Muaj: Nëntor 2025

Në qytetin e Elbasanit po vijon me intensitet aksioni për çlirimin e hapësirave publike.

Fadromat dhe ekipet e shërbimeve bashkiake janë të pranishme në disa zona të qytetit, duke mundësuar prishjen e ndërtimeve dhe strukturave që kanë zënë trotuare, rrugë apo ambiente të përbashkëta.

Ky operacion, i cili po shtrihet në të gjitha lagjet e qytetit, ka si qëllim rikthimin e hapësirave publike në funksion të qytetarëve dhe lëvizjes së lirë. “Çdo hapësirë i kthehet qytetarëve për përdorim të përbashkët dhe për një qytet më të hapur e më të rregullt,” thekson kryetari i Bashkisë z. Gledian Llatja

Aksioni është fokusuar në prishjen e objekteve pa leje, kioska, dhe ndërtime të tjera që pengonin qarkullimin apo shfrytëzimin publik të ambienteve.

Banorët e Elbasanit e kanë mirëpritur aksionin, duke e konsideruar një hap të rëndësishëm për përmirësimin e jetës urbane dhe kthimin e hapësirave të përbashkëta në funksion të komunitetit.

Aksioni për çlirimin e hapësirave publike në Elbasan do të vijojë edhe në ditët në vijim, deri në përfundimin e plotë të ndërhyrjeve të planifikuara në të gjithë territorin e bashkisë.

Në ambientet e Bashkisë Elbasan u zhvillua sot takimi me përfaqësuesit e projektit rajonal “Convergence for Environmental Justice (CEJ)”, një nismë e financuar nga Agjencia Franceze për Zhvillim (AFD) dhe Expertise France, ku u prezantua Raporti i Vlerësimit të Nevojave për Pjesëmarrjen Publike në Qeverisjen Mjedisore.

Në këtë aktivitet morën pjesë përfaqësues të projektit CEJ, AFD, Expertise France, drejtues të Bashkisë Elbasan, anëtarë të Forumit të Qeverisjes së Hapur (OGP Local) dhe përfaqësues të organizatave partnere të shoqërisë civile.

E pranishme në takim ishte edhe Nënkryetarja e Bashkisë Elbasan, znj. Klaudja Krasnika, e cila theksoi rëndësinë e forcimit të partneritetit mes institucioneve vendore dhe komunitetit në ndërtimin e një qeverisjeje më të hapur dhe më të gjelbër.

“Bashkia Elbasan ka qenë gjithmonë e angazhuar për të ndërtuar politika mjedisore të bazuara në pjesëmarrjen e qytetarëve dhe transparencë institucionale. Ky raport përfaqëson një hap të rëndësishëm drejt forcimit të kulturës së bashkëpunimit dhe llogaridhënies në nivel vendor,”  u shpreh znj. Klaudja Krasnika, Nënkryetare e Bashkisë Elbasan.

Raporti, i përgatitur gjatë vitit 2025 në bashkëpunim me strukturat e Bashkisë Elbasan, ofron një analizë të thelluar mbi mënyrën se si qytetarët përfshihen në vendimmarrjen mjedisore dhe si mund të përmirësohen mekanizmat e transparencës dhe konsultimit publik.

Në Elbasan janë identifikuar dy fusha pilotuese për zbatim.

Buxhetimi me pjesëmarrje, si një proces tashmë i konsoliduar që garanton zërin e qytetarëve në vendimmarrje. Konsultimet publike për Vlerësimin e Ndikimit në Mjedis (VNM), që do të forcohen përmes bashkëpunimit më të ngushtë midis Bashkisë dhe Agjencisë Rajonale të Mjedisit.

Elbasani është ndër bashkitë e para në vend që ka integruar parimet e Partneritetit për Qeverisje të Hapur (OGP Local) në politikat vendore, duke ndërtuar një forum të përhershëm qytetar për hartimin e politikave lokale. Ky forum do të shërbejë si platformë kyçe për zbatimin e rekomandimeve të raportit CEJ dhe për nxitjen e pjesëmarrjes së qytetarëve në qeverisjen mjedisore.

Raporti vlerëson Elbasanin si një nga bashkitë me përvojën më të konsoliduar në buxhetimin me pjesëmarrje dhe me potencial për të shndërruar qeverisjen mjedisore në një praktikë model.

Në bashkëpunim me projektin CEJ dhe partnerët ndërkombëtarë, Bashkia Elbasan do të vijojë zbatimin e mjeteve inovative për pjesëmarrje publike, duke ndërtuar një model të qëndrueshëm për qeverisje të hapur dhe të gjelbër.

