Lajme

Një nga gjimnazet më të njohura në qytetin e Elbasanit, “Dhaskal Todri”, pritet t’i nënshtrohet së shpejti një rikonstruksioni të plotë. Lajmi u bë i ditur gjatë një vizite të përbashkët në shkollë nga Ministrja e Arsimit dhe Sportit, Ogerta Manastirliu, dhe kryetari i Bashkisë Elbasan, Gledian Llatja.

Investimi i ri do të sjellë kushte moderne për 607 nxënës dhe 42 mësues, duke transformuar tërësisht infrastrukturën e institucionit dhe duke garantuar një mjedis të sigurt dhe funksional për të gjithë komunitetin shkollor.

Punimet për ndërtimin e shkollës së re 9- të vjeçare “Jonuz Carçiu” në Tregan janë drejt përfundimit dhe pritet që në shtator ajo të hapë dyert për mbi 200 nxënës të zonës. Ministrja e Arsimit dhe Sportit, Ogerta Manastirliu, dhe Kryetari i Bashkisë Elbasan, Gledian Llatja, panë nga afër ecurinë e punimeve dhe ndanë mesazhet e tyre për këtë investim të rëndësishëm në infrastrukturën arsimore.

Kryebashkiaku Llatja shprehu një falenderim të madh, sepse sipas tij ” shkolla ‘Jonuz Carçiu’ në Tregan ishte një nga ato kërkesat tona dhe patjetër, pas një sërë investimesh të tjera që kemi pasur në Elbasan në infrastrukturën shkollore, shkolla tashmë është realitet dhe bëhet gati për në shtator të hapim dyert. Të gjithë nxënësit e njësisë administrative Tregan, por edhe një pjesë të njësisë administrative Gjergjan, Bujarasit dhe Kodra e Bujarasit, të cilët e përdorin këtë shkollë, do të kenë kushte shumë të mira. Në shtator vijnë edhe bankat e reja, e gjithë baza logjistike. Ne kemi punuar në vazhdimësi edhe me drejtorinë e shkollës me projekte, pasi presim edhe një laborator shumë të mirë të IT-së. Njerëzit këtu e kanë kërkuar shkollën, edhe nxënësit. Kemi 200 nxënës, kemi 15 fëmijë në kopsht. Është një strukturë e cila në fakt na ka shërbyer edhe për kopshtin e ri edhe për shkollën e re. I kemi bashkuar të dyja bashkë me ndarje të veçanta, ashtu siç kërkon edhe rregullorja e re. “

Ai theksoi se ky model i ri duhet të përhapet edhe në zona të tjera.  “Është një model i ri që ne duam të bëjmë për njësitë tona administrative, edhe për fëmijët tanë, por edhe për t’u kthyer në një qendër komunitare të mirëfilltë për zonën. Unë kam një falenderim edhe për tre projektet të cilat pritet të fillojnë këtë vit. Gjimnazi “Dhaskal Todri” është gjimnazi kryesor i Elbasanit dhe dua ‘’ju falenderoj shumë për të gjithë mbështetjen që na keni dhënë për rikonstruksionin e tij, i cili fillon shumë shpejt. Shkolla “Naim Frashëri” është shkolla qendrore e qytetit të Elbasanit,  është një shkollë e amortizuar që kërkonte ndërhyrje dhe po bëhet realitet.”

Llatja shtoi se investimet nuk janë përqendruar vetëm në qytet. “Ndërkohë, nuk kemi parë vetëm shkollat e qytetit, ashtu siç ka qenë edhe projekti dhe vizioni juaj si ministre që të shohim edhe njësitë administrative, dhe prandaj edhe miratimi juaj për shkollën e njësisë administrative Shushicë, e cila është njësia më e madhe administrative që ne kemi në Bashkinë e Elbasanit, tashmë bëhet realitet me rikonstruksionin e saj. Terrenet sportive i bëmë bashkarisht vitin që kaloi në shkollën e Shushicës dhe ishte një projekt shumë i mirë që e ka shfrytëzuar sot komuniteti, ashtu siç do të shfrytëzojë edhe palestrën e re këtu në ‘Jonuz Carçiu’ në Tregan.”

Nga ana e saj, Ministrja e Arsimit dhe Sportit, Ogerta Manastirliu, tha se ” jam e kënaqur që shohim sesi investimet që ne kemi bërë vit pas viti tashmë janë duke u finalizuar dhe po hapim kantieret e reja në infrastrukturën arsimore në të gjithë vendin. Jam e kënaqur që këtu në Elbasan, në njësinë administrative Tregan, të kemi një shkollë të re e cila do të mirëpresë rreth 200 fëmijë, duke përfshirë këtu një kompleks arsimor pasi kemi edhe kopshtin për fëmijët dhe gjithashtu edhe shkollën me ambiente tërësisht të reja, sepse është një shkollë e cila është ndërtuar e re me standardet më të mira të shkollave.”

