Ditë: 27 Tetor 2025

Procesi i buxhetimit me pjesëmarrje u zhvillua në Rajonin Nr. 6, ku banorët e ardhur në takim patën mundësinë të shprehin kërkesat dhe pritshmëritë e tyre për investimet e ardhshme.

Kryetarja e Këshillit të Qarkut, znj. Ermira Urupi, shprehu bindjen se të gjithë banorët pjesëmarrës në takim kanë ardhur për të shprehur kërkesat e tyre në këtë proces kaq të rëndësishëm për Elbasanin, i cili zhvillohet çdo muaj tetor për më shumë se një dekadë.

“Unë mendoj se ju keni ardhur edhe për të falenderuar punën që është bërë në Rajonin Nr. 6. Bashkë me mua të gjithë e dini që punohet në të gjithë Shqipërinë, punohet në 7 bashkitë e qarkut, por unë them që më shumë punohet në Bashkinë e Elbasanit. Jam e bindur që kërkesat që ju keni do të gjeni dakordësinë e institucionit dhe kryetarit.”

Kryetari i Bashkisë Elbasan, z. Gledian Llatja, u ndal tek investimet dhe projektet e realizuara, duke përmendur edhe banesat e riparuara për komunitetin rom dhe egjiptian.

“Nga kërkesat tuaja të vazhdueshme kemi arritur të riparojmë pjesërisht 215 banesa individuale por edhe pallate kolektive në të gjithë Elbasanin.”

Duke e vënë theksin tek investimet në rrugë, Llatja tha: “ kemi investuar në një sërë asfaltimesh. E nisëm me rrugën tek Koladuimi, pastaj me rrugët e brendshme, për të vazhduar me kërkesën e kahershme tuajën që është rruga “Arif Dardha”.

Sot është shtuar një rrugë me standard fantastik.

Kemi akoma shumë punë për të bërë dhe do t’i bëjmë, sepse për ne janë punët.

Ashtu si ishin rrugët tek ura e sektorit, një sërë rrugësh në vazhdimësi të cilat tashmë janë zgjidhur, kanë ecur investimet, janë bërë punë.”

Llatja foli më tej edhe për kanalizimet dhe përmirësimin e shesheve të pallateve.

“Kemi bërë kanalizimet e ujrave të zeza, sistemimin e një pjese të përrroit. Po fillojmë tek “5 Maji”, ato sheshet e pallateve, që ne i kemi pasur përherë problematikë dhe na kanë dalë tek procesi i buxhetimit me pjesëmarrje dhe sot aty po investohet.”

Pasi banorët dëgjuan investimet e kryera si edhe prioritetet e kryetarit të Bashkisë, ata vazhduan me votimin e kërkesave të tyre, të cilat janë përcaktuar si më prioritaret dhe do të kthehen në investime gjatë vitit të ardhshëm.

Në Universitetin “Aleksandër Xhuvani” Elbasan u zhvillua sot Konferenca Ndërkombëtare “Democracy at Crossroads: Resilient Cooperation and Peacebuilding”, e organizuar nga Peace Volunteering Netëork (PVN) në partneritet me universitetin. Aktiviteti solli në fokus forcimin e demokracisë, dialogun ndërsektorial dhe bashkëpunimin ndërinstitucional, duke theksuar rëndësinë e pjesëmarrjes qytetare dhe transparencës në qeverisjen lokale.

Konferenca u hap me përshëndetjet e Rektores Znj. Elvira Fetahu, e cila foli për rëndësinë e demokracisë dhe rolin e qytetarëve në zhvillimin e komuniteteve, kryetarit të Bashkisë z. Gledian Llatja, dhe të Drejtores Ekzekutive të PVN, Znj. Oltiana Rama.

