Aktualitet

Të gjitha kanalet vaditëse të cilat janë në territorin e Bashkisë së Elbasanit, thuajse kanë përfunduar proçesin e pastrimit.

Ditën e sotme, Kryetari i Bashkisë Z. Gledian Llatja, ka parë nga afër punimet e kryera nga punonjësit e ASHP – së, për pastrimin e kanalit vaditës në Gurakuq të Njësive Administrative Shushicë dhe Labinot Fushë.

Sipas kryebashkiakut, ” kanali vaditës i vjen në ndihmë më shumë se 80 hektarë tokë bujqësore të fermerëve të këtyre njësive. Këtë vit pastrimi  i kanaleve vaditëse në Bashkinë e Elbasanit nisi më herët, për shkak të rritjes së menjëherëshme të temperaturave. Për këtë arsye, ne u angazhuam që në një kohë rekord të pastrojmë kanalet vaditëse, me qëllim që fermerët tanë të mos kenë probleme me vaditjen e tokave bujqësore”.

Sakaq kryebashkiaku, i bën apel të gjithë banorëve të zonave ku edhe ndodhen kanalet vaditëse, që të mos hedhin inerte dhe mbeturina, pasi sipas tij, ky veprim shkakton vetëm problem për ta.

” Është e vërtetë që Bashkia Elbasan është në çdo kohë funksionale, por kjo nuk do të thotë që qytetarë të papërgjegjshëm të abuzojnë duke dëmtuar pronën e përbashkët”, tha Llatja.

 Nisja më herët e pastrimit të kanaleve vaditëse në të gjithë territorin e Bashkise Elbasan, ka ardhur edhe si pasojë e kërkesave të vetë fermerëve.

 Kreu i Bashkisë shton se ” i  kemi përshpejtuar ritmet duke punuar pa orar me qëllim që t’i ofrojmë fermerëve shërbimin e duhur për të arritur sa më shumë prodhim të stinës”.Banorët falenderojnë bashkinë e Elbasanit për pastrimin e kanalit vaditës në kohën e duhur.

Kodra e Krastës, zona e pyllëzuar e cila ndodhet 1.5 km në lindje të qytetit të Elbasanit, do ti rikthehet totalisht qytetarëve.

Bashkia e Elbasanit sistematikisht ka kryer aksione të shumta për lirimin e hapësirave publike në Kodër Krastë, si edhe në mbjelljen e shumë pishave në këtë zonë të pyllëzuar e cila quhet edhe “mushkëria” e qytetit.

Ditën e sotme, kryebashkiaku Z. Gledian Llatja me punonjës të IMT-së, ka qenë i pranishëm në aksion, ku fadromat po prishin të gjitha objektet pa leje në Kodër Krastë.

” Jemi rikthyer sërisht në Krastë në një aksion, për lirimin e të gjitha hapësirave publike, të zëna në mënyrë të paligjshme nga persona të papërgjegjshëm, të cilët e kanë konsideruar në vazhdimësi Krastën si zonë private. Zona e Krastës konsiderohet si “mushkëria e qytetit” përveç mbjelljeve të vazhdueshme që kemi bërë, kemi nisur edhe me lirimin e hapësirave publike”, tha Z Llatja.

Sipas tij, ” nuk do të ketë asnjë tolerim për këdo që ka zaptuar me parcela në mënyrë të paligjshme në zonën e Krastës. Fondi pyjor është i qytetarëve të Elbasanit.

Ditën e sotme janë prishur dy godina të ngritura në këtë zonë, të cilat shërbenin si stane, të ndërtuara në mënyrë të paligjshme të cilët jo vetëm prishin imazhin e Krastës, por edhe dëmtojnë ambjentin rreth e qark.

Atmosferat festive të  1 Qershorit kanë çelur edhe siparin e një sërë aktivitetesh kulturore dhe festive, për fëmijët në qytetin e Elbasanit.

 Qendra Kulturore e Fëmijëve në Elbasan, ka mbledhur fëmijët të cilët kanë pasur një dëshirë të madhe këtë vit për ta frekuentuar, duke organizuar një koncert të madh festiv, ku ka qenë i pranishëm edhe kryetari i Bashkisë Z. Gledian Llatja.

