Lajme

Procesi i buxhetimit me pjesëmarrje ka vijuar sot në Njësinë Administrative Labinot-Fushë, ku banorët u njohën me investimet e realizuara gjatë vitit të fundit, si edhe me prioritetet që do të pasqyrohen në planin e investimeve për vitin 2026.

Në këtë takim mori pjesë deputetja Sara Mile si dhe nënkryetari i Bashkisë Elbasan, z. Asim Sula, i cili së bashku me administratorin e njësisë prezantuan projektet e kryera duke theksuar mbështetjen e vazhdueshme ndaj zonave rurale.

Gjatë vitit të fundit, Bashkia Elbasan ka investuar në përmirësimin e infrastrukturës rrugore dhe shërbimeve komunitare në të gjithë territorin e njësisë, duke përfshirë, asfaltim i rrugës së lagjes së spitalit, asfaltim i rrugëve të brendshme në lagjet Isak, Bucajvër dhe Shkëmbit. Sistemim dhe pastrim sistematik i kanaleve ujitëse. Sistemim i ujërave të zeza në përroin e Larit dhe zonën e pompave Mëngel.

Rikonstruksion i qendrës shëndetësore Labinot-Fushë, vendosje ndriçimi publik në lagje, pastrim i gurrës së ujit, rehabilitim dhe asfaltim i rrugëve Krastë–Ura e Lizës dhe Behxhet Hyti–Mëngel, dhe rehabilitim i kanalit ujitës në Mëngel.

Në fshatin Godolesh janë realizuar ndërhyrje për rehabilitimin e rrjetit të ujit të pijshëm, shtrimin me çakull të rrugës Shegunë, vendosjen e ndriçuesve publikë në rrugët kryesore si edhe vendosjen e koshave të mbeturinave.

Nënkryetari i Bashkisë Elbasan, z. Asim Sula, u shpreh se , “Bashkia Elbasan është e angazhuar të sjellë investime të prekshme në çdo lagje e fshat. Rritja e cilësisë së jetesës së qytetarëve është prioriteti ynë kryesor dhe buxhetimi me pjesëmarrje garanton që zëri i banorëve të jetë gjithmonë vendimtar në planifikimin e projekteve të reja.”

Procesi i buxhetimit me pjesëmarrje vijon, me synimin për të ndërtuar një zhvillim të balancuar dhe për të forcuar bashkëpunimin mes Bashkisë dhe komuniteteve lokale.

Në kuadër të procesit të Buxhetimit me Pjesëmarrje, Bashkia Elbasan zhvilloi një takim me banorët e Njësisë Administrative Labinot Mal, me qëllim përfshirjen e tyre në identifikimin e nevojave dhe prioriteteve të zhvillimit për vitin e ardhshëm. Në këtë takim mori pjesë deputetja Sara Mile si edhe Nënkryetari i Bashkisë Elbasan,  z. Asim Sula, i cili theksoi rëndësinë e dialogut të drejtpërdrejtë me komunitetin për të ndërtuar projekte që pasqyrojnë vërtet nevojat e qytetarëve.

Gjatë takimit u prezantuan edhe investimet e rëndësishme që Bashkia Elbasan ka realizuar në territorin e Labinotit Mal dhe fshatrave përbërëse, si devijimi dhe hapja e rrugës së njohur si “Balta” në fshatin Gur i Zi, betonizimi dhe sistemimi i rrugëve në Sericë, si dhe pastrimi i rrugëve lidhëse nga qendrat e njësive administrative në fshatrat Shmil, Dritas dhe Qafë etj.

Këto ndërhyrje përfaqësojnë angazhimin e vazhdueshëm të Bashkisë Elbasan për zhvillimin e infrastrukturës dhe përmirësimin e cilësisë së jetës në zonat rurale, duke forcuar lidhjen ndërmjet komuniteteve dhe duke mbështetur potencialet e tyre ekonomike.

Labinoti Mal njihet për traditën e bujqësisë, kultivimin e gështenjave e arrave, si dhe për mbarështimin e bletëve dhe prodhimin e mjaltit cilësor, ç’ka e bën këtë njësi të pasur në burime natyrore dhe me potencial për zhvillim të qëndrueshëm.

