Muaj: Prill 2025

Me ardhjen e pranverës së dytë, siç na pëlqen ta quajmë këtë periudhë të bukur të vitit ,Elbasani, qyteti i luleve, vazhdon të gjallërohet çdo ditë me më shumë ngjyra, jetë dhe pastërti. Ekipet e Agjencisë së Shërbimeve Publike janë në terren çdo mëngjes, duke punuar pa u lodhur për ta mbajtur qytetin tonë të pastër dhe të mirëmbajtur.

Nga pastrimi i rrugëve dhe hapësirave publike, tek kujdesi për gjelbërimin dhe mbjellja e luleve të reja , çdo detaj ka rëndësi kur bëhet fjalë për cilësinë e jetës urbane. Ky përkushtim i përditshëm i punonjësve tanë është një reflektim i përgjegjësisë për ta bërë Elbasanin gjithnjë e më të bukur.

 Më shumë gjelbërim, më shumë lule, më shumë kujdes për qytetin që duam, kjo është motoja që na udhëheq!

Kryetari i Bashkisë Elbasan, Gledian Llatja, i dorëzoi familjes së Genc Trëndafilit titullin “Qytetar Nderi”, si një vlerësim i merituar për kontributin e tij të jashtëzakonshëm në arsim dhe trashëgimi kulturore.

Genc Trëndafili ka qenë një ndër figurat më të spikatura në arsimin elbasanas dhe më gjerë, ish-drejtor i shkollës “Luigj Gurakuqi” dhe një ndër metodistët më të shquar të gjeografisë. Ai është autor i librit “Didactic of Geography”, një tekst i rëndësishëm akademik që mbetet një udhërrëfyes për mësimdhënien moderne në këtë fushë.

Përveç kontributit të palodhur në edukimin e brezave, Trëndafili ka luajtur një rol thelbësor edhe në pasurimin e jetës kulturore të qytetit. Ai ka kontribuar në ngritjen dhe sistemimin e Muzeut të Shkollës Normale të Elbasanit – një institucion simbol për historinë e arsimit shqiptar.

“Puna dhe vlera e tij do të jetojnë përjetë ndër breza. Respekt dhe nderim për një figurë të rrallë të dijes dhe kulturës shqiptare,” u shpreh Kryetari Llatja gjatë ceremonisë së dorëzimit të çmimit.

Teatri “Skampa” në Elbasan ka sjellë me sukses premierën e komedisë “Çfarë pa Kryeshërbëtorja”, një vepër e autorit britanik Joe Orton, nën regjinë mjeshtërore të Kiço Londos. Qindra artëdashës kanë ndjekur me entuziazëm një shfaqje që kombinon mjeshtërisht humorin absurd me realitetin tronditës të marrëdhënieve njerëzore.

Në skenë janë ngjitur emra të njohur të teatrit shqiptar si Helidon Fino, Egla Ceno, Linda Jarani, Mario Elezi, Ëngjell Hoxha dhe Livjon Aliaj, të cilët me interpretimin e tyre brilant i kanë dhënë jetë personazheve kompleksë të Orton. Ata sjellin një galeri karakteresh që luhaten mes çmendurisë, dëshirës dhe absurditetit, duke bërë publikun të qeshë, të mendojë dhe të reflektojë.

Një punonjës hoteli i përfshirë në intrigat e një psikiatri me prirje të çuditshme, një sekretare e zhveshur dhe e fshehur pas perdes, një zonjë elegante dhe e zhytur në alkool, përqafime të paligjshme dhe një profesor me fantazi surreale, ndërthuren me hyrjen e një polici që prish gjithçka… Në sfond, mjegulla e trashë e purove të Çurçillit shton dhe më shumë absurditetin e situatave.

Kjo premierë është një tjetër dëshmi e gjallërisë së jetës artistike në Elbasan, që po zhvillohet me përkushtim të drejtorit artistik i teatrit “Skampa”, z. Kliton Kapaj. Falë punës së tij dhe ekipit të aktorëve e regjisorëve, Teatri “Skampa” mbetet një pikë referimi për kulturën në qytet dhe më gjerë. “Çfarë pa Kryeshërbëtorja”, do të shfaqet në “Skampa” deri në datën 16 maj.

Bashkia e Elbasanit është drejt rikonstruksionit total të çerdhes nr. 2, një projekt që ka si qëllim përmirësimin e kushteve për zhvillimin e fëmijëve. Me një investim prej 124 milionë lekësh ( te vjetra) nga buxheti i Bashkisë, çerdhja do të ofrojë ambiente të sigurta, moderne dhe komode për 150 fëmijë.

Ky rikonstruksion është një ndërhyrje e domosdoshme për të siguruar kushte më të mira dhe më të sigurta për vogëlushët. Pas përfundimit të punimeve, fëmijët do të gëzojnë ambiente tërësisht të rinovuara, që do të mundësojnë një zhvillim më të mirë për ata.

Ky është një investim i rëndësishëm për të ardhmen e fëmijëve dhe kujdesi ndaj më të vegjlit është prioritet i Bashkisë së Elbasanit.