Përreth një orë, fëmijët kanë recituar, vallëzuar dhe kënduar këngët e tyre të trajnuar nga stafi i kësaj qendre.

” Ne po  bëhemi gati për një verë aktive, ne sherbim  të fëmijëve, ku do të ketë shumë aktivitete për to. I kishim ndaluar disa aktivitete për shkak të pandemisë, por kjo verë do të kthehet në një tjetër ritëm, do të kthehet për të gjithë, por kryesisht për fëmijët”, tha në fjalën e tij kryebashkiaku Gledian Llatja.

Këtë vit Qendra Kulturore e Fëmijëve ka organizuar një sërë aktivitetesh vetëm me fëmijët, aktivitete sportive, festivale, etj.

 Kjo qendër ka përgatitur edhe një kalendar festash të cilat konsistojnë për tre muajt e verës, ku finalizohen edhe në muajin gusht me Festivalin e  35-te  për fëmijët.

Me rastin e 1 Qershorit, festës ndërkombëtare të fëmijëve,kryetari i Bashkisë Z. Gledian Llatja ka pritur në zyrën e tij fëmijët e kopshtit Nr.7. Me naivitetin dhe shkelqëlqimin e syve që i karakterizon këta vogelushe, zyra e kryebashkiakut u kthye në një ambjent festiv dhe plot buzëqeshje. I rrethuar nga vogëlushët festa u kthye në një mini spektakël ku vogëlushët me rradhë nisën të recitonin vjershat e tyre me temë qytetin, 1 Qershorin, etj. Fëmijët kanë falenderuar kryebashkiakun që nga dita në ditë e ka zbukuruar qytetin me më shumë gjelbërim, ndricim, kënde.lojrash dhe shumë parqe për argëtim, si edhe inagurimin e spitalit pediatrik ku fëmijët marrin shërbim mjekësor. Nga ana e tij Kryetari i Bashkisë përcolli urimin për të gjithë fëmijët, prindërit dhe mësuesit.

” Gëzuar 1 Qershorin, fëmijë të dashur!

 Jeni ju burimi i çdo gjëje, lumturia më e madhe. Kjo ditë, na përkujton të drejtat e fëmijëve që të rriten të lumtur dhe të shëndetshëm.

Ndaj, ju uroj të keni mirëqenie, lumturi, më shumë se kurrë. Le të jetë 1 Qershori edhe një ditë sensibilizimi, për ti thënë jo dhunës dhe abuzimit ndaj fëmijëve.

Është një ditë që ne të rriturit, prindërit, të kujdesemi për edukimin, shëndetin, e tyre.

Fytyrat dhe zemrat tuaja të bukura qofshin të lumtura përgjithmonë.

Fëmijët, janë koncepti ynë për të bukurën, lumturia jonë e vetme pa shpërblim.

Të dashur prindër e mësues, gëzuar ditën e jetës sonë të vërtetë, një nga ditët më të bukura e të sinqerta!Qoftë festë përditë!

Në ambjentet e  Hotel “Skampa”  është zhvilluar  një takim i Komisionerit per te Drejten e Informimit dhe Mbrojtjen e te Dhenave Personale, me institucione te qarkut Elbasan. Në këtë takim komisioneri Besnik Dervishi ka falenderuar kryetarin e Bashkisë Gledian Llatja , prefekten e Qsrkut si dhe të pranishmit duke pohuar se ” Elbasani është një nga qarqet me bagazh intelektual dhe kulturor” . Qëllimi i këtij takimi ishte evidentimi i të drejtave dhe lirive themelore njeriut, sic është e drejta për informim, si dhe për të ofruar shërbimin sic është transparenca e autoriteteve publike. Këto takime organizohen në kuadër të një projekti të titulluar ” Ditët e transparencës” . Kryetari i Bashkisë Z. Gledian Llatja, i cili nisi fjalën në këtë takim pohoi se ” praktikat më të mira të qeverisjes vendore e konsiderojnë transparencën si moment historik të qeverisjes së mirë dhe komuniteteve të forta. Transparenca e institucioneve vendore lufton korrupsionin, rrit besimin e qytetarëve dhe forcon integritetin e institucioneve publike”.

