Muaj: Janar 2026

Në ambientet e Qendrës Kulturore të Fëmijëve (QKF) në Elbasan u zhvillua Kampionati i Përvitshëm i Shahut për nxënësit e shkollave 9-vjeçare, një aktivitet që tashmë është kthyer në traditë dhe që synon të nxisë zhvillimin intelektual dhe kulturën sportive te fëmijët.

Fitues të këtij edicioni u shpallën Erdet Alla nga shkolla “Sule Harri” dhe Arsa Çekani nga shkolla “Jorgji Dilo”, të cilët u dalluan për përqendrimin, strategjinë dhe aftësitë e tyre logjike. Organizatorët i uruan kampionët për suksesin dhe i inkurajuan të vijojnë rrugën e sportit të mendjes.

Këtë vit, kursi i shahut është përfshirë si pjesë e rregullt e kurseve që QKF ofron, pas kërkesave të shumta nga nxënësit dhe prindërit. Pjesëmarrja e lartë në kampionat dëshmon interesin gjithnjë e në rritje të fëmijëve për aktivitete që zhvillojnë mendimin kritik, përqendrimin dhe disiplinën.

Qendra Kulturore e Fëmijëve në Elbasan ofron një sërë kursesh artistike, kulturore dhe sportive, me qëllim edukimin, argëtimin cilësor dhe largimin e fëmijëve nga përdorimi i tepruar i mjeteve teknologjike. Kjo qendër përbën një shembull pozitiv të investimit në formimin e brezit të ri, duke krijuar hapësira ku talenti dhe vlerat edukative kultivohen çdo ditë.

Në kuadër të strategjisë për mbrojtjen e mjedisit dhe rritjen e sipërfaqeve të gjelbra, vijon me intensitet fushata vjetore e pyllëzimit në Bashkinë Elbasan. Ky proces, pjesë e një plani të mirëfilltë masash për rigjenerimin e ekosistemit, ka hyrë tashmë në një fazë të rëndësishme zbatimi në terren.

Aksioni i radhës i mbjelljeve është zhvilluar në Kodër Krastë, e njohur si “mushkëria e qytetit”, ku grupe e punës së drejtorisë së pyjeve, si edhe vullnetarë kanë vijuar mbjelljen e fidanëve të rinj. 

Aksionit ju bashkuan kryetari i Bashkisë, Gledian Llatja, si dhe deputeti Adi Qose.

Kryebashkiaku Llatja theksoi se fushata e pyllëzimit po shtrihet në disa zona prioritare të qytetit dhe të territorit rural.

“Ne kemi pasur shumë aksione edhe në shkollat e qytetit, por edhe në zonat më nevralgjike të Elbasanit, siç është Kodër Krasta. Deri më tani janë mbjellë mbi 14 mijë pemë, ndërsa qëllimi ynë është që në fund të sezonit të mbjellim mbi 20 mijë fidanë në të gjithë Bashkinë e Elbasanit.

 Prioritet kryesor u kemi dhënë zonave ekonomike, por edhe zonave që kanë ndikim mjedisor për qytetin. Një vëmendje të veçantë i kemi kushtuar Krastës, si për pastrimin e pemëve të rëna, ashtu edhe për zëvendësimin e tyre me fidanë të rinj. Deri më tani këtu janë mbjellë mbi 3 400 fidanë,” u shpreh Llatja.

Nga ana e tij, deputeti Adi Qose u bëri thirrje qytetarëve që të kontribuojnë në ruajtjen e këtyre hapësirave të gjelbra, veçanërisht gjatë sezonit veror.

Fokusi i kësaj fushate nuk është i rastësishëm. Grupet e punës janë përqendruar në zona me rëndësi mjedisore, turistike dhe ekonomike.

 Funari dhe Gjinari konsiderohen zona me potencial të lartë turistik, ku ndërhyrja synon ruajtjen e peizazhit natyror si aset për zhvillimin e turizmit malor dhe agroturizmit. Ndërkohë, Krasta mbetet një zonë jetike për balancën ekologjike të qytetit, ku po forcohet brezi i gjelbër për të parandaluar degradimin e mëtejshëm të tokës.

Një tjetër drejtim i rëndësishëm i fushatës është pyllëzimi në oborret dhe rrethinat e shkollave, me karakter edukativ dhe mjedisor, për të krijuar hapësira më të shëndetshme për nxënësit dhe për të përcjellë te fëmijët mesazhin për rëndësinë e gjelbërimit.

Një shtyllë kryesore e projektit është edhe ripyllëzimi i zonave të prekura nga zjarret. Ndërhyrja shërben si masë rehabilituese për të rikthyer funksionalitetin e ekosistemeve, duke minimizuar rrezikun e erozionit dhe duke rivendosur biodiversitetin e humbur.

