Lajme

Në kuadër të Javës së Europës, Bashkia Elbasan ka organizuar një sërë aktivitetesh, një ndër të cilat ishte edhe ajo me Këshillin Rinor Elbasan. Në këtë takim ku ka marrë pjesë edhe Kryetari i Bashkisë Z. Gledian Llatja, si edhe familjarë të familjeve të vjetra elbasanase, u diskutua për rëndësinë që ka bashkimi rreth vlerave e qëllimeve të përbashkëta për një kontinent e Botë më të mirë.  Gjithashtu të rinjve të Këshillit Rinor ju prezantua historia e familjes Biçaku në Elbasan,  që gjatë Luftë së Dytë Botërore u bë një strehë e sigurtë për 26 hebrenj në Elbasan. Traditë që u trashëgua dhe ditët e sotme, ku Elbasani u bë i pari qytet që hapi dyert dhe mikpriti sportistët ukrainas. Kryetari i Bashkisë Z. Gledian Llatja vlerësoi kontributin që Këshilli Rinor, por jo vetëm, edhe shumë të rinj të Elbasanit japin në fusha të ndryshme sociale të qytetit. Ndërsa e vuri theksin tek Java Europiane, Llatja pohoi se “ rrugëtimi ynë drejt familjes së madhe evropiane kalon gjithmonë nga gjenerata më e re. Çdonjëri nga ne e gjen veten në Europë. Jemi në kohë të vështira, edhe pse gati pas 100 vitesh kemi një luftë tjetër në Europë, është një situatë jo e këndshme për ne, për Europën, për politikat që ajo ka. Por, nëse ne kthejmë kokën pas në Luftën e Dytë Botërore, Shqipëria ishte krah aleatëve, kundër luftës, pro shteteve demokratike. Ne nuk duhet të harrojmë edhe holokaustin që ka ndodhur në Luftën e Dytë Botërore, prandaj duhet të jemi të fortë, ti themi njëzëri jo luftës, pasi ju jeni rinia, brezi më afër Europës.  Historia e Familjes Biçaku në Elbasan është shembulli më i prekshëm se si ne shqiptarët gjithmonë jemi rreshtuar në anën e së drejtës dhe historia jonë dëshmon se jemi faktor i bashkëpunimit e prosperitetit rajonal”, tha Z. Llatja. Në fund të rinjve i janë shpërndarë edhe çertifikata vlerësimi me motivacionin “ për pjesëmarrjen në aktivitetet e Javës së Europës 2022″.

Sot, Elbasani renditet tek Bashkitë me zero kultivim të lëndëve narkotike dhe kjo është me të vëtetë një arritje.Në një takim në sallën e teatrit ” Skampa” për të inkurajuar strukturat  lokale dhe nxitur bashkëpunimin e mirë të deritanishëm ndaj luftës së kultivimit të bimëve narkotike, kryetari i Bashkisë Z. Gledian Llatja pohoi se: “kemi një sfidë të përbashkët ne si shoqëri, pa dallime për të luftuar kultivimin e kanabisit në shqipëri. Ne kemi fatin e mirë sepse jemi Bashkia me nivelin zero të kultivimit të lëndëve narkotike, por, ne duhet të jemi avangart në ruajtjen dhe monitorimin e territorit në të gjithë vendin, jo vetëm në qytet por edhe në fshatrat më të largët. Kemi zona të thella në Elbasan, kemi shtëpi të abandonuara si në qytet ashtu eshe në fshat, të cilat bëhen vatra të lëndëve narkotike ku kultivohen pa rënë në sy. Kjo luftë është e përbashkët, e pushtetit vendor, komunitetit të Elbasanit dhe të gjitha institucioneve të tjera. Ne duhet të jemi gjithmonë të gatshëm për këtë luftë të vazhdueshme të komunitetit për të mirën tonë të përbashkët. Lufta kundër kultivimit të lënëve narkotike nuk është vetëm luftë e Elbasanit por e të gjithë Shqipërisë, e cila kërkon disponibilitet maksimal dhe bashkëpunim të gjitha strukturave. Një punë të rëndësishme në këtë proces kanë hallkat inspektuese, edhe pse me problematika për shkak të terrenit, por informacioni duhet te ndërlidhet dhe të veprohet sa më shpejt të jetë e mundur. OSHE ka një rëndësi të madhe në luftën kundër kanabisit, pasi aty ku konstaton konsum të lartë energjie dhe ka dyshime duhet të ndërhyjë në bashkëpunim me kryepleqtë dhe strukturat përkatëse. Nëse kemi dyshime për kultivimin e lëndëve narkotike duhet të jemi ne të parët që duhet të ngrijmë zërin.  