Muaj: Dhjetor 2024

Kryetari i Bashkisë së Elbasanit, i shoqëruar nga deputetë të qarkut, ka zhvilluar sot vizita tek klerikët ortodoksë dhe katolikë në kuadër të festës së Krishtlindjes, një nga festat më të rëndësishme për komunitetin e krishterë.

Vizita ka nisur në Kishën Ortodokse dhe ka vijuar në Kishën Katolike, ku kryetari ka përcjellë urimet më të përzemërta për këtë ditë të shënuar. Ai ka vlerësuar Krishtlindjen si një festë që përcjell mesazhe të paqes, dashurisë dhe solidaritetit, duke theksuar rëndësinë e bashkëjetesës dhe harmonisë ndërfetare, e cila mbetet një vlerë e veçantë e qytetit të Elbasanit.

Krishtlindja festohet masivisht në Elbasan, duke mbledhur bashkë familjet dhe komunitetin në frymën e ngrohtësisë dhe gëzimit. Gjatë këtyre vizitave, kryetari dhe deputetët kanë shprehur angazhimin e tyre për të mbështetur më tej zhvillimin e një qyteti ku respektohen vlerat shpirtërore dhe traditat fetare.

Kryetari i Bashkisë së Elbasanit, Gledian Llatja, ka zhvilluar një vizitë zyrtare në Komunën e Preshevës, ku është pritur nga Kryetarja e Komunës, Ardita Sinani, dhe ambasadori i Shqipërisë, Bardhyl Canaj. Vizita kulmoi me firmosjen e një memorandumi bashkëpunimi që synon forcimin e marrëdhënieve ndërmjet dy qyteteve dhe krijimin e mundësive të reja për qytetarët e të dyja vendeve.

Memorandumi përfshin shkëmbimin e eksperiencave mes administratave, bashkëpunimin në trashëgiminë kulturore dhe historike, përmirësimin e cilësisë së arsimit, si dhe ofrimin e bursave dhe qëndrimit në Elbasan për nxënësit e Preshevës që dëshirojnë të studiojnë në Universitetin e Elbasanit. Gjithashtu, në marrëveshje parashikohet aplikimi i përbashkët për fonde të Bashkimit Europian për projekte infrastrukturore dhe sociale.

Gjatë konferencës për shtyp, Kryetarja e Komunës së Preshevës, Ardita Sinani, theksoi se  “jam e nderuar jo vetëm si kryetare, por edhe si qytetare e Preshevës, për këtë vizitë të rëndësishme nga kryetari i Bashkisë së Elbasanit, z. Gledian Llatja, dhe ambasadori i Shqipërisë. Ky bashkëpunim është një hap inkurajues për qytetin tonë, duke na mundësuar shkëmbim eksperiencash në fusha të ndryshme dhe mbështetje konkrete për nxënësit që dëshirojnë të studiojnë në Elbasan.”

Kryetari Gledian Llatja e quajti vizitën dhe marrëveshjen një hap të rëndësishëm edhe drejt thellimit të marrëdhënieve.  “Firmosja e këtij memorandumi vë bazat për një vëllazërim të ri mes dy qyteteve tona. Kjo marrëveshje nuk është vetëm simbolike, por krijon mundësi konkrete për qytetarët e Preshevës dhe Elbasanit, që nga mbështetja me bursa për nxënësit që studiojnë në Elbasan deri te zhvillimi i përbashkët i projekteve për infrastrukturën dhe jetën kulturore.”

Llatja theksoi gjithashtu se bashkëpunimi me Preshevën nuk është vetëm simbolik, por krijon mundësi konkrete për zbatimin e projekteve që prekin direkt qytetarët. Ai vlerësoi rolin e BE-së dhe donatorëve të tjerë si partnerë të rëndësishëm në forcimin e infrastrukturës dhe jetës komunitare. 

“Ky memorandum hap rrugën për aplikime të përbashkëta në projektet e Bashkimit Europian, të cilat do të na ndihmojnë të përmirësojmë cilësinë e jetesës për qytetarët tanë. Fokusi ynë është në infrastrukturën, arsimin dhe zhvillimin social, duke synuar që të dy qytetet tona të përfitojnë nga thirrjet dhe grantet europiane.”

