Ditë: 13 Mars 2026

Ministria e Arsimit, Mirela Kumbaro, vizitoi qytetin e Elbasanit për të parë nga afër zhvillimin e programit “Art e Zeje”, i cili promovon kreativitetin dhe talentin e nxënësve në prag të festës së Ditës së Verës.

Bashkë me kryetarin e Bashkisë Elbasan, Gledian Llatja, ministrja Kumbaro shijoi punimet e nxënësve nga 27 shkolla të qytetit, të cilat u shndërruan në një panair plot ngjyra, art dhe energji pozitive. Programi, i cili kombinon artin, muzikën dhe zejet tradicionale, synon të nxisë talentin e të rinjve dhe të ruajë vlerat kulturore të komunitetit.

“Është gjithmonë kënaqësi të shohësh nxënësit të shprehin dashurinë e tyre për artin dhe krijimtarinë. Programi “Art e Zeje” është një mënyrë e shkëlqyer për të promovuar kulturën dhe traditën tonë ndër breza”, tha ministria Mirela Kumbaro gjatë vizitës.

Panairi i sotëm është një dëshmi e angazhimit të nxënësve dhe institucioneve arsimore të Elbasanit për të kultivuar kreativitetin dhe talentin në çdo fushë të artit dhe zejeve tradicionale.

Qendra Kulturore e Fëmijëve në Elbasan ka sjellë edhe këtë vit atmosferën festive të Ditës së Verës, duke organizuar koncertin e madh tradicional që mblodhi në shesh shumë fëmijë, prindër dhe qytetarë për të festuar së bashku.

Në një skenë të mbushur me energji, fëmijët e kësaj qendre dhuruan një program të pasur artistik me këngë, valle dhe performanca të ndryshme, duke treguar talentin dhe pasionin e tyre për artin. Interpretimet e tyre u pritën me duartrokitje të shumta nga publiku, duke krijuar një atmosferë të ngrohtë dhe plot gëzim.

Koncerti u shndërrua në një festë të vërtetë për qytetin, ku arti i fëmijëve solli ngjyra, emocione dhe optimizëm, duke përcjellë mesazhin e bukur të kësaj feste të dashur për elbasanasit.

Përmes këtij aktiviteti, Qendra Kulturore e Fëmijëve vazhdon të mbështesë dhe promovojë talentet e reja, duke i dhënë mundësi fëmijëve të shprehin kreativitetin e tyre dhe të jenë pjesë aktive e jetës kulturore të qytetit.

Drejtori i Klubit Shumësportësh Elbasani, Artin Kovaçi, priti në një takim përfaqësues të Ambasadës së Republikës Popullore të Kinës, të kryesuar nga drejtori i Politikave Sportive dhe Kulturore, Tang Hao, i shoqëruar nga përfaqësues të Shoqatës së “Miqësisë Shqipëri–Kinë”.

Në vijim të bisedës u diskutua mbi mundësinë e krijimit të një bashkëpunimi të qëndrueshëm në të ardhmen, përmes shkëmbimit të eksperiencave, binjakëzimit të ekipeve në sporte të ndryshme, organizimit të aktiviteteve sportive masive dhe cilësore, si dhe zhvillimit të kualifikimeve shkencore në fushën e trajningut sportiv.

Takimi u zhvillua në një frymë shumë pozitive, ndërsa përfaqësuesit e Ambasadës Kineze shprehën gatishmërinë për bashkëpunim me Klubin Shumësportësh Elbasani në disa fusha.

Gjithashtu, të ftuarit vizituan ambientet e Pallatit të Sportit “Tomorr Sinani”, ndërsa u ftuan të jenë të pranishëm në aktivitetet ndërkombëtare që pritet të zhvillohen gjatë muajve qershor–gusht 2026 në disiplinat ping-pong dhe peshëngritje.

Gjatë takimit u diskutua edhe për mbështetjen dhe përmirësimin e kushteve të Pallatit të Sportit, me synimin për ta zhvilluar më tej atë si një qendër të rëndësishme sportive për qytetin dhe aktivitetet ndërkombëtare.

Në këtë ditë të 13 marsit, qyteti i Elbasan është mbushur me atmosferën e veçantë të Dita e Verës, ku gëzimi, tradita dhe ngjyrat e festës janë ndjerë në çdo cep të qytetit. Qindra qytetarë, familje dhe vizitorë kanë shëtitur përgjatë stendave të panairit, duke shijuar nga afër punimet artizanale dhe shijen e traditës që sjell kjo festë.

Në disa pika të qytetit, maskotat e Teatrit të Ftohtë kanë argëtuar fëmijët dhe kalimtarët, duke krijuar momente plot buzëqeshje dhe një atmosferë festive që i ka dhënë qytetit energji të veçantë në këtë ditë të bukur pranvere.

Një nga ndalesat më të vizituara ka qenë Panairi i Zejeve, ku artizanët kanë ekspozuar punimet e tyre tradicionale, duke ruajtur dhe gjallëruar mjeshtërinë e trashëguar ndër breza. Ndërsa Panairi i Ballokumeve ka sjellë aromën dhe shijen karakteristike të kësaj ëmbëlsire simbol të qytetit, të përgatitur me përkushtim nga amvisa dhe artizanë që e mbajnë gjallë këtë traditë të veçantë të Elbasanit.

Atmosfera festive është vizituar edhe nga kryetari i Bashkisë së Elbasan, Gledian Llatja, i cili ka vizituar stendat e panairit dhe është takuar me artizanët dhe qytetarët, i shoqëruar nga nënkryetarja e bashkisë Klaudja Krasnika.

Kjo ditë e mbushur me ngjyra, shije dhe aktivitete festive e ka kthyer qytetin në një qendër gëzimi për të gjithë, ku tradita dhe komuniteti bashkohen për të festuar ardhjen e pranverës. Festa vazhdon gjatë gjithë ditës me plot surpriza dhe aktivitete për qytetarët dhe vizitorët.