Ditë: 17 Qershor 2026

Teatri “Skampa” vijon të sjellë në skenë produksione cilësore artistike, duke tërhequr vëmendjen dhe interesin e publikut elbasanas.

Mbrëmjen e fundit, në sallën e tejmbushur të teatrit u shfaq premiera e komedisë “Për një Fjalë Goje”, një bashkëprodhim që u mirëprit ngrohtësisht nga artdashësit dhe u shoqërua me duartrokitje të gjata në fund të shfaqjes.

Vepra solli në skenë situata plot humor, emocione dhe mesazhe të forta njerëzore, duke krijuar një komunikim të drejtpërdrejtë me publikun. Interpretimi i aktorëve Ledion Zoi, Erli Fortuzi dhe Ledio Lako u vlerësua për profesionalizmin dhe energjinë e sjellë në skenë, ndërsa regjia e Altin Bashës i dha ritëm dhe dinamizëm shfaqjes.

Suksesi i kësaj premiere konfirmon edhe një herë rolin e Teatrit “Skampa” si një nga qendrat më aktive të jetës kulturore në qytet, duke ofruar vepra që pasurojnë jetën artistike dhe afron publikun me teatrin.

Po vijojnë punimet për rikonstruksionin e plotë të shkollës 9-vjeçare të Shushicës, një prej institucioneve arsimore më të rëndësishme në zonat rurale të Bashkisë Elbasan.

Investimi po realizohet në bashkëpunim mes Bashkisë Elbasan dhe Ministrisë së Arsimit, me synimin për të krijuar kushte moderne dhe dinjitoze për zhvillimin e procesit mësimor.

Pas përfundimit të punimeve, rreth 320 nxënës dhe 35 mësues do të përfitojnë ambiente të rikonstruktuara dhe infrastrukturë bashkëkohore, në funksion të rritjes së cilësisë së arsimit.

Ky është një investim i rëndësishëm dhe prej kohësh i kërkuar nga banorët e zonës, që do të kontribuojë në përmirësimin e kushteve të mësimit dhe në krijimin e një mjedisi më të përshtatshëm për fëmijët e Shushicës.