Skip to content Skip to left sidebar Skip to right sidebar Skip to footer

Aktualitet

Rilindja e Babait të Gjuhës Shqipe në qendër të Elbasanit!

Një kënd i ri pushimi i është shtuar zemrës së qytetit, duke i ofruar një ambient dinjitoz e të gjelbëruar banorëve të Lagjes nr.1.  Kreu i Bashkisë Z.Gledian Llatja, këtë investim e ka cilësuar si një kënd të ri rekreativ e të gjelbër që po i shtohet jo vetëm banorëve të Lagjes nr.1, por edhe gjithë qytetarëve të Elbasanit. Ky investim në qendër të qytetit, ka marrë një pamje bashkëhore jo vetëm nga vizitorët e shumtë, por edhe për vetë qytetarët elbasanas. Një figurë historike për Elbasanin dhe Shqipërinë, i njohur si “Babai i Gjuhës Shqipe” Kostandin Kristoforidhi meritonte dhe një vend të veçantë në zemër të qytetit.  Prandaj dhe vëmendja jonë për rehabilitimin e lulishtes që mban emrin e tij ka qenë e shtuar për ta shndërruar atë në një kënd dinjitoz rekreativ pushimi për banorët e Elbasanit. Investimi përfshin veshjen me mermer të bazamentit të bustit të Babait të Gjuhës Shqipe “Kostandin Kristoforidhit”, por edhe rikonstruksionin e lulishtes përreth bustit, si edhe ndriçimin.  

Mblidhet Këshilli Vendor për Sigurinë Publike!

Kryetari i Bashkisë Z. Gledian Llatja, ka thërritur mbledhjen e Këshillit Vendor për Sigurinë Publike, e fundit për këtë vit. Edhe në këtë takim të rradhës janë diskutuar disa prej pikave më të rëndësishme të  zbatuara gjatë vitit 2021, ku pjesa më e madhe e synimeve të vendosura u arrit. Këshilli Vendor për Sigurinë Publike, është  një shembull i qartë i përpjekjes dhe kontributit të autoriteteve dhe aktorëve lokalë në funksion të identifikimit, të kuptuarit dhe parandalimit të faktorëve dhe sjelljeve që mund të ndikojnë negativisht në cilësinë e jetës së njerëzve dhe komuniteteve. Ne jemi të bindur se nismat e suksesshme për rritjen e sigurisë, e për pasojë të cilësisë së jetesës, janë të rrënjosura në një qasje gjithëpërfshirëse të institucioneve, shoqërisë civile, familjes, të rinjve, edukatorëve dhe udhëheqësve fetarë dhe të komunitetit. Në këtë prag fundviti ne ndajmë një sërë arritjesh të rëndësishme.

• Përzgjedhjen e strukturave komunitare – tashmë çdo lagje në territorin e Bashkisë Elbasan ka ndërlidhësa komunitar të cilët do të mundësojnë identifikimin dhe adresimin e problematikave që shqetësojnë komunitetin e tyre.

• Strehimin social – Bashkia Elbasan ka ofruar bonus social për rreth 179 gra kryefamiljare, persona me aftësi ndryshe, persona të komunitetev rom egjyptian dhe familje me një prind.

• Menaxhimin e rasteve të dhunës në familje në Strehëzën e Emergjencës.

