Lajme

 Konferencë për Shtyp nga Presidenti i Federatës dhe Drejtori i Sportit

Në datat 23-28 korrik, në Pallatin e Sportit “Tomorr Sinani” në Elbasan, do të zhvillohet Kampionati Europian i Basketbollit për moshën U18, aktiviteti i parë ndërkombëtar i kësaj përmase në këtë arenë sportive. Bashkia Elbasan, nën kujdesin e veçantë të kreut të bashkisë, z. Gledian Llatja, i ka kushtuar një vëmendje të veçantë këtij kampionati.

Në një konferencë të përbashkët për shtyp, Drejtori i Sportit në Bashkinë Elbasan, z. Artin Kovaci, dhe Presidenti i Federatës së Basketbollit, z. Avni Ponari, dhanë detajet për organizimin e këtij aktiviteti. Z. Ponari theksoi angazhimin e veçantë që Bashkia e Elbasanit dhe Klubi Shumësportësh kanë ofruar për këtë kampionat.

“Në eksperiencën tonë, organizonim një aktivitet në vit, por kësaj here Federatës Shqiptare të Basketbollit iu besuan dy aktivitete, U16 në Tiranë dhe U18 në Elbasan. Urojmë që ky aktivitet të zhvillohet ashtu si duhet. Pjesëmarrja e tetë ekipeve nga vende të ndryshme të Evropës është e rëndësishme, sepse ato janë kombëtaret e ardhshme. Ne presim shumë nga kombëtarja jonë sepse ka një përvojë në pjesëmarrjen e aktiviteteve të shumta, ndaj urojmë që të kemi rezultat pozitiv,” tha Ponari.

Ky aktivitet zhvillohet bazuar në eksperiencën dhe përvojën e viteve të kaluara. Pas një eksperiencë 6-vjeçare, është fituar besimi dhe janë krijuar ekipet zinxhir. Federata ka arritur të përfaqësohet në të gjitha kompeticionet, ndaj pritjet janë të mëdha. Programet që ka aplikuar federata gjatë kësaj kohe kanë bërë që të jenë të integruar dhe të kenë prurje nga basketbolli. Një meritë e veçantë i takon edhe shoqatave sportive të cilat janë pjesë e federatës për europianizimin e këtyre aktiviteteve.

“Në mbledhjen e fundit vendosëm që çdo ekip të jetë i lirë dhe të zgjedhë si të dojë në mënyrë që aktivitetet të zhvillohen në nivelin dhe mundësitë që ka secila shoqatë sportive. Kjo mënyrë i nxit lojtarët vendas të arrijnë nivele të larta për të mos marrë lojtarë nga jashtë. Gjithashtu, do të krijojmë një kampionat të veçantë me U20 për femra dhe meshkuj, e cila do të jetë liga më e fortë në rast se do të kapim numrin e nevojshëm për zhvillimin e aktiviteteve.

Ndaj i nxisim të gjitha shoqatat sportive që ta rrisin rolin e skuadrave për të arritur nivelin e duhur”, shtoi Ponari. Ai e cilësoi një ngjarje të shënuar kampionatin që do të zhvillohet në Elbasan, pasi sot mbërrin edhe sekretari i përgjithshëm i FIBA Europës, i cili do të marrë pjesë në ceremoninë e hapjes dhe në ndeshjen e parë Shqipëri – Luksemburg. Elbasani merr ngjyra më të forta si pritës i një aktiviteti kaq të rëndësishëm ndërkombëtar.

Drejtori i Sporteve në Bashkinë Elbasan, z. Artin Kovaci, theksoi angazhimin maksimal që është ndërmarrë për zhvillimin e këtij aktiviteti. “Ne jemi gjithmonë gati për aktivitete të kësaj natyre sepse eksperienca nuk na mungon, dhe ne jemi si shumë qytete të tjera si edhe Tirana. Sipas të gjitha kritereve që kërkon FIBA, Federata Shqiptare e Basketbollit i ka plotësuar, ndaj edhe ky kampionat do të shkojë në parametra maksimal si në organizim por edhe në cilësi sportive. Ndaj dëshira jonë është që ekipi shqiptar të jetë fitimtar i këtij kampionati.”

Kovaci, duke iu referuar kushteve të Pallatit të Sportit, i cili është ndër më të mirët në vend, kërkoi që aktivitete të tilla ndërkombëtare të zhvillohen edhe në të ardhmen.

Me 21 korrik 1934 përfundoi ndërtimi i godinës së bibliotekës publike “Qemal Baholli”, Elbasan.

Prej 90 vjetësh kjo bibliotekë ka shërbyer gjithmonë si një udhërrëfyes i zhvillimit kulturor dhe arsimor i qytetit tonë, si një vend i dijes dhe i shkencës, e cila ruan dhe koleksionon trashëgiminë kulturore të shkruar të popullit shqiptar në përgjithësi dhe komunitetit elbasanas në veçanti.

Falënderime dhe mirënjohje për familjen Baholli, intelektualët dhe familjet elbasanase që kontribuuan në ngritjen dhe pasurimin e kësaj biblioteke.

