Ditë: 29 Shtator 2025

Në Ditën e Trashëgimisë Kulturore, me tematikë “Trashëgimia dhe arkitektura: dritaret drejt të kaluarës, portat drejt së ardhmes”, nxënësit e gjimnazit “Kostandin Kristoforidhi” zhvilluan vizita pranë disa prej ndërtesave më karakteristike në qendër të qytetit të Elbasanit, duke u njohur nga afër me vlerat arkitekturore dhe historike që mbart qyteti. Këto aktivitete organizohen nga Bashkia Elbasan, nën kujdesin e veçantë të kryetarit Gledian Llatja, i cili i ka kushtuar gjithmonë rëndësi të madhe ruajtjes dhe promovimit të trashëgimisë kulturore të qytetit.

Elbasani është një qytet që flet vetë për historinë dhe trashëgiminë e tij. Bazilika e Kodër Tepes, Bazilika Paleokristiane, Muzeu Etnografik, Kalaja e Elbasanit, Stacioni antik “Ad Quintum”, Hamami brenda Kalasë, të gjitha këto monumente dëshmojnë rrënjët e thella të qytetarisë shqiptare.

Një vend të veçantë zë edhe zona e Shpatit, ku ruhen ikonat e piktorit të madh Onufri në Kishën e Shelcanit, duke e bërë këtë krahinë një thesar shpirtëror e kulturor për mbarë kombin.

Trashëgimia e Elbasanit nuk përfaqësohet vetëm nga monumentet e mëdha, por edhe nga rrugicat e ngushta brenda Kalasë, ku historia bashkëjeton me përditshmërinë, si dhe nga kishat e xhamitë që ndodhen aty, duke i dhënë qytetit një mozaik të pasur kulturor e arkitekturor. Të gjitha këto elemente e bëjnë Elbasanin një qytet ku e shkuara dhe e ardhmja ndërthuren natyrshëm në çdo gur e çdo rrugicë.

Me nisjen e sezonit kurativ në Llixha të Elbasanit, të njohura si banjat termale kurative më të mira në vend, Bashkia ka intensifikuar masat për pastrimin dhe mirëmbajtjen e objekteve dhe hapësirave publike në këtë zonë.

Gjatë vitit, Llixhat vizitohen nga mijëra turistë dhe pacientë, të cilët nuk vijnë vetëm për trajtimet kurative, por edhe për të shijuar zonën dhe natyrën që e rrethojnë, duke e bërë atë një destinacion tërheqës për pushime dhe shërim.

Aksioni i pastrimit përfshin pastrimin e hapësirave publike,  objekteve, largimin e mbeturinave dhe krijimin e hapësirave të lira, duke garantuar një përvojë të këndshme dhe të sigurt për vizitorët.

Bashkia e Elbasanit vendos theks të veçantë edhe në mbrojtjen dhe kujdesin për konsumatorët, duke siguruar që të gjitha objektet dhe shërbimet në zonë të jenë të rregulluara dhe të ofrojnë standarde të larta higjienike dhe shëndetësore. Operatorët dhe bizneset e zonës janë të angazhuar të respektojnë këto standarde për të garantuar kënaqësinë dhe sigurinë e vizitorëve.

Në prag të sezonit kurativ, zhvillimi i bizneseve dhe i hoteleve familjare ka bërë që Llixha të ketë një rritje të vazhdueshme të numrit të pacientëve dhe vizitorëve. Ky trend ka tërhequr jo vetëm kurues nga Kosova dhe Maqedonia, por edhe nga vende të tjera si Italia, Gjermania, Franca dhe më gjerë, të cilët kanë njohur përfitimet e Llixhave të Elbasanit përmes mediave online.

Bashkia apelon tek operatorët dhe qytetarët për bashkëpunim, duke u siguruar që Llixha të mbetet një destinacion i pastër, i rregullt dhe me reputacion të lartë gjatë gjithë sezonit kurativ. Përveç vlerës kurative, Llixhat janë një zonë shumë e bukur natyrore dhe turistike, e cila ofron për vizitorët jo vetëm shërim, por edhe mundësi për relaksim dhe shijim të peizazheve të jashtëzakonshme që e rrethojnë.