Elbasani ka pasur dhe ka një traditë që nuk e ka kultivuar lëndën narkotike dhe duhet ta vazhdojmë këtë traditë. Ne kemi një bashkëpunim të mirë me strukturat me drejtin e Policisë së shtetit, shërbimet përkatëse informative, shefat e komisariateve, të gjithë bashkë ne jemi një strukturë” . Sipas kreut të Bashkisë ” parandalimi i kultivimit të lëndëve narkotike është shprehje e vendosmërisë sonë për t’i dhënë fund këtij kërcënimi që shkakton dëme të pamatshme për mijëra përdorues individualë, që shkatërron familje, që kërcënon strukturën morale të shoqërisë sonë si edhe dëmton ekonominë e ndershme.Puna e institucionit që unë drejtoj është e shtrirë në disa drejtime, siç është edhe mbështetja dhe fuqizimi i të rinjve. Bashkëpunimi me organizatat ndërkombëtare të tilla si projekti RAYS (i mbështetur nga qeveria e Mbretërisë së Bashkuar), është vetëm një nga shembujt se si ne mbështesim të rinjtë që të mos angazhohen në sjellje kriminale. Gjithashtu, investimet e zhvilluara në sport, art, kulturë dhe punësim ndihmojnë në arritjen e qëllimit tonë të përbashkët. Nëpërmjet kësaj qasjeje ne kemi mundësinë që të trajtojmë shkaqet që i shtyjnë shumë të rinj drejt konsumimit të lëndëve narkotike.Gjatë vitit të kaluar, në kuadër të luftës kundër kultivimit të lëndëve narkotike janë ushtruar kontrolle në të gjithë territorin e Bashkisë Elbasan. Gjatë kësaj periudhe punonjësit e Policisë Bashkiake janë vënë në mbështetje të Njësive Administrative dhe Kryetarëve të fshatrave me qëllim evidentimin e serave, tuneleve, vendstrehimeve nëntokësore, magazinave, shtëpive dhe objekteve të braktisura, etj… Ne do të vazhdojmë të punojmë edhe më fort jo vetëm për të parandaluar kultivimin e lëndëve por edhe identifikimin e hotspoteve të përdorimit të lëndëve narktoike. Në muajt në vijim ne do të vazhdojmë me ushtrimin e kontrolleve për kultivimin e lëndëve narkotike. Në këtë kontekst do të kërkoja nga të gjithë ju angazhimin maksimal dhe koordinimin e punës për të rritur sa më shumë efikasitetin në luftën kundër kultivimit të lëndëve narkotike.Unë u kërkoj burrave dhe grave guximtare të agjencive tona ligjzbatuese, prokurorisë dhe gjyqësorit si edhe të gjithë bashkëpunëtorëve tanë që të mos lëkunden kurrë në detyrën e tyre të vështirë, por edhe shpërblyese. Tashmë kemi arritur shumë në këto vite të fundit dhe mund të arrijmë më shumë në vitet e ardhshme.Ne duhet të qëndrojmë të palëkundur në fushatën tonë jo vetëm duke intensifikuar operacionet tona kundër kultivimit trafikimit të lëndëve narkotike por dhe duke trajtuar shkakun rrënjësor të abuzimit dhe varësisë nga droga.Dhënia fund e kultivimit të lëndëve narktoike do të thotë të sigurojmë të ardhmen e qytetit tonë. Së bashku, le të mundësojmë trashëgiminë më të madhe që mund t’u lëmë pas fëmijëve tanë dhe brezave pasardhës, NJË SHOQËRI PA DROGË- përfundoi fjalën e tij kryetari Llatja.Në këtë takim morën pjesë përfaqësues nga institucionet e rëndësishme të qytetit, si prefektja znj. Majlinda Perriu, përfaqësues nga policia z. Ardian Çipa, Drejtor i Drejtorisë Vendore të Policisë Elbasan dhe prokuroria Elbasan z. Kreshnik Ajazi, Drejtues i Prokurorisë së Rrethit Gjyqësor Elbasan si dhe kryepleqtë e Njësive Administrative të bashkisë Elbasan.

