Muaj: Dhjetor 2025

Bashkia Elbasan vijon fushatën e pyllëzimit me synimin që deri në muajin mars të mbillen mbi 15 mijë fidanë të rinj në të gjithë territorin e saj. Fokus i kësaj nisme janë zonat e dëmtuara nga zjarret dhe erozioni, por edhe institucionet arsimore, duke e parë ndërgjegjësimin mjedisor si një proces që nis që në bankat e shkollës.

Në kuadër të kësaj fushate, kryetari i Bashkisë Elbasan, Gledian Llatja, së bashku me drejtoreshën e Zyrës Vendore të Arsimit Elbasan, Vesa Llana Lico, iu bashkuan nxënësve të shkollës 9-vjeçare “Kuqan” për mbjelljen e pemëve në ambientet e shkollës.

Kryebashkiaku Llatja theksoi se përfshirja e fëmijëve dhe të rinjve është thelbësore për suksesin e nismave mjedisore.

 “Fëmijët dhe rinia janë mbështetja më e madhe për një mjedis më të gjelbër. Për këtë arsye, do të jemi të pranishëm në çdo shkollë të territorit të bashkisë me fushatën e pyllëzimit dhe pastrimit të mjedisit”, u shpreh ai.

Bashkia Elbasan synon që përmes këtyre aktiviteteve të kontribuojë jo vetëm në përmirësimin e cilësisë së mjedisit, por edhe në edukimin e brezit të ri me vlerat e kujdesit dhe përgjegjësisë ndaj natyrës.

Në kuadër të forcimit të qeverisjes së mirë dhe luftës kundër korrupsionit, u zhvillua paneli

“Ndërtimi i besimit: mendime për planin vendor të integritetit”, me asistencë nga programi Bashki të Forta.

Paneli mblodhi bashki, ekspertë dhe partnerë ndërkombëtarë për të ndarë praktikat më të mira në hartimin dhe zbatimin e Planeve Vendore të Integritetit, në përputhje me Strategjinë Kombëtare Antikorrupsion.

Bashkia Elbasan u identifikua si bashkia me Planin Vendor të Integritetit më të mirë në nivel kombëtar, falë qasjes së strukturuar, masave konkrete dhe mekanizmave të transparencës, monitorimit dhe llogaridhënies.

Takimi u mbështet nga SDC – Ambasada Zvicerane, Ambasada Suedeze, GIZ / Qeveria Gjermane, Mbretëria e Vendeve të Ulëta dhe CR Partners, duke sjellë një qasje të përbashkët për forcimin e integritetit në nivel vendor.

Integritet, transparencë dhe besim për qytetarët e Elbasanit.

U nënshkrua marrëveshja për themelimin e Akademisë së Pushtetit Vendor, një instrument strategjik që synon forcimin e njësive të vetëqeverisjes vendore, rritjen e kapaciteteve profesionale të administratës lokale dhe përgatitjen e pushtetit vendor për procesin e integrimit europian.

Në këtë aktivitet morën pjesë Kryetari i Bashkisë Elbasan, z. Gledian Llatja, si edhe Kryetarja e Këshillit të Qarkut Elbasan, znj. Ermira Urupi, të cilët vlerësuan rëndësinë e bashkëpunimit ndërinstitucional dhe investimit në zhvillimin profesional të burimeve njerëzore në nivel vendor.

Kryetari i Bashkisë Elbasan, z. Llatja, theksoi se ngritja e Akademisë përfaqëson një hap konkret drejt rritjes së cilësisë së qeverisjes vendore dhe përmbushjes së standardeve europiane, duke e bërë administratën lokale më efikase dhe më pranë qytetarëve.

Akademia e Pushtetit Vendor do të funksionojë si një platformë kombëtare trajnimi dhe zhvillimi profesional, në përputhje me standardet europiane dhe në shërbim të përmirësimit të shërbimeve publike për qytetarët.

Bashkia e Elbasanit mbetet e angazhuar në mbështetjen e nismave që kontribuojnë në forcimin e qeverisjes vendore dhe afrimin e Shqipërisë me Bashkimin Europian.

Të pranishëm në prezantimin zyrtar të Akademisë së Pushtetit Vendor ishin edhe ambasadorët e Suedisë, Zvicrës dhe Hollandës, shtete që kanë ndihmuar shqipërinë në rritjen dhe fuqizimin e pushtetit vendor.

Në prag të festave të fundvitit, qyteti dhe njësitë administrative janë gjallëruar nga një sërë aktivitetesh festive të dedikuara më të vegjëlve. Një pjesë e rëndësishme e jetës kulturore në këto ditë janë zënë nga koncertet e fëmijëve, të organizuara nga të gjitha kopshtet e qytetit dhe ato në njësitë administrative.

Këto koncerte festive, të mbushura me këngë, vjersha dhe mesazhe dashurie, përcjellin simbolikën e Vitit të Ri dhe të Krishtlindjes, duke sjellë gëzim, shpresë dhe ngrohtësi në çdo komunitet. Fëmijët janë protagonistët kryesorë të këtyre aktiviteteve, duke dhuruar emocione të veçanta dhe duke përçuar me sinqeritet vlerat më të bukura të këtyre festave.

Një rol të veçantë në organizimin dhe realizimin e koncerteve kanë edukatoret e kopshteve, të cilat, me përkushtim dhe profesionalizëm, janë dirigjentet e këtyre aktiviteteve artistike. Falë punës së tyre të palodhur, çdo koncert shndërrohet në një festë të vërtetë për fëmijët, prindërit dhe komunitetin.

Bashkia Elbasan ka mbështetur dhe ka qenë e angazhuar në nxitjen e këtyre aktiviteteve kulturore-edukative, si pjesë e vizionit për krijimin e një mjedisi sa më të ngrohtë dhe gjithëpërfshirës për fëmijët. Përmes këtyre koncerteve, jo vetëm festohen ditët e shënuara të fundvitit, por forcohet edhe bashkëpunimi mes institucioneve arsimore, familjeve dhe komunitetit.

Koncertet në kopshte, si në qytet ashtu edhe në njësitë administrative, kanë zbukuruar atmosferën festive, duke e kthyer fundvitin në një periudhë plot ngjyra, buzëqeshje dhe emocione pozitive, ku gëzimi i fëmijëve mbetet dhurata më e çmuar për të gjithë.