Llatja/ Të shkëpusim të rinjtë nga veset dhe ti afrojmë tek sporti

Pas Buxhetimit me Pjesëmarrje, ku janë vetë qytetarët ata që paraqesin problemet dhe prioritetet e tyre, Bashkia tashmë ka shtrirë këtë model edhe në fushën e sportit. Kryetari i Bashkisë së Elbasanit Z. Gledian Llatja, ka zhvilluar një takim me sportistë, trajnerë dhe stafin e sportit, me qëllim për të përcaktuar prioritet dhe investimet  e realizuara gjatë këtij viti në fushën e sportit. Takimi  është kryer në ambjentet e pallatit të sportit “ Tomorr Sinani” ku Drejtori i Sporteve Artin Kovaci ka bërë edhe një përmledhje të investimeve të kryera gjatë këtij viti, një ndër më kryesoret është përmirësimi i ambjenteve sportive që ndikojnë në rezultatet sportive. Nga ana e tij Kryetari i Bashkisë Z. Gledian Llatja vlerësoi sportistët elbasanas për rezultatet e tyre të larta ndërsa shtoi se Elbasani është një qytet që e do sportin, i do rezultatet dhe arritjet që i kemi bërë ne të gjithë bashkë dhe detyrimisht kur e do i gjithë qyteti ne e kemi për detyrë të bëjmë punë të mira. Është hera e parë që ne po bëjmë një aktivitet kaq masiv të dëgjesës publike të Buxhetimit me Pjesëmarrje përsa i përket fokusit të sportit dhe rëndësisë që ne duhet ti japim buxhetit 2022, çështjes së sporteve, madje ne e kemi pasur këtë fokus të veçantë edhe falë mbështetjes së anëtarëve të Këshillit Bashkiak edhe komisioneve të sporteve. Ndërsa i kemi dhënë një vëmendje të veçantë gjatë kësaj periudhe si për investimet por edhe për trajtimet e çështjeve të ndryshme që kanë lidhje me sported, tha Llatja. Duke ngritur vlerat e sportistëve, kreu i Bashkisë shtoi se “ kemi arritur rezultate shumë të mira, kemi skuadra shumë të mira, tashmë kemi krijuar edhe ekipin e futbollit, sportin e radioamatorizmit ku morëm rezultate shumë të mira po ashtu edhe në Kampionatin Botëror. Duhet të shkëpusim të rinjtë nga veset dhe ti afrojmë në sporte. Duhet të përpiqemi që të japim mbështetjen maksimale, si nga ana financiare ashtu edhe infrastrukturore, siç janë rehabilitim i terreneve sportive edhe në Njësitë Administrative në Gjinar, Kuqan, Bradashesh. Sporti ka ardhur në rritje dhe gjithashtu do të ketë një rritje edhe për buxhetin e vitit 2022 dhe do përpiqemi që të krijojmë balancë në të gjitha fushat, si sporti, arti etj. Jam i bindur se bashkarisht do ecim përpara për të mirën e qytetit, për ta ngritur emrin tonë aty ku e kemi dhe aty ku na takon në të gjitha sportet. Mbështetjen time dhe të bashkisë së Elbasanit e keni dhe e keni patur gjithmonë. Kuptohet që mundësitë janë të kufizuara dhe problematikat dhe nevojat janë të mëdhaja. Po mbajtja e një balance është ajo që ne po përpiqemi të kemi si në qytet ashtu edhe nëpër fshatra në të gjitha fushat, si në infrastrukturë, në fushat sociale dhe ajo sportive, si në terrene sportive, pjesës kulturore e artistike”, tha Llatja. Më pas vetë sportistët, trajnerët, kanë parashtruar prioritetet e tyre të cilat konsistojnë në investime si në terrene sportive, palestra shkolle etj. Infrastruktura sportive ka ndryshuar, janë rregulluar shumë gjëra dhe më mirë do bëhet pasi Elbasani ka kualitete.

Kryetari i bashkise Z Llatja, pret homologun e tij te Ulqinit!

Kryetari i Bashkisë Z. Gledian Llatja, ka pritur në një vizitë kryetarin e Bashkisë së Ulqinit të Malit të Zi  Aleksandar Dobovic. Mes dy homologëve është diskutuar rreth prioriteteve dhe perspektiva me qëllim shkëmbimin e eksperiencave mes dy qyteteve. Nga ana e tij Z. Llatja e ka njohur kreun e bashkisë së Ulqinit rreth resurseve të shumta që ofron Bashkia që ai drejton si nga ana ekonomike, por edhe kulturore dhe historike. Pas takimit kreu i Bashkisë Gledian Llatja vlerësoi bashkëpunimin mes dy bashkive sikundër shtoi se”  shumë i lumtur për vizitën e kryetarit të Bashkisë së Ulqinit në Malin e Zi, mikut Aleksandar Dabovic.Marrëdhëniet shumë të mira mes vendeve tona duhet t’i çojmë në një tjetër nivel, atë të bashkëpunimit më të ngushtë mes Bashkisë së Elbasanit dhe Ulqinit në projekte konkrete për qytetarët tanë”.