Kryetari i bashkisë së Elbasanit, Z.Gledian Llatja, bashkë me Sekretaren e Përgjithshme të Ministrisë së Brendshme, Elena Pici dhe prefekten Majlinda Peza vizituan zyrat e Gjendjes Civile në bashkinë e Elbasanit, për të parë nga afër ecurinë e reformës për digjitalizimin e shërbimeve. Që nga data 1 maj, të gjitha shërbimet publike tashmë ofrohen online, ndaj dhe qëllimi i kësaj vizite në bashkinë e Elbasanit, ka qenë për të inspektuar nga afër ofrimin e shërbimeve në Gjendjen Civile. Kryetari i bashkisë, Z.Llatja deklaroi se “në bashkinë Elbasan do të ketë 7 sportele fizike, ndërsa pjesa tjetër e shërbimeve do të oftohet vetëm online. Në këto sportele fizike do të ofrohen vetëm ato shërbime që kërkojnë domosdoshmërisht prezencën fizike të qytetarëve, ndërkohë që çdo shërbim tjetër do të merret online nëpërmjet platformës e-Albania. Janë udhëzuar të gjithë punonjësit e Njesive  Administrative, që të orientojnë qytetarët se si ti marrin këto shërbime online nëpërmjet e-Albania”. Nga ana e saj, Sekretarja e Përgjithshme e Ministrisë së Brendshme Elena Pici e vuri theksin tek orientimi dhe informimi i qytetarit duke deklaruar se “këto inspektime na shërbejnë për t’u njohur me problematikat e hasura këto ditë të para, dhe sigurojmë se problematikat që qytetari raporton, gjendja civile i raporton në kohe dhe trajtohen me prioritet nga e gjithë skuadra që merret me këtë shërbim. Është e rëndësishme që qytetarët të mos bien pre e çdo rasti abuziv nga subjekte private të cilat japin kosto të larta për një shërbim të cilin nuk do të jetë më i nevojshëm për qytetarët. Nëse do t’ju duhet që të merrni një shërbim në Zyrën Arsimore Rajonale, dhe  pjesë e këtij aplikimi është pajisja e një certifikate, është vetë zyra ajo e cila do ta marrë atë tek sistemi i Gjendjes Civile, duke i lehtësuar qytetarit printimin e certifikatës”. “Të vetmet certifikata që qytetarit do t’i nevojitet është ajo e lëvizjes jashtë vendit, ku certifikata mund të printohet në e-Albania në 6 gjuhë, pa u drejtuar tek institucioni i prefektit”, tha Pici. Që nga 1 maji, janë 8 shërbime publike, që do të jepen në sportele fizike për qytetarët. Mes tyre regjistrimi i lindjeve, martesave dhe shërbime që jepen në zyra noteriale, të cilat kërkojnë praninë fizike me domosdoshmëri. Pjesa tjetër e gjitha online, përmes aplikimeve në portalin shtetëror e-Albania.

