Lajme

Kryetari  i bashkisë z. Gledian Llatja pati kënaqësinë të presë Ambasadorin e Shtetit të Katarit, Sh.T. z. Jabor Ali H.A. Al-Dossari, në një takim të frytshëm dhe plot optimizëm për të ardhmen. Gjatë këtij takimi u diskutua gjerësisht për mundësitë e zgjerimit të bashkëpunimit strategjik në disa fusha kyçe, duke përfshirë ekonominë, turizmin, dhe shkëmbimet kulturore.

Bashkëpunimi në fushën e ekonomisë ishte një nga pikat kryesore të bisedës, me fokusin për të gjetur mënyra konkrete për të rritur investimet dhe zhvillimin e përbashkët në qytetin e Elbasanit. Turizmi, një tjetër sektor me potencial të madh, u vlerësua si një fushë me rëndësi të veçantë për të dy vendet, duke ofruar mundësi për promovimin e kulturave dhe traditave unike të Shqipërisë dhe Katarit.

Një tjetër aspekt i rëndësishëm ishte shkëmbimi kulturor, ku u theksua rëndësia e forcimit të lidhjeve midis dy popujve nëpërmjet artit, muzikës dhe trashëgimisë kulturore. Ambasadori Al-Dossari shprehu gatishmërinë e Katarit për të mbështetur iniciativa që forcojnë marrëdhëniet miqësore midis vendeve tona.

Bashkia e Elbasanit është mirënjohëse për mbështetjen e vazhdueshme të Shtetit të Katarit dhe është e angazhuar që idetë e diskutuara të kthehen në projekte konkrete.

Më 8 tetor, në Elbasan do të fillojë procesi i buxhetimit me pjesëmarrje, një praktikë e vendosur prej vitesh në qytetin tonë. Ky proces synon të përfshijë drejtpërdrejt qytetarët në vendimmarrjen për zgjidhjen e problematikave të komunitetit.

Në këtë takim, të organizuar nën drejtimin e Kryetarit të Bashkisë, Gledian Llatja, qytetarët do të kenë mundësinë të paraqesin shqetësimet dhe prioritetet e tyre, duke u bërë pjesë aktive e përcaktimit të nevojave që do të reflektohen në buxhetin e ardhshëm të qytetit. Çështjet që prekin infrastrukturën, arsimin, shërbimet publike dhe çdo aspekt tjetër të jetës qytetare do të jenë në qendër të diskutimeve.

Procesi i buxhetimit me pjesëmarrje ka për qëllim të forcojë transparencën dhe përgjegjshmërinë, duke i dhënë qytetarëve një rol kyç në zhvillimin e komunitetit të tyre. Ftojmë të gjithë qytetarët të marrin pjesë dhe të japin kontributin e tyre për të ndërtuar një Elbasan më të mirë dhe më të zhvilluar.

Për tri ditë, orkestra dhe ansamble nga qytete të ndryshme të Shqipërisë interpretuan muzikë lirike dhe operistike nga autorët më të njohur, duke ofruar një përvojë të jashtëzakonshme për publikun elbasanas.

Nga viti në vit, ky festival ka njohur rritje të vazhdueshme, dhe edicioni i këtij viti solli disa risi të rëndësishme. Përveç repertorit të pasur, për herë të parë u dhanë çmime me vlerë të caktuar monetare, duke i dhënë një dimension të ri këtij eventi tradicional që tashmë ka tetë edicione të mëparshme.

Mbështetur nga Ministria e Kulturës dhe Bashkia Elbasan, ky festival është bërë një traditë e pritur me shumë entuziazëm, dhe pritshmëritë për suksesin e tij u plotësuan. Performanca e orkestrës pritëse të Elbasanit në mbylljen e natës së parë u vlerësua si një nga momentet më të paharrueshme të festivalit.

Kryetari i Bashkisë së Elbasanit, Gledian Llatja, vizitoi sot fshatrat Thanë dhe Murriqan për të parë nga afër ecurinë e punimeve për pastrimin e kanaleve kulluese dhe vaditëse. Gjatë inspektimit, kryetari vlerësoi progresin e bërë në këtë projekt të rëndësishëm për zonën, që synon përmirësimin e vaditjes dhe kullimit të tokave bujqësore, si dhe mbrojtjen nga përmbytjet.

