Ditë: 30 Tetor 2025

Kryetari i Bashkisë Elbasan, Gledian Llatja, së bashku me drejtoreshën e ZVA Elbasan, Vesa Liço, morën pjesë në aktivitetin e zhvilluar në gjimnazin “Kostandin Kristoforidhi”, në kuadër të Tetorit Rozë, muajit të ndërgjegjësimit për kancerin e gjirit.

Në këtë aktivitet, nxënësit sollën interpretime artistike, recitime dhe mesazhe sensibilizuese, duke përcjellë ndjenja të forta empatie dhe solidariteti.

Kryetari Llatja përgëzoi mësuesit, nxënësit dhe prindërit për angazhimin e tyre, si dhe për historitë personale dhe shembujt frymëzues të forcës e kurajos që u ndanë me pjesëmarrësit.

“Një aktivitet vërtet domethënës, që na kujton se sa e rëndësishme është të flasim për këto tema me dashuri, mirëkuptim dhe mbështetje ndaj njëri-tjetrit,” u shpreh Llatja.

Në një atmosferë të ngrohtë dhe domethënëse, Tetori Rozë u bashkua bukur me Tetorin e Librit, duke sjellë një mesazh të përbashkët për dashurinë ndaj jetës, fuqinë e shpirtit dhe rëndësinë e kujdesit për shëndetin.

“Kur hedhim mbeturinat në koshin e duhur, nuk po pastrojmë vetëm shkollën tonë, por po kujdesemi për të ardhmen.”

Kështu shprehen nxënësit aktivistë të gjimnazeve të Elbasanit, të cilët u bënë pjesë e vendosjes së koshave për ndarjen e mbetjeve në burim, një nismë që po merr jetë në kuadër të projektit #Youth4CleanAir, në bashkëpunim mes Bashkisë së Elbasanit dhe Ambasadës Suedeze.

Në gjashtë shkolla të mesme të qytetit janë vendosur koshat për plastikën, metalin dhe letrën, një hap i parë drejt krijimit të një kulture të re mjedisore në mesin e të rinjve. Qëllimi është i qartë, të mësohet që në bankat e shkollës se mbetjet nuk janë thjesht hedhje, por përgjegjësi.

Në takimin me nxënësit, Kryebashkiaku Gledian Llatja u shpreh se ky është vetëm fillimi i një ndryshimi që duhet të nisë nga brezi i ri:

 “Qëllimi i këtij akti është që të gjithë të rinjtë në gjimnaze të ndërgjegjësohen dhe të mësojnë të hedhin mbetjet në koshat e duhur, për një të ardhme më të shëndetshme. Falënderoj iniciatorët e këtij procesi, por edhe të gjithë të rinjtë që e mbështesin këtë nismë.

Bashkia e Elbasanit do t’ju vijë në ndihmë me të gjitha materialet që ju kërkoni, dhe jam i bindur se edhe bizneset e qytetit do të jenë pjesë e këtij procesi që kemi nisur së bashku.

Është shumë e rëndësishme që vetë shkollat dhe të rinjtë të bëjnë ndarjen e mbetjeve, që të bëhemi burim i riciklimit. Shkollat janë vendi më i mirë për ta nisur këtë ndryshim.

Këtë vit po e fillojmë në gjashtë shkolla, ndërsa në janar do ta zgjerojmë në të gjitha shkollat e Elbasanit. Ky projekt duhet të na bashkojë të gjithëve për të ndërtuar një shoqëri më të ndërgjegjshme dhe një mjedis më të pastër,” tha Llatja.

Me mbështetjen e Ambasadës Suedeze dhe përfshirjen e vetë nxënësve, Bashkia e Elbasanit po e shndërron këtë projekt në një platformë edukimi praktik, ku çdo kosh i vendosur në shkollë bëhet simbol i përgjegjësisë qytetare.

Në përmbyllje të aktiviteteve në kuadër të “Tetorit Rozë, muajit të ndërgjegjësimit mbi kancerin e gjirit, Bashkia Elbasan organizon “Marshim për Jetën”. 