Falë bashkëpunimit të ngushtë me Fondacionin “Mirënjohja” dhe Ambasadës së Kuvajtit  Bashkia Elbasan ka nisur ndërtimin e një Qendre të re Shëndetësore pas prishjes së objekteve të ndërtuara pa leje. Shumë shpejt rreth 5 mijë familje të Lagjes Nr.5 në Elbasan , do të kenë një qendër të re shëndetësore që plotëson të gjithë standardet. Kryetari i Bashkisë Z. Gledian Llatja ka parë nga afër punimet e kësaj qendre ku ka bërë të ditur se në Elbasan ka nisur një projekt për zhvendosjen e qendrave shëndetësore nga ambientet brenda pallateve, në godina të reja, në bashkëpunim dhe me komunitetin. “ Është një projekt për lëvizjen e qendrave shëndetëosre nga katet e para të pallateve, i cili nisi gjatë kohës së pamdemisë dhe që tashmë po jep rezultate. Është një shembulll i një pune të përbashkët , pushtet vendor,  pushtet qëndror dhe OJQ. Kjo qendër do t’i shërbejë dy lagjeve “Haxhias” dhe “Vullnetari” të cilat deri diku janë lagje shumë të mëdha por periferike, por që kohët e fundit falë investimeve të realizuara nga ana e Bashkisë kanë marrë jetë dhe po rivitalizohen”. Qendra shëndetësore është një nga kërkesat e hershme të banorëve, pasi pjesa më e madhe e banorëve janë të moshuar. “Tashmë jemi gati thuajse në përfundim për qendrën shëndetësore, ndërsa na mbetet në bashkëpunim edhe me pushtetin qendror që të ndërhyjmë për rehabilitimin e shesheve brenda pallateve, pasi janë lagje të mëdha,  edhe pse ka një ndryshim radikal falë investimeve që ne kemi bërë:, tha Z. Llatja. Pak muaj më parë ky shesh mes pallateve të lagjes Haxhias e kishte zaptuar një çiban – simbol i paligjshmërisë. Inspektoriati i Territorit të Bashkisë ndërhyri në kohë për t’ja rikthyer atë hapësirë komunitetit. Qendra e re Shëndetësore Nr.3 po ndërtohet më e fortë dhe e një tjetër standardi për të ofruar shërbime të kujdesit parësor shëndetësor për banorët e lagjeve “Vullnetari” dhe “Haxhias” në Lagjn nr. 5 . Qendra do të shërbejë për rreth 10 mijë banorë, ku do të shërbejnë 13 mjekë si edhe 29 infermierë, ashtu si edhe me specifikat e qendrave të tjera, do të ofrohet edhe shërbimi i Chek – Up, shërbimi pediatrik, vizita, si edhe do të vijohet edhe me shërbimin e mbasdites.  

Në 80-vjetorin e rënies së Heroit të Popullit Qemal Stafa, qytetit iu rikthye një simbol i sakrificës së rrallë në Luftën Antifashiste Nacional Çlirimtare. Falë bashkëpunimit të ngushtë me Këshillin e Qarkut Elbasan dhe Organizatën e Familjeve të Dëshmorëve në lulishten qëndrore “Aqif Pasha” u vendos shtatorja e punuar me aq mjeshtëri e dashuri nga skulptori elbasanas Vladimir Caridha. Në vijim, në sallën e teatrit “ Skampa” Bashkia organizoi një aktivitet përkujtimor, për vlerësimin e nderimin e Qemal Stafës, simbolit të luftës për liri e përparim, dhe  për të gjithë dëshmorët dhe heronjtë që u flijuan për Atdhe!. Qemal Stafa ishte bashkëthemelues i Grupit Komunist të Shkodrës, pjesëtar në takimin e themelimit të partisë, anëtar i Komitetit Qëndror dhe sekretar politik i të rinjve. Ndaj është nder për Elbasanin që në qendër të qytetit të ngrihet busti i një figure  si Qemal Stafa, veprimtaria revolucionare e të cilit ra në sy të pushtuesve italianë e bashkëpunëtorëve të tyre, ndaj më 5 Maj 1942 u rrethua nga fashistët italianë në Tiranë dhe u vra duke luftuar heroikisht. Qemal Stafa ishte edhe një letrar i