Ministrja theksoi rëndësinë e standardeve bashkëkohore, “gjithashtu është një shkollë e cila do të ketë jo vetëm klasat, laboratorët, por gjithashtu edhe palestrën dhe ambientet sportive dhe të gjithë oborrin e shkollës në funksion të programeve të cilat ne tashmë i kemi në shkollat tona, sikurse është edhe programi ‘Art e Zeje’, sikurse është edhe shkolla qendër komunitare.”

“Jam e kënaqur që ne për Elbasanin kemi investuar në vazhdimësi, ashtu sikurse edhe në të gjitha bashkitë në vendin tonë, pasi për ne investimi në infrastrukturën arsimore është thelbësor për cilësinë në arsim, për krijimin e kushteve edhe më të mira të punës për mësuesit tanë, e gjithashtu për të arritur ato standarde dhe edukim që ne duam. Në Bashkinë e Elbasanit ne vijojmë edhe me tre projekte të tjera të miratuara nga Ministria e Arsimit dhe Sportit në bashkëpunim me bashkinë. Janë tre shkolla të cilat do të kenë mundësi që të rehabilitohen me standardet më të mira, e gjithashtu për t’u shërbyer më shumë se 1.600 nxënësve të Bashkisë Elbasan, të cilët do të kenë kushte dhe standarde bashkëkohore falë këtyre investimeve që ne jemi duke bërë.” Në fund të fjalës së saj, Manastirliu u ndal te bashkëpunimi me mësuesit. “Ndaj unë besoj shumë që, falë bashkëpunimit, dua të falenderoj dhe të shpreh mirënjohjen edhe për durimin që keni treguar, stafit arsimor, drejtorisë së shkollës, mësuesve tanë, të gjithë stafit që vërtet, me shumë sakrifica e përkushtim, ka punuar vit pas viti edhe jo në kushte kaq të mira, por tashmë ndjehemi mirë që bashkë me kryetarin e bashkisë dhe me ekipin Ministrisë dhe të Bashkisë Elbasan kemi arritur që të sjellim një investim vërtet të domethënës për Treganin, një shkollë të re,  sikurse janë të gjitha shkollat e reja, një qendër, një pikë referimi për edukimin dhe arsimimin e brezave të rinj.”

Ministri i Shtetit për Pushtetin Vendor, Arbjan Mazniku, zhvilloi sot një vizitë në sportelet e dedikuara të Bashkisë Elbasan, ku ofrohet asistencë për përdorimin e portalit e-Albania. I shoqëruar nga Kryetari i Bashkisë, Gledian Llatja, Ministri Mazniku u njoh nga afër me funksionimin e këtyre zyrave dhe bashkëbisedoi me qytetarë dhe stafin.

Kryebashkiaku Llatja theksoi se Bashkia Elbasan ka një rrjet prej 19 zyrash të shpërndara në të gjithë territorin për të ndihmuar qytetarët me aplikimet online:

“Kemi kohë që ofrojmë në Bashkinë e Elbasanit asistencë për përdorimin e portalit e-Albania. Ky shërbim ofrohet falas, në çdo njësi administrative, me qëllim që qytetarët të mos udhëtojnë deri në qytet. Krahas këtij shërbimi, kemi vënë në funksion edhe sportelet ‘One Stop Shop’, ku ofrohen të gjitha shërbimet e bashkisë në një pikë të vetme. U bëj thirrje qytetarëve të mos përdorin shërbimet me pagesë, pasi ne e ofrojmë këtë ndihmë pa kosto dhe me profesionalizëm.”

Ministri Mazniku vlerësoi modelin e ofruar nga Bashkia Elbasan, duke pohuar se “ portali e-Albania u ka dhënë qytetarëve mundësinë të aksesojnë shërbimet publike online, por për shumë prej tyre, sidomos të moshuarit apo ata që nuk kanë njohuri teknologjike, asistenca është thelbësore. Është shumë e rëndësishme që në çdo njësi administrative të Bashkisë Elbasan ofrohet ndihmë falas nga stafi i bashkisë, pa qenë nevoja të përdorin shërbime private. Ky është një shembull i mirë se si pushteti vendor vjen realisht në ndihmë të qytetarit.”

Ky model i shërbimeve publike dixhitale pa pagesë, i shtrirë në gjithë territorin e bashkisë, synon të rrisë aksesin, barazinë dhe përfshirjen digjitale të qytetarëve të Elbasanit.

