Muaj: Prill 2026

Në vijim të turit të dëgjesave për buxhetin afatmesëm, kryetari i Bashkisë Elbasan, Gledian Llatja, zhvilloi një takim me banorët e Labinot Fushë dhe Labinot Mal, ku u diskutuan prioritetet dhe projektet konkrete për zhvillimin e zonës.

Gjatë dëgjesës, u ndanë me komunitetin investimet e realizuara deri më tani, si dhe ato që janë planifikuar për periudhën në vijim. Fokusi kryesor mbetet përmirësimi i infrastrukturës rrugore, furnizimi me ujë të pijshëm, kanalizimet, ndriçimi publik dhe rritja e cilësisë së shërbimeve bazë për qytetarët.

Ndërhyrjet përfshijnë rehabilitimin dhe asfaltimin e rrugëve, përmirësimin e kanaleve vaditëse dhe rrjetit të ujësjellësit, si dhe rikonstruksionin e qendrës shëndetësore, investime të cilat synojnë drejtpërdrejt rritjen e cilësisë së jetës për banorët e zonës.

Kryebashkiaku Llatja theksoi rëndësinë e këtyre takimeve si një mundësi për të dëgjuar nga afër nevojat e komunitetit dhe për të ndërtuar një buxhet sa më të orientuar drejt qytetarëve, duke garantuar zhvillim të qëndrueshëm për të gjithë territorin e bashkisë.

Në Elbasan ka vijuar procesi i konsultimeve publike për buxhetin afatmesëm, me ndalesën e radhës në Rajonin Nr. 2.

Këto dëgjesa po organizohen në të gjithë qytetin dhe njësitë administrative, me qëllim përfshirjen e qytetarëve në diskutimin e prioriteteve dhe projekteve për tre vitet e ardhshme, si pjesë e një procesi transparent dhe gjithëpërfshirës vendimmarrjeje.

E pranishme në këtë takim, deputetja Aulon Abylykbashi theksoi rëndësinë e konsultimeve si bazë e shprehjes së demokracisë. Ajo u shpreh se buxheti afatmesëm përfaqëson një planifikim strategjik trevjeçar, që përcakton drejtimin e investimeve dhe shpenzimeve të bashkisë, duke reflektuar kërkesat dhe interesat e komunitetit.

Në vijim, kryetari i Bashkisë Gledian Llatja e vendosi theksin te rëndësia e këtij procesi për ndërtimin e një vizioni të qartë zhvillimi për qytetin.

“Buxhetimi afatmesëm është një proces që na ndihmon të planifikojmë tre vitet e ardhshme, për të pasur një vizion më të qartë për zhvillimin e Elbasan dhe rajoneve të tij. Ne kemi dëgjuar qytetarët dhe po veprojmë, ndaj jemi këtu për të marrë mendime të drejta dhe të konsultuara me publikun,” u shpreh Llatja.

Duke folur për investimet konkrete, ai theksoi se , “ne po bëjmë 22 mijë metra katrorë terrene sportive dhe kënde lojërash, si edhe hapësira për të moshuarit, që do të përbëjnë parkun më të madh në Shqipërinë e mesme, një terren fantastik për qytetarët.”

Llatja u ndal edhe te projektet madhore që janë në vijim, si zhvillimi i zonës së ish-metalurgjikut përmes një masterplani të ri, ndërhyrjet në Kalaja e Elbasanit dhe projekti i automotoparkut.

“Nëse nuk kemi një ekonomi të shëndetshme, nuk kemi edhe si të gjejmë paratë për investime apo për të mbështetur shtresat në nevojë apo për të bërë pallatet me kapotë,” u shpreh ai.

Duke vijuar me projektet konkrete, kryebashkiaku theksoi se në buxhetin afatmesëm parashikohet edhe rikonstruksioni i tregut kryesor të qytetit, një investim me vlerë mbi 1.5 milion euro, me qëllim zgjidhjen e problematikave dhe rritjen e potencialit ekonomik të zonës. Gjithashtu, ai përmendi ndërhyrjen në kryqëzimin e Cërrikut për lehtësimin e trafikut, si dhe transformimin e shëtitores përgjatë lumit Shkumbin në një nga hapësirat më tërheqëse publike.