talentuar. Krijimtaria e tij u takon kryesisht viteve të rinisë. Shkroi tregime, skica e vjersha, një pjesë e të cilave u botuan me pseudonimin “Brutus” në shtypin përparimtar të kohës. Radhitet ndër letrarët e viteve ’30. Në shkrimet e tij ai u ngrit kundër realitetit shoqëror të kohës, vuri në qendër njerëzit e thjeshtë që vuanin nga padrejtësitë shoqërore, dha portrete të luftëtarëve e të njerëzve me karakter të fortë që nuk u mposhtën nga vështirësitë e që luftuan për një botë të re. Në shkrimet e tij me karakter publicistik Qemal Stafa paraqiti haptazi idetë e tij revolucionare me pjekuri e bindje të thellë. Trashëgimi i tij letrar është përmbledhur në vëllimin “Qortimet e vjeshtës”(1961)  

Shtëpitë e Besim dhe Xhaferr Sollakut në fshatin Korrë të Funarit, rreth 1 vit më parë u përfshinë nga flakët për shkak të një defekti elektrik. Falë ndërhyrjes në kohë nga ekipet e emergjencave civile dhe mbështetjen e Bashkisë Elbasan, arritën të rindërtojnë shtëpitë e tyre në një kohë të shpejtë. Nën kujdesin e veçantë të kryetarit të Bashkisë së Elbasanit Z. Gledian Llatja, tashmë kjo familje ka një shtëpi të re.  Pasi ka uruar familjen Sollaku për shtëpinë e re, Kryetari i Bashkisë i cili ka qenë i pranishëm në momentet që familjarët kanë hyrë në banesën e re, i ka falenderur për besimin që ata kishin tek mbështetja e Bashkisë së Elbasanit. Familja Sollaku pas djegies së banesës, i humbën shpresat se mund ta rindërtonin atë, për shkak të gjendjes jo të mirë ekonomike. Ata e kishin të pamundur ta rindërtonin shtëpinë e tyre, ndaj dhe kërkuan ndihmën e Bashkisë së Elbasanit. Menjëherë Ekipi i Emergjencave Civile me mbështetjen e Bashkisë arritën të rindërtonin banesën e tyre në një kohë record, duke e rikthyer si në gjendjen e mëparshme. Familjet Sollaku në fshatin Korrë të Funarit, tashmë kanë një banesë të re dhe më komode si dikur.  

Kryetari i Bashkisë Elbasan, z Gledian Llatja ka marrë pjesë në takimin e organizuar me drejtues të partive politike të Këshillit të Bashkisë në qytetin Kristiansand Norvegji. Ky takim është organizuar në kuadër të eventit të organizuar për “Javën e Demokracisë” Democracy Week, me ftesë të Kryetarit të Bashkisë Z.Jan Oddvar Skisland. Qëllimi i këtij takimi ishte për të  ndarë praktikat më të mira në vullnetarizmin lokal dhe për të prezantuar prioritetet dhe eksperiencën e Bashkisë Elbasan. “I lumtur të prezantoja praktikat e mira të Bashkisë Elbasan, përfshirjen e gjerë të qytetarëve në proçeset vendimmarrëse lokale përmes Buxhetimit me Pjesëmarrje dhe Këshillin Vendor të Sigurisë Publike si një model suksesi”, ka pohuar Z. Llatja. Ky takim u organizua falë organizatës PVN Shqipëri pēr rrjetëzimin ndërmjet qyteteve shqiptare dhe norvegjeze. Takimi u zhvillua në Bashkinë Kristiansand me Kryetarin e Bashkisë, administratën lokale së bashku me kolegët Kryetarë të Bashkive Lushnje, Berat dhe Tropojë ku u ndanë eksperiencat e secilit në kuadër të përfshirjes së programeve të vullnetarizmit dhe ku u prezantuan mundësitë dhe sfidat e Bashkive Elbasan, Berat, Tropojë, Lushnje. Në këtë tur, kreu i Bashkisë ka zhvilluar një takim edhe me Drejtuesin e Dhomës së Tregëtisë në Kristiansand, ku u diskutua rreth mundësive për rritjen e prezencës së sipërmarrësve Norvegjezë në Shqipëri, ku një rëndësi e veçantë ishin mundësitë në sektorin e turizmit.  