Në përmbyllje, Nënkryetari Asim Sula nënvizoi se “zëri i qytetarëve është themeli i çdo vendimmarrjeje të drejtë”, duke shtuar se Bashkia Elbasan do të vijojë të investojë në Labinot Mal dhe në çdo njësi tjetër me fokus në infrastrukturë, bujqësi dhe mjedis, për një zhvillim të qëndrueshëm dhe jetë më të mirë për banorët.

Në fund të takimit, banorët e Labinot Malit votuan për prioritetet kryesore të investimeve, të cilat do të shqyrtohen nga Bashkia Elbasan për t’u përfshirë në buxhetin e vitit 2026, duke vijuar kështu traditën e transparencës dhe përfshirjes qytetare në vendimmarrje.

Teatri i Kukullave në Elbasan, një prej projekteve të realizuara falë kërkesave të Këshillit Rinor dhe komunitetit të prindërve gjatë procesit të buxhetimit me pjesëmarrje, po vijon të kthehet në një hapësirë kulturore e të dashur për fëmijët e qytetit.

Që me publikimin e afishes së shfaqjes në Teatrin “Skampa”, vogëlushët e kanë pritur me padurim “Pinoku im, djali perfekt”. Interesi i madh u dëshmua edhe me mbushjen e sallës së Teatrit të Kukullave nga fëmijët dhe familjet e tyre, të cilët u zhytën në botën e aventurave të Pinokut.

Xhoni Abazi shkëlqeu në rolin e Pinokut, duke sjellë një interpretim plot emocione e humor dhe duke përcjellë mesazhe të bukura edukative për publikun e vogël. Shfaqja mban regjinë e Hysen Mullajonuzit dhe u mirëprit me duartrokitje e buzëqeshje nga të gjithë të pranishmit.

Prindërit shprehën kënaqësinë e tyre për një hapësirë të tillë të dedikuar fëmijëve, ndërsa të vegjlit nuk e fshehën gëzimin.

“Ishte shumë bukur! Dua ta shoh përsëri Pinokun!” , u shpreh një nga vogëlushët pas shfaqjes.
“Kemi pasur nevojë për aktivitete të tilla. Fëmijët tanë e meritojnë këtë lloj argëtimi,”, tha një prind i pranishëm.

Për shkak të kërkesës së madhe, shfaqja do të rivihet sërish në ditët në vijim, për t’i dhënë mundësinë edhe më shumë fëmijëve të shijojnë këtë eksperiencë të veçantë teatrore.

Me të tilla aktivitete, Elbasani po u ofron fëmijëve më shumë hapësira arti, loje dhe imagjinate, aty ku gjithçka është e mundur!

Në kuadër të nismës për qeverisje të hapur dhe përfshirëse, Forumi i OGP Elbasan, në bashkëpunim me Bashkinë Elbasan, ka hartuar një pyetësor publik që synon të mbledhë mendimet, idetë dhe shqetësimet e qytetarëve lidhur me nevojat e komunitetit, në funksion të përgatitjes së Buxhetit me Pjesëmarrje 2026.

Ky proces i hapur është një mundësi e rëndësishme për çdo qytetar që të ndikojë drejtpërdrejt në përcaktimin e investimeve prioritare të Bashkisë, duke ndihmuar që ato të përputhen me kërkesat reale të komunitetit.

Nëpërmjet pyetësorit, qytetarët mund të shprehin mendimin e tyre për:

Prioritetet e lagjes apo njësisë administrative ku jetojnë

Projektet që dëshirojnë të realizohen

Çështjet që kërkojnë zgjidhje

Përfshirjen dhe informimin në procesin e buxhetimit publik

 Plotëso pyetësorin këtu:

https://docs.google.com/…/1FAIpQLSeoizpIGd0PJF…/viewform

Kjo nismë është fryt i bashkëpunimit të ngushtë ndërmjet Bashkisë Elbasan dhe Forumit OGP, si pjesë e përpjekjeve të përbashkëta për të ndërtuar një Elbasan më transparent, më gjithëpërfshirës dhe me pjesëmarrje aktive qytetare në proceset vendimmarrëse.

