Funari nën petkun e bardhë të dimrit
Debora ka zbardhur Funarin, duke e shndërruar këtë zonë perle të Bashkisë Elbasan në një kartolinë dimërore. Male, pyje dhe liqene të rrethuar nga bora krijojnë një panoramë magjepsëse, ku natyra shfaqet në formën e saj më të bukur dhe më të qetë.
Edhe pse temperaturat kanë rënë dhe reshjet e dëborës kanë qenë të dendura, rrugët drejt Funarit janë të hapura dhe të kalueshme. Qarkullimi i mjeteve bëhet me zinxhirë dhe goma dimërore, ndërsa autoritetet lokale kanë qenë në terren për të garantuar sigurinë e udhëtarëve dhe mirëmbajtjen e akseve rrugore.
Më të lumturit nga kjo tablo dimërore janë qytetarët, e mbi të gjitha fëmijët, të cilët shijojnë borën me lojëra, topa dëbore dhe buzëqeshje pa fund. Familje të shumta kanë zgjedhur Funarin për të kaluar fundjavën, larg zhurmës së qytetit, pranë natyrës dhe ajrit të pastër.
Funari vijon të jetë një nga destinacionet më të frekuentuara turistike të qarkut të Elbasanit, edhe në ditët e ftohta të dimrit. Investimet e kryera ndër vite nga Bashkia Elbasan në infrastrukturë, shërbime dhe promovimin e zonës kanë dhënë rezultatet e tyre, duke e bërë këtë destinacion të aksesueshëm dhe të preferuar për vizitorët.
Pavarësisht kushteve të vështira atmosferike, turistë nga qytete të ndryshme kanë mbërritur për të parë nga afër Funarin e mbuluar nga dëbora, liqenet e ngrira pjesërisht dhe qetësinë që vetëm dimri di të sjellë. Zona ofron një eksperiencë unike, ku bukuria natyrore dhe investimet publike ndërthuren në mënyrë harmonike.
Funari, edhe nën dëborë, mbetet një thesar i Elbasanit, një destinacion që fton vizitorët ta zbulojnë në çdo stinë, duke ofruar pamje që lënë gjurmë.
