Lajme

Pas më shumë se 30 vitesh pa asnjë ndërhyrje, tre rrugë të rëndësishme në Rajonin Nr. 2 të Elbasanit “Dhimitër Bega”, “Hasan Bajraktari” dhe “Fetah Cankja”,  janë asfaltuar dhe sistemuar plotësisht. Këto rrugë, dikur të amortizuara dhe të pakalueshme, tashmë ofrojnë siguri dhe akses më të mirë për mbi 60 familje që jetojnë në zonë.

“Pas dekadash pa investime, këto rrugë janë rikthyer në shërbim të banorëve. Asfaltimi dhe sistemimi i tyre janë një hap konkret për një infrastrukturë urbane dinjitoze,”  tha Kryetari i Bashkisë Gledian Llatja, gjatë inspektimit të punimeve së bashku me deputeten e zgjedhur në 11 maj, Aulona Bylykbashi.

 Deputetja Bylykbashi pohoi se “kur nisi rikonstruksioni i rrugës ‘Hasan Bajraktari’, banorët ishin mosbesues, pasi për dekada nuk ishte bërë asgjë. Sot, me përfundimin e punimeve, jo vetëm që përmirësohet cilësia e jetesës, por rritet edhe vlera e pronave. Rrugët janë funksionale, të kalueshme dhe të sigurta.”

Llatja theksoi gjithashtu se “projektet e asfaltimit nuk mund të nisnin pa përfunduar më parë rrjetin e ujësjellësit. Sot, jo vetëm që kemi shtruar rrugët, por kemi lidhur lagjen ‘Çlirimi’ me ‘Shën Koll’, duke krijuar edhe një rrugë të rëndësishme shkarkuese për zonën e tregut.”

Banorët shprehën mirënjohjen e tyre për këtë investim, duke theksuar se për herë të parë pas dekadash, një premtim u mbajt realisht. “Shumë na e kishin premtuar, por asgjë nuk ishte bërë. Sot më në fund kemi rrugë të shtruara dhe ndriçim,”  shprehen ata.

 Bashkia Elbasan mbetet e angazhuar për të vazhduar me ritme të larta investimet në infrastrukturë, duke e bërë qytetin më të jetueshëm për të gjithë.

Kryetari i Bashkisë Elbasan, Gledian Llatja, së bashku me deputeten e Partisë Socialiste zgjedhur në 11maj Aulona Bylykbashi, inspektuan sot përfundimin e punimeve në rrugën “Todi Dhamo”, një nga zonat më problematike dhe tërësisht informale të qytetit, e ndërtuar pas viteve ’90.

Zona, e njohur për mungesën e infrastrukturës, ndodhet pranë pularisë së Elbasanit në rajonin nr. 2. Deri më tani, ishte ndërhyrë në kanalizimet e ujërave të zeza, ndërsa tashmë ka përfunduar edhe shtresimi i asfaltit duke i dhënë një tjetër pamje të gjithë bllokut të banimit.

Kryetari i Bashkisë, Gledian Llatja, theksoi se ky investim ishte një kërkesë e hershme e banorëve të zonës, pasi përfshin rreth 250 banesa dhe përmirëson ndjeshëm cilësinë e jetesës. “Pas përfundimit të kësaj rruge, do të vijojmë me ndërrimin e të gjithë linjave të ndriçimit në lagjet periferike, për t’i unifikuar dhe për të reduktuar konsumin e energjisë. Po ashtu, synojmë të rivitalizojmë të gjitha zonat e qytetit dhe periferisë”, u shpreh Llatja.

Deputetja Aulona Bylykbashi vlerësoi përpjekjet e Bashkisë Elbasan për të strukturuar infrastrukturën në të gjitha lagjet, duke theksuar se tashmë edhe kjo lagje ka përfituar nga investimet publike. “Infrastruktura rrugore dhe kanalizimet janë jetike për përmirësimin e cilësisë së jetesës, por edhe për të ndihmuar në zhvillimin ekonomik të zonave rurale përmes lehtësimit të transportit, tregtisë dhe bujqësisë”, tha ajo.