Llatja nënvizoi gjithashtu rëndësinë e bashkëpunimit në fushën e kulturës dhe artit, duke shtuar se Bashkia e Elbasanit dhe Qendra e Artit do të organizojnë koncerte dhe festivale në Preshevë për të forcuar lidhjet kulturore dhe ndërveprimin midis qytetarëve.

Kryetari i Bashkisë Elbasan, Gledian Llatja, organizoi një takim të veçantë me sportistët dhe personalitetet që kanë dhënë një kontribut të çmuar për sportin në qytet. Në bashkëpunim me Klubin Shumësportësh “Elbasani”, u nderuan sportistë të shquar që ndër vite kanë ngritur lart emrin e qytetit dhe klubit, si në nivel kombëtar ashtu edhe ndërkombëtar. Në  këtë  takim morën pjesë  edhe përfaqësues të  pushtetit lokal, sportistë, si edhe Fidel Ylli presidenti i KOKSH.

Lista e personaliteteve të nderuara përfshiu emra të njohur në fushën e sportit në  Elbasan si:  Mimoza Fusha, Ferdinand Hodo, Fatos Demeti, Ilir Balliu, Llambi Shëputi, Kristaq Papajani, Ilir Hoxha, Aleksandër Binjaku, Dhimiter Gjika, Kujtim Dalipi, Safet Merko, Nikollaq Papanikolla, Musa Peqini, Mimoza Gjoci, Hasan Dinja, Reshit Haxhihyseni, Afrit Balliu, Ylli Mollsi, Ramazan Pisha.

Gjatë takimit, Kryetari Llatja vlerësoi rolin e tyre në promovimin e sportit dhe në krijimin e një trashëgimie të pasur sportive për qytetin e Elbasanit.

“Jam i lumtur që sot nderojmë figura të spikatura që kanë shkruar historinë e sportit elbasanas, duke e ngritur emrin e qytetit në majat më të larta sportive në rang kombëtar e ndërkombëtar,” u shpreh Kryetari Llatja.

Ai theksoi gjithashtu rëndësinë e investimeve të kryera gjatë viteve të fundit në infrastrukturën sportive të qytetit, si një prioritet i rëndësishëm për Bashkinë Elbasan. Disa prej investimeve më të spikatura përfshijnë përmirësimin e fushave të sportit, palestrave të  shkollave dhe rikonstruksionin e Pallatit të Sportit, duke krijuar kushte optimale për zhvillimin e sporteve dhe për promovimin e talenteve të reja.

Ky aktivitet shërben si një vlerësim për punën dhe përkushtimin e sportistëve ndër vite, duke përcjellë mesazhin se sporti mbetet një shtyllë e rëndësishme e identitetit të qytetit të Elbasanit.

Kryetari i Bashkisë Elbasan, Gledian Llatja, inspektoi punimet në lagjen “Borodin Mitarja”, ku po realizohen një sërë investimesh të rëndësishme për përmirësimin e infrastrukturës. Banorët e zonës kanë shprehur mirënjohjen për punën dhe përkushtimin që po tregohet ndaj nevojave të tyre.

“Jemi në rrugën ‘Borodin Mitarja’, ku kemi bërë investime të vazhdueshme. Sapo përfunduam veshjen e pallateve me kapotë, për të kursyer energjinë dhe për të krijuar ambiente më të ngrohta për banorët, sidomos gjatë dimrit. Po vazhdojmë me riasfaltimin e rrugës, e cila tashmë është kthyer në një rrugë kryesore që lidh qytetin me varrezat e qytetit,” deklaroi Llatja.

Puna për riasfaltimin ka nisur paralelisht me ndërhyrje të tjera në disa zona të qytetit. Llatja theksoi rëndësinë e këtij investimi, duke përmendur se rruga ka pësuar një fluks të madh qarkullimi pas hapjes së nënkalimit të ri.