Kampionati Europian i Basketbollit U18 për djem, i cili do të mbahet në Pallatin e Sportit “Tomorr Sinani” në Elbasan, është një ngjarje e rëndësishme për qytetin tonë.

 Në këtë kuadër, kryetari i bashkisë, z. Gledian Llatja, zhvilloi një bashkëbisedim me elitën e Klubit Shumësportësh në ambientet e ristrukturuara tërësisht të pallatit të sportit, duke falënderuar për punën e bërë dhe duke inkurajuar që ky kampionat të mos jetë i pari, por të sjellë të tjera të ardhme në Elbasan.

“Ky është aktiviteti i parë i madh ndërkombëtar që bëhet në Elbasan, por gjatë kësaj periudhe i kemi kushtuar një vëmendje të veçantë të gjitha ambienteve tona sportive, sidomos Pallatit të Sportit ‘Tomorr Sinani’ dhe fushës së vjetër të sportit ‘Shefqet Lamcja’.

 Pallati i Sportit është një nga fokuset kryesore për rehabilitimin e tij. Këto ndërhyrje që kemi bërë bashkarisht kanë qenë të domosdoshme për ta rikthyer në shkëlqimin që ka pasur dhe pse jo ta kalojë atë,” tha z. Llatja.

Pallati i Sportit ka marrë një pamje të re dhe zhvillim infrastrukture me ambiente të përshtatshme, salla mbledhjesh, dhe një parket që përmbush standardet e kërkuara nga Federata e Basketbollit dhe ajo e Volejbollit. E gjithë infrastruktura që i shërben tifozëve është rikualifikuar. Kryetari Llatja theksoi rëndësinë e investimeve në infrastrukturë dhe mbështetjen për sportistët e rinj.

“Vitet e fundit, sporti në Elbasan ka njohur një dimension tjetër. Kjo nuk ka ardhur vetë, por është bërë një punë e madhe nga ana jonë dhe ju. Dua t’ju falënderoj për punën e mirë që keni bërë dhe mbështetjen që i keni dhënë të rinjve dhe ekipeve tona. Ne jemi gati për Kampionatin Europian të Basketbollit U18 me ambientet tona dhe uroj shumë që të jemi kampionë,” shtoi ai.

Sa i përket akomodimit të ekipeve në Elbasan, z. Llatja pohoi se “po e presim me padurim Kampionatin Europian të Basketbollit që është një nga eventet kryesore, hotëlerinë e kemi, e cila ishte një nga kushtet që kërkohen, është shumë komode, kemi edhe zonën e Treganit që ka hotele shumë të mira, dhe në këtë periudhë që është kampionati është jashtë sezonit turistik, dhe ka mundësi të akomodojë të gjithë ekipet tona”.

Bashkia Elbasan ka dhënë të gjithë mbështetjen financiare që është kërkuar , dhe do të vazhdojë t’a japë për të gjithë pjesën e infrastrukturës  dhe terreneve sportive.

Në fund, kryetari i bashkisë ftoi të gjithë qytetarët e Elbasanit dhe vizitorët e Shqipërisë që vijnë si turistë të mos e humbasin këtë ngjarje të rëndësishme, duke theksuar se mbështetja e tifozëve është thelbësore për suksesin e kampionatit dhe zhvillimin e mëtejshëm të sportit në qytet.

Në Elbasan, një nga bashkitë përfituese ku po zbatohet projekti “Transparenca dhe Barazia në Ndërhyrjet Infrastrukturore në Shkolla”, mbështetur nga USAID dhe zbatuar nga UNICEF dhe Bashkia Elbasan, u zhvillua njw aktivitet për përmirësimin e infrastrukturës shkollore. Në këtë kontekst, UNICEF, me mbështetjen financiare të USAID-it, po bashkëpunon me gjashtë komuna për të vlerësuar infrastrukturën shkollore, duke përfshirë institucionet komunale si partnerë kyç.

Përfaqësues të UNICEF-it dhe drejtoresha e USAID në Shqipëri, znj. Mischere Kawas, kanë marrë pjesë në një seri aktivitetesh, duke nisur me “Tur Galeria- Kopshti im ideal”. Në këtë ngjarje, UNICEF-i, përfaqësuesit e USAID-it dhe Kryetari i Bashkisë, patën mundësinë të shohin punime artistike të realizuara nga fëmijët e kopshteve dhe shtatë shkollat e përzgjedhura “Shkolla ime, komuniteti im” nga Elbasani. Secila shkollë ishte e përfaqësuar nga drejtori i shkollës, dy të rinj, dy prindër dhe dy mësues, të cilët paraqitën analizën e nevojave të identifikuara në sistemin GIS dhe prioritizuan ndërhyrjet më të menjëhershme.

Kryetari i bashkisë, z. Gledian Llatja, theksoi se janë duke u bërë investime në shumë shkolla, duke përmendur “Jorgji Dilo”, “Bardhyl Popa” dhe “Kostandin Kristoforidhi”, ndërsa investime të pjesëshme po bëhen për të rregulluar problematikat e bartura, veçanërisht për sistemimin e tualeteve të vajzave.

Z. Llatja falenderoi USAID dhe UNICEF për zgjidhjen e problematikave në