“Është prioritet i yni që, sapo të përfundojmë me vaditjen, të nisë puna me kanalet kulluese. Periudhat e shirave duhet të na gjejnë gati, sepse dëmi është i madh nëse i lëmë pas dore këto kanale. Ky është një shembull i mirë ku Ndërmarrja e Punëve Publike Rurale është përqendruar në pastrimin e kanaleve kulluese. Një kanal vaditës pa një kanal kullues nuk e plotëson gjithë sistemin e vaditjes apo menaxhimin e tokës,” theksoi Llatja.

Ai shtoi se “kemi pasur një sezon të mirë bujqësor, ku kanalet vaditëse kanë qenë efikase, duke nisur nga Labinoti dhe duke përfunduar në zonat fushore të Paprit dhe Fushën e Elbasanit. Ndërmarrja e Punëve Publike ka vazhduar mirëmbajtjen e tyre dhe tani është momenti për t’i intensifikuar punimet pas sezonit të verës. Më gëzon fakti që sa herë kaloj, shoh që ndërmarrja është e gatshme dhe efikase në punët e kryera.”

Nga 250 hektarë tokë bujqësore, janë pastruar tashmë 20 km kanale vaditëse dhe ka përfunduar puna në Kanalin Kullues 33, duke siguruar një kullim më të mirë për 64 hektarë tokë. Gjithashtu, kanalet vaditëse të veshura me beton janë pastruar nga punonjësit sezonalë, duke garantuar që fermerët të kenë furnizim të pandërprerë me ujë gjatë sezonit të mbjelljeve dhe korrjeve.

Ky është një investim i nevojshëm që do t’i japë një nxitje të re zhvillimit të bujqësisë në këtë zonë, duke garantuar kontrollin e përmbytjeve dhe vaditje të qëndrueshme për fermerët. Pastrimi i kanaleve dhe përmirësimi i infrastrukturës së ujitjes janë ndër prioritetet e Bashkisë për të siguruar që prodhimi bujqësor të vazhdojë të rritet dhe që toka bujqësore të shfrytëzohet në mënyrë sa më efikase.

Funari, një nga perlat e fshehura të Shqipërisë, po shndërrohet gjithnjë e më shumë në një destinacion të preferuar për të gjithë ata që kërkojnë të kombinojnë shëndetin me natyrën. Me peizazhet e tij të jashtëzakonshme, liqenet e kristalta dhe shtigjet ideale për hiking, kjo zonë ofron një përvojë të veçantë për ata që duan të largohen nga ritmi i zhurmshëm i jetës së përditshme dhe të përfshihen në aktivitete fizike e mendore relaksuese. Fundjava të kaluara në Funar me muzikë, lundrim, ecje në natyrë dhe ajër të pastër janë receta e përsosur për të fituar energji pozitive dhe për të rigjeneruar shpirtin.

Gjatë këtij fundjave, kreu i Bashkisë Elbasan, Gledian Llatja, së bashku me Ministrin e Shtetit për Pushtetin Vendor, Arbjan Mazniku, kaluan një ditë të paharrueshme në Funar, duke përjetuar nga afër bukuritë natyrore dhe qetësinë që kjo zonë ofron. Krahas pjesëmarrjes në aktivitete turistike dhe eksplorimin e peizazheve mahnitëse, ata inspektuan gjithashtu punimet e pastrimit të kanaleve kulluese, ku aktualisht po pastrohet një kanal prej 4.2 km, i cili do të shërbejë për ujitjen e mbi 60 hektarë tokë bujqësore. Ky projekt është thelbësor për zhvillimin e mëtejshëm të bujqësisë dhe blegtorisë në zonë, duke rritur edhe më shumë potencialin e Funarit si një qendër për zhvillimin e qëndrueshëm.

Banorët lokalë, të njohur për mikpritjen e tyre të ngrohtë, ofrojnë produkte bio dhe artizanale, të cilat turistët kanë mundësinë t’i shijojnë gjatë qëndrimit të tyre. Funari, më shumë sesa një destinacion turistik, përfaqëson një mënyrë jetese ku natyra dhe shëndeti janë në harmoni të plotë.

