Lajme

Kryetari i Bashkisë së Elbasanit, Gledian Llatja, ka pritur në zyrën e tij përfaqësues të Departamentit Amerikan të Thesarit – Office of Technical Assistance (OTA), me të cilët ka diskutuar mbi mundësitë e reja të financimit për projektet prioritare të Bashkisë së Elbasanit.

Në fokus të takimit ka qenë modernizimi i ndriçimit publik dhe zgjerimi i përdorimit të energjisë diellore, përmes instalimit të paneleve fotovoltaike në godina dhe hapësira të administruara nga bashkia.

Gjatë takimit, kryebashkiaku Gledian Llatja ka prezantuar investimet e ndërmarra deri tani në fushën e energjisë së pastër, ndërsa ka theksuar rezultatet konkrete të instalimit të paneleve diellore në godinat arsimore të qytetit.

Synimi është që ky model të shtrihet edhe në godina dhe hapësira të tjera publike, duke modernizuar ndriçimin publik, rritur përdorimin e energjisë së rinovueshme dhe ulur kostot e energjisë.

Bashkëpunimi me përfaqësuesit e Departamentit Amerikan të Thesarit pritet të krijojë mundësi të reja për identifikimin e mekanizmave të financimit dhe mbështetjes teknike për projektet e gjelbra dhe të qëndrueshme të qytetit.

Ministrja e Arsimit dhe Sportit, Mirela Kumbaro, së bashku me kryetarin e Bashkisë Elbasan, Gledian Llatja, dhe drejtoreshën e ZVA Elbasan, Vesa Llanaj Lico, vizituan gjimnazin, ku u njohën nga afër me investimet dhe risitë e sjella në këtë institucion arsimor.

Vizita nisi në palestrën e rikonstruktuar të shkollës dhe vijoi në bibliotekën dixhitale, ku nxënësit kanë mundësi të aksesojnë online libra përmes website-it të “Dhaskal Todrit”. Një tjetër hapësirë e veçantë është Muzeu i Shkollës, ku përmes fotografive, dokumenteve dhe materialeve të ndryshme përcillet historia e institucionit ndër breza, aktivitetet e zhvilluara ndër vite dhe kujtimet e nxënësve e mësuesve.

Gjatë vizitës u panë gjithashtu ambientet sportive të jashtme, ndërsa në klasën dixhitale ministrja Kumbaro zhvilloi një bashkëbisedim me nxënësit për mënyrën se si teknologjia po integrohet në procesin mësimor.

Në fokus ishte edhe bashkëpunimi mes shkollës, mësuesve dhe prindërve, si një element i rëndësishëm për mbarëvajtjen e procesit edukativ dhe krijimin e një mjedisi sa më të përshtatshëm për nxënësit.

Me 607 nxënës, gjimnazi “Dhaskal Todri” ofron tashmë klasa të reja, laboratorë të shkencave, bibliotekë, muze dhe ambiente sportive, duke krijuar më shumë mundësi për zhvillimin e njohurive, prirjeve dhe talenteve të të rinjve.

Shkolla është gjithashtu pjesë e programit “Pas Shkolle” dhe synon të jetë e hapur edhe për komunitetin përtej orarit mësimor, përmes aktiviteteve sportive, kulturore dhe edukative për nxënësit dhe familjet.

Pas përfundimit të punimeve për nënstacionin elektrik dhe linjën e interkonjeksionit, Bashkia Elbasan ka përfunduar rehabilitimin e segmentit rrugor që lidh nënstacionin me fshatin Kryezjarr. Rruga, me një gjatësi prej rreth 800 metrash, ishte një nga kërkesat e banorëve të zonës dhe pjesë e angazhimeve të marra nga Bashkia.

Kryetari i Bashkisë Elbasan, Gledian Llatja, së bashku me deputeten Evis Kushi, inspektuan nga afër punimet në këtë segment, duke theksuar se investimi vjen në vijim të përfundimit të Unazës së Kryezjarrit, një tjetër ndërhyrje e kërkuar prej kohësh nga banorët.

“Para disa muajsh përfunduam Unazën e fshatit Kryezjarr, me një gjatësi prej 1100 metrash, një kërkesë e banorëve. Tashmë jemi duke kryer një tjetër investim në fshatin Kryezjarr, për lidhjen me nënstacionin elektrik të Operatorit të Sistemit të Transmetimit, një nga linjat kryesore të lidhjes me Maqedoninë e Veriut dhe Greqinë, e cila është ndërtuar në fshatin Kryezjarr. Tashmë po vazhdojmë me investimin tjetër, për lidhjen e fshatit Kryezjarr me fshatin Mjekës”, u shpreh Llatja.

Kryebashkiaku nënvizoi se ndërhyrjet në këtë zonë nuk ndalen me këtë segment rrugor. Sipas tij, në vijim pritet të nisin edhe investime të tjera që do të përmirësojnë lidhjen mes fshatrave dhe zonave të njësive administrative Shirgjan dhe Tregan.

“Ne po përgatitemi që shumë shpejt të nisim një tjetër investim, i cili lidh Mjekësin me Tudanin dhe Kryezjarrin me Tudanin, duke ndërvepruar me të gjithë pjesën e sipërme të kodrave të njësive administrative Shirgjan dhe Tregan. Investime të tjera do të bëhen gati gjatë këtij viti në shumë fshatra të Bashkisë Elbasan”, tha Llatja.

Nga ana e saj, deputetja Evis Kushi vlerësoi rëndësinë që këto investime kanë për komunitetin, veçanërisht për banorët e zonës së Kryezjarrit.

