Lajme

Në një vizitë të veçantë në punishtet e skulptorit të njohur Vladimir Caridha në lagjen “Kala” Kryetari i Bashkisë së Elbasanit, z. Gledian Llatja, pati mundësinë të njohë më nga afër punimet artizanale të këtij artisti të talentuar. Ky takim u shndërrua në një mundësi  për të njohur më nga afër botën krijuese të një artisti që ka lënë një gjurmë të rëndësishme në artin skulpturor të vendit tonë.

Gjatë vizitës, Llatja u impresionua nga gama e gjerë e veprave të Caridhas, të cilat shpalosin mjeshtërinë dhe shpirtin e thellë artistik të skulptorit.

“Vizita në punishtet e Vladimir Caridha është një përvojë që pasuron dhe inspiron,” tha Kryetari Llatja. “Punimet e tij janë më shumë se veprat e artit, ato janë një pasqyrë e thellë e ndjenjave dhe mendimeve që artisti ka për botën. Është një privilegj të shohësh nga afër procesin krijues dhe të njihesh me pasurinë që ai sjell në kulturën tonë.”

Skulpturat e Caridhas, të cilat përfshijnë figura njerëzore dhe abstrakte, janë krijuar me një ndjeshmëri të veçantë për detajet dhe përshkrimin e emocioneve. Secila vepër ka një histori të veçantë dhe është rezultat i një pune të përkushtuar dhe të kujdesshme.

Kryetari Llatja shprehu mbështetje për inisiativat artistike dhe nënvizoi rëndësinë e ruajtjes dhe promovimit të trashëgimisë kulturore në qytetin e Elbasanit. Ai theksoi gjithashtu angazhimin e Bashkisë për të ndihmuar artistët lokalë dhe për të krijuar mundësi për promovimin e arteve në komunitet.

 Elbasani ka shumë punime të jashtëzakonshme, të skulptorit Vladimir Caridha, si  portreti  Ataturkut,  Busti i Qemal Stafës, monumenti i arsimit etj.

Vladimir Caridha është një skulptor i njohur dhe shumë i respektuar në Elbasan. Punimet e tij kanë një ndikim të rëndësishëm në kulturën artistike dhe janë një shembull i shkëlqyer i përkushtimit dhe kreativitetit. Prej 40 vitesh ai kujdeset profesionalisht për punishten e tij si dhe edukimin artistik të brezave të rinj.

 Rivitalizimi i Qendrës së Gjinarit Turistik ka nisur tashmë me ritme intensive, duke synuar transformimin e kësaj zone në një destinacion të rëndësishëm për turistët dhe banorët lokalë. Kryetari i Bashkisë, Gledian Llatja, ka kryer një inspektim të afërt të punimeve dhe ka vlerësuar progresin e arritur deri tani.

Projektet përfshijnë një ndryshim të rëndësishëm të zonës, duke përfshirë ndërtimin e një infrastrukture të re, përfshirë kanalizimet, trotuarët, ndriçimin, një park shlodhës dhe një kënd lojrash. Fusha e Kuqe, një zonë sportive e rëndësishme, ka marrë një pamje të re dhe tërheqëse, ndërsa një segment rrugor i ndërtuar me gurin karakteristik të Gjinarit do të lidhë të gjitha pjesët e zonës deri te lapidari.

Kryetari Llatja ka theksuar se, përveç këtyre investimeve, projekti përfshin edhe ndërtimin e një muzeumi dhe një qendre informacioni për të gjithë zonën e Shpatit, ku do të shpaloset tradita dhe kultura e kësaj zone. Ai e ka cilësuar këtë si një premtim të mbajtur për përmirësimin e infrastrukturës dhe zhvillimin e turizmit në zonë.

“Problemi i vonesës për nisjen e punimeve ishte mbyllja e shpronësimeve, e cila ndikoi në afatet e zbatimit të projektit. Megjithatë, tani jemi në kohë dhe këto ditë do të hidhet asfalti. Ky është një projekt kompleks dhe ambicioz që do të kontribuojë në zhvillimin e qëndrueshëm të Gjinarit,” tha Kryetari Llatja.