Një tjetër projekt i rëndësishëm është edhe zgjerimi dhe modernizimi i bibliotekës publike, për ta kthyer atë në një hapësirë bashkëkohore në shërbim të qytetarëve.

“Në thelb, ne duam t’i japim një frymë tjetër projekteve të mëdha trevjeçare,” u shpreh Gledian Llatja.

Në takim ishte e pranishme edhe kryetarja e PS, dega Elbasan, Ermira Urupi, e cila vlerësoi investimet e realizuara dhe projektet që vijojnë në qytet.

Konsultimet për buxhetin afatmesëm do të vijojnë në të gjitha njësitë administrative, me synimin për të përfshirë sa më shumë qytetarë në përcaktimin e prioriteteve zhvillimore të bashkisë.

Bashkia Elbasan ka nisur një tur të gjerë takimesh në çdo rajon dhe njësi administrative, me qëllim diskutimin e buxhetit afatmesëm dhe përcaktimin e prioriteteve për tre vitet e ardhshme.

Takimi i parë u zhvillua në Shirgjan, duke shënuar edhe hapin e parë të këtij procesi gjithëpërfshirës. Në këtë takim ishte i pranishëm kryebashkiaku i Elbasanit, Gledian Llatja, i shoqëruar nga deputetja Evis Kushi.

Deputetja Kushi e cilësoi këtë tur takimesh si shumë të vlefshëm për komunitetin dhe për vetë Bashkinë, pasi u shërben qytetarëve për të përcaktuar investimet dhe prioritetet që do të realizohen në vijim.

Nga ana e tij, kryebashkiaku Gledian Llatja vuri theksin te pjesëmarrja e qytetarëve, duke e cilësuar atë si një tregues të besimit ndaj Bashkisë.

Ai u ndal te investimet e realizuara dhe problematikat ekzistuese, duke theksuar se puna do të vijojë për zgjidhjen e tyre, paralelisht me nxitjen e zhvillimit ekonomik në çdo zonë.

Në fjalën e tij, Llatja nënvizoi se Bashkia do të ndërmarrë hapa konkretë për transformimin e sektorit të bujqësisë.

“Për herë të parë do të miratojmë një ndërmarrje aksionere në fushën e bujqësisë, e cila do të merret me çështjet bujqësore dhe pyjore. Do të krijojmë shoqëri bashkëpunimi me fermerët dhe blegtorët, sepse duam që ata të jenë partnerë të drejtpërdrejtë në zhvillimin e kësaj fushe,” u shpreh ai.

Kryebashkiaku bëri të ditur gjithashtu se në bashkëpunim me qeverinë japoneze po ndërtohet një baxho e re në shërbim të gjithë zonës së Elbasanit, ndërsa paralajmëroi edhe ngritjen e një qendre të madhe në fshatin Thanë, ku do të ndërtohen magazina shtetërore të Bashkisë dhe pika grumbullimi për produktet bujqësore.

Duke theksuar rëndësinë e zinxhirit të përpunimit, Llatja u shpreh se Bashkia synon të krijojë edhe kapacitete konkrete prodhuese: “Ne duam të kemi pikën tonë të grumbullimit, si dhe të ndërtojmë fabrikën tonë të kompostos dhe të turshive. Kjo është shumë e rëndësishme për të rritur vlerën e produkteve vendase dhe për t’i dhënë mbështetje reale fermerëve tanë.”

Ai theksoi se këto iniciativa kërkojnë bashkëpunim të ngushtë me komunitetin, duke i ftuar qytetarët të bëhen pjesë aktive dhe partnerë në këtë proces zhvillimi.

Gjatë këtyre takimeve, qytetarët do të kenë mundësinë të shprehin mendimet, sugjerimet dhe nevojat e tyre konkrete për komunitetin ku jetojnë.

Ky proces synon të garantojë një vendimmarrje transparente dhe të hapur, ku çdo zë dëgjohet dhe çdo ide merr vlerësimin e duhur.

Turi i takimeve do të vijojë në ditët në vijim në të gjitha zonat e Elbasanit, duke ftuar çdo qytetar të bëhet pjesë aktive e këtij procesi të rëndësishëm për të ardhmen e qytetit.