Kryetari i Bashkisë Elbasan, z. Gledian Llatja, priti në një vizitë të veçantë Ministrin e Shtetit për Pushtetin Vendor, z. Arbjan Mazniku, si dhe drejtuesit e Fondit Shqiptaro-Amerikan për Zhvillim (AADF), z. Martin Mata dhe z. Aleksandër Sarapuli. Kjo vizitë u zhvillua në lagjen historike të Kalasë së Elbasanit, ku rrugicat e ngushta dhe banesat shekullore treguan edhe një herë bukurinë dhe rëndësinë e kësaj pasurie kulturore.

Gjatë kësaj vizite, u diskutuan mundësitë për projekte të reja që synojnë ruajtjen dhe zhvillimin e trashëgimisë kulturore të qytetit, duke e shndërruar Kalanë në një destinacion tërheqës turistik. Bashkëpunimet e reja mes pushtetit lokal dhe partnerëve ndërkombëtarë synojnë të promovojnë vlerat kulturore dhe historike të zonës, duke ndikuar pozitivisht në zhvillimin ekonomik dhe turistik të Elbasanit.

Në prani të Kryetarit të Bashkisë së Elbasanit dhe Drejtorit të Përgjithshëm të Burgjeve, u lidh sot një marrëveshje bashkëpunimi midis Bibliotekës së Elbasanit ” Qemal Baholli” dhe Bibliotekës së Institucionit të Paraburgimit. Kjo marrëveshje synon krijimin e një biblioteke ambulante, e cila do t’u mundësojë të paraburgosurve akses të lehtë dhe të vazhdueshëm në libra dhe literaturë.

Kryetari i Bashkisë, gjatë fjalës së tij, vlerësoi këtë bashkëpunim duke theksuar rëndësinë e rehabilitimit dhe edukimit.

“Institucioni i Ekzekutimit të Vendimeve Penale ka pasur gjithmonë një bashkëpunim të mirë me Bashkinë e Elbasanit. Falënderoj drejtorin dhe stafin për përkushtimin e tyre në rehabilitimin dhe përmirësimin e kushteve për personat që vuajnë dënimin. Kjo është hera e parë që ne krijojmë një bibliotekë të lëvizshme brenda territorit tonë. Ne kemi pasuruar bibliotekat e shkollave tona dhe bibliotekat e tjera të qytetit, përfshirë bibliotekën e rinisë, dhe tashmë edhe atë të paraburgimit në Elbasan. Falënderoj të gjithë për bashkëpunimin në këtë iniciativë që u vjen në ndihmë këtyre personave, duke u ofruar mundësinë të kalojnë kohën brenda institucionit sa më afër librave dhe botimeve më të

Nga ana tjetër, Drejtori i Përgjithshëm i Burgjeve falënderoi për këtë nismë duke e cilësuar si një risi për institucionin dhe një kontribut të rëndësishëm në procesin e rehabilitimit.

“Kjo nismë është një risi, pasi është hera e parë që kemi një bibliotekë ambulante në një institucion të paraburgimit në vend. Për personat e paraburgosur, kjo është një pjesë e procesit të rehabilitimit dhe integrimit në shoqëri, pasi këta individë nuk konsiderohen fajtorë deri sa të marrin një vendim gjyqësor. Shoqëria jonë duhet të jetë e para që t’i mbështesë ata, jo vetëm me libra, por në të gjitha format më të mira për rehabilitimin e tyre. Libri ofron dije dhe përmes tij, këta individë do të jenë më pranë familjeve, shoqërisë dhe vazhdimit të jetës.”

Në përfundim të takimit, të dy palët shprehën dëshirën e tyre që ky bashkëpunim të shtrihet edhe në institucione të tjera, duke shërbyer si një shembull për të gjitha bashkitë në vend.