“Jemi përpjekur të jemi korrektë duke investuar njësoj si në fshat, ashtu edhe në qytet”, përfundoi Llatja, duke siguruar se bashkia do të vazhdojë punën për të modernizuar të gjithë territorin e saj.

Këto investime janë pjesë e angazhimeve të ndërmarra nga Kryetari i Bashkisë, të ardhura si rezultat i kërkesave të banorëve dhe të buxhetimit me pjesëmarrje, duke treguar një model të qeverisjes vendore të afërt me qytetarin.

Në këtë ditë të shenjtë të Kurban Bajramit, kryetari i Bashkisë Elbasan, Gledian Llatja, së bashku me deputetët e qarkut, zhvilluan vizita në Komunitetin Mysliman dhe në Teqenë e Madhe të Elbasanit, duke uruar të gjithë besimtarët myslimanë për festën.

Në frymën e tolerancës dhe harmonisë fetare, që është një vlerë e trashëguar brez pas brezi në qytetin e Elbasanit, kryetari Llatja shprehu urimet për paqe, mirësi dhe begati në çdo familje.

Pjesë e këtyre vizitave ishte edhe një ndalesë e veçantë në familjen e Ferit Musta, një familje e njohur për kontributin e saj në komunitet.

“Gëzuar Bajramin! Paqe, mirësi dhe begati në çdo shtëpi!”,  u shpreh Llatja, duke theksuar rëndësinë e bashkëjetesës dhe respektit mes komuniteteve.

Ky aktivitet është një shembull i përkushtimit të institucioneve lokale për të ruajtur dhe forcuar harmoninë fetare, si një pasuri e vyer e qytetit të Elbasanit.

Në kuadër të 5 Qershorit – Ditës Botërore të Mjedisit, në të gjitha kopshtet e Bashkisë Elbasan u organizuan aktivitete edukative dhe argëtuese për të rritur ndërgjegjësimin mbi rëndësinë e mbrojtjes së natyrës dhe planetit tonë.

Nën moton “Bota është më e bukur kur kujdesemi për të!”, fëmijët me duart e tyre të vogla dhe zemrat plot dashuri për natyrën mbollën bimë, ricikluan materiale dhe mësuan mënyra praktike për të mbrojtur mjedisin.

Këto aktivitete edukative synojnë të nxisin te fëmijët dashurinë dhe respektin për mjedisin që na rrethon, si dhe përgjegjësinë për të kontribuar çdo ditë në ruajtjen e një planeti të pastër e të shëndetshëm.

 Bashkia Elbasan mbështet me përkushtim çdo nismë që promovon edukimin mjedisor dhe kujdesin për natyrën, duke e bërë qytetin tonë një vend më të mirë për të gjithë.

Në fshatin Shijon të Elbasanit, sot u zhvillua pelegrinazhi tradicional për nder të Shën Joan Vladimirit, ku morën pjesë qindra besimtarë nga Shqipëria dhe vendet fqinje të Ballkanit. Manastiri i Shën Joan Vladimirit është kthyer në një qendër të rëndësishme fetare dhe kulturore, duke mirëpritur gjithnjë e më shumë besimtarë vit pas viti.

Kryetari i Bashkisë Elbasan, Gledian Llatja, së bashku me deputetët e Partisë Socialiste, ishin të pranishëm në këtë aktivitet të rëndësishëm fetar dhe kulturor.

Kryetari Llatja u shpreh se kjo festë është një simbol i harmonisë dhe bashkëjetesës ndërfetare.
“Çdo vit, Shën Joan Vladimiri na bashkon të gjithëve. Këto aktivitete dhe lidhjet historike që kanë pasur popujt tanë me figurat e krishtërimit na bashkojnë dhe forcojnë miqësinë mes vendeve të Ballkanit,” tha ai.

Deputetja Aulona Bylykbashi përcolli një urim të përzemërt për të gjithë besimtarët, duke theksuar rëndësinë e kësaj feste për forcimin e harmonisë dhe bashkëpunimit:
“Uroj të gjithë besimtarëve një festë të bekuar dhe sa më shumë harmoni mes njerëzve. Kjo ngjarje na bashkon dhe na kujton vlerat më të larta shpirtërore,” u shpreh ajo.