Rivitalizimi i Gjinarit pritet të rrisë tërheqjen e vizitorëve dhe të ofrojë mundësi të reja për zhvillimin e biznesit lokal, duke pasuruar ofertën turistike të Elbasanit dhe duke kontribuar në mirëqenien e komunitetit lokal.

Banorët e Gjinarit kanë hapur dyert e shtëpive dhe bujtinave, të cilat me mikpritjen dhe gatimet tradicionale po tërheqin gjithnjë e më shumë miq nga e gjithë Shqipëria e jo vetëm.

Kryetari i Bashkisë z. Gledian Llatja, ka inspektuar punimet që janë drejt përfundimit në lagjen ” Dyli Haxhire”, një zonë në lagjen NSHU, në rrugën “Tasim Luniku” duke shprehur kënaqësinë për transformimin e ndjeshëm të kësaj zone.
“Kemi nisur me kanalizimet, me ujin e pijshëm, dhe tashmë po sistemohet komplet rruga duke zgjidhur të gjitha problematikat. “Nga një zonë totalisht informale, lagja NSHU po i kthehet urbanizimit”, tha Llatja.
Një ndër aspektet më të rëndësishme të projektit ka qenë përmirësimi i infrastrukturës së kanaleve të ujërave të shiut, veçanërisht në pjesën malore të lagjes, që ka paraqitur sfida të veçanta.
“Pavarësisht temperaturave të larta, puna vazhdon pandërprerë në këtë lagje,” shtoi kryetari i bashkisë. “Kur erdhëm para tre vjetësh dhe thamë se do të investonim në ujin e pijshëm, dukej si një mision i pamundur. Por, pas kanalizimeve të ujërave të zeza, tashmë jemi duke shtruar rrugën.”
Llatja theksoi se që në fillim ka besuar se gjërat do të rregulloheshin gradualisht, edhe pse zona është fundore dhe shumë pranë ullishtave ku sistemimi ka qenë i pamundur nga banorët. “Jam i bindur se ne ia dolëm,” tha ai.
Pas përfundimit të punimeve në këtë pjesë malore, do të vijojë sistemimi i rrugicave të tjera në zonën e NSHU. “Pjesa malore ka qenë problematike për qarkullimin e mjeteve, por tashmë kjo çështje është zgjidhur dhe do të vazhdojmë me urbanizimin,” tha Llatja.
Banorët janë shprehur të kënaqur me mbështetjen e dhënë nga bashkia, duke theksuar se problemet e tyre ishin të shumta. “Fundjava do të na gjejë me të gjithë segmentin e rrugës të sistemuar,” përfundoi kryetari i bashkisë.

Ekipet tona të Punëve Publike janë në terren çdo ditë duke punuar me ritëm të lartë për mirëmbajtjen e kanaleve vaditëse në të gjithë zonat rurale. Aktivitetet e përditshme përfshijnë pastrimin e kanaleve, riparimin e dëmtimeve dhe përmirësimin e strukturave ekzistuese, për të siguruar funksionimin optimal të këtij sistemi të rëndësishëm.

Bashkia Elbasan po tregon një vëmendje të shtuar për t’i siguruar një lehtësim bujqve në punët e stinës. Ne e kuptojmë rëndësinë e një infrastrukture të mirë për suksesin e sektorit bujqësor dhe po punojmë për të ndihmuar çdo fermer që të arrijë rezultatet më të mira.

VetëmPërpara

Pas disa orësh përpjekje të pandërprera, ekipet tona kanë arritur të vënë nën kontroll zjarrin pranë fshatit Valas. Falë bashkëpunimit të shkëlqyer me bashkitë fqinje, Drejtorinë e Përgjithshme të Zjarrfikësve, Emergjencat Civile, Forcat e Ushtrisë dhe Prefekturën Elbasan, arritëm të shpëtojmë banesat dhe objektet e rëndësisë së veçantë.

Ekipet vijojnë të jenë në terren për të monitoruar çdo riaktivizim të mundshëm të zjarrit.