Urë e re për banorët e  Korrës, fshatit të largët    Një tjetër investim i cili i vjen në ndihmë 200 banorëve të fshatit Korrë në Funarin turistik ka përfunduar. Bashkia Elbasan ka bërë të mundur ndërtimin e urës së re në këtë fshat të largët. Kryetari i Bashkisë Z. Gledian Llatja ka parë nga afër përfundimin e punimeve të urës e cila kishte shumë vite që thuajse ishte jashtë funksionit. Ishte një premtim i bërë nga ana e kreut të Bashkisë për ndërtimin e një ure të re për banorët e zonës së thellë të Funarit. ” Ndërtimi i urës së re do ti vijë në ndihmë banorëve, por do të lehtësojë shumë qarkullimin e mjeteve drejt spitalit të Elbasanit si edhe fëmijëve që shkojnë në shkollë” , pohon Z Llatja. Ura është ndërtuar me të gjitha parametrat e duhura, dhe lehtëson qarkullimin edhe brenda Njësisë Administrative të Funarit. Bashkia Elbasan,  është dhe do të jetë gjithmonë pranë komunitetit me qëllim lehtësimin e qarkullimit por edhe të gjithë problemet që dalin ne vazhdimësi.

Maja e Korrës, në Funarin e resurseve dhe turizmit të mrekullueshëm, shumë shpejt do të kthehet në një destinacion turistik për sportet e aventurës në Shqipëri dhe Rajon. Kryetari i Bashkisë Z. Gledian Llatja, pohon se “shume shpejt do të marrë formë ambicia jonë për ta shndërruar këtë perlë mahnitëse natyrore në pikën më të rëndësishme turistike për sportet e aventurës në Shqipëri dhe rajon”. Duke nisur nga Maja e Korrës do të hapen shtigjet malore me qëllim që Funari të lidhet me Labinotin Fushë dhe Elbasanin. “Janë  rreth 70  kilometra shtigje që do të hapen për këmbësorët, për të apasionuarit e sportit, për mjetet, si edhe për biçikletat.  Është një gamë e gjerë  a aktiviteteve të cilat programohen në Njësinë Administrative Funar.  Ndaj, sot ne vendosëm një nga piketat e para në këtë Majë ku do të ngihet edhe një nga pistat më të mëdha  që ne kemi në Shqipërinë e Mesme për hedhjen me parashutë, si edhe do të jetë pika kryesore lidhëse e disa shtigjeve kryesore që do të lidhen me Elbasanin, duke u kthyer kështu në një destinacion turistik”, pohon Z. Llatja. Funari, është pjesë e qytetit, të Bashkisë së Elbasanit, e resurseve e turizmit të mrekullueshëm, me ujë, blektori dhe peshk. Bashkia e Elbasanit ka kryer një sërë investimesh në Funar, ku dikurë ishte thuajse i harruar. E pasur me pyje pishash dhe dushku Funari ofron një klimë të shëndetshme që nëse i shtojmë dhe gatimet tradicionle të zonës bëhet vendi ideal për të kaluar fundjavat. Ishte një inisiativë e Bashkisë së Elbasanit që Funarit ti jepte atë që me të vërtetë meritonte, emrin, ” Funari Turistik”, duke shpallur edhe datën 26 Mars ditë feste për promovimin e turizmit në këtë zonë, si edhe kthimin e kësaj feste në traditë.