Festa e Shën Joan Vladimirit, që përkujton martirizimin e shenjtorit në shekullin XI, bashkon besimtarë nga Maqedonia e Veriut, Mali i Zi, Bosnja dhe Serbia, duke e kthyer Manastirin e Shën Joan Vladimirit në një qendër të rëndësishme pelegrinazhi dhe respekti ndërfetare. Numri i besimtarëve që marrin pjesë në këtë pelegrinazh është rritur nga viti në vit, duke e bërë këtë festë gjithnjë e më të madhe dhe më të dashur për të gjithë.

Kjo traditë, që daton që nga vitet 1010–1020, i ka mbijetuar kohës, duke u ruajtur me përkushtim nga banorët e fshatit Shijon dhe duke i bërë ata krenarë për trashëgiminë që mbajnë.

Vijojnë me ritme të larta punimet për transformimin e plotë të shkollës “Fadil Gurmani” në Elbasan, ku çdo detaj po merr formë për t’i ofruar nxënësve kushte bashkëkohore për të mësuar dhe ëndërruar më shumë.

Kryetari i Bashkisë Elbasan, Gledian Llatja, e ka konsideruar këtë projekt si një nga prioritetet e sistemit arsimor në qytet, duke synuar të krijojë një mjedis modern dhe të sigurt për mbi 350 nxënës që do të rikthehen në bankat e shkollës në shtator.

Punimet përfshijnë transformimin e plotë të godinës ekzistuese, rinovimin e sistemit të ngrohjes dhe të ujësjellësit, si dhe krijimin e hapësirave të reja për zhvillimin e aktiviteteve edukative dhe kulturore. “Fadil Gurmani” do të jetë një model për shkollat e tjera të qytetit, duke reflektuar vizionin e një arsimi cilësor dhe infrastrukturë moderne.

Ky projekt është dëshmi e përkushtimit të Bashkise për të vendosur arsimin në qendër të zhvillimit të komunitetit, duke garantuar që çdo nxënës të ketë mundësi të zhvillojë potencialin e tij në kushte dinjitoze dhe të sigurta.

Sot, në stadiumin “Elbasan Arena”, u zhvillua një aktivitet madhështor me pjesëmarrjen e qindra fëmijëve të kopshteve të qytetit të Elbasanit, të cilët festuan Ditën Ndërkombëtare të Fëmijëve. Aktiviteti u organizua nën kujdesin e Kryetarit të Bashkisë së Elbasanit, z. Gledian Llatja.

Fëmijët, të mbushur me energji e buzëqeshje, interpretuan këngë të ndryshme, kërcime dhe valle tradicionale, duke sjellë atmosferë të gjallë dhe festive në stadium. Gjithashtu, u organizuan edhe aktivitete sportive të larmishme si gara me biçikleta, me skuter, si dhe lojëra të ndryshme argëtuese, të cilat i dhuruan fëmijëve momente të paharrueshme.

Në këtë festë mori pjesë edhe vetë Kryetari i Bashkisë, z. Gledian Llatja, i cili përshëndeti fëmijët dhe edukatoret për punën e tyre të palodhur, duke uruar të vegjlit për Ditën e 1 Qershorit. Ai e cilësoi këtë festë si një “1 Qershor plot ngjyra, buzëqeshje dhe gëzim për më të vegjlit tanë”.

Ky aktivitet tregoi edhe një herë përkushtimin e institucioneve vendore për të sjellë më shumë gëzim dhe aktivitete argëtuese për fëmijët e Elbasanit.

Në Bruksel u zhvillua takimi i parë i Komitetit Konsultativ të Përbashkët CoR–Shqipëri, një hap i rëndësishëm për forcimin e dialogut mes institucioneve vendore të Shqipërisë dhe Bashkimit Europian.

Në këtë takim, drejtues vendorë nga të dyja palët u bashkuan për të shkëmbyer përvoja, për të ndërtuar ura bashkëpunimi dhe për të mbështetur më tej rrugën europiane të Shqipërisë. Gledian Llatja, kryetari i bashkisë, ishte pjesë aktive e këtij procesi, duke theksuar rëndësinë e qeverisjes vendore në integrimin europian.

