Ditë: 4 Dhjetor 2025

Për herë të parë në Tiranë u mbajt takimi dypalësh mes Komitetit Europian të Rajoneve dhe Shqipërisë, një forum i rëndësishëm diskutimi mbi të ardhmen e qeverisjes vendore dhe rolin e bashkive në procesin e integrimit europian.

Në këtë takim, i dyti në llojin e tij, morën pjesë Ministri i Shtetit për Pushtetin Vendor, Ervin Demo, Ambasadori i Bashkimit Europian në Shqipëri, Silvio Gonzato, Këshilltari Rajonal i Toskanës, Antonio Mazzeo, Drejtorja Ekzekutive e Shoqatës së Bashkive, Adelina Farrici, kryetarë bashkish nga i gjithë vendi, përfaqësues të BE-së dhe ekspertë vendas e të huaj.

Në këtë takim mori pjesë edhe Kryetari i Bashkisë Elbasan, Gledian Llatja, i cili njëkohësisht është edhe bashkëkryetar i këtij forumi, së bashku me Antonio Mazzeo.

Ky takim vjen në një moment vendimtar për Shqipërinë, e cila po avancon me ritme të shpejta në procesin e integrimit në Bashkimin Europian, ndërsa roli i bashkive po bëhet gjithnjë e më thelbësor në zbatimin e standardeve të BE-së dhe në përfitimin nga programet e saj.

Duke folur në cilësinë e bashkëkryetarit të forumit, Kryetari i Bashkisë Elbasan, Gledian Llatja, theksoi rëndësinë e këtij partneriteti dhe angazhimin e pushtetit vendor në këtë proces, duke deklaruar se, “Bashkitë shqiptare kanë bërë hapa të rëndësishëm përpara në forcimin e qeverisjes vendore, përmirësimin e shërbimeve dhe zbatimin e projekteve që ndikojnë drejtpërdrejt në cilësinë e jetës së qytetarëve. Integrimi europian nuk është vetëm një proces politik, por mbi të gjitha një proces që prek drejtpërdrejt komunitetet tona.”

Gjatë takimit u diskutua mbi integrimin europian, mundësitë që ofron Plani i Rritjes (Growth Plan), decentralizimi fiskal si dhe qëndrueshmëria financiare e bashkive, si elementë kyç për ndërtimin e institucioneve vendore më të forta, më funksionale dhe më inovative.

Këshilli i Përbashkët Konsultativ u vlerësua si një mekanizëm thelbësor që siguron jo vetëm përafrimin e politikave vendore me ato të Bashkimit Europian, por edhe fuqizimin e bashkive për të kontribuar në mënyrë aktive në axhendën europiane dhe në zhvillimin e qëndrueshëm të komuniteteve.

Kryetari i Bashkisë Elbasan, Gledian Llatja, mori pjesë në mbledhjen e Komisionit për Burimet Natyrore, Infrastrukturën dhe Zhvillimin e Qëndrueshëm, ku u diskutua dhe miratua projektligji i ri “Për Gjuetinë”.

Projektligji i ri shënon një hap të rëndësishëm pas më shumë se një dekade ndalim të plotë të gjuetisë, duke hapur rrugën drejt një modeli modern të menaxhimit të faunës së egër, i bazuar në përgjegjshmëri, mbrojtje të biodiversitetit dhe standarde europiane. Sipas kuadrit të ri ligjor, bashkitë do të kenë një rol kryesor në administrimin e Zonave të Gjuetisë, ndërsa në terren do të angazhohen menaxhues të posaçëm për të garantuar zbatimin rigoroz të rregullave dhe ruajtjen e ekuilibrave natyrorë.

Ligji i ri parashikon disa hallka të rëndësishme për funksionimin e gjuetisë, që nis nga miratimi i menaxhimit të zonave me vendim të Këshillit të Ministrave, vijon me Planin Kombëtar të sezonit të gjuetisë që miratohet nga ministria përkatëse, si dhe përcaktimi i sezonit për secilën bashki dhe lista e faunës së lejuar.

Në këtë kontekst, pjesëmarrja e kryetarit të Bashkisë Elbasan merr një rëndësi të veçantë, pasi Elbasani është një nga bashkitë më të pasura me sipërfaqe të gjelbërta dhe zona pyjore, si pylli i Funarit, pylli i Bukanikut dhe masivet e tjera që rrethojnë territorin. Këto zona përbëjnë jo vetëm një pasuri natyrore me vlera të mëdha ekologjike, por edhe një potencial të rëndësishëm për turizmin natyror dhe zhvillimin e qëndrueshëm.

Menaxhimi i pyjeve është tashmë në tagrin e bashkive, ndërsa aktet nënligjore që do të pasojnë pritet të përcaktojnë qartë modalitetet e administrimit, mbrojtjes dhe përdorimit të tyre. Bashkia Elbasan, përmes këtij angazhimi institucional, synon të kontribuojë në ruajtjen e faunës së egër, mbrojtjen e ekosistemeve dhe ndërtimin e një marrëdhënieje më të shëndetshme mes njeriut dhe natyrës.

Ky projektligj konsiderohet si një hap i rëndësishëm për t’i dhënë fund kaosit të së shkuarës dhe për të garantuar një qasje të përgjegjshme ndaj një pasurie kombëtare që kërkon kujdes dhe mbrojtje afatgjatë.