Sipas kryebashkiakut “

ky proces u mundëson qytetarëve të vlerësojnë objektivisht cilësinë, përshtatshmërinë dhe efikasitetin e shërbimeve publike, duke propozuar ndryshime për përmirësimin e shërbimeve të ofruara.

Transparenca e institucioneve vendore është një parakusht për një qeverisje të hapur dhe demokratike. Nga ana tjetër, qeverisja e hapur është më shumë e kontrollueshme nga qytetarët, pasi qasja në informacione publike u mundëson qytetarëve të jenë më shumë informuar për aktivitetin e bashkisë.

Aksesi në informacionin publik është një e drejtë themelore e njeriut dhe a hapi i parë drejt demokracisë pjesëmarrëse lokale.

Nëpërmjet Programit të Transparencës, Bashkia Elbasan vendos në dispozicion të qytetarëve një kategori të gjerë informacionesh, mënyrat dhe afatet e publikimit të tyre si dhe procedurat për të aksesuar e përdorur ato”. Për garantimin e të drejtës së informimit, bashkia në hartimin e Programit të Transparencës është bazuar në parimin e    vendosjes në dispozicion të çdo qytetari, të gjithë informacionit të prodhuar nga veprimtaria e bashkisë.

Monitorimi i transparencës dhe llogaridhënies lokale nga shoqëria civile ka, gjithashtu, një rëndësi të veçantë në nxitjen dhe promovimin e angazhimit qytetar në proceset vendimmarrëse. Për më tepër, është një mjet efikas për nxitjen e publikut dhe përgjegjësinë sociale dhe llogaridhënien e institucioneve vendore. Pjesëmarrja e qytetarëve në vendimmarrje është parësore për forcimin e demokracisë lokale dhe minimizimin e praktikave korruptive.

Bashkia Elbasan synon ofrimin e qeverisjes së mirë duke: Inkurajuar akses dhe pjesëmarrje të publikut për të garantuar që vendimmarrja të përgjigjet ndaj nevojave të përbërësve të tij dhe të pranojë opinionet e tyre;  Ofruar shërbime me cilësi të lartë për qytetarët e saj; dhe   promovuar përdorimin efikas të burimeve publike”.

Sezoni i vaditjes ka nisur më herët këtë vit për shkak të rritjes së menjëherëshme të temperaturave. Në këtë kuadër  Agjencia e Shërbimeve Publike po kryen një punë për t’u lavdëruar duke vënë në funksion më shumë 6.5 km kanale vaditëse në Shirgjan që i vijnë në funksion 2000 fermerëve të gjithë zonës së fushës së Elbasanit. Kryetari i Bashkisë Gledian Llatja ka parë nga afër punen thuajse në përfundim të pastrimit të kanalit të Ferrasit me një gjatësi prej 7 km, duke deklaruar se ” këtë vit ky kanal ka pasur një sasi të madhe inertesh dhe bashkë me Inspektoriatin ne po punojmë për të gjetur edhe arsyen. Aktualialisht janë hequr 3000 metra kub inerte nga kanali egzistues e pazakontë kjo krahasuar me vitet e tjera. Sidoqoftë ne jemi në gadishmëri, Ndërmarrja e Shërbimeve Publike po punon për hapjen e të gjitha kanaleve vaditëse”. Kanali i Ferrasit furnizon të gjithë Njësinë Administrative Shirgjan, Gjergjan, si edhe një pjesë të Bashkisë së Cerrikut. Nisja më herët e pastrimit të  kanaleve vaditëse në të gjithë territorin e Bashkise Elbasan, ka ardhur edhe si pasojë e kërkesave të vetë fermerëve. Kreu i Bashkisë shton se ” i  kemi përshpejtuar ritmet duke punuar pa orar me qëllim që ti ofrojmë fermerëve shërbimin në kohën e duhur për të arritur sa më shumë prodhim të stinës”.

Kryetari i Bashkisë Z. Gledian Llatja ka vijuar turin e konsultimeve publike për Programin Afatmesëm Buxhetor 2023- 2025, me banorë të Njësive Bradashesh, Gracen, Paper, Funar. Kryetari i bashkise bëri një prezantim të tarifave vendore dhe bashkëbisedoi me përfaqësuesit e fshatrave të atyre zonave mbi ndërhyrjet në infrastrukturë e shërbime. Fokusi kryesor i këtij buxhetimi afatmesëm, sipas kryebashkiakut është rritja e cilësisë në shërbime për ujitjen e kullimin, sportin, kulturën, bujqësinë, etj.  