“Panvarësisht kushteve atmosferike, jemi të përkushtuar të vijojmë punimet. Aktualisht, po punojmë në 11 rrugë në qytet, duke përfshirë asfaltime dhe riasfaltime, si në zonat informale ashtu edhe në qendrat kryesore. Gjithashtu, përmes projektit të ujësjellës-kanalizimeve të realizuar me mbështetjen e KFV-së gjermane dhe qeverisë shqiptare, kemi siguruar përmirësime të mëdha në sistemin e furnizimit me ujë të pijshëm,” shtoi ai.

Banorët e zonës, të pranishëm gjatë inspektimit, vlerësuan punën që po bëhet në lagjen e tyre, duke theksuar se këto ndërhyrje po rrisin cilësinë e jetës në komunitet.

Në përfundim të inspektimit, kryetari i bashkisë siguroi se punimet do të vazhdojnë me rregullimin e trotuareve dhe përfundimin e të gjitha detajeve infrastrukturore, për të garantuar një lagje më të sistemuar dhe moderne.

Përroi i Gurrës në Shushicë po i nënshtrohet një operacioni pastrimi dhe përforcimi nga Agjencia e Shërbimeve Publike Rurale (ASHPR). Ky përrua, me një gjatësi prej 3 kilometrash, ka qenë burim problemesh për shkak të prurjeve të mëdha me materiale inerte dhe argjile gjatë shirave.

Gjatë inspektimit të punimeve, kryetari i bashkisë z. Gledian Llatja theksoi se ” tani po realizojmë një ndërhyrje rrënjësore me ndërmarrjen e punëve publike. Ne jemi koshientë që këtu duhet të hiqen 50 mijë metra kub material inerte që kanë ardhur nga zonat malore, sipër fshatit të vjetër të Shushicës. Ndaj këtë vit kemi ndërhyrë aty me një projekt për sistemimin e përrejve të vegjël malorë, në mënyrë që prurjet inerte të kufizohen rrugës dhe të mos zbresin të gjitha në përruan e Shushicës. Tani po mbjellim edhe 8500 pemë në zonën sipër dhe masat e ndërmarra për ndalimin e erozionit besojmë se do t’i japin zgjidhje problematikës që Gurra na ka dhënë gjithnjë.

Sakaq, pas dore nuk kemi lënë edhe pastrimin e kanaleve kulluese dhe jam i bindur se bashkë me forcimin e argjinaturës anësore të përroit të Gurrës, do të sigurojmë që të mos kemi përmbytje në zonën e banesave që ndodhen poshtë ose afër lumit Shkumbin. Puna po vazhdon; ne jemi gati në 3 kilometra”.

Desantila Tahiraj deputete e zonës e cilësoi Gurrën si një përrua të rrezikshëm, duke theksuar se ” kjo është edhe arsyeja që Bashkia Elbasan po merr të gjitha masat në kohë, në mënyrë që përroi të mos përbëjë rrezik për banorët e zonës.”

Ekipet e ASHPR-së po punojnë për përforcimin e argjinaturave në të dy krahët e përroit dhe riparimin e zonave të gërryera. Ndërhyrjet e përvitshme kanë bërë që përroi i Gurrës të mos shkaktojë dëme prej më shumë se 10 vitesh.

Pas përfundimit të këtij aksioni, do të pastrohen edhe përrojet e vegjël të zonës, si Përroi i Fosës dhe Shalthatës, duke siguruar mbrojtjen e tokave bujqësore dhe të banorëve të Shushicës.

Në kuadër të projektit ADAPT 2, të mbështetur nga Agjencia Suedeze Sida dhe IUCN, Kryetari i Bashkisë Elbasan, Z. Gledian Llatja, inspektoi punimet në zonën e Shushicës.

 Ky projekt synon rehabilitimin e zonave të degraduara natyrore, përmes mbjelljes së fidanëve, ndërtimit të pritave malore dhe zbatimit të zgjidhjeve inovative për mbrojtjen e mjedisit dhe forcimin e qëndrueshmërisë lokale.

Z. Llatja, gjatë inspektimit, theksoi rëndësinë e këtij projekti dhe adresoi problematikat e deritanishme.

 “Në zonën e Shushicës jemi duke zbatuar një projekt të rëndësishëm për rehabilitimin e zonave të degraduara. Përmes ndërtimit të tetë pritave malore dhe mbjelljes së 8,500 fidanëve, kemi filluar një proces që ndihmon jo vetëm në mbrojtjen e mjedisit, por edhe në krijimin e mundësive për ekonominë lokale, falë bimësisë së re që po eksperimentojmë. Falënderoj IUCN për mbështetjen e dhënë dhe për frymën bashkëpunuese në këtë iniciativë.”

