Ditë: 2 Prill 2026

Në kuadër të Ditës Botërore të Ndërgjegjësimit për Autizmin, në kopshtet e qytetit të Elbasanit u zhvilluan aktivitete të ndryshme ndërgjegjësuese dhe edukative, me fokus promovimin e mirëkuptimit, pranimit dhe gjithëpërfshirjes së fëmijëve me autizëm.

Këto iniciativa synojnë të krijojnë një mjedis sa më mbështetës dhe gjithëpërfshirës në institucionet parashkollore, duke nxitur që në moshë të hershme vlera si empatia, durimi dhe solidariteti.

Bashkia e Elbasanit mbetet e angazhuar në promovimin e politikave dhe aktiviteteve që vendosin në qendër fëmijët dhe mirëqenien e tyre, duke kontribuar në ndërtimin e një komuniteti më të ndjeshëm dhe të barabartë për të gjithë.

Punimet për parkun rekreativ “Dua të luaj” në Elbasan janë drejt përfundimit, duke sjellë shumë shpejt një hapësirë të re moderne në shërbim të komunitetit.
Ky investim, i shtrirë në një sipërfaqe prej rreth 22 mijë m², përfshin fusha sportive, kënde lojërash për fëmijë dhe ambiente të gjelbra rekreative për familjet dhe të moshuarit.

Me mbështetjen e Fondit Shqiptar të Zhvillimit, ky projekt synon të krijojë një park funksional dhe gjithëpërfshirës, duke promovuar një stil jetese aktive për të gjitha grupmoshat.

Bashkia Elbasan vijon punën për transformimin e hapësirave publike, duke rritur gjelbërimin dhe cilësinë e jetës për qytetarët.