Konsultime me publikun

Në Gracen, buxheti afatmesëm vijoi me një sërë projektesh dhe investimesh konkrete, që synojnë përmirësimin e infrastrukturës dhe zhvillimin ekonomik të zonës. Ndër investimet kryesore u theksua rruga prej 1.6 km nga Dopaj deri tek shkolla, si edhe projekti i ri që pritet të nisë brenda vitit për ndërtimin e aksit Dopaj–Funar, një ndërhyrje e rëndësishme për lidhjen dhe aksesin e banorëve.

Paralelisht, vëmendje po i kushtohet edhe “Paketës së Maleve”, një mundësi konkrete për banorët që të përfitojnë deri në 10 vite pa taksa, duke nxitur investimet dhe zhvillimin e bizneseve në zonat rurale.

Kreu i bashkisë, Gledian Llatja, shprehu besimin për pjesëmarrjen e qytetarëve në këto dëgjesa publike, duke e cilësuar atë si një tregues të qartë të besimit që ata kanë ndaj institucionit dhe investimeve që po realizohen në zonën e tyre.

“Buxheti afatmesëm nuk është një buxhet vjetor, por një plan trevjeçar, ku ne shohim dhe kërkojmë prioritete që kërkojnë më shumë investime sesa ato të përvitshme.

Në Njësinë Administrative Gracen kemi parashikuar një sërë ndërhyrjesh konkrete, ku ndër më kryesoret është investimi për rrugën prej 1.6 km nga Dopaj deri tek shkolla, një rrugë e asfaltuar që përmirëson ndjeshëm aksesin për banorët. Gjithashtu, brenda këtij viti do të nisim edhe ndërtimin e rrugës nga Dopaj drejt Funarit, një aks i rëndësishëm që i shërben jo vetëm kësaj zone, por edhe banorëve përreth.

Paralelisht, po vijojmë me zgjerimin e përfituesve të ‘Paketës së Maleve’, ku ata që aplikojnë përfitojnë deri në 10 vite pa taksa, duke krijuar mundësi reale për zhvillimin e pronave dhe ndërtimin e bizneseve familjare që ndikojnë drejtpërdrejt në rritjen e ekonomisë së zonës.

Tashmë kemi nisur edhe krijimin e SHBB-ve, shoqatave të bashkëpunimit bujqësor, ku qëllimi është të mbështesim fermerët në të gjitha hallkat që u mungojnë në ciklin e zhvillimit të biznesit, nga prodhimi deri tek tregtimi. Kjo është një nismë e përbashkët mes qeverisë dhe fermerëve, për të rritur kapacitetet dhe për të garantuar më shumë të ardhura për familjet në zonat rurale.”

Në Njësinë Administrative Tregan vijoi turi i konsultimeve për buxhetin afatmesëm, ku u prezantuan një sërë projektesh dhe investimesh që prekin drejtpërdrejt zhvillimin e zonës për tre vitet e ardhshme. Nga ndërtimi i shkollës së re të Treganit me standarde bashkëkohore, te investimet në infrastrukturën rrugore që lidhin fshatrat dhe mbështesin turizmin e llixhave, bashkia ka parashikuar ndërhyrje konkrete për përmirësimin e jetës së banorëve dhe zhvillimin ekonomik të zonës.

Në këtë takim morën pjesë banorë të zonës, përfaqësues të majtë e të djathtë, ndërsa të pranishëm ishin edhe kryetari i Bashkisë Gledian Llatja dhe deputetja Evis Kushi.

Deputetja Evis Kushi u shpreh se kërkesat e qytetarëve janë të shumta dhe kjo e bën të vështirë përcaktimin e prioriteteve, por theksoi rëndësinë e dëgjimit të komunitetit.

“Ne kemi dëgjuar se çfarë është bërë deri tani dhe po diskutojmë së bashku prioritetet për investimet në të ardhmen. Kërkesat janë të larta, ndaj duhet të bëjmë zgjedhje të kujdesshme.”