Nga data 11 deri më 13 korrik, Sheshi “Gensher” në Elbasan ka qenë epiqendra e “Festës së Miqësisë”, një ngjarje tashmë tradicionale që këtë vit feston 10-vjetorin e saj.

Në bashkëpunim me Birra Elbar, kjo festë ka sjellë për qytetarët dhe vizitorët tre netë me muzikë live, performanca artistësh të njohur dhe një atmosferë të ngrohtë e mikpritëse.

Kryetari i Bashkisë Elbasan, z. Gledian Llatja, ka qenë i pranishëm në aktivitet, duke përshëndetur qytetarët dhe duke theksuar rëndësinë që kanë eventet kulturore dhe festive në jetën e komunitetit. “Festa e Miqësisë është tashmë një ngjarje e përvitshme që i jep Elbasanit një tjetër ritëm gjatë verës dhe forcon lidhjen mes qytetarëve,” u shpreh z. Llatja.

Artistë si Lorenc Hasrama, Mateus Frroku, West Side Family, Eranda Libohova, Rea Nuhu, Aroilda, 3 Musketjerët dhe Renis Gjoka kanë dhuruar performanca të paharrueshme për publikun.

Elbasani ishte qyteti i parë ku nisi ky edicion jubilar, duke konfirmuar edhe një herë se qyteti është një qendër e rëndësishme e aktiviteteve kulturore dhe festive në nivel kombëtar.

Bashkia Elbasan falënderon qytetarët për pjesëmarrjen dhe mirëkuptimin, si dhe partnerët që bëjnë të mundur organizimin e ngjarjeve të tilla në qytetin tonë.

Në qytetin e Elbasanit po vijon aksioni për lirimin e hapësirave publike të zëna në mënyrë abuzive nga bizneset. Inspektorati Kombëtar i Mbrojtjes së Territorit (IKMT) dhe Policia Bashkiake e Elbasanit po zhvillojnë aksionin, i cili ka për qëllim kthimin e trotuareve dhe lulishteve në përdorim të lirë për qytetarët, duke siguruar një ambient të rregullt dhe tërheqës, që të promovojë më mirë potencialin e Elbasanit.

Autoritetet kanë dërguar njoftime paraprake ndaj bizneseve për largimin vullnetar të strukturave që pengojnë kalimin, ndërsa për rastet pa përgjigje kanë nisur heqjet nga IKMT.

Në vijim, pritet të shtohen aksionet dhe kontrollet nga ana e institucioneve përgjegjëse për monitorimin e zbatimit të ligjit në hapësirat publike, me qëllim ruajtjen dhe mbrojtjen e tyre afatgjatë.

Bashkia e Elbasanit thekson rëndësinë e mbrojtjes së hapësirave publike sidomos në sezonin veror, kur qyteti mirëpret një numër të konsiderueshëm turistësh dhe vizitorësh.

Rruga “Benjamin Deliana” në lagjen “28 Nëntori” është tashmë e rikonstruktuar dhe ka marrë trajtën e një aksi funksional që i shërben komunitetit lokal. Ndërhyrja nga Bashkia Elbasan ka përfunduar me shtresimin përfundimtar të asfaltit dhe sistemimin e infrastrukturës.

Kjo rrugicë, megjithëse me gjatësi të shkurtër, ka pasur rëndësi të veçantë për banorët, pasi lidh dy rrugë të tjera më të mëdha, “Mustafa Shashaj” dhe “Shyqyri Berisha”, dhe i shërben drejtpërdrejt rreth 150 banorëve. Për më shumë se 30 vite, rruga ka qenë e paasfaltuar, pavarësisht se kishte sistem kanalizimesh funksional.

Rikonstruksioni i saj u realizua pas një kërkese të kahershme të banorëve, si pjesë e programit të Bashkisë Elbasan për përmirësimin e infrastrukturës në zonat informale, si në qytet, ashtu edhe në njësitë administrative rurale.

Kryetari i Bashkisë Elbasan, Gledian Llatja, thekson se“edhe një tjetër rrugë e paasfaltuar prej dekadash mori zgjidhje përfundimtare. Zona të tëra informale, si në qytet ashtu edhe në fshat, po i rikthejmë në standarde dinjitoze. Kjo është qasja jonë, të mos lëmë asnjë segment të lënë pas.”

Ai shtoi se investimet do të vijojnë në mënyrë të pandërprerë në të gjitha zonat informale të bashkisë, me qëllim që çdo lagje dhe komunitet të ketë infrastrukturën që meriton.