“Veçanërisht kjo rrugë, por edhe Unaza e Kryezjarrit, ka ndryshuar jetën e banorëve, por është edhe një kontribut i rëndësishëm ekonomik për jetën e qytetarëve”, u shpreh Kushi.

Rehabilitimi i këtij segmenti plotëson kështu një tjetër hallkë të rëndësishme të infrastrukturës rrugore në Kryezjarr, ndërsa investimet e planifikuara synojnë të përmirësojnë më tej lidhjen e fshatrave të zonës me njëri-tjetrin dhe me pjesën tjetër të territorit të Bashkisë Elbasan.

Bashkia Elbasan, në bashkëpunim me GIZ Albania, në kuadër të thirrjes CliMobility City Lab Elbasan, zhvilloi sesionin informues, gjatë të cilit u prezantua programi, procesi i aplikimit, kriteret e pjesëmarrjes dhe fazat kryesore të tij. Ky program inovativ synon të nxisë zhvillimin e zgjidhjeve të reja dhe kreative për sfidat e mobilitetit urban dhe përshtatjes ndaj ndryshimeve klimatike në qytetin e Elbasanit, përmes pilotimit të ndërhyrjeve të qëndrueshme dhe rezistente në fushën e mobilitetit. Si i vetmi qytet shqiptar pjesëmarrës në iniciativën e BE-së “100 Qytete Neutrale ndaj Klimës dhe të Zgjuara deri në vitin 2030” (“Cities Mission”), Elbasani është angazhuar për arritjen e neutralitetit klimatik deri në vitin 2030. Ky program mbështet drejtpërdrejt këtë ambicie.

Programi fton të rinj, profesionistë, studentë, ekipe multidisiplinare dhe aktorë të tjerë të interesuar, të cilët do të kenë mundësinë të zhvillojnë ide dhe zgjidhje inovative që kontribuojnë në krijimin e një qyteti më të aksesueshëm, të qëndrueshëm, gjithëpërfshirës dhe rezistent ndaj ndryshimeve klimatike.

Në kuadër të hapjes së Thirrjes për Aplikime, ju ftojmë të aplikoni sipas linkut https://albict.al/climobility-city-lab-elbasan/

Afati i aplikimit është i hapur deri në datën 10 tetor 2026

Bashkia Elbasan është përzgjedhur si bashki pilot për përdorimin e Inteligjencës Artificiale (AI) në funksion të rritjes së transparencës, llogaridhënies dhe aksesit të qytetarëve në informacionin mbi performancën dhe shërbimet bashkiake.

Në këtë kuadër, sot u zhvillua një takim prezantues mbi mundësitë konkrete që ofron Inteligjenca Artificiale për përmirësimin e komunikimit të Bashkisë me qytetarët dhe grupet e interesit.

Bashkia Elbasan prej disa vitesh harton dhe publikon Raportin Vjetor të Performancës, bazuar në tregues të përcaktuar të performancës. Raporti për vitin 2025 është publikuar në faqen zyrtare të Bashkisë dhe është i aksesueshëm për të gjithë qytetarët.

Përmes këtij pilotimi synohet që informacioni publik të bëhet edhe më i lehtë për t’u konsultuar, përmes krijimit të një dritareje interaktive në faqen zyrtare të Bashkisë Elbasan. Qytetarët do të mund të drejtojnë pyetje mbi rezultatet e performancës, shërbimet bashkiake dhe çështje të tjera me interes publik, duke marrë përgjigje të menjëhershme.

Zgjidhja pritet të vihet në funksion brenda muajit shtator 2026, në kuadër të bashkëpunimit me projektin “Bashki të Forta”, në bashkëpunim me Smart Process.

“Bashki të Forta” mbështetet nga Agjencia Zvicerane për Zhvillim dhe Bashkëpunim (SDC) dhe Agjencia Suedeze për Bashkëpunim Ndërkombëtar për Zhvillim (Sida) dhe zbatohet nga Helvetas.

Elbasani ka marrë zyrtarisht titullin “Qyteti Europian i Sportit 2027” (European City of Sport 2027), një vlerësim prestigjioz i akorduar nga ACES Europe – World Capitals and Cities of Sport Federation.

Titulli përfaqëson një vlerësim për punën e bërë ndër vite në zhvillimin e sportit në qytet, përmirësimin e infrastrukturës sportive, mbështetjen e sportistëve dhe trajnerëve, si dhe krijimin e mundësive më të mëdha për përfshirjen e qytetarëve në aktivitetet sportive.

Drejtori i Përgjithshëm i Klubit Shumësportësh Elbasani, Artin Kovaçi, ka shprehur mirënjohjen për Kryetarin e Bashkisë Elbasan, Gledian Llatja, për mbështetjen dhe angazhimin e vazhdueshëm në fuqizimin e sportit në qytet. Falënderime janë adresuar gjithashtu për Presidentin e Komitetit Olimpik Kombëtar Shqiptar, Fidel Ylli, zv.Ministrin e Kulturës dhe Sporteve, Endri Hoxha, si dhe për stafin e Klubit Shumësportësh Elbasani, për kontributin në arritjen e këtij objektivi.

Në vlerësimin e ACES Europe kanë ndikuar politika sportive e qytetit, infrastruktura, programet sportive dhe gama e gjerë e aktiviteteve të zhvilluara në Elbasan.

Titulli “European City of Sport 2027” e vendos Elbasanin në familjen europiane të qyteteve të sportit dhe njëkohësisht sjell një përgjegjësi të re për të vijuar investimet, promovimin e sportit dhe mbështetjen e sportistëve të rinj.

Elbasani tashmë mban zyrtarisht titullin Qyteti Europian i Sportit 2027.