Buxhetimi me pjesëmarrje vijoi në Rajonin Nr. 5, ku një numër i madh banorësh u mblodhën për të ndjekur nga afër diskutimin dhe për t’u bërë pjesë aktive me mendimet dhe sugjerimet e tyre për investimet publike të vitit 2026.

Kryetari i Bashkisë, z. Gledian Llatja u shoqërua në këtë takim nga Drejtuesi Politik i PS për Qarkun, z. Arbjan Mazniku, Deputetja znj. Aulona Bylykbashi, Kryetarja eKëshillit të Qarkut, znj. Ermira Urupi, si dhe Kryetari i Njësisë Administrative, z. Agron Lulaj.

Takimi u mbajt në shkollën e rikonstruktuar “Fadil Gurmani”, e kthyer sot në një nga shkollat qendrore të qytetit me kushte bashkëkohore.

Duke marrë fjalën, znj. Ermira Urupi theksoi rëndësinë e bashkëpunimit ndërmjet institucioneve vendore dhe përfaqësuesve politikë në shërbim të qytetarëve, duke shprehur mbështetjen për nismat e Bashkisë që synojnë përmirësimin e cilësisë së jetës në çdo lagje të qytetit.

Ndërsa deputetja Aulona Bylykbashi u fokusua te rezultatet konkrete të investimeve të deritanishme në Rajonin Nr. 5.

 “Pjesëmarrja juaj në buxhetim tregon që ka një besim të shtuar në këtë proces, ndaj kjo është një tregues pse pjesëmarrja juaj është në rritje.”

Kryetari i Bashkisë, z. Gledian Llatja, falënderoi qytetarët për kontributin e tyre, ndërsa solli në vëmendje investimet kryesore të realizuara në zonë. Ai u ndal pikërisht te vendndodhja e takimit.

 “Fadil Gurmani është një nga shkollat qendrore të qytetit, por nuk konsiderohej e tillë, konsiderohej si shkollë periferike. Sot një shkollë totalisht e rikonstruktuar, me staf fantastik arsimor, me terrene sportive të reja, afër universitetit dhe me standarde shumë të mira.”

 Llatja shtoi se brenda këtij viti do të nisë puna për tre shkolla të tjera të rëndësishme, shkollën 9-vjeçare “Naim Frashëri”, gjimnazin kryesor të qytetit dhe shkollën e Shushicës.

Ai theksoi rikonstruksionin total të Çerdhes Nr. 2, si edhe hapjen e një çerdheje të re për të mbështetur familjet e reja të zonës. Gjithashtu, Llatja përmendi Qendrën Rinore të rikonstruktuar, kërkesë e dalë nga procesi i buxhetimit me pjesëmarrje.

Në fokus të punës së Bashkisë kanë qenë edhe infrastruktura rrugore, ujësjellësi dhe kanalizimet.

Nga ana e tij, z. Arbjan Mazniku përgëzoi ekipin drejtues të Bashkisë për punën dhe u shpreh se deputetët do të kenë në mënyrë permanente një prezencë në zyrë të paktën një herë në javë që t’ju japë secilit prej qytetarëve mundësinë të diskutojnë për një problem me deputetin, ashtu siç e ka kryetari i bashkisë çdo ditë të enjte.

Mazniku u ndal tek përmirësimi i dukshëm i qytetit, duke vlerësuar se “ Elbasani sot është shumë herë më i mirë se para tre vitesh, shumë herë më i mirë se para dhjetë vitesh dhe është e sigurt që pas një viti do të jetë një qytet më i mirë se është sot”.

Mazniku shtoi: “kemi një seri punësh të tjera të rëndësishme të cilat janë duke u bërë me mbështetjen e qeverisë”, duke nënvizuar rëndësinë e bashkëpunimit në të gjitha nivelet për të adresuar nevojat dhe pritshmëritë e qytetarëve.

Në përmbyllje të takimit, banorët e Rajonit Nr. 5 vlerësuan investimet e realizuara gjatë vitit të fundit dhe vijuan me votimin e prioriteteve të reja, të cilat do të kthehen në investime të prekshme gjatë vitit 2026.