Elbasani mirëpriti një ngjarje të veçantë artistike këtë korrik, me koncertin dy-ditor “Virtuozët”, që solli në skenë disa prej instrumentistëve më të talentuar të skenës muzikore shqiptare.

Nën drejtimin artistik të Desart Shëmilit, koncertet do të zhvillohen më 7 dhe 8 korrik, në dy ambiente të veçanta kulturore të qytetit: Muzeu Etnografik dhe Kulla Hotel “Guri”.

 Mbrëmja e parë, më 7 korrik në orën 20:00, u mbajt në ambientet historike të Muzeut Etnografik, me pjesëmarrjen e violinistit të njohur Zeqir Sulkuqi dhe interpretimet virtuozë të artistëve elbasanas.

Mbrëmja e dytë, më 8 korrik, po në orën 20:00, u zhvillua tek Kulla Hotel “Guri”, ku performoi Kuarteti i Harqeve “Mansius”, me një program të përzgjedhur nga repertori klasik ndërkombëtar.

Në të dyja netët, publiku pati mundësinë të shijojë vepra të njohura nga kompozitorë të mëdhenj, të interpretuara me pasion, dhe frymëzim nga emra të spikatur të muzikës klasike shqiptare.

Koncerti “Virtuozët” vjen si një iniciativë për të afruar artin cilësor me publikun e Elbasanit dhe për të kthyer hapësirat muzeale dhe historike në skena të gjalla të kulturës.

Ministri i Mbrojtjes, Pirro Vengu, së bashku me ministrin e Brendshëm, Ervin Hoxha zhvilluan sot një inspektim në fushën e mbetjeve në Elbasan, pas një zjarri të rrezikshëm, që përfshiu zonën ditët e fundit, i nxitur nga temperaturat e larta të kësaj vere.

Në këtë vizitë ishin të pranishëm edhe kryetari i Bashkisë së Elbasanit, z. Gledian Llatja, si dhe prefekti i Qarkut, Ilir Bejtja.

Gjatë inspektimit, ministri Vengu vlerësoi maksimalisht punën e palodhur të strukturave zjarrfikëse, emergjencave civile vendore, Forcave të Armatosura dhe të gjithë institucioneve të përfshira në menaxhimin e situatës. Ai theksoi se falë reagimit të shpejtë dhe ndërhyrjes së koordinuar u arrit të shmangej një katastrofë e madhe mjedisore dhe të mbrohej shëndeti i komunitetit.

Zjarri u shua falë angazhimit të mjeteve zjarrfikëse të ardhura nga Elbasani dhe bashkitë fqinje, si dhe përdorimit të teknologjisë, përfshirë një dron, që ndihmoi në monitorimin ajror dhe identifikimin e vatrave aktive.

Ministri i Mbrojtjes theksoi se situata të tilla nxjerrin në pah domosdoshmërinë e modernizimit të plotë të sistemit të emergjencave civile në vend. Ai propozoi instalimin e kamerave termike për monitorim të vazhdueshëm në landfill-e dhe stacionimin e një mjeti zjarrfikës në gatishmëri të përhershme pranë tyre.

“Një zhvillim premtues në këtë drejtim është përfshirja e industrisë së mbrojtjes në prodhimin vendas të pajisjeve të emergjencave civile. Kompania shtetërore KAYO po punon për të prodhuar zjarrfikëse dhe pajisje të tjera, me objektivin për të përmbushur nevojat kombëtare dhe për të forcuar pavarësinë teknologjike të vendit”, deklaroi ministri Vengu.

Në përfundim të inspektimit, u ritheksua rëndësia e bashkëpunimit ndërinstitucional dhe investimeve në teknologji moderne për përballimin në kohë të emergjencave dhe garantimin e sigurisë së qytetarëve.

Për zjarrin në landfill është ngritur një grup pune, që përfshin edhe ekspertë të huaj, i cili do të realizojë një vlerësim të plotë të situatës dhe do të sugjerojë masat e mëtejshme për të shmangur përsëritjen e rasteve të ngjashme.

Enti Rregullator i Ujit (ERRU) ka miratuar me Vendimin nr. 18, datë 01.07.2025, tarifat e reja të shërbimit për Shoqërinë Rajonale Ujësjellës Kanalizime Elbasan sh.a., të vlefshme për periudhën 2025–2027. Ky vendim synon përmirësimin e qëndrueshmërisë financiare të shoqërisë, rritjen e cilësisë së shërbimeve dhe mbulimin e kostove operacionale.

Vendimi hyn në fuqi më 1 gusht 2025 dhe është i vlefshëm deri më 31 dhjetor 2027. Ai është botuar në Fletoren Zyrtare dhe është i detyrueshëm për të gjitha njësitë përbërëse të shoqërisë.