Festa e Bushekut, e kthyer tashmë në një traditë të përvitshme nga Bashkia e Elbasanit, solli sot një ditë të mbushur me aktivitete të larmishme. Nën kujdesin e kryetarit të bashkisë, z. Gledian Llatja, kjo festë mblodhi së bashku banorë të zonës, të rinj e të vjetër, si dhe shumë vizitorë të apasionuar pas këtij vendi të bukur dhe historik.

Në këtë festë, pjesëmarrësit shijuan një panair të veçantë, ku prodhimet tradicionale të zonës, punimet artizanale dhe veshjet karakteristike të Shushicës shkëlqyen. Gratë dhe vajzat e zonës u dalluan për mjeshtërinë e tyre në përgatitjen e aksesorëve të punuar me dorë, duke sjellë gjallëri dhe ngjyra në atmosferën e festës.

Kryetari i Bashkisë Elbasan, z. Gledian Llatja, vlerësoi rëndësinë e kësaj feste, duke theksuar se ” Busheku nuk është vetëm i Shushicës, është i Elbasanit, është i të gjithëve sepse tradicionalisht, gjatë gjithë ekzistencës së tij, ka qenë i pandashëm nga Elbasani. Në fakt, kjo festë është ndër më të bukurat e Njësisë Administrative Shushicë dhe ne do të vazhdojmë t’i pasurojmë këto festa në të ardhmen dhe ta pasurojmë këtë trashëgimi. Ndaj, një falenderim për të gjithë miqtë e ardhur në këtë festë, si edhe turistët, fëmijët dhe të rinjtë që i japin jetë kësaj tradite”.

Deputetja e zonës, znj. Desantila Tahiraj, vuri në dukje bukurinë e natyrës përreth, të pasur me rrapet shekullore dhe burimet ujore që karakterizojnë këtë zonë turistike. Ajo theksoi gjithashtu rëndësinë e rrugës antike Via Egnatia, që kalon pikërisht në këtë rajon.

Ndërsa deputetja Evis Kushi u përqendrua te virtytet e larta dhe mikpritja e banorëve, duke thënë se “Detyra jonë është ta ruajmë dhe ta promovojmë këtë zonë si një pikë turistike për Elbasanin dhe mbarë vendin.”

Deputeti Florenc Spaho përmendi me krenari bukurinë natyrore të Bushekut, duke e krahasuar atë me “një Lugano të vogël”, dhe e quajti këtë vend një dhuratë të vërtetë nga Zoti për banorët e Elbasanit.

Atmosfera e ngrohtë, ndërthurja e traditës me natyrën dhe aktivitetet festive, e kanë kthyer Festën e Bushekut në një ngjarje të rëndësishme për komunitetin dhe vizitorët.

Sot, nën moton “Bashkë për një ambient më të pastër dhe të gjelbër”, Agjencia e Kulturës dhe Turizmit, Agjencia e Pyjeve, Bujqësisë dhe Mjedisit, dhe Këshilli Rinor, organizuan një aksion pastrimi në zonën e Byshekut, një nga destinacionet turistike më të rëndësishme të Elbasanit. Ky aksion synon të rrisë ndërgjegjësimin për mbajtjen e ambientit të pastër dhe ruajtjen e bukurive natyrore të zonës.

Drejtori i Agjencisë së Kulturës dhe Turizmit, Artur Guni, theksoi rëndësinë e përfshirjes së komunitetit, sidomos të rinisë, në aktivitete të tilla, duke vënë në pah se një ambient i pastër ndikon drejtpërdrejt në cilësinë e jetës dhe promovimin e turizmit lokal. “Një akt i vogël, si mbledhja e mbeturinave, mund të bëjë një ndryshim të madh për komunitetin dhe mjedisin tonë. Është detyrë e të gjithëve që të kujdesemi për pasurinë natyrore që na rrethon, dhe Bysheku është një nga thesaret tona,” u shpreh Guni.

Pjesëmarrësit, përfshirë të rinjtë e Këshillit Rinor, treguan angazhimin dhe përgjegjësinë e tyre qytetare, duke kontribuar në këtë nismë të rëndësishme. Përmes këtij aksioni, ata dërguan një mesazh të qartë për të gjithë qytetarët: mbrojtja e mjedisit është një përgjegjësi që na takon të gjithëve.