Shkolla “Naim Frashëri” në Elbasan do të jetë një nga kantieret e hapur, pjesë e investimeve për transformimin e infrastrukturës arsimore duke iu nënshtruar një rikonstruksioni total.

Ky investim i shumëpritur do të sjellë ndryshime thelbësisht pozitive për 730 nxënës që do të mësojnë në mjedise të reja me kushte bashkëkohore si dhe për 72 mësuesit që kontribuojnë çdo ditë në edukimin e brezave të rinj.

Rikonstruksioni total i cili do të nisë brenda këtij viti do të përfshijë ndërhyrje të thelluara në të gjithë strukturën e shkollës, duke garantuar siguri, komoditet dhe standarde moderne për një mjedis të denjë arsimor.

“Arsimi është themeli i të tashmes dhe të ardhmes, ndaj përmes këtij investimi dhe jo vetëm, po ndërtojmë më shumë mundësi për fëmijët dhe nxënësit e Elbasanit”, tha kryetari i bashkisë Gledian Llatja.

Prej më shumë se një dekade kjo shkollë kryente mësimin me dy turne dhe gjithnjë ka qenë kërkesë e kreut të bashkisë, duke lobuar në ministrinë dhe qeverinë për rikonstruksionin total të kësaj shkolle të vjetër në Elbasan, e cila ka nxjerrë breza të talentuar nxënësish për më shumë se 50 vite, duke ruajtur një muze të vyer me figurat që u kanë dhënë zë arsimit në Elbasan.

Shkolla “Naim Frashëri” e themeluar për herë të parë në vitin 1908 është një ndër institucionet më të hershme arsimore në qytetin e Elbasanit. Godina aktuale ku funksionon shkolla është ndërtuar në vitin 1967 dhe që prej asaj kohe ka shërbyer si një vatër e rëndësishme formimi për breza të tërë nxënësish. Me një traditë të gjatë dhe staf të përkushtuar pedagogjik, shkolla ka ruajtur një identitet të fortë arsimor, duke kontribuar ndjeshëm në edukimin e fëmijëve të qytetit. Brenda saj ndodhet edhe një kënd muzeal, që përkujton figurat më të shquara që kanë kontribuar në historinë e arsimit në Elbasan.

Me këtë rikonstruksion, ajo nuk do të jetë vetëm një shkollë moderne, por edhe një simbol i respektit për trashëgiminë dhe përkushtimit për të ardhmen.

Bashkia Elbasan vijon të qëndrojë pranë qytetarëve duke ofruar asistencë falas për përdorimin e platformës elektronike e-Albania, me qëllim lehtësimin e marrjes së shërbimeve publike dhe rritjen e aksesit në shërbimet digjitale.

Në të gjitha zyrat e bashkisë dhe njësive administrative, qytetarët që kanë nevojë për ndihmë në aplikime, plotësim formularësh apo procedura të tjera online, mund të marrin mbështetjen e nevojshme nga stafi i dedikuar, në mënyrë të sigurt, të saktë dhe pa asnjë kosto.

Veçanërisht, vëmendje e veçantë i kushtohet pensionistëve dhe shtresave në nevojë, të cilët shpesh hasin vështirësi me përdorimin e shërbimeve digjitale. Stafi i Bashkisë Elbasan është i angazhuar t’i udhëheqë hap pas hapi në çdo procedurë, duke garantuar që asnjë qytetar të mos mbetet pa shërbimin që i takon.

Kjo nismë është pjesë e angazhimit të vazhdueshëm të Bashkisë Elbasan për të ofruar shërbime më pranë qytetarëve, duke e bërë administratën lokale më të afërt, më efikase dhe më njerëzore. Kujdesi për qytetarët nuk është vetëm detyrë, por përgjegjësi dhe respekt.

Bashkia Elbasan, nën drejtimin e Kryetarit Gledian Llatja, ka nisur një nismë të re që synon përmirësimin e cilësisë së shërbimeve publike dhe mirëmbajtjen e hapësirave të përbashkëta në të gjithë territorin e bashkisë.

Nëpërmjet Agjencisë së Shërbimeve Publike, ka filluar vendosja e koshave të rinj të mbeturinave në të gjitha njësitë administrative, si pjesë e planit të Bashkisë për rritjen e standardeve të higjienës urbane.

Kryetari i Bashkisë Elbasan, z. Gledian Llatja, ka theksuar se ky investim është pjesë e vizionit për një qytet më të pastër, dhe më të qëndrueshëm mjedisor. “Pastrimi dhe mirëmbajtja e hapësirave publike janë pjesë e një strategjie të gjerë për zhvillim të qëndrueshëm. Ne po punojmë çdo ditë që Elbasani të jetë një shembull në menaxhimin e mbetjeve dhe në ndërgjegjësimin qytetar për kujdes ndaj mjedisit,” u shpreh Llatja.

