Muaj: Gusht 2025

Qyteti i Elbasanit ka hapur dyert e historisë së tij me një ekspozitë unike që shënon 100 vite ndryshimesh, zhvillimi dhe kujtimesh. Në muret e Kalasë janë vendosur fotografi dhe imazhe që tregojnë çdo dekadë të jetës së qytetit, duke e sjellë atë në një retrospektivë të gjallë dhe emocionuese.

Ekspozita, e cila ka tërhequr artdashës dhe turistë nga brenda e jashtë vendit, u hap me mesazhin e kryetarit të Bashkisë, Gledian Llatja, i cili theksoi rëndësinë e njohjes së rrënjëve tona, të kaluarës dhe të tashmes, për të vlerësuar dhe ndërtuar të ardhmen.

Ky aktivitet është pjesë e një kalendari të pasur ngjarjesh kulturore që Bashkia e Elbasanit, në bashkëpunim me institucionet e saj, ka zhvilluar gjatë gjithë muajit gusht. Përveçse ka ngjallur interesin e qytetarëve elbasanas, ai ka tërhequr edhe vizitorë të shumtë që e kanë zbuluar qytetin në këtë verë të nxehtë.

Në kohën kur Shqipëria po njeh një bum turistësh, Elbasani po i përgjigjet sfidës, duke rikthyer në përdorim thesaret e tij historike dhe natyrore, dhe duke i shndërruar ato në përvoja të paharrueshme për çdo vizitor. Brenda mureve të Kalasë së Elbasanit, në Gjinarin piktoresk dhe në Funarin e gjelbër, po marrin jetë bujtina të vogla familjare, që mishërojnë një turizëm të qëndrueshëm, të ngrohtë e autentik.

Shembull është “Vila Zoi”, një bujtinë e vendosur në zemër të kalasë, aty ku rrugët e gurta të Via Egnatia-s shpalosin rrëfime mijëravjeçare. E hapur një vit më parë, falë bonusit të rijetëzimit nga Ministria e Kulturës, kjo iniciativë familjare është sot një ndalesë e preferuar për turistë nga e gjithë bota, nga Europa në Zelandën e Re, nga Afrika e Jugut në Australinë e largët.

Qëndrimi në “Vila Zoi” nuk është thjesht një fjetje, por një përjetim, aty shpaloset panorama e kalasë, ndërsa aroma e kafesë në mëngjes përzihet me historitë që mbart çdo gur i kësaj zone.

Kryetari i Bashkisë Elbasan, Gledian Llatja, vlerëson bujtinat si një formë të qëndrueshme zhvillimi turistik dhe u bën thirrje familjeve e sipërmarrësve të ndjekin këtë model suksesi. “Ne duam që vizitorët të mos e shohin Elbasanin vetëm si qytet transit, por ta përjetojnë atë, të qëndrojnë, të shijojnë historinë, natyrën, ushqimin dhe mikpritjen tonë,” thekson ai.

Me mbështetjen e qeverisë dhe nismat e bashkisë, bujtinat në Kala, në Gjinar dhe në Funar po i japin një pamje të re turizmit në Elbasan, duke i kthyer këto zona në destinacione të vizitueshme në çdo stinë të vitit.

 Bashkia e Elbasanit ka nisur një nismë të re për ndarjen e mbeturinave në burim, duke vendosur koshat e rinj për riciklim në disa pika strategjike të qytetit. Ky projekt synon të rrisë ndërgjegjësimin e qytetarëve dhe të promovojë riciklimin si pjesë të një kulture të re për mbrojtjen e mjedisit.

Punonjësit e bashkisë kanë filluar punën për vendosjen e kontenierëve, duke shtrirë këtë iniciativë edhe në zona të tjera të qytetit. Kjo nismë është një hap i rëndësishëm në përpjekjet për ta bërë Elbasanin një qytet më të pastër, më të gjelbër dhe më të qëndrueshëm për të gjithë.

Ndarja e mbetjeve në burim nuk është vetëm një veprim teknik, por një akt qytetar i respektit për natyrën dhe për brezat që do të vijnë. Ky është një angazhim për një qytet më të shëndetshëm dhe një mjedis më të pasur për të gjithë banorët e tij.

Nën kujdesin e veçantë të kryetarit të Bashkisë Elbasan, Gledian Llatja, sheshi kryesor i qytetit u shndërrua mbrëmë në një festë të traditës shqiptare, teksa Ansambli Popullor ndezi atmosferën me tingujt dhe vallet më të bukura nga të gjitha trevat.

Qindra qytetarë dhe vizitorë u mblodhën në shesh për të shijuar më shumë se dy orë këngë, valle dhe emocion, në një mbrëmje që solli gjallëri, dhe energji pozitive në zemër të Elbasanit.

Spektakli i kulturës sonë kombëtare çeli zyrtarisht kalendarin e pasur të aktiviteteve verore që do të vijojnë gjatë gjithë muajit gusht, duke e kthyer Elbasanin në një destinacion tërheqës për artdashësit, turistët dhe çdo qytetar që kërkon argëtim dhe promovim të identitetit tonë kulturor.