Procesi i Buxhetimit me Pjesëmarrje ka vijuar në Njësinë Administrative Funar, një nga zonat me potencialin më të madh turistik dhe natyror të Bashkisë Elbasan.

Në takimin me banorët mori pjesë Nënkryetari i Bashkisë Elbasan, Asim Sula, i cili vlerësoi kontributin e komunitetit dhe evidentoi investimet e rëndësishme që janë realizuar gjatë këtij viti në këtë zonë.

Gjatë diskutimit, u theksua se Funari tashmë është përfshirë në “Paketën e Maleve”, si një nga zonat që do të përfitojnë projekte të dedikuara për zhvillimin e infrastrukturës rurale dhe turizmit të qëndrueshëm.

Investimet e kryera dhe ato që pritet të nisin së shpejti, po i japin zonës një dinamikë të re zhvillimi, duke e kthyer në një qendër të rëndësishme për turizmin natyror dhe aventuror.

Sula bëri me dije se në muajin nëntor do të nisë edhe një projekt i ri në bashkëpunim me një organizatë në Elbasan dhe Bashkinë Elbasan, që ka të bëjë me ndërtimin e një Parku Aventurash modern, që do të sjellë zhvillim të zonës dhe një atraksion të ri turistik për Funarin.

Gjatë kësaj periudhe, në Funar janë realizuar ndërhyrje të rëndësishme në mirëmbajtjen e rrugëve rurale, pastrimin e kanaleve kulluese dhe sistemimin e rezervuarëve në Mollagjesh e Cërujë, si dhe rehabilitimi i aksit Letan–Funar, që ka lehtësuar ndjeshëm qarkullimin e banorëve dhe vizitorëve.

Në kuadër të strategjisë për zhvillimin e turizmit malor, në Funar tashmë janë hapur bujtinat e para, si “Bujtina Agim”, që ofrojnë mikpritje dhe akomodim për turistë vendas dhe të huaj.

Zonës i janë shtuar gjithashtu aktivitete të reja turistike dhe sportive, që po e kthejnë Funarin në një destinacion të preferuar për pushime dhe aventurë.

Peizazhi i veçantë i zonës, me katër liqene të shpërndarë përreth fshatit, ofron mundësi për aktivitete si kajak dhe kanoe, ndërsa projekti në zhvillim “Funari Adventure Park” do të përfshijë një pistë parashutizmi, mbi 75 km shtigje malore dhe një qendër informimi për vizitorët, duke krijuar kushte për turizëm aktiv gjatë gjithë vitit.

Në kuadër të Buxhetimit me Pjesëmarrje, banorët parashtruan edhe propozime për projekte të tjera që lidhen me turizmin, bujqësinë dhe përmirësimin e infrastrukturës publike, duke u bërë pjesë aktive e procesit të vendimmarrjes për zhvillimin e komunitetit të tyre.

Bashkia Elbasan vijon të mbetet e angazhuar në mbështetjen e zonave rurale me potencial turistik, duke e kthyer Funarin në një zonë me zhvillim të qëndrueshëm dhe afatgjatë.

Në kuadër të procesit të buxhetimit me pjesëmarrje, Kryetari I Bashkisë Elbasan, Gledian Llatja, zhvilloi një takim me banorët e Njësisë Administrative Papër, I shoqëruar nga deputetja e zonës, znj. Sara Mile.

Gjatë takimit, kryebashkiaku Llatja vuri theksin te investimet e realizuara gjatë këtij viti dhe theksoi se puna do të vijojë me intensitet vitin që vjen.

“Buxhetimi me pjesëmarrje është formati që ndjekim për të përcaktuar investimet në njësitë administrative, por edhe për punët komunale që nevojiten në fshat. 

Kemi ardhur me shumë investime dhe kemi realizuar më shumë se çfarë ishte parashikuar në listën e prioriteteve. 

Viti nuk ka mbaruar ende, kemi ende punë për të bërë. 

Ndërkohë po flasim për buxhetin e vitit 2026 dhe planin trevjeçar, duke vijuar me  zhvillimin e Elbasanit dhe përmirësimin e cilësisë së jetesës në çdo fshat, njësi administrative,” u shpreh Llatja.