“ Na është bërë si traditë tashmë që të mblidhemi të gjithë në Njësitë Vendore, por do kemi edhe takime të tjera të këtij lloji edhe në fshatrat e largëta në zonën e Gracenit, Funarit dhe Paprit të cilat janë pak zona problematike. Pak kohë më parë kemi realizuar Buxhetimin me Pjesëmarrje, ndërsa sot fillojmë me buxhetin afatmesëm. Ne këtë buxhetim e kemi me traditë në bashkinë  e Elbasanit, ku diskutojmë për prioritetet e mëdha por edhe ato të vogla. Kemi pasur disa problematika gjatë këtyre 3 viteteve, ku ju kemi qenë vetë koshient se sapo morëm mandatin u përballëm me tërmetin e pastaj me pandeminë por kemi pasur edhe zjarre edhe përmbytje, e tani po përballemi me një luftë në Europë që ka ndikuar në rritjen e çmimeve si dhe rritja e çmimit të naftës na ka prekur edhe ne, pasi ndërrmarrja publike kërkon vazhdimisht furnizim me naftë”.  

Sipas kryebashkiakut Llatja, “ po planifikojmë të kemi një rritje të energjisë elektrike diku te 20% dhe nuk ka për t’u rritur më shumë se 20 %. Pra, ne kërkojmë balancimin e tarifës, ku konsumatori paguan atë që harxhon. Besoj me vitin e ardhëm me paketën e re fiskale do e rrisim sërish tarifën për energjinë elektrike, në mënyrë që ato të ardhura që kemi parashikuar për ndërtimin apo mirëmbajtjen e rrugëve në qytet apo në fshatra të mos i heqim nga investimet dhe të mbulojmë faturat e energjisë elektrike por t’i cojmë aty ku e kanë destinacionin e vet”. 

Kryebashkiaku, është ndalur edhe tek investimet e kryera gjatë kësaj periudhe që sipas tij konsistojnë në “ ndërhyrjet me asfaltime në disa zona dhe rrugë dytësore, kemi akoma shumë për të bërë siç janë investimet mes pallateve apo urbanizimi i zonës periferike të qytetit siç është edhe Bradasheshi që ka shumë potenciale”, tha kryebashkiaku.  

Ai nënvizoi edhe një sërë ndërhyjesh në qytet si në lagjen “5 Maji”, në zonën e Bypassit sikundër shtoi se “do vazhdojmë ndërhyrjen  deri në përfundim të projektit të Bypassit i cili është një projekt shumë i madh për qytetin. 

Ndërkohë për pjesën e mbetjeve, do të fillojmë shumë shpejt me pastrimin e fshatrave dhe do merremi me problematikat që na shqetësojnë kryesisht në zonën e Bradasheshit, Labinot Fushë, Shushicës që kanë problem të mëdha përsa i përket mbetjeve dhe pastrimit. 

Po eksperimentojmë edhe me një projekt të ri, me vendosjen e disa kazanëve ku edhe makinat e pastrimit do merren me pastrimin e zonave rurale. 

Kemi marre nën administrim edhe impiantin e mbeturinave në Elbasan dhe është një sfidë për ne e sidomos për mua dhe stafin pasi është një megastrukturë dhe po e menaxhojmë ne. 

Kemi kontaktuar edhe me bizneset për menaxhimin e mbetjeve të tyre pasi kemi pasur problematika në zonën e Kusarthit me makina të mëdha që vijnë në mënyrë të paligjshme dhe na ndotin ambientin, po nisim një aksion për monitorimin e tyre, pasi kemi vende për depozitimin e mbetjeve. Ne shkojmë i pastrojmë ata sërish ndotin, kërkojmë ndihmën e kryeplakut që të denoncojnë rastet dhe të çojmë në ndjekje penale këta ndotës pasi nuk tolerojmë asnjë që bëhet palë me ta. Kemi impiantin që është fat për qytetin tonë dhe çdo shkelës do të përballet me ligjin. Jemi përballë një viti electoral dhe duhet të punojmë shumë”.  