“Qeverisja vendore luan një rol kyç në procesin e integrimit dhe në përmbushjen e standardeve europiane në terren — sot treguam se jemi të gatshëm ta çojmë këtë partneritet në një nivel më të lartë,” tha Llatja.

Ky takim shënon një fillim të ri për bashkëpunimin mes Shqipërisë dhe Bashkimit Europian, duke forcuar dialogun dhe duke hapur mundësi të reja për zhvillimin lokal dhe implementimin e projekteve që përmirësojnë jetën e qytetarëve.

Kryetari i Bashkisë Elbasan, Gledian Llatja, i shoqëruar nga deputeti i sapozgjedhur në datën 11 maj, Adi Qose, kanë inspektuar nga afër punimet që kanë nisur për asfaltimin e rrugës në lagjen e Ballinjve, pjesë e fshatit Labinot, në njësinë administrative Labinot Fushë.

Menjëherë pas zgjedhjeve, Bashkia Elbasan ka nisur me intensitet ndërhyrjet për sistemimin dhe përmirësimin e infrastrukturës, me qëllim rritjen e cilësisë së jetesës për të gjithë banorët. Rruga që po ndërtohet ka një gjatësi prej 465 metrash linearë dhe është pjesë e një plani më të gjerë investimesh si në qytet, ashtu edhe në zonat rurale.

“Ky investim ishte i domosdoshëm për shkak të kushteve të vështira të terrenit dhe problemeve të vazhdueshme të shkaktuara nga përroi i Gurrës, i cili shpesh, në periudha reshjesh të mëdha, ka dëmtuar tokat bujqësore dhe ka paraqitur rrezik për banorët,” tha kryetari Llatja. Ai shtoi se ndërhyrja ka nisur me pastrimin e përroit dhe po vijon me asfaltimin, një projekt i diskutuar më parë me banorët gjatë procesit të buxhetimit me pjesëmarrje.

Gjatë inspektimit, deputeti Adi Qose falënderoi kryetarin Llatja për angazhimin dhe realizimin e këtij investimi, duke theksuar se ishte një kërkesë e hershme e komunitetit lokal. “Kjo rrugë është tejet e rëndësishme pasi e lidh zonën me rrugën nacionale dhe përmirëson ndjeshëm jetën e banorëve. Është një premtim i mbajtur dhe një ogur i mirë që punët po nisin nga Labinoti Fushë,” tha Qose.

Bashkia Elbasan ka ndërmarrë ndërhyrje të shumta në fshatin Labinot Fushë, veçanërisht në përmirësimin e shtresave asfaltike të rrugëve të lagjeve, si pjesë e një plani gjithëpërfshirës zhvillimi.

“Zgjedhjet përfunduan, tani jemi të gjithë të mobilizuar për të punuar dhe për të qenë në shërbim të qytetarëve,” përfundoi Llatja.

Kryetari i Bashkisë Elbasan, z. Gledian Llatja, priti në një vizitë zyrtare Ambasadorin e Azerbajxhanit në Shqipëri, Sh.T.Z. Anar Huseynov. Gjatë vizitës, kryebashkiaku shoqëroi Ambasadorin në ambientet e Bibliotekës “Qemal Baholli”, një nga institucionet më të rëndësishme kulturore të Elbasanit.

Me këtë rast, Ambasadori dhuroi disa tituj në gjuhën shqipe mbi kulturën, historinë dhe ekonominë e Azerbajxhanit, duke pasuruar më tej fondin e bibliotekës dhe duke thelluar bashkëpunimin kulturor mes dy vendeve.

Biblioteka e qytetit të Elbasanit mbart një trashëgimi të pasur kulturore, përfshirë fondin e albanologjisë të studiuesit të njohur Lef Nosi, si dhe një arkiv të gjerë materialesh të dixhitalizuara që pasqyrojnë historinë dhe zhvillimin kulturor të vendit.

Kjo vizitë shënoi një moment domethënës në rritjen e ndërsjellë të lidhjeve kulturore dhe nxitjen e dialogut mes dy popujve miq.