Bashkia Elbasan në terren për të përballuar çdo situatë emergjente.

Shirat e rënë me intensitet të lartë  në Elbasan, kanë shkaktuar probleme të konsiderueshme edhe në toka bujqësore.  Përroi i Gurrës në Shushicë si shkak i reshjeve të shumta filloi të dalë nga shtrati duke rrezikuar të mbjellat e banorëve të zonës. Ekipet tona të emergjencave civile dhe punëve publike janë në gatishmëri të plotë duke ndjekur në terren situatën e cila për momentin është normalizuar dhe çdo aks urban e rural është i kalueshëm. Rezervuari i fshatit Mlizë që i shërben banorëve të zonës për vaditje nga reshjet e dendura të ditëve të fundit filloi të dalë nga shtrati. Falë angazhimit në kohë të ekipit të punëve publike arritëm që të shmangim një emergjencë për fshatin dhe banorët e tij. Bashkia e Elbasanit gjatë stinës së verës dhe pranverës ka ndërhyrë në këtë zonë ndërsa do të jetë në gadishmëri për përrenjtë malorë si edhe për menaxhimin e rezervuareve gjatë të gjithë kohës. Një apel shkon për të gjithë banorët e Bashkisë Elbasan që në momentin më të parë që vërejnë një problematikë të sinjalizojnë përfaqësuses të pushtetit lokal në zonën e tyre.

 

112 vjet Normale, histori krenarie për Elbasanin!

Gati 112 vjet më parë, kur Shqipëria ende nuk kishte fituar Pavarësinë, në kryeqendrën e Shqipërisë së Mesme në Elbasan, u çel shkolla e mesme kombëtare ‘Normale’, e para e këtij lloji në gjuhën shqipe që përgatiste mësues për edukimin e brezave të ardhshëm. Hapja e shkollës ‘Normale’ u vendos nga Kongresi i Elbasanit, i mbajtur në gusht të vitit 1909 dhe në 1 dhjetor të po atij viti ajo çeli dyert për mbi 100 nxënës nga gjithë trevat shqiptare. Pedagogët shqiptarë të angazhuar në këtë shkollë ditën të shfrytëzonin arritjet intelektuale të sferës së arsimit, pedagogjisë, psikologjisë dhe të shkencave të tjera të zbatuara. Përmendim këtu Luigj Gurakuqi, drejtorin e parë të Normales, emrin e të cilit mban sot pasardhësja e saj, (Shkolla e Mesme Pedagogjike në Elbasan), Aleksandër Xhuvani, Simon Shuteriqi, Petër Dodbiba, Dhmitër Paparisto, Hysen Blloshmi, etj. ‘Normalja’  pati jehonë brenda dhe jashtë vendit. Shtypi i kohës e cilësonte shkollë e lartë. Dhe në të vërtetë ‘Normalja’ mbetet institucioni i parë për shumë dekada që përgatiti mësues në mbarë hapësirën shqiptare, me ndikim të gjerë në shtresat e popullsisë. Shkolla ‘Normale’, e njohur si rrezatimi i dritës së diturisë shqiptare, nisi të funksionojë në ndërtesën e Servet Bej Zylfit, në Elbasan dhe që në hapat e para u dallua për misionin historik kombëtar dhe arsimor. Në datën 1 dhjetor të vitit 1909 në bankat e shkollës u ulën 111 nxënës dhe pas 2  muajsh ky numër arriti në 140 nxënës, 70 prej të cilëve ishin nga Kosova, dërguar nga Hasan Prishtina. Aty mësohej matematikë, numëratore, gjeometri, algjebër, trigonometri, astronomi, mekanikë, fizikë, kimi, histori natyrore, anatomi, fiziologji, zoologji, botanikë, gjeologji, mineralogji, gjuhë shqipe, shkronjtore, sintaksë, literaturë, retorikë, poetikë, turqisht, frëngjisht, anglisht, greqisht, etj. Viti i parë mësimor u mbyll me sukses në vitin 1910 dhe nxënësit iu nënshtruan një sërë provimesh si në gjuhën shqipe, turqisht, matematikë, fizikë e kimi.  Ndër nxënësit e parë të shkollës ishin Emin Matraxhiu, Abedin Çaushi etj. Fill pas përfundimit të vitit të parë, ‘Normalja’ u mbyll, si pasojë e agresionit të Shevqet Turgut Pashës. Përpjekjet e patriotëve shqiptarë do ta rihapnin sërish këtë shkollë në shkurt të vitit 1912, në mjediset e shtëpisë së Qemal Karaosmanit. Shkolla kishte tre klasë dhe rreth 80 nxënës me një personel prej katër vetësh. Viti shkollor u mbyll aty nën drejtimin e drejtorit Aleksandër Xhuvani. Më pas shkolla u mbyll sërish për shkak të periudhës së luftës dhe u rihap në 22 nëntor të vitit 1918 Në përvjetorin e 30-të të Pavarësisë Kombëtare, në vitin 1942, ‘Normalja’ mori emrin ‘Luigj Gurakuqi’. Aktualisht ajo quhet shkolla e mesme Pedagogjike dhe ndodhet në të njëjtën godinë ku ‘Normalja’ u çel gati 112 vjet më parë. Dialekti i Elbasanit, flitet sot në shumë treva, pikërisht nga kjo shkollë. Tashmë data e krijimit të ‘Normales’ së parë të Elbasanit përkujtohet çdo vit, dhe ajo ndodhet në cdo cep të Elbasanit.

