Ditë: 3 Tetor 2025

Bashkia Elbasan është shpallur fituese e nismës europiane “WiFi4WB”, duke siguruar financim për vendosjen e dy pikave të internetit falas (WiFi) në hapësira publike të qytetit. Ky sukses sjell një hap të rëndësishëm drejt zgjerimit të aksesit në internet publik dhe forcimit të përfshirjes dixhitale për qytetarët dhe vizitorët.

Iniciativa “WiFi4WB” synon instalimin e rrjeteve pa tel falas në pika kyçe të qyteteve të rajonit, duke përmirësuar lidhshmërinë dhe qasjen në shërbime online.

Në kuadër të këtij projekti, Bashkia Elbasan ndodhet aktualisht në fazën e përzgjedhjes së vendndodhjeve ku do të vendosen këto dy pika WiFi. Qëllimi është që ato të shërbejnë sa më mirë qytetarët, duke u vendosur në hapësira të frekuentuara si sheshe publike, parqe, apo pranë institucioneve publike.

Ky projekt pritet të rrisë aksesin në internet për banorët dhe vizitorët,  lehtësojë përdorimin e shërbimeve elektronike si edhe te forcojë imazhin e Elbasanit si një qytet i përparuar dixhitalisht.

Informacione të mëtejshme mbi vendndodhjet e sakta të pikave WiFi do të publikohen së shpejti në faqen zyrtare të Bashkisë Elbasan.

Kryetari i Bashkisë Elbasan, Gledian Llatja, priti sot në zyrën e tij Drejtorin Artistik të Festivalit Ndërkombëtar të Teatrit, Adionis Fiilipi, së bashku me trupat teatrore nga Turqia, Serbia dhe Greqia, të cilët këto ditë po marrin pjesë në edicionin e 27-të të këtij festivali që ka kthyer Elbasanin në një qendër të rëndësishme të artit dhe kulturës.

Gjatë takimit, u diskutua mbi rëndësinë e festivalit për promovimin e artit teatrore dhe trashëgimisë kulturore të qytetit, si dhe mbi bashkëpunimin e vazhdueshëm mes artistëve vendas dhe atyre ndërkombëtarë. Kryetari Llatja shprehu kënaqësinë e tij për mikpritjen e ofruar nga qyteti dhe theksoi se kultura dhe arti janë prioritete strategjike për zhvillimin e Elbasanit.

Artistët e huaj shprehën mirënjohje për ngrohtësinë dhe dashamirësinë e publikut elbasanas, për duartrokitjet e sinqerta dhe për atmosferën e veçantë që qyteti ofron gjatë festivalit. Ky edicion, që sjell trupa nga vendet e rajonit dhe më gjerë, është një rast unik për të lidhur kulturat dhe për të krijuar një dialog ndërkombëtar mbi teatrin dhe artin dramatik.

Festivali Ndërkombëtar i Teatrit, që prej 27 vitesh, ka qenë promovuesi më i mirë i artit dhe kulturës në Elbasan, duke kontribuar në afirmimin e trashëgimisë historike dhe artistike të qytetit dhe duke i ofruar publikut një përvojë të pasur artistike. Ky aktivitet i rëndësishëm rikthen çdo vit qytetin në skenën ndërkombëtare të artit, duke e bërë Elbasanin një destinacion kulturor për artistët dhe artdashësit nga e gjithë bota.

Ky takim dhe mikpritja e trupave teatrore theksojnë edhe një herë përkushtimin e Bashkisë për të mbështetur artin, talentin dhe dialogun kulturor, duke shndërruar Elbasanin në një qytet që jeton dhe frymëzohet nga arti.

Agjencia e Shërbimeve Publike Elbasan prej ditësh ka nisur punimet për pastrimin e Përroit të Gurres, në një gjatësi rreth 2 km.

Ky aksion ka për qëllim të parandalojë përmbytjet, duke mbrojtur qindra hektarë tokë bujqësore dhe dhjetëra banesa, në mënyrë që banorët e zonës të ndihen më të sigurt. Kujdesi i përvitshëm dhe puna paraprake janë garancia që komuniteti të jetë i mbrojtur përballë shirave që po afrohen.

Aksione të tilla të pastrimit dhe mirëmbajtjes së përrenjve zhvillohen sistematikisht çdo vit në territorin e Bashkisë Elbasan, sidomos në këtë prag dimri, për të reduktuar rrezikun nga përmbytjet dhe për të garantuar sigurinë e banorëve.