Kryetari i Bashkisë Elbasan, Gledian Llatja, inspektoi nga afër punimet në rrugën “Gjergj Arianiti”, një investim i rëndësishëm që po merr formë dita-ditës dhe që pritet të ndryshojë ndjeshëm qarkullimin dhe pamjen urbane të qytetit.

Me trotuare të reja, ndriçim modern dhe korsi të dedikuara për biçikleta, kjo rrugë po lidh lagjen “Emin Matraxhiu” me Menglin dhe më tej me Koridorin VIII, duke sjellë një alternativë të re qarkullimi për banorët dhe një pamje mbresëlënëse përgjatë brigjeve të lumit Shkumbin. Punimet kanë avancuar me ritme të mira edhe në pjesën lumore të rrugës, ku aktualisht janë përfunduar rreth 75 përqind e punimeve me të gjitha elementët e një rruge me standarde të larta.

E njohur ndryshe edhe si “rruga e Krastës”, ky aks rrugor përveçse shërben si lidhje funksionale mes lagjeve, është edhe një rrugë panoramike që i shërben qytetarëve që frekuentojnë zonën e Krastës për sporte dhe rekreacion në natyrë. Rruga është konceptuar me dy korsi, korsi të veçantë për biçikleta, trotuare të gjera dhe ndriçim, duke e kthyer në një hapësirë moderne e të aksesueshme për të gjithë.

Ky investim u cilësua nga kryetari Llatja si një projekt me rëndësi të veçantë për zhvillimin urban të Elbasanit. “Gjatë gjithë kohës kjo rrugë ka qenë thjesht një vijë në hartë, ndërsa sot po bëhet realitet. Me përfundimin e saj, qytetit tonë i shtohet një unazë e re, një rrugë e brendshme që nuk është vetëm panoramike, por ka edhe potencial të madh zhvillimi për të gjithë zonën përreth. Fatmirësisht, një pjesë e banorëve nuk do kenë më nevojë të përdorin Koridorin VIII për të hyrë në qytet,” u shpreh ai.

Aksi “Gjergj Arianiti”, me gjatësi rreth 1.5 kilometra, po ndërtohet nga e para dhe do të vijojë më tej me segmentin e rrugës “Behxhet Hyti”, nga ura e Lizës deri tek ish-frigoriferi i Elbasanit. Investime të tilla rrugore janë pjesë e strategjisë së bashkisë për të përmirësuar lëvizshmërinë në qytet dhe për të ndërtuar infrastrukturë moderne në funksion të qytetarëve. “Në përfundim të këtij projekti, si dhe të urës së Bushekut që është pjesë e Koridorit VIII, kjo zonë e Elbasanit pritet të kthehet në një pikë me potencial të lartë zhvillimi”, tha Llatja.

Muzeu Etnografik i Elbasanit, një ndër institucionet më të rëndësishme kulturore në vend, ka përfunduar së fundmi një proces tërësor restaurimi, i cili është përmbyllur një muaj përpara afatit të përcaktuar.

Falë mbështetjes së Bashkisë Elbasan dhe bashkëpunimit me Drejtorinë Rajonale të Trashëgimisë Kulturore Korçë, ky investim i dytë madhor në muze që prej hapjes së tij në vitin 1986, ka rikthyer shkëlqimin e një prej godinave më përfaqësuese të trashëgimisë sonë. Restaurimi përfshiu çatinë, çardakun, parmakët, fasadën, dritaret dhe elementë të tjerë autoktonë të banesës, gjithmonë me kujdes për të ruajtur identitetin e saj historik dhe arkitekturor.

Më 14 mars, muzeu hapi dyert për publikun me një pamje të rifreskuar dhe përmbajtje edhe më të pasur, duke i ofruar vizitorëve një përvojë autentike në rrënjët e historisë, kulturës dhe jetesës tradicionale të trevës së Elbasanit.

Në këtë muze ekspozohen rreth 80 zeje tradicionale, duke pasqyruar mjeshtërinë, stilin e jetës dhe zhvillimin ekonomik të qytetit ndër shekuj. Ndodhur në një banesë karakteristike të shekullit XVIII, e shpallur Monument Kulture i Kategorisë I, muzeu mbart në çdo kënd frymën e një qyteti të lashtë që di të ruajë dhe vlerësojë trashëgiminë.
Në vizitën e tij në muzeun e restauruar, Kryetari i Bashkisë Elbasan, Gledian Llatja, u shpreh, se “historia dhe trashëgimia kulturore janë thesaret më të çmuara që kemi. Investimi në muze nuk është thjesht restaurim i një godine, por një rikthim dinjitoz i kujtesës dhe identitetit tonë. Ky është një obligim që i kemi brezave të ardhshëm.”
Muzeu Etnografik qëndron i hapur çdo ditë të javës dhe mirëpret vizitorë nga vendi dhe jashtë, që duan të njihen më nga afër me jetën e të parëve tanë, veshjet, traditat, artizanatin dhe gjithë pasurinë shpirtërore të këtij qyteti.