Ai shtoi se fokusi I Bashkisë nuk është vetëm në zgjidhjen e problemeve immediate të infrastrukturës, por edhe në zhvillimin ekonomik e turizmin.

Ndërsa deputetja, znj. Sara Mile, vlerësoi procesin e buxhetimit me pjesëmarrje si një praktikë e mirë demokratike.

“Buxhetimi me pjesëmarrje është një ritual shumë I mirë I Bashkisë së Elbasanit, një proces demokratik, dhe shpresoj të na ecë gjatë. 

Do të ishte mirë ta mbajmë këtë ritual bashkarisht edhe në diskutimet e tjera, në çështje ku duhet të ndërhyjë pushteti vendor. 

Do të përpiqem të jem një zë I fortë për ju, të kemi një bashkëpunim shumë të mirë me Bashkinë e Elbasanit dhe do të mundohem të kontribuoj edhe në nivel qeveritar, pasi fuqizimi nga të dyja anët do të sjellë më shumë efektivitet për zonën,” u shpreh Mile.

Në përfundim të takimit, banorët votuan për prioritetet e tyre, të cilat do të shqyrtohen për t’u kthyer në investime konkrete gjatë vitit 2026.

Gjimnazi i njohur “Dhaskal Todri”, një nga institucionet arsimore më të rëndësishme në qytetin e Elbasanit, do t’i nënshtrohet rikonstruksionit të plotë brenda vitit 2025. Ky investim i Bashkisë së Elbasanit vjen si përgjigje ndaj nevojave urgjente të nxënësve dhe stafit pedagogjik për ambiente më moderne dhe standarde më të larta mësimdhënieje.

Kryetari i Bashkisë, z. Gledian Llatja, bëri të ditur se përmes këtij projekti do të transformohen të gjitha hapësirat ekzistuese, duke krijuar kushte të reja bashkëkohore për zhvillimin e procesit arsimor.

Me rikonstruksionin e paralajmëruar, 607 nxënës dhe 42 mësues do të përfitojnë, klasat e mësimit të rinovuara dhe të pajisura me teknologji bashkëkohore, laboratorë funksionalë për shkencat natyrore,sisteme të përmirësuara të ngrohjes, dhe sigurisë, si dhe mjedise të jashtme të rehabilituara.

Bashkia e Elbasanit mbetet e përkushtuar në rritjen e cilësisë së arsimit dhe krijimin e kushteve sa më të mira për brezat e rinj, duke e kthyer shkollën publike në një prioritet të padiskutueshëm të zhvillimit të qytetit.

Gjatë këtij viti, në Rajonin Nr. 4 janë realizuar disa investime të rëndësishme, duke zgjidhur edhe disa problematika të banorëve.

Të gjitha këto investime janë diskutuar dhe përfshirë në procesin e buxhetimit me pjesëmarrje, ku kryetari i Bashkisë Elbasan, Gledian Llatja, i shoqëruar nga deputeti Adi Qose, zhvilluan një takim masiv me banorët e rajonit.

Llatja e vuri theksin tek Përroi i Zaranikës, një çështje që dikur ishte problem për lagjen.

“Mbaj mend zaranikën, me problemin, se do të përmbyste lagjen, por Zaranika u zgjidh”.

Duke u ndalur tek investimet në infrastrukturën arsimore, Llatja shtoi se “ U kemi dhënë një prioritet të madh investimeve në infrastrukturën arsimore gjatë këtyre viteve. Do të vazhdojmë vitin tjetër të investojmë në shkollat tona.

E filluam me një shkollë në vit, kaluam në dy shkolla në vit dhe tani kemi kaluar në rikonstruksionin e tre shkollave në vit, si edhe po kryejmë sistemime të pjesshme për mbi 20 infrastruktura arsimore. Kjo është pozitive sepse po i bëjmë me buxhetet tona dhe me ndihmën e qeverisë shqiptare.”

Në Rajonin 4 kanë përfunduar investime në çerdhe dhe shkolla, përfshirë çerdhen nr. 2 dhe rikonstruksionin e shkollës “Bardhyl Popa”, ndërsa çerdhja nr. 5 ndodhet në ndërtim. Po ashtu, janë mbyllur punimet në lagjen “Aqif Pasha” dhe së shpejti do të mbyllet edhe lagjja “Visarion Xhuvani” dhe disa rrugë të vogla, duke përfunduar të gjithë Rajonin 4 dhe duke u fokusuar më pas tek zonat informale të qytetit.