“Dëshiroj të falënderoj Drejtorin e Përgjithshëm të Zjarrfikësve, Arben Cara, dhe Kryetarin e Bashkisë Cerrik, Andis Salla, për mbështetjen e tyre të çmuar,” tha Kryetari i Bashkisë së Elbasanit, Gledian Llatja.

Ai gjithashtu bëri thirrje për kujdes të shtuar nga qytetarët: “Zjarrvënia, qoftë e qëllimshme apo aksidentale, është një vepër penale e dënueshme me ligj. Ju lutemi, tregohuni të kujdesshëm dhe raportoni çdo aktivitet të dyshimtë.”

Bashkia Elbasan mbetet e përkushtuar në garantimin e sigurisë dhe mirëqenies së komunitetit, duke u angazhuar maksimalisht në parandalimin dhe menaxhimin e situatave emergjente.

Në mes të natyrës së virgjër dhe peizazheve mbresëlënëse, bujtina Agim ka pritur vizitën e kryetarit të Bashkisë, z. Gledian Llatja, i cili ka mbështetur fuqishëm promovimin e këtij turizmi malor në qytetin e Elbasanit.

 Funari, kjo perlë turistike, ka hapur dyert për qindra turistë këtë verë të nxehtë, tërhequr jo vetëm nga Shqipëria, por edhe nga vende si Gjermania, Holanda, madje edhe Dubai.

Një nga bujtinat që spikat në këtë zonë është Bujtina Agim, e mobiluar me kujdes dhe komoditet. Ajo përmban tre dhoma gjumi me kushte higjeno-sanitare të shkëlqyera. Vizitorët janë të shumtë, duke bërë rezervime jo vetëm nga Shqipëria, por edhe nga jashtë vendit. Administruesja e bujtinës tregon se kërkesat janë të shumta dhe rezervimet bëhen edhe me telefon, duke theksuar se numri i lartë i vizitorëve ka qenë një surprizë për të gjithë.

“Ka raste kur turistët presin që të largohet një turist për ta prenotuar tjetri,” thotë ajo.

 Kryetari i Bashkisë, z. Gledian Llatja, shprehet se “kur filluam idenë e Funarit dhe të promovonim bujtinat, duke i kërkuar banorëve të cilët kishin zbritur në qytet apo jashtë, t’i kthenin shtëpitë e tyre në bujtina, kjo dukej si çudi. Por sot, me investimet e fundit dhe ndihmën e BE-së me projektet info cross border, kemi bërë investime në infrastrukturën e ujësjellës kanalizimeve dhe energjinë elektrike.”

Falë ndihmës së BE-së për promovimin e turizmit, janë ngritur info point-e, janë vendosur kajakë, biçikleta, qendra parashutizmi dhe shtigje malore, duke e kthyer Funarin në një destinacion të pashoq turistik. “Nuk do të mendohej kurrë që turistët do të zgjedhin vetëm detin, por edhe zonat malore si Funari,” shton z. Llatja.

Bujtina Agim, e vendosur në një zonë rurale, ofron një përvojë të veçantë me freskinë e natyrës, praninë e bletëve, liqenit dhe kafshëve të ndryshme.

 “Është një mrekulli, me një freski që nuk e gjen në qytet,” shprehet z. Llatja.

 “Jemi të kënaqur për këtë, ne kemi promovuar dhe do të vazhdojmë të promovojmë bujtinat. Kemi disa vite që investojmë dhe po shohim frutet e punës sonë. Bujtina Agim dhe të tjera po hapen, dhe turistët vijnë për të eksploruar Funarin, qëndrojnë këtu për dy-tre muaj, punojnë këtu, dhe kjo është diçka shumë pozitive.”

Funari po kthehet në një destinacion tërheqës për turistët, dhe Bujtina Agim është një shembull i shkëlqyer i zhvillimit dhe mikpritjes shqiptare.

Në një atmosferë miqësore dhe bashkëpunimi, pata kënaqësinë të mirëprisja në bashkinë e Elbasanit një mik të veçantë, Ambasadorin e Mbretërisë së Bashkuar në Shqipëri, Shkëlqesinë e Tij Z. Alastair King-Smith.