25 Nëntor 1912- Pavarësia e Qytetit të Elbasanit!

Sot u përkujtua një nga ngjarjet më të rëndësishme të historisë së qytetit tonë, Shpalljen e Pavarësisë.

Më 25 nëntor 1912, Elbasani shpalli i pari Pavarësinë kombëtare, duke vënë kështu gurin e parë në themelet e kësaj pavarësie.

109  vjet më parë, 35 patriotë nga Elbasani por edhe rrethet e tjera të tij,  shpallën pavarësinë e këtij qyteti në Shqipërinë e Mesme, duke ngritur të parët flamurin e Pavarësisë dhe duke i paraprirë pavarësisë së vendit në 28 Nëntor.

Vështirësitë për të arritur deri në shpalljen e Pavarësisë së  Shqipërisë ishin të shumta, pasi fati i kombit shqiptar ka kaluar nëpër disa orbita dramatike. Kryengritjet e njëpasnjëshme të shqiptarëve në vitet 1910-1911 ishin preludi i ngjarjes madhore që do të vinte më pas.

Ushtria serbe po përparonte me shpejtësi në tokat shqiptare. Ajo po i afrohej Elbasanit, çka i vuri rrethet patriotike të qytetit përballë detyrës urgjente të Shpalljes së Pavarësisë me qëllim që autoritetet ushtarake serbe të viheshin para një fakti të kryer.

Edhe  Aqif Pashë Elbasani, si një nga bashkëpunëtorët më të ngushtë të Ismail Qemalit, ndihmoi për kryengritjen e përgjithshme antiosmane në vitin 1912, si dhe në organizmin e çetës së Elbasanit.

Ai bashkë me popullin e Elbasanit dhe me mbështetjen e Ismail Qemalit ngritën flamurin kombëtar më 25 nëntor të vitit 1912, dhe shpallën të parët pavarësinë duke i treguar ushtrisë serbe që po i afrohej Elbasanit, se kishte shkelur në vise të Shqipërisë së Pavarur.

Shpallja e Pavarësisë ishte nder për Elbasanin, por edhe e drejtë legjitime për vendin, që zuri dhe rolin që luajti ky qytet në shpalljen e Pavarësisë kombëtare.

Mirënjohje për të gjithë patriotët firmëtarë të pavarësisë.

Buxhetimi me Pjesëmarrje/ Dy projekte të mëdha do ta kthejnë Gjinarin në “Xhevahirin malor të Shqipërisë së Mesme”.

