Bashkia e Elbasanit dhuron 108 botime për bibliotekat shkollore. Llatja/ “Pasuria e dijes nis nga libri”
Në kuadër të muajit tetor, i njohur si muaji i librit, Biblioteka e Qytetit të Elbasanit ka zhvilluar një sërë aktivitetesh kulturore e edukative për të nxitur dashurinë ndaj leximit. Në mbyllje të këtij muaji të veçantë, Bashkia e Elbasanit ka vendosur t’i japë një tjetër dimension nismave për librin, përmes dhurimit të 108 botimeve të reja për pasurimin e bibliotekave të shkollës “Fadil Gurmani” dhe asaj “Alush Lleshanaku” në Bradashesh.
Kryetari i Bashkisë së Elbasanit, Gledian Llatja, gjatë ceremonisë së dorëzimit të librave, theksoi se kujdesi i bashkisë nuk kufizohet vetëm te infrastruktura shkollore, por shtrihet edhe te pasurimi i jetës kulturore e arsimore të nxënësve.
“Në fokus të Bashkisë së Elbasanit nuk është vetëm infrastruktura shkollore, por padyshim edhe pasurimi i bibliotekave dhe rehabilitimi i terreneve sportive apo laboratorëve. Shkolla ‘Fadil Gurmani’ sot plotëson të gjitha kushtet e infrastrukturës dhe ka një staf të shkëlqyer pedagogjik, por të gjitha këto do të ishin të pamjaftueshme pa pasuruar edhe bibliotekën,” u shpreh Llatja.
Në një kohë kur teknologjia po fiton gjithnjë e më shumë hapësirë në jetën e fëmijëve, kryebashkiaku Llatja theksoi nevojën për të mbajtur të gjallë pasionin për leximin.
“Sot, kur libri sfidohet çdo ditë nga fuqia e jashtëzakonshme e teknologjisë, detyra jonë për të rritur fëmijë të lexuar, që e duan librin, bëhet edhe më e madhe,” shtoi ai, duke nënvizuar se tetori nuk shërben thjesht për të kujtuar rëndësinë e librit, por për të forcuar përpjekjet e përvitshme për promovimin e tij.
Librat e dhuruar përfshijnë autorë të njohur të letërsisë botërore dhe shqiptare, si Heminguej, Tomas Man, Mopasan, Balzak e shumë të tjerë, duke pasuruar ndjeshëm fondin letrar të këtyre shkollave.
“Biblioteka e shkollës, ashtu si ajo e qytetit, duhet të rimarrë rëndësinë që i takon për vetë pasurinë e paçmuar që mbart. Ne besojmë se libri mbetet ura më e fortë që lidh dijen me brezat. Pasuria e dijes nis nga libri,” përfundoi Llatja.
Përmes kësaj nisme, Bashkia e Elbasanit vijon të mbështesë projektet që nxisin kulturën e leximit dhe zhvillimin e një edukimi gjithëpërfshirës, duke e vendosur librin dhe dijen në qendër të vëmendjes publike.