Ky investim në gjelbërim përbën një angazhim afatgjatë për t’i kthyer natyrës atë që është dëmtuar nga  faktorë të ndryshëm natyrorë.

 Përmbushja e objektivit prej 20 mijë fidanësh këtë vit do të shënojë një hap të rëndësishëm drejt një mjedisi më të qëndrueshëm dhe një infrastrukture natyrore më të pasur për komunitetin dhe vizitorët e Elbasanit.

Bashkia Elbasan ka zhvilluar takimin e parë për këtë vit të Këshillit Vendor të Sigurisë Publike, duke e nisur ciklin e bashkëbisedimeve me të rinjtë e qytetit dhe përfaqësues të Këshillit Rinor. 

Tryeza mblodhi përfaqësues të institucioneve publike, organizatave të shoqërisë civile dhe të rinj, me fokus forcimin e sigurisë publike dhe përfshirjen aktive të rinisë në çështjet e sigurisë.

Në fjalën e tij, kryetari i Bashkisë Elbasan, dhe njëkohësisht kryetar i KVSP Gledian Llatja, theksoi se siguria publike mbetet një nga prioritetet kryesore të qeverisjes vendore, duke nënvizuar përmirësimin e ndjeshëm të situatës në komunitet.

“Sot, mbi 92% e qytetarëve ndihen të sigurt, një rritje e jashtëzakonshme krahasuar me vitet e mëparshme. Ky perceptim është një tregues konkret i stabilitetit, rendit dhe përmirësimit të jetës së përditshme,” u shpreh Llatja.

Ai vuri në dukje se ky rezultat është fryt i bashkëpunimit ndërinstitucional, politikave lokale dhe angazhimit komunitar, duke theksuar se siguria është e pandashme nga planifikimi urban dhe qeverisja vendore. Në këtë proces, sipas tij, roli i të rinjve është thelbësor.

“Të rinjtë nuk janë vetëm përfitues të politikave publike, por aktorë aktivë të ndryshimit. Siguria e qëndrueshme vjen nga përfshirja e të gjitha zërave, nga ndërtimi i besimit dhe krijimi i një komuniteti të fortë,” tha kryebashkiaku.

Në takim Zëvendësdrejtori për Sigurinë dhe Rendin Publik në Drejtorinë Vendore të Policisë Elbasan, kryekomisar Blerim Berbati, i cili e cilësoi sigurinë publike si një koncept të gjerë që kërkon angazhimin e institucioneve shtetërore, publike dhe private.

Sipas tij, Policia e Shtetit e konsideron përfshirjen e të rinjve një element kyç përmes bashkëpunimit, edukimit ligjor dhe ndërgjegjësimit, duke theksuar se angazhimi aktiv i rinisë ndihmon në parandalimin e veprimtarive të paligjshme dhe ndërtimin e një kulture qytetare.

Si përfaqësuese e Prokurorisë së Rrethit Gjyqësor Elbasan, prokurorja Glenda Zeneli theksoi rolin e institucionit në hetimin dhe ndjekjen penale të çështjeve që lidhen me të miturit, duke garantuar vëmendje të veçantë për sigurinë e tyre.

Ndërsa drejtuesja e Zyrës Vendore të Arsimit, Vesa Llanaj Liço, iu drejtua të rinjve me mesazhin se siguria publike, veçanërisht ajo që lidhet me të rinjtë, është një mision i përbashkët që padyshim nis nga vetë të rinjtë.

Vetë të rinjtë e pranishëm përcollën mesazhin se përfshirja e tyre e bën sigurinë publike më të fortë, duke e vlerësuar këtë nismë si një shembull konkret të bashkëpunimit mes institucioneve dhe të rinjve.

Në fokus të diskutimit ishte edhe rëndësia e pjesëmarrjes së të rinjve në ndërtimin e politikave të sigurisë, si burim inovacioni, ndërtimi besimi dhe kohezioni shoqëror. 

U theksua nevoja për krijimin e platformave reale të përfshirjes, dëgjimin e ideve të rinisë dhe fuqizimin e tyre përmes arsimit, aftësive dhe mundësive ekonomike.

“Një qytet i sigurt nuk ndërtohet vetëm me rregulla dhe kamera, por me pjesëmarrje, përgjegjësi dhe ndjenjë komuniteti,” ishte mesazhi përmbyllës i takimit.

Një investim tërësisht i përfunduar ka transformuar konviktin “Ymer Tola” në Elbasan, duke krijuar kushte moderne jetese dhe studimi për nxënësit e shkollave të mesme, veçanërisht për ata të arsimit profesional dhe për të rinjtë që vijnë nga zonat e thella rurale.