 Llatja theksoi nder të tjera se projekt-buxhetet bazohen në vizionin për Elbasanin e së ardhmes, i cila para së gjithash duhet të jetë një qytet i jetueshëm, me infrastrukturë moderne e transport publik cilësor, me shërbime efikase e cilësore, me mundësi investimi për sipërmarrësit. Nga Bashkia e Elbasanit theksohet fakti se pavarësisht problemeve të shumta, ky qytet fsheh një potencial të jashtëzakonshëm ekonomik, social e kulturor. 

Spitali Pediatrik i Elbasanit është transformuar në një mjedis miqësor për vogëlushët, ku ata marrin shërbimin spitalor në kushte optimale. Kjo, falë investimit të buxhetit të shtetit për rikonstruksionin e plotë të godinës 4-katëshe, ndërtim i para viteve 90-të, e cila është shndërruar,  jo vetëm nga pikëpamja infrastrukturore, por edhe organizative dhe funksionale e ambienteve të saj. Kryeministri Edi Rama ishte sot në Elbasan, ku së bashku me Ministren e Shëndetësisë dhe Mbrojtjes Sociale, Ogerta Manastirliu, kryetarin e Bashkisë Gledian Llatja dhe deputetë vizituan spitalin e ri, i cili siguron shërbime shëndetësore për më shumë se 20 mijë fëmijë. Ministrja Manastirliu tha se tashmë korpusi Spitalit të Elbasanit është një korpus tërësisht i kompletuar për nga pikëpamja e strukturës spitalore, por edha nga pikëpamja e teknologjisë, imazherisë dhe laboratorëve.
“Pas një seri investimesh në spitalin e Elbasanit, investimi më i ri tashmë i përfunduar është Spitali Pediatrik, një angazhim i përmbushur tashmë që i siguron shërbime cilësore më shumë se 20 mijë fëmijëve që marrin shërbim çdo vit në këtë spital. Se si kanë qenë kushtet e Spitalit Pediatrik, atë e dinë fare mirë të gjithë mjekët dhe infermierët e këtij spitali, por për të thënë të vërtetën, tashmë korpusi i spitalit të Elbasanit është një korpus i mirëinvestuar nga pikëpamja e infrastrukturës spitalore, por edhe nga pikëpamja e teknologjisë, imazherisë dhe laboratorit që tashmë janë përfshirë në gjithë programin e zhvillimit spitalor.” – u shpreh Ministrja Manastirliu. Spitali Pediatrik i Elbasanit ka një kapacitet prej 75  shtretërish, 60 shtretër shtrimi për pacientët e vegjël,  të organizuar në shërbimet e terapisë ditore, reanimacionit, neuro – interiteve, bronkiteve, dhe shërbimit të pediatrisë infektive, si dhe 15 shtretër në shërbimin e urgjencës. Të gjithë dhomat e pacientëve të vegjël duke filluar nga urgjenca, pavioni i terapisë ditore dhe pavijonet e tjera të shërbimeve pediatrike kanë ambiente miqësore për pacientët e vegjël. “Besoj që tashmë janë të gjitha standardet dhe ajo çka është e rëndësishme është që përveç mobilimit spitalor, të gjitha aparaturat mjekësore janë të reja. Është një spital që ka 60 linja oksigjeni. Çfarë e karakterizon këtë spital si një model të ri që kemi filluar ta përfshijmë në spitalet pediatrike janë shërbimet miqësore për fëmijët. Hapësirat e përbashkëta janë rehabilituar. Kur e filluam në fillim këtë projekt, nuk e dinim a do sillej dot në kushtet dhe parametrat e duhura pasi që nga viti ’90 nuk ishte vënë dorë.” – shpjegoi Ministrja Manastirliu.Spitali i ri është gjithashtu një investim i shumëpritur për personelin e dedikuar shëndetësor të Spitalit pediatrik të Elbasanit që trajton në ditë mesatarisht 80 pacientë të vegjël në shërbimin e urgjencës dhe deri në 150 pacientë të vegjël në periudhat e pikut.