Sikundër shtoi se “jemi në fillimin e një sërë investimesh, ne po hapim sezonin e mbjelljeve të reja në bashkinë e Elbasanit dhe rehabilitimit të zonave të degraduara”.

Përfaqësuesi i IUCN, i pranishëm në inspektim, vlerësoi angazhimin për mbështetjen që Bashkia Elbasan ka treguar në zbatimin e projektit.

“Ky është një model suksesi, dhe me fillimin e fazës së re rajonale, do të kemi mundësi të monitorojmë, vlerësojmë dhe përmirësojmë ndikimin e këtyre masave në komunitet. Në fillim ne kontaktuam autoritetet kombëtare për të zbatuar atë që ju e përmblodhët shumë mirë, zgjidhjet me bazë në natyrë, zgjidhjet alternative duke u përpjekur të përmirësojmë jetët e njerëzve këtu, përtej mjedisit në vetvete.

Ka qenë një process i gjatë, por përgjatë gjithë procesit, shërbimet tuaja, e gjithë bashkia juaj na ka mbështetur gjithmonë dhe sot jam krenar të them se ky nuk është projekti ynë, por është projekti juaj.

Gjithashtu, kam kënaqësinë t’ju bëj me dije se ne jemi në fazën e re të zbatimit të projektit, në nivel rajonal dhe ne po planifikojmë të punojmë së bashku për monitorimin e zbatimit të këtij projekti, vlerësimin dhe si rrjedhojë të ndërmarrim masat si edhe të përmirësojmë ndikimin tonë në këtë rajon”

Deputetja Desantila Tahiraj përgëzoi këtë nismë, duke e vlerësuar si një hap të rëndësishëm drejt përballimit të ndryshimeve klimatike dhe përmirësimit të jetës së komunitetit:

“Mbjellja e 8,500 pemëve dhe rehabilitimi i këtyre zonave do të ketë një ndikim të madh jo vetëm në mjedis, por edhe në cilësinë e jetës së banorëve të kësaj zone.”

Në planin e zbatimit të këti projekti, përfshihet mbjellja e 8,600 fidanëve në një sipërfaqe prej 8.2 hektarësh, duke përfshirë pisha dhe bimësi të tjera qëndruese.

Ndërtimi i tetë pritave malore për të frenuar erozionin dhe përmirësuar cilësinë e tokës.

 Eksperimentimi me bimësi të reja, si lajthia dhe pemët frutore, për të ndihmuar ekonominë lokale.

Ky projekt, pjesë e ADAPT 2, shënon fillimin e sezonit të ri të mbjelljeve dhe një angazhim të përbashkët për një Elbasan më të gjelbër dhe më të qëndrueshëm.

Kryetari i Bashkisë Elbasan Gledian Llatja ka marrë pjesë në Samitin e 5-të Global të Rrjetit të Strong Cities Network, një platformë ndërkombëtare që mblodhi mbi 140 liderë lokalë, përfaqësues të qeverive dhe organizatave të shoqërisë civile nga më shumë se 90 qytete dhe 40 vende.

 Samiti u fokusua në zgjidhje inovative për të adresuar çështje të ndjeshme si urrejtja, polarizimi dhe sfidat që krizat globale sjellin në nivele lokale.

Në këtë samit, kryetari i bashkisë ndau përvojat dhe iniciativat e ndërmarra në Elbasan për të ndërtuar një qytet gjithëpërfshirës dhe të qëndrueshëm. Bashkëpunimi dhe shkëmbimi i ideve me liderë nga e gjithë bota nënvizuan rëndësinë e një qasjeje të përbashkët për të përballuar sfidat e përbashkëta.

Kjo pjesëmarrje përfaqëson një angazhim konkret për të forcuar rolin e qyteteve si faktorë të rëndësishëm në zgjidhjen e çështjeve globale, duke u bazuar në vlera solidariteti dhe mirëkuptimi.