Praktika e suksesshme e Bashkisë së Elbasanit, Buxhetimi me Pjesëmarrje, është ndalur në Njësitë  Administrative Gjinar – Zavalinë.  

Kryetari i Bashkisë Z. Gledian Llatja në këtë tur dëgjesash dhe konsultimesh me banorët dhe grupet e interesit për buxhetin 2022 pohoi, “kemi bërë një punë të madhe në vitet që po lëmë pas në zonën e Shpatit.  

Ndërmarrja jonë e punëve publike ka ndërhyrë në mirëmbajtjen e infrastrukturës rurale, investime në ujësjellës, dhe kemi patur investime periodike në linjën e rrjetit shpërndarës të rrymës elektrike.  

Në këtë takim Z. Llatja ka prezantuar para banorëve edhe dy projekte të mëdha që sipas tij do ta kthejnë Gjinarin në identitetin e tij turistik, në xhevahirin malor të Shqipërisë së Mesme.  

E njohur si pika turistike më e vizitueshme pas viteve 90 nga turistët e huaj, me ajrin e pastër , pishat dhe Malin e Bukanikut, Bashkia e Elbasanit ka në projekt dy investime të mëdha,  sheshin  kryesor të Gjinarit, me një investim të mirëfilltë, si edhe “ Fusha e Kuqe”, ku investimet do të zbatohen gjatë vitit 2022. Gjithashtu, bashkë me organizatat të cilat merren me turizmin malor, kemi ecur  me projektin e hapjeve të shtigjeve për turistët këmbësor dhe është bërë gati vendosja e sinjalistikës. Sipër në Bukanik do të vendosim një qendër të vogël për ti ardhur në ndihmë turistëve për të bërë ecje.        

Edhe pse është investuar shumë gjatë këtij viti në infrastrukturën që të çon tek  objektet e Kultit,  pasi Gjinari tashmë njihet edhe si zona e shumë Kishave. Kreu i bashkisë Z. Llatja premtoi se edhe me miratimin e Ministrisë së Kulturës do të bëhet e mundur  ristrukturimi i strukturave të kishave të Shelcanit dhe Valshit.  

Më shumë kushte higjieno – sanitare për shkollat në qytet!

Sfida Botërore e UJIT – bëri bashkë nxënësit e shkollave “Vasil Kamami” dhe ”Jeronim De Rada” në një aktivitet ndërgjegjësues mbi rëndësinë e kushteve të higjienës në kushtet e pandemisë Covid-19.    

 Të pranishëm në këtë aktivitet kanë qenë, përfaqësues të GIZ Albania, kryetari i bashkisë Z. Gledian Llatja, nxënësit dhe stafi pedagogjik i dy  shkollave 9-vjeçare.  

Falë mbështetjes së partnerit tonë të GIZ Albania po bëjmë të mundur përmirësimin e kushteve higjeno-sanitare për 700 fëmijët e këtyre shkollave.

Investimi në përmirësimin e kushteve higjeno-sanitare për shkollat “Vasil Kamami” dhe “Jeronim De Rada” është një domosdoshmëri në periudhën post-Covid që po kalojmë, pasi parandalon sëmundjet infektive.  

Për Buxhetimin me Pjesëmarrje në Shushicë!

Vijojmë dëgjesat e konsultimet me banorët dhe grupet e interesit për buxhetin e vitit 2022

Zv.kryetari i Bashkisë Elbasan Z. Adi Qose, ka folur me transparencë të plotë për punët e mira të bëra nga bashkia gjatë këtij viti, duke e vënë theksin se gjatë vitit 2022 do të bëhen akoma edhe më shumë punë për Njësinë Administrative Shushicë, dhe jo vetëm.

Asfaltim i  rrugës në Kishën e Shelcanit, asfaltimi i rrugës së varrezave, ndërtimi i shkollës së re në Mlizë, ndërtimi i  urës së Polisit, si dhe ngritja e  Qendrën Komunitare Multifunksionale janë disa nga investimet e kryera në Shushicë dhe fshatrat përreth gjatë këtij viti.