Objekti është rikonstruktuar nga themelet dhe tashmë përfshin 26 dhoma me një kapacitet prej 100 shtretërish. Çdo dhomë është e kompletuar me krevate, dollapë, rafte librash, tavolina studimi, karrige dhe kondicioner, duke ofruar ambiente komode për jetesë dhe përgatitje mësimore. Janë ndërtuar tualete sipas standardeve, një sallë e re studimi dhe një kuzhinë me pajisje bashkëkohore, ndërsa dyert, dritaret dhe veshjet e brendshme janë zëvendësuar plotësisht.

Rikonstruksioni ka përfshirë gjithashtu rrjetin e plotë elektrik dhe hidraulik, instalimin e një gjeneratori për furnizim të pandërprerë me energji, si dhe ndërtimin e shkallës së emergjencës sipas standardeve të sigurisë.

Përfundimi i këtij investimi është ndjekur nga afër nga kryetari i Bashkisë Elbasan, Gledian Llatja, i cili vizitoi ambientet e reja dhe u njoh me kushtet që tashmë u ofrohen nxënësve.

“Ky konvikt tashmë ka një kapacitet prej rreth 100 shtretërish dhe i vjen në shërbim të të gjithë nxënësve të shkollave të mesme, veçanërisht atyre të arsimit profesional,” u shpreh Llatja gjatë vizitës.

Ai theksoi se investimi është realizuar me standarde të krahasueshme me ato të Bashkimit Europian.

“Çdo dhomë mund të akomodojë dy ose tre fëmijë në kushte shumë të mira. Kemi krijuar dhoma leximi, një kuzhinë komode dhe ambiente funksionale për të gjithë nxënësit që studiojnë si në arsimin profesional, ashtu edhe në gjimnazet e qytetit,” tha kryebashkiaku.

Sipas tij, rëndësi e veçantë i është kushtuar edhe shërbimeve mbështetëse.

“Konvikti ka një qasje shumë pozitive edhe sa i përket kujdestarisë dhe shërbimit infermieror, për të garantuar shendet dhe mirëqenie për çdo nxënës që jeton këtu,” shtoi Llatja.

Për shumë familje nga zonat e largëta rurale, ky konvikt përfaqëson një mbështetje të rëndësishme për vijimin e arsimit të mesëm në kushte dinjitoze. Ndërsa për vetë nxënësit, “Ymer Tola” tashmë nuk është vetëm një vend akomodimi, por një hapësirë moderne që i ndihmon të përqendrohen te studimi dhe e ardhmja e tyre.

Kryetari i Bashkisë Elbasan, Gledian Llatja, i shoqëruar nga deputetja Evis Kushi, ka inspektuar punimet për asfaltimin në rrugën e Isufajve, në fshatin Jagodinë, një kërkesë e kahershme e banorëve të zonës që sot ka marrë zgjidhje.

Gjatë inspektimit, kryebashkiaku Llatja u shpreh se investimet në fshat kanë qenë të vazhdueshme dhe do të vijojnë, me fokus kryesor zhvillimin ekonomik dhe përmirësimin e infrastrukturës rurale. Sipas tij, kjo rrugë i shërben rreth 550 banorëve të fshatit Jagodinë, si edhe një sipërfaqeje prej afro 30 hektarësh sera bujqësore.

“Qëllimi ynë është rritja e sipërfaqes së serrave dhe forcimi i ekonomisë rurale. Ka pasur rritje ekonomike në fshatin Jagodinë, por edhe në njësitë administrative Shirgjan dhe Gjergjan, veçanërisht pas ndërtimit të unazës bujqësore dhe investimeve infrastrukturore që kemi realizuar. Kjo rrugë lehtëson jo vetëm qarkullimin e banorëve, por edhe daljen e lirshme të prodhimeve bujqësore në treg,” u shpreh Llatja.

Ai i bëri thirrje banorëve të ndërtojnë ura mbi kanalet kulluese sipas standardeve, duke theksuar se strukturat pa leje që shkaktojnë probleme do të prishen. Kryebashkiaku njoftoi se investimet do të vijojnë në unazën e Kuqanit, si dhe në 18 rrugë të tjera rurale dhe projekte të tjera infrastrukturore.

Nga ana e saj, deputetja Evis Kushi theksoi se çdo investim në zonat rurale përkthehet drejtpërdrejt në përmirësimin e jetesës dhe rritjen e ekonomisë lokale. “Vetëm ndërtimi i unazës bujqësore ka sjellë zhvillim të ndjeshëm për zonën. Nga 10 hektarë sera që kishte disa vite më parë, sot janë rreth 70 hektarë sera,” u shpreh Kushi.

Banorët e Jagodinës kanë falënderuar kryebashkiakun për këtë investim, i cili ishte një nga kërkesat e paraqitura gjatë procesit të buxhetimit me pjesëmarrje.