Ajo vlerësoi gjithashtu investimin në shkollën e Treganit, duke theksuar se shkolla është me kushtet sipas standardeve më të mira të Bashkimit Europian.

Nga ana e tij, kryetari i Bashkisë Gledian Llatja renditi projektet konkrete në zbatim dhe ato të planifikuara.

“Kemi një sërë projektesh në zbatim, përfshirë këtu edhe shkollën e re të Treganit, e cila është  ndër më cilësoret në zonat rurale, një shkollë e re. Brenda këtij viti nisim investimin në aksin rrugor Kryezjarr–Tudan dhe më tej drejt Trepsenishtit, ndërsa vitin tjetër vijon segmenti Tregan–Tudan, që do të krijojë një unazë funksionale për gjithë zonën.”

Ai shtoi se brenda vitit do të nisë edhe ndërtimi i rrugës Llixha–Hidraj drejt zonës së hoteleve, një segment prej 850 metrash asfalt, që pritet të ndikojë drejtpërdrejt në zhvillimin e turizmit dhe ekonomisë lokale.

“Ekonomia kryesore e Treganit janë llixhat, të cilat mbajnë edhe një pjesë të mirë të Shirgjanit. Ne kemi qenë dhe do të vazhdojmë të jemi pranë bizneseve të kësaj zone”, tha Llatja.

Në fokus të diskutimeve ishte edhe ndërhyrja në rrugën e varrezave, si dhe projekte të tjera që pritet të përfshihen në buxhetin trevjeçar.

Buxheti afatmesëm synon pikërisht këtë proces bashkëbisedimi me qytetarët, për të përkthyer kërkesat dhe nevojat e tyre në investime konkrete për zhvillimin e qëndrueshëm të zonës.

Kryetari i Bashkisë Elbasan, Gledian Llatja, në vijim të turit të konsultimeve për buxhetin afatmesëm, ka zhvilluar një takim me banorët e Rajonit Nr. 6, ku janë diskutuar investimet e realizuara deri më tani, por edhe projektet që pritet të marrin jetë në vitet në vijim.

Gjatë bashkëbisedimit me qytetarët, kryebashkiaku Llatja u ndal tek puna e bërë në lagjet e këtij rajoni, duke theksuar ndërhyrjet për përmirësimin e infrastrukturës në rrugët problematike si edhe formalizimin e zonave informale.

Ai theksoi se, megjithëse është bërë shumë punë, nevojat e komunitetit mbeten të shumta dhe investimet do të vijojnë.

Një nga projektet më të rëndësishme të prezantuara ishte hapja e rrugës së re që lidh zonën e Teqes me unazën kryesore të qytetit, e cila do të përmirësojë ndjeshëm qarkullimin. Gjithashtu do të vijojë investimi në segmentin nga “Vasil Papamihali” drejt qendrës kryesore pranë Teqes, një aks i konsideruar me rëndësi për banorët e zonës.

Kryetari i Bashkisë bëri të ditur se paralelisht do të vazhdojnë investimet në arsim, ku vetëm gjatë këtij viti Bashkia Elbasan po investon mbi 1 milion euro në katër shkolla të qytetit, me qëllim përmirësimin e kushteve për nxënësit dhe stafin arsimor.

Një tjetër fokus i diskutimit ishte edhe projekti i Kalasë së Elbasanit, i cili sipas Llatjas pritet të ketë ndikim të madh në zhvillimin ekonomik lokal dhe turizmin. Ai e cilësoi kalanë si një nga asetet më të rëndësishme të qytetit për tërheqjen e vizitorëve dhe zhvillimin e biznesit lokal.

Në takim u diskutua edhe mbi ecurinë e projektit të Auto Moto Parkut, ku aktualisht po përfundon infrastruktura dhe po mbyllet unaza lidhëse që do të krijojë akses direkt me zonën e “Borodin Mitarja”, ose lagjen e kinezëve dhe dalje drejt Urës së Lizës.

