Njësia Administrative Gjergjan

Njësia Administrative Gjergjan ndodhet në pjesën qendrore të qarkut Elbasan dhe shtrihet në një zonë kodrinore–fushore, e pasur me histori, natyrë dhe tradita të lashta. Territori i saj përfshin disa fshatra me vlera arkeologjike, burime natyrore dhe trashëgimi të veçantë etnografike, duke e bërë një zonë me potencial të lartë zhvillimi rural dhe turistik.

Zona karakterizohet nga kodra të buta dhe fusha pjellore, ndërsa ndër pikat më të njohura dallon Kodra e Zekthit në fshatin Bujaras, që ofron pamje panoramike dhe lidhet me gojëdhëna të vjetra vendore.

Gjergjani ruan një trashëgimi të pasur historiko–kulturore, ku spikasin rrënojat shekullore të kishave në Thane, Keshtjellas dhe Bujaras, elementë të rrugës së vjetër Egnatia si “Muri i urës së gurit” në Muriqan, teqeja e familjes “Kisha” në Shtepanjë, si dhe dy xhami historike në Gjergjan dhe Muriqan, që dëshmojnë bashkëjetesën fetare në zonë.

Njësia njihet gjithashtu për traditat e forta të artizanatit dhe veshjeve popullore, të punuara me tezgjah nga gratë e zonës, të cilat vijojnë të ruajnë e përcjellin motive dhe punime tradicionale. Gjergjani ka edhe një identitet të dallueshëm kulinar, ku gatimet tradicionale mbeten pjesë e pandarë e jetës së përditshme dhe festave lokale.

Falë kombinimit të vlerave historike, kulturore, natyrore dhe traditave vendore, Njësia Administrative Gjergjan përfaqëson një pjesë të rëndësishme të mozaikut rural të Bashkisë Elbasan.