Në aktivitet morën pjesë përfaqësues vendorë dhe ndërkombëtarë, përfshirë Znj. Tone Skindlo Taraldsen, koordinatore e përgjithshme e Arendal Ëeek në Norvegji, Znj. Frederique Hanotier nga Delegacioni i BE-së për të Drejtat e Njeriut dhe Demokracinë, dhe Z. Abdullahi M. Alason, këshilltar dhe ekspert në integrim dhe diversitet nga Norvegjia, . si edhe përfaqësues nga universitetet e Norvegjisë, Japonisë dhe Republikës Çeke.

Gjatë konferencës u theksua roli i Bashkisë Elbasan në forcimin e demokracisë vendore dhe nxitjen e pjesëmarrjes qytetare. Bashkia po hedh hapa konkretë përmes Forumit të Qeverisjes së Hapur (OGP Local), një nismë që synon të forcojë transparencën, llogaridhënien dhe përfshirjen e qytetarëve në vendimmarrje.

Ky forum përfaqëson një model të ri bashkëpunimi midis institucioneve, akademisë dhe komunitetit, një platformë dialogu ku zëri i qytetarëve bëhet pjesë e përditshme e qeverisjes vendore dhe instrument kryesor për ta bërë demokracinë të prekshme në jetën e qytetarëve.

Kryetari i Bashkisë Elbasan, Gledjan Llatja, gjatë fjalës së tij u ndal gjatë mbi rëndësinë e pjesëmarrjes qytetare, transparencës dhe bashkëpunimit ndërsektorial. Ai theksoi se demokracia nuk është një arritje statike, por një proces organik që ndërtohet çdo ditë përmes angazhimit dhe përgjegjësisë së qytetarëve.

 “Demokracia lulëzon kur qytetarët kanë besim te institucionet e tyre dhe kur debati publik është i hapur dhe i informuar. Sfida e dezinformimit, polarizimit dhe rënies së besimit kërkon angazhimin e të gjithë aktorëve shoqërorë, shoqërisë civile, medias, akademisë, sektorit privat dhe komuniteteve vendore.”

Pjesë e prezantimeve ishte edhe përvoja ndërkombëtare e Arendal Week në Norvegji, e prezantuar për të pranishmit nga Znj. Tone Skindlo Taraldsen

Llatja pohoi se pjesëmarrja në Arendal Week në Norvegji, ku qytetarët, institucionet dhe shoqëria civile bashkëpunojnë në dialog të hapur, ka frymëzuar iniciativat në Elbasan, duke filluar me Festivalin e Demokracisë dhe Forumet e Qeverisjes së Hapur.

“Në Arendal pashë nga afër sesi institucionet dhe qytetarët ndërveprojnë në një dialog konstruktiv dhe të hapur. Kjo përvojë na frymëzoi të sjellim praktikat më të mira në Elbasan, duke krijuar një model të veçantë të demokracisë vendore,” u shpreh Kryetari Llatja.

Bashkia e Elbasanit është e gatshme për të organizuar këtë nismë falë infrastrukturës organizative dhe bashkëpunuese, mbështetjes nga institucionet dhe partnerët, përvojës konkrete në qeverisje demokratike dhe një komuniteti aktiv e të ndërgjegjshëm qytetar. Festivali i Demokracisë shërben si një hapësirë e hapur për dialog qytetar, transparencë dhe ndërveprim institucional, ku zëri i çdo qytetari ka rëndësi. Përmes debateve publike, forumeve rinore, ekspozitave dhe aktiviteteve kulturore, qytetarët kanë mundësi të përjetojnë demokracinë si një proces të gjallë që ndërtohet çdo ditë, me përfshirje, respekt dhe besim të ndërsjellë.

Ky projekt shihet si vazhdim natyror i përpjekjeve të Bashkisë për ta bërë demokracinë të prekshme dhe domethënëse në jetën e përditshme të qytetarëve.

Qëndrueshmëria e modelit mbështetet në partneritete ndërkombëtare, bashkëpunim institucional, përvojë ndërkombëtare dhe pjesëmarrje aktive të shoqërisë civile dhe komunitetit lokal.