Bashkia Elbasan fton qytetarët dhe bizneset të bashkëpunojnë, duke hedhur mbetjet vetëm në vendet e përcaktuara dhe duke kontribuar së bashku për një mjedis më të pastër dhe të shëndetshëm për të gjithë.

Një nga objektivat më të rëndësishëm për qytetin e Elbasanit, furnizimi i qëndrueshëm me ujë të pijshëm 24 orë në ditë, po bëhet realitet falë investimeve të reja që po ndërmerren në këtë drejtim.

Në mbledhjen e fundit të Këshillit Teknik të Agjencisë Kombëtare të Ujësjellës-Kanalizimeve, është miratuar projekti “Rehabilitimi i rrjetit të ujësjellësit të qytetit të Elbasanit”, një ndërhyrje e rëndësishme që do të mundësojë përmirësimin e ndjeshëm të furnizimit me ujë për të gjithë qytetarët.

Ky projekt parashikon modernizimin e rrjetit ekzistues, uljen e humbjeve teknike, si dhe rritjen e cilësisë së shërbimit, me qëllim që çdo banor i Elbasanit të ketë ujë të pijshëm pa ndërprerje, 24 orë në ditë.

Në këtë mbledhje mori pjesë edhe Kryetari i Bashkisë Elbasan, z. Gledian Llatja, i cili vlerësoi miratimin e projektit si një hap të madh përpara në përmirësimin e jetesës së qytetarëve dhe forcimin e shërbimeve bazë që garanton bashkia.

Ai theksoi se Bashkia Elbasan do të vazhdojë të bashkëpunojë ngushtë me institucionet qendrore për të siguruar që çdo investim të sjellë ndikim real në përditshmërinë e komunitetit.

Me këtë projekt, Bashkia Elbasan po rrit standardet e shërbimeve publike dhe po e kthen qytetin në një model të qëndrueshëm, të pastër dhe me infrastrukturë moderne që i përgjigjet nevojave të çdo banori.

Një aksion i gjerë pastrimi është zhvilluar në fshatin Fushë-Buall, në njësinë administrative Shushicë, ku rreth 180 vullnetarë janë bërë pjesë e nismës për pastrimin e përrenjve malorë.

Ky aktivitet u organizua në bashkëpunim mes Bashkisë Elbasan dhe Organizatës “Rrjedha”, që për herë të katërt ndërmerr veprime konkrete për mbrojtjen e rrjedhave ujore në zonat malore.

Përroi i Fushë-Buallit njihet si një nga zonat më të bukura dhe më të pasura me burime ujore, me potencial të madh turistik, por është prekur nga mbetjet që hidhen pa kriter nëpër përrenj, të cilat më pas përfundojnë në rrjedhën e lumit Shkumbin dhe në tokat bujqësore të Shushicës.

Kryetari i Bashkisë Elbasan, Gledian Llatja, gjatë aksionit tha se përveç pastrimit fizik, është ndërmarrë edhe një sesion informimi për banorët e zonës mbi rëndësinë e ruajtjes së mjedisit.

“Kemi nisur një fushatë ndërgjegjësuese që banorët të hedhin mbetjet në vendet e caktuara dhe jo në përrenjtë malorë. Falenderoj organizatën ‘Rrjedha’ për bashkëpunimin, sepse qëllimi ynë është t’i kemi të pastra të gjitha rrjedhat malore, në mënyrë që mbetjet e malit të mos përfundojnë në lumë e më pas në det. Kjo është një sipërmarrje që do ta vazhdojmë në të gjitha zonat malore”, u shpreh Llatja.

Në aksion morën pjesë edhe nxënës të shkollave të zonës, të cilët kontribuan në pastrimin dhe sensibilizimin e komunitetit për mbrojtjen e mjedisit.

Përfaqësuesja e Organizatës “Rrjedha” theksoi se bashkëpunimi me Bashkinë Elbasan dhe njësinë administrative Shushicë është pjesë e një projekti më të gjerë që synon ruajtjen e ekosistemeve ujore dhe promovimin e turizmit të qëndrueshëm në zonat malore.

“Ky është aksioni ynë i katërt në këtë territor. Synimi është të pastrojmë çdo përrua që derdhet në Shkumbin, duke reduktuar ndotjen dhe duke kthyer natyrën në gjendjen e saj të pastër”, u shpreh ajo.

 Nisma “Rrjedha” pritet të shtrihet edhe në zona të tjera të Bashkisë Elbasan në javët në vijim, me fokus te pastrimi i burimeve malore, edukimi mjedisor dhe përfshirja e sa më shumë vullnetarëve të rinj.