Përveç zgjidhjeve infrastrukturore, Llatja foli edhe për projektin e rivitalizimit të Lagjes Kala.

“Në Kala, ka dy javë që kanë ardhur arkitektët dhe po shohin banesat nga brenda, sepse kemi nisur projektin për rikonstruksionin e lagjes Kala, një projekt fantastik. Fillojmë nga rruga kryesore nga Porta e Kalasë deri tek “Via Egnatia”, ku do të restaurohen të gjitha banesat anash këtyre rrugëve dhe njëkohësisht po vazhdojmë edhe me projekte të tjera për zhvillimin e infrastrukturës brenda Kalasë.”

Deputeti Adi Qose theksoi rëndësinë e buxhetimit me pjesëmarrje.

“Jam shumë i lumtur që ju shoh kaq shumë në një nga proceset më të rëndësishme, ku ju vendosni për investimet e vitit të ardhshëm. Kjo është mënyra më e drejtë që investimet të shkojnë aty ku nevojiten më shumë”, tha ai.

Në fund të takimit, banorët votuan për prioritetet e tyre, duke kontribuar drejtpërdrejt në vendosjen e investimeve që do të realizohen në vitin 2026.

Llatja thirrje qytetarëve: Aplikoni deri në 3 nëntor.

Në mbledhjen e Këshillit Bashkiak të Elbasanit u miratua pika për miratimin e vlerës së qirasë mesatare të shtresave të banesave në tregun e lirë dhe vlerës maksimale të subvencionit të qirasë për vitin 2026.

Kjo nismë synon të mbështesë familjet në nevojë për strehim, të cilat nuk mund të përballojnë pagesën e qirasë në tregun e lirë, si dhe shtresat vulnerabël që përfitojnë nga skema e bonusit të qirasë.

Gjatë diskutimit, Kryetari i Bashkisë Elbasan, Gledian Llatja, u bëri thirrje të gjitha familjeve që janë në nevojë të përfitojnë nga kjo mundësi:

“U bëj thirrje të gjitha familjeve, nxitoni të aplikoni pasi  në datë 3 nëntor është dita e fundit e aplikimeve për skemën e bonusit të qirasë. 

Kjo është një nga skemat e cila u vjen në ndihmë familjeve në nevojë, grave të dhunuara, të divorcuara, atyre që janë në vështirësi ekonomike apo shtresave të ndryshme vulnerabël, por edhe familjeve që për një arsye apo tjetër u është prishur banesa e tyre pa mundësi legalizimi dhe kanë nevojë për një banesë të tyre apo një banesë private.”

Llatja nënvizoi rëndësinë e aplikimeve brenda afatit të përcaktuar, duke theksuar se qiratë do të jenë me vlerën mesatare të tregut:

“Dua t’u bëj apel të gjitha familjeve që duan të aplikojnë në këtë skemë që të aplikojnë deri në tre nëntor. Qiratë janë me vlerë mesatare të tregut. Projektvendimi për garsoniere është 10 mijë lekë në muaj, apartament 1+1 me 10 mijë lekë të vjetra, 2+1 me 12 mijë lekë dhe 15 mijë lekë të vjetra për apartamentet 3+1. Këto janë çmimet që po miratojmë sot për mbështetjen e familjeve për bonusin e qirasë.”

Në fjalën e tij, kryetari Llatja solli edhe të dhëna konkrete për ecurinë e skemës.

“Deri tani kemi 200 aplikime që po bëhen gati nga familjet që kanë aplikuar në këtë skemë. Vitin e kaluar janë miratuar 309 familje të cilat janë kualifikuar. Dokumentacioni dhe kërkesat ligjore janë të qarta. Familjet që nuk kanë mundësi të paguajnë tregun me qira janë të gjitha të lutura të aplikojnë, pasi vit pas viti janë miratuar të gjitha ato që kanë aplikuar. Janë 315 kuota të lira, ndaj i bëj thirrje që të aplikojnë.”