Ky marshim ka qëllim rritjen e ndërgjegjësimit mbi rëndësinë e diagnostikimit të hershëm dhe kujdesit shëndetësor për gratë.

Aktiviteti synon solidarizimin me ato gra e vajza që sot luftojnë për jetën dhe përçimin e mesazheve rë shpresës, forcës dhe kurajos.

📅 Data:31 Tetor 2025

🕛 Ora:12:00

📍 Nisja:Nga Teatri “Skampa”

📍 Destinacioni:Sheshi “Gensher”

Me moton *“Gratë për Gratë”*, ftojmë të gjithë qytetarët të marrin pjesë në këtë nismë që mbart mesazhin e jetës, forcës dhe shpresës.

Ky Aktivitet zhvillohet nga: Bashkia Elbasan në bashkëpunim me

Këshillin e Qarkut Elbasan,

Zyrën Arsimore Elbasan

Operatorin e Kujdesit Shëndetësor

Zyrën e Punës Elbasan, Shërbimi Social si dhe me mbështetjen e partnerëve dhe organizatave: World Vision, AKPA, OSH KSH, Forumi i Gruas Elbasan,Yjet e Ardhmërisë dhe aktorë të tjerë lokalë.

Në kuadër të muajit tetor, i njohur si muaji i librit, Biblioteka e Qytetit të Elbasanit ka zhvilluar një sërë aktivitetesh kulturore e edukative për të nxitur dashurinë ndaj leximit. Në mbyllje të këtij muaji të veçantë, Bashkia e Elbasanit ka vendosur t’i japë një tjetër dimension nismave për librin, përmes dhurimit të 108 botimeve të reja për pasurimin e bibliotekave të shkollës “Fadil Gurmani” dhe asaj “Alush Lleshanaku” në Bradashesh.

Kryetari i Bashkisë së Elbasanit, Gledian Llatja, gjatë ceremonisë së dorëzimit të librave, theksoi se kujdesi i bashkisë nuk kufizohet vetëm te infrastruktura shkollore, por shtrihet edhe te pasurimi i jetës kulturore e arsimore të nxënësve.

“Në fokus të Bashkisë së Elbasanit nuk është vetëm infrastruktura shkollore, por padyshim edhe pasurimi i bibliotekave dhe rehabilitimi i terreneve sportive apo laboratorëve. Shkolla ‘Fadil Gurmani’ sot plotëson të gjitha kushtet e infrastrukturës dhe ka një staf të shkëlqyer pedagogjik, por të gjitha këto do të ishin të pamjaftueshme pa pasuruar edhe bibliotekën,” u shpreh Llatja.

Në një kohë kur teknologjia po fiton gjithnjë e më shumë hapësirë në jetën e fëmijëve, kryebashkiaku Llatja theksoi nevojën për të mbajtur të gjallë pasionin për leximin.

 “Sot, kur libri sfidohet çdo ditë nga fuqia e jashtëzakonshme e teknologjisë, detyra jonë për të rritur fëmijë të lexuar, që e duan librin, bëhet edhe më e madhe,” shtoi ai, duke nënvizuar se tetori nuk shërben thjesht për të kujtuar rëndësinë e librit, por për të forcuar përpjekjet e përvitshme për promovimin e tij.

Librat e dhuruar përfshijnë autorë të njohur të letërsisë botërore dhe shqiptare, si Heminguej, Tomas Man, Mopasan, Balzak e shumë të tjerë, duke pasuruar ndjeshëm fondin letrar të këtyre shkollave.

“Biblioteka e shkollës, ashtu si ajo e qytetit, duhet të rimarrë rëndësinë që i takon për vetë pasurinë e paçmuar që mbart. Ne besojmë se libri mbetet ura më e fortë që lidh dijen me brezat. Pasuria e dijes nis nga libri,” përfundoi Llatja.

Përmes kësaj nisme, Bashkia e Elbasanit vijon të mbështesë projektet që nxisin kulturën e leximit dhe zhvillimin e një edukimi gjithëpërfshirës, duke e vendosur librin dhe dijen në qendër të vëmendjes publike.