Banorët e Rajonit Nr. 6 ngritën gjithashtu shqetësime dhe sugjerime për problematikat e zonës, ndërsa kryebashkiaku garantoi se konsultimet për buxhetin afatmesëm do të vazhdojnë në çdo rajon të qytetit, me qëllim që investimet të jenë sa më pranë nevojave reale të komunitetit.

Në vijim të konsultimeve për buxhetin afatmesëm trevjeçar të Bashkisë Elbasan, kryetari i Bashkisë, Gledian Llatja, zhvilloi një takim me banorët e Njësisë Gjergjan, ku u diskutuan projektet infrastrukturore dhe ndërhyrjet që synojnë përmirësimin e aksesit rrugor dhe mbështetjen e zonave bujqësore.

Në fokus të takimit ishin rrugët e brendshme të njësisë, përfundimi i akseve kryesore dhe investimet në zonat rurale, me qëllim lehtësimin e qarkullimit dhe rritjen e zhvillimit ekonomik lokal.

Kryebashkiaku u ndal fillimisht tek rruga e Kështjellës, një kërkesë e hershme e banorëve.

Ai theksoi gjithashtu se në këtë zonë janë diskutuar edhe problematika të tjera infrastrukturore që po marrin zgjidhje graduale.

Në vijim, Llatja u ndal tek përfundimi i punimeve në disa akse dhe vijimi i ndërhyrjeve të tjera në zonë.

“Sikundër edhe rruga e Gjergjanit, edhe ajo ka qenë një kërkesë e kahershme, kemi bërë një pjesë të rrugëve dhe ka mbetur kjo tjetra për t’u përfunduar,” tha Llatja.

Kryebashkiaku foli edhe për rrugën Bujaras – Kodër Bujaras, ku punimet po vijojnë në faza.

“Problemi ishte edhe ajo e Bujaras – Kodër Bujaras, por tashmë është realitet. Ka përfunduar pjesa kryesore e punimeve civile dhe do të vijojmë me fazën e dytë, që është asfaltimi i rrugës,” deklaroi ai.

Sipas tij, synimi është që rrugët të ndërtohen me standarde bashkëkohore, duke mbështetur edhe zhvillimin bujqësor të zonës.

Në fund, Llatja vlerësoi dialogun me banorët si pjesë të rëndësishme të procesit të investimeve.

“Fakti që ju jeni sot këtu tregon se kemi besim tek njëri-tjetri, sepse kur diskutojmë së bashku, marrim edhe vendime të përbashkëta,” përfundoi Llatja.

Vijoi në Rajonin Nr. 4 turi i bashkëbisedimeve për buxhetin afatmesëm të Bashkisë së Elbasanit, ku fokusi i diskutimeve u vendos te projektet dhe investimet që pritet të transformojnë lagjet e qytetit gjatë viteve në vijim.

Gjatë takimit u prezantua paketa e investimeve për rehabilitimin e blloqeve të banimit, sistemimin e shesheve, ndriçimin modern, si dhe ndërhyrjet në infrastrukturën e kanalizimeve të ujërave të zeza. Një nga projektet kryesore të parashikuara është ndërhyrja te pallatet 496 dhe rehabilitimi total i lagjes “Visarion Xhuvani”, projekt që pritet të nisë së shpejti.

Po ashtu, Bashkia e Elbasanit ka planifikuar një fond prej 1.5 milionë eurosh për investime në lagjet e qytetit dhe blloqet e pallateve, ndërsa një tjetër paketë me të njëjtën vlerë do të shkojë për rrugët rurale të fshatrave të Elbasanit. Në fokus mbetet edhe infrastruktura arsimore, ku për herë të parë në një vit po rikonstruktohen njëkohësisht katër shkolla, me një investim që kap vlerën mbi 10 milionë euro.

Deputeti Adi Qose vuri në dukje se bashkëpunimi mes qytetarëve dhe bashkisë ka sjellë më shumë investime dhe projekte konkrete për komunitetin. Ai theksoi rëndësinë e dëgjesave publike si një mënyrë për të përcaktuar prioritetet reale të banorëve.