Gjatë takimit, pata mundësinë t’i përcjell ambasadorit urimet më të mira për punën e tij të shkëlqyer në krye të misionit në Shqipëri dhe për detyrat e reja që do t’i besohen në të ardhmen.

 Gjithashtu, ambasadori pati rastin të vizitojë ekspozitën e hapur në bashki, ku shpaloset trashëgimia historike, kulturore dhe turistike e qytetit tonë.

Në bujtinën “Deliu”, një nga destinacionet më të njohura të turizmit rural në Mollagjesh, kryetari i bashkisë z. Gledian Llatja zhvilloi një bisedë me familjarët e kësaj bujtine dhe një turist anglez. Kjo bujtinë, e cila ka parë një rritje të ndjeshme të vizitorëve këtë sezon, ka bllokuar të gjitha datat për rezervime.

“Kemi bllokuar të gjitha datat,” thotë e zonja e bujtinës. “Një person që vjen, mund të rrijë dy-tre ditë, por maksimumi nuk mund të qëndrojë më tepër. Por, duke pasur aktivitete të shumta rreth e përqark, i shtojnë më tepër ditët e qëndrimit, gjë që është më interesante për bujtinat që të kenë më shumë netë fjetjeje.”

Aktivitetet në natyrë si xhiro me varka, kuaj, biçikleta dhe vizita në shpella janë disa nga atraksionet që i bëjnë turistët të qëndrojnë më gjatë. Ish mësuesja, ka punuar për 36 vjet në Mollagjesh, tani merret me turizmin pas daljes në pension dhe përpiqet t’u mësojë shqipen turistëve që vijnë.

Turistët vijnë nga e gjithë bota për të shijuar natyrën e bukur të zonës. “Francezë, anglezë, rumunë, çekë, sllovakë, të gjithë vijnë,” thotë ajo. “Natyra është shumë e bukur, janë shumë të kënaqur.”

Kryetari i bashkisë, i pranishëm në bisedë, thekson se promovimi i destinacioneve turistike dhe investimet në infrastrukturë janë kyçe për zhvillimin e zonës. “Investuam tek rruga e Funarit dhe qendra e informacionit, sepse është e rëndësishme të informohen mbi zonën, gatimet, destinacionet dhe aktivitetet që ofron zona,” thotë ai.

Një turist anglez, i cili kishte rezervuar fillimisht për një javë, vendosi të zgjaste qëndrimin e tij pas përvojës së mrekullueshme që pati. “Unë vij nga Londra, por kam jetuar në Zelandën e Re dhe Australi për një kohë të gjatë. Vendosa se nuk doja të largohesha më nga ky vend,” thotë ai. “Unë po punoj për startup-in tim këtu dhe është një vend i bukur ku mund të punosh pa presion.”

Turizmi rural në Mollagjesh po përjeton një rigjallërim të madh, duke tërhequr gjithnjë e më shumë vizitorë që kërkojnë përvoja autentike dhe të veçanta. Bujtina “Deliu” është një shembull i shkëlqyer i mikpritjes dhe bukurisë së kësaj zone.

Gjatë një vizite në punishten  e dy vëllezërve Loris dhe Erald Hasa u njoha nga afër me biznesin e tyre të trashëguar.

 Më gëzoi fakti se dy vëllezërit prodhojnë një gamë të gjerë mobiljesh me cilësi të lartë dhe përkushtim, të cilat kanë tejkaluar kufijtë e vendit tonë.

 Edhe pse një biznes i hershëm familjar, Loris dhe Eraldi kanë nisur prej vitesh eksportimin e mobiljeve në vende të ndryshme të Europës si Itali dhe Gjermani, ku kërkesat janë për mobilim banesash, zyrash dhe hotelesh.

 Bizneset në Elbasan po vijnë në rritje, falë përkushtimit të tyre.

 Do të vazhdojmë t’i mbështesim dhe inkurajojmë për të ndihmuar në zhvillimin ekonomik të qytetit tonë.