Gjatë vizitës në  Bruksel  në ceremoninë e organizuar nga Parlamenti Evropian për akordimin e titullit “Kryetari më miqësor me romët 2022″ , cmim i akorduar për herë të parë për një kryetar Bashkie, Z. Gledian Llatja ka zhvilluar një takim me eurodeputetin Ciarán Cuffe MEP. Ky takim u zhvillua para se eurodeputeti të raportonte para Parlamentit Evropian për ecurinë e Shqipërisë.  ” Në këtë takim shumë miqësor i shpreha eurodeputetit mirënjohjen e thellë se sa shumë po ngre zërin në zemër të familjes së madhe Evropian për hapat para që Shqipëria ka bërë në  realizimin dhe plotësimin e kushteve për mbajtjen e Konferencës së Parë Ndërqeveritare.Shumë shpejt do të lancojmë një projekt shumë ambicioz për Elbasanin, falë mbështetjes që Bashkimi Evropian po jep në mjedis, ndryshimet klimatike dhe teknologji”, tha Z Llatja.I nderuar të vlerësohesha nga Komisioni Evropian me çmimin “Kryetari më miqësor me romët 2022″Cmimi i akorduar për kryetarin e Bashkisë  “Kryetari më miqësor me romët 2022” , tregoi dhe njëherë rezultatet e përpjekjeve  në këto 3 vite që Bashkia Elbasan ka ndërmarrë për gjithëpërfshirjen e këtij minoriteti në proceset vendimmarrëse lokale, investimet në infrastrukturë, arsim dhe punësim.

Kryetari i Bashkisë së Elbasanit Z. Gledian Llatja është vlerësuar nga Komisioni Europian me çmimin “Kryetari më miqësor me romët 2022”. Për herë të parë Bashkimi Europian akordon një çmim të tillë, për Bashkitë e vendit tonw. Është vlerësuar Bashkia Elbasan pasi gjatë viteve të fundit, i është dhënë një prioritet Komunitetit Rom, në gjithpërfshirje, duke arritur rezultate të dukshme në proçeset vendimmarrëse lokale, investimet në infrastrukturë, arsim dhe punësim. Sot fëmijët Rom, frekuentojnë rregullisht shkollën, të rinj e të reja janë të punësuar në administratë publike, dhe jo vetëm, njëri prej të cilëve është edhe anëtar i Këshillit Bashkiak, ç’ka e ka fuqizuar komunitetin për të ndikuar në vendimmarrjet publike. “Në tre vitet e fundit, nga koha kur jam zgjedhur Kryetar i Bashkisë së Elbasanit, kam patur mundësinë të kontribuoj dhe të dëshmoj arritjet në rigjallërimin dhe zhvillimin e minoritetit Rom. Mandatin tim e kam nisur me hartimin dhe vënien në zbatim të Planit Vendor për Integrimin e Minoriteteve Rome dhe Egjiptiane 2019-2022. Një dokumenti prodhuar me mbështetjen financiare të Bashkimit Evropian dhe Këshillit të Evropës”, tha në fjalën e tij Kryetari i Bashkisë Z. Gledian Llatja. Çmimi “The Most Roma Friendly Mayor” vjen si një përpjekje dhe punë e stafit të Bashkisë si edhe e partnerëve lokalë të cilët kanë punuar për të ndërtuar një mjedis ku të gjitha minoritetet të mësojnë, zhvillohen dhe përdorin gjuhën e tyre amtare. Duke ju drejtuar anëtarëve të Parlamentit Europian, Llatja renditi edhe disa sfida të cilat mund të përballohen përmes ndjekjes së një strategjie gjithpërfshirëse, siç janë, arsimi dhe dialogu ndërkulturor, punësimi dhe arsimi profesional, lufta kundër gjuhës së urrejtjes, kujdesi shëndetësor, strehimi dhe integrimi urban etj. Elbasani, një qytet krenar me një histori krenare, do të vazhdojë të mbështesë komunitetin Rom përmes angazhimit të vetë komunitetit, si edhe qytetarëve të angazhuar në kauzën e përbashkët. Bashkia Elbasan, është pjesë e Programit të Bashkimit Evropian dhe Këshillit të Evropës “ROMACTED: “Promovimi i qeverisjes së mirë dhe fuqizimit Rom në nivelin vendor”.