Forumet e Qeverisjes së Hapur funksionojnë si platforma kryesore ku qytetarët kontribuojnë drejtpërdrejt në vendimmarrje, duke promovuar transparencën, llogaridhënien dhe përfshirjen qytetare. Zbatimi i mekanizmave të konsultimit publik dhe buxhetimit me pjesëmarrje janë shembuj praktikë që tregojnë se qeverisja lokale funksionon nëpërmjet dialogut të hapur me qytetarët.

Si përfundim, ky model është një shembull praktik i demokracisë së hapur në veprim. Elbasani po ndërton një kulturë të re bashkëqeverisjeje, ku demokracia nuk mbetet vetëm ideal, por shndërrohet në praktikë të përditshme, përmes transparencës, dialogut dhe pjesëmarrjes qytetare, duke e bërë qytetin një shembull të veçantë të demokracisë vendore dhe bashkëpunimit ndërsektorial.

Elbasani ishte një nga ndalesat kryesore të “Seminar Week Albania”, aktivitet i organizuar nga NEWROPE – The Design in Dialogue Lab pranë ETH Zürich, ku morën pjesë studentë dhe arkitektë të rinj nga vende të ndryshme të botës.

Të udhëhequr nga arkitektja elbasanase Alba Canaj, pjesëmarrësit u njohën nga afër me rrugëtimin historik, industrial dhe kulturor të qytetit, duke vizituar Kalanë e Elbasanit dhe Kombinatin Metalurgjik, dikur simbol i zhvillimit socialist dhe sot një hapësirë me potencial të madh për rigjenerim urban, kreativitet dhe qëndrueshmëri.

Bashkia Elbasan ka dhënë mbështetjen e saj për zhvillimin e aktiviteteve të tilla që promovojnë qytetin dhe hapin mundësi të reja për bashkëpunim ndërkombëtar në fushën e arkitekturës, planifikimit urban dhe ruajtjes së trashëgimisë industriale.

Institucioni vendor vijon të jetë aktiv në nxitjen e projekteve që i japin jetë zonave në transformim dhe që kontribuojnë në modernizimin e qytetit.

Vizita synoi të nxisë dialog mbi të ardhmen e zonave të braktisura industriale dhe shndërrimin e tyre në vatra të reja zhvillimi, duke reflektuar mbi konceptin “Liria në fundin e historisë” dhe rolin që qytete si Elbasani mund të luajnë në të ardhmen europiane.

Elbasani vazhdon të frymëzojë si qytet i transformimit, i ideve të reja dhe i mundësive për një zhvillim bashkëkohor që respekton trashëgiminë.

Shkolla 9-vjeçare e Shushicës do të nisë rikonstruksionin total brenda vitit 2025, duke hapur një kapitull të ri për 314 nxënës dhe 33 mësues që çdo ditë japin më të mirën për edukimin e brezit të ri.

Lajmin e ka bërë të ditur Kryetari i Bashkisë Elbasan, Gledian Llatja, i cili theksoi se ky është një investim i shumëpritur dhe i kërkuar prej kohësh nga komuniteti lokal.
“Shkolla e Shushicës ka qenë një ndër prioritetet e vazhdueshme të komunitetit në procesin e buxhetimit me pjesëmarrje. Tashmë, ky projekt do të bëhet realitet, duke ofruar kushte bashkëkohore dhe një mjedis dinjitoz për nxënësit dhe mësuesit,” u shpreh Llatja.

Njëkohësisht, në fund të këtij viti bëhet e ditur se do të nisin punimet edhe për rikonstruksionin total të gjimnazit “Dhaskal Todri” dhe të shkollës 9-vjeçare “Naim Frashëri”, dy institucione të rëndësishme arsimore të qytetit, që do të përfitojnë ambiente moderne dhe standarde të reja infrastrukturore.
Këto investime janë pjesë e vizionit të Bashkisë Elbasan për të forcuar sistemin arsimor, duke krijuar kushte optimale për zhvillimin e dijes dhe të brezit të ri.