Kjo nismë është vetëm fillimi i një sërë aktivitetesh që do ndërmerren nga Bashkia e Elbasanit dhe partnerët e saj, me qëllim promovimin e kulturës së pastërtisë dhe ruajtjen e zonave turistike.

Bashkë për një të ardhme më të pastër dhe më të qëndrueshme!

Kryeministri Edi Rama ka deklaruar nga Elbasani se arsimi profesional është instrumenti i garancisë që fëmijët e shqiptarëve të mos mbeten pa punë.

I shoqëruar nga ministri i Ekonomisë, Kulturës dhe Inovacionit, Blendi Gonxhja ministri i Shtetit për Pushtetin Vendor, Arbjan Mazniku, dhe kryetari i bashkisë Gledian Llatja, Rama ka vizituar Shkollën Profesionale të qytetit të Elbasanit ku aktualisht studiojnë 1400 nxënës dhe ku është shprehur se po thyhet mentaliteti që shqiptarët kanë pasur kryesisht ndaj arsimit profesional.

Kryeministri Rama vlerësoi se këto shifra optimiste flasin për thyerjen e mentalitetit se arsimi profesional është i kategorisë së dytë.

“Lajmi i mirë është se po thyhet mentaliteti se arsimi profesional është kategori e ulët. Arsimi profesional është garanci absolute për të pasur një instrument në dorë që të mos ngelet pa punë. Po ashtu kush bën arsim profesional nuk e ka të mbyllur derën e universitetit, por ndryshe nga ata që mbarojnë arsimin e përgjithshëm ka edhe një zanat që edhe e përdor për të punuar gjatë universitetit apo pas universitetit për të bërë sipërmarrjen e vetë”, shtoi Rama.

Sipas kryeministrit, është një ndryshim i madh edhe për faktin se sipërmarrjet tani nuk kanë ku shkojnë pa punonjës të kualifikuar, ndaj duhet ta kuptojnë se duhet paguar puna ashtu si e meriton.

“Tani pagat janë rritur dhe nevoja për punonjës të kualifikuar është bërë alarmante. Të gjithë ata që synojnë në arsim profesional e kanë të garantuar se do të gjejnë punë”, shtoi Rama.

Kryeministri theksoi se ndikim ka edhe faktori i rritjes ekonomike.

“Ekonomia rritet dhe rritet nevoja për punonjës të kualifikuar sidomos në fushën e teknologjisë. Me aftësi në teknologji ti punësohesh jashtë shtetit pa lëvizur nga shtëpia dhe merr paga që janë shumë të larta në varësi të asaj që ti ofron. Janë 17-18 vjeç që i kanë pagat sa gjithë familja bashkë”, tha Rama.

Kryeministri Rama theksoi se “kur pranojnë të bashkëpunojnë me sipërmarrës në shkelje të ligjit dhe të deklarohet një pagë më e ulët dhe një pjesë tjetër të merret nën dorë për të mos paguar sigurimet shoqërore, faktikisht i japin sipërmarrësit mundësinë që padrejtësisht të marri nga pensioni i gjyshes dhe i gjyshes”.

“Sigurimet shoqërore që secili e paguan për pensionin e vetë, aktualisht shkojnë në arkën e sigurimeve shoqërore dhe paguhen pensionet. Në këtë pikë duhet të kemi shumë më tepër vetëdije dhe të vendosim barrikadën që ‘pagën e dua të plotë, të pastër me sigurimet shoqërore dhe shëndetësore sepse pastaj është e kotë të kërkohet rritja e pensioneve. Kjo ndodh kur të gjithë bashkë kontribuojmë për sigurimet shoqërore”, shtoi Rama.

Shkolla profesionale e Elbasanit ka një larmi programesh studimi që i përgjigjen nevojave të tregut të punës; si TIK, Hoteleri-Turizëm, Ekonomi Biznes, Termohidraulike, Tekstil Konfeksione, Shërbime Mjete Transporti, Mekanikë, Elektroteknikë etj. Ajo po zbaton dhe Sistemin Dual, ku aktualisht janë rreth 300 biznese që ofrojnë praktikë mësimore për të gjithë nxënësit.