Ndërsa kryetari i Bashkisë së Elbasanit, Gledian Llatja, u shpreh se modeli i buxhetimit me pjesëmarrje ka krijuar një marrëdhënie të drejtpërdrejtë me qytetarët, duke bërë të mundur realizimin e një sërë investimesh në lagje të ndryshme të qytetit.

“Kemi krijuar një marrëdhënie të ndërmjetme, ku një sërë investimesh i kemi bërë të mundura nëpërmjet këtij modeli bashkëbisedimi. Kemi futur në buxhetin e këtij viti pallatet 496, për të bërë një investim fantastik dhe për të rehabilituar totalisht lagjen ‘Visarion Xhuvani’. Do të fillojmë punën shumë shpejt. Gjithashtu kemi parashikuar zgjidhjen e problemit të kanalizimeve të ujërave të zeza, sistemet moderne të ndriçimit dhe rikualifikimin e shesheve të pallateve”, tha Llatja.

Ai shtoi se Bashkia e Elbasanit do të vijojë konsultimet me banorët për të adresuar problematikat dhe prioritetet e çdo komuniteti në hartimin e buxhetit afatmesëm.

Bashkia Elbasan ka vijuar turin e takimeve me qytetarët në kuadër të hartimit të buxhetit afatmesëm 3-vjeçar në Rajonin Nr. 1, ku u diskutuan investimet me fokus përmirësimin e infrastrukturës, rritjen e cilësisë në arsim dhe krijimin e kushteve më të mira të jetesës për banorët.

I pranishëm në këtë takim ishte edhe deputeti Adi Qose, i cili vlerësoi buxhetin si një nga më të mirët për Bashkinë e Elbasanit.

Sipas tij, Rajoni Nr. 1 ka një potencial të veçantë zhvillimi dhe investimet e bashkisë janë të orientuara drejt përmirësimit të cilësisë së jetesës, kushteve në arsim dhe rritjes së mirëqenies ekonomike, në përputhje me standardet e Bashkimit Europian.

Kryebashkiaku Gledian Llatja bëri me dije se bashkia është në fazën përgatitore për nisjen e një sërë investimesh të reja. “Shumë shpejt përmbyllim të gjitha procedurat për projektet e pallateve dhe më pas do të vijojmë me procedurat e prokurimit, për të nisur investime në sheshet e pallateve, përfshirë zonën pas kopshtit nr. 9 dhe lagjen 41,” u shpreh Llatja.

Ai theksoi gjithashtu rëndësinë e një projekti të shumëpritur nga banorët, që lidhet me përmirësimin e infrastrukturës dhe lidhjen e lagjes “Emin Matraxhiu” me rrethrrotullimin tek “Kinezët” në rrugën “Borodin Mitarja ”. Ky investim pritet të nisë brenda këtij viti dhe tashmë është përfshirë në buxhet.

Në fushën e arsimit, Llatja u ndal te rikonstruksioni i shkollës “Naim Frashëri”, ku punimet po vijojnë me ritme të shpejta. Projekti përfshin edhe një shtesë të re në godine, duke krijuar kushte për zhvillimin e mësimit pa turne, me ambiente moderne si palestër, laboratorë dhe hapësira rekreative për nxënësit dhe komunitetin.

Sipas kryebashkiakut, ky është viti i parë që Bashkia e Elbasanit po realizon paralelisht rikonstruksionin e katër shkollave, ndërkohë që pritet edhe ndërtimi i një çerdheje të re në Rajonin Nr. 2, në zonën e Balashes, për t’i shërbyer zonave informale.

Në vijim të planit 3-vjeçar, bashkia synon ndërtimin e çerdheve të reja, rikonstruksionin e kopshteve dhe përmirësimin e mëtejshëm të infrastrukturës arsimore.

Duke u ndalur te rëndësia e këtyre takimeve, Llatja theksoi se ato shërbejnë për të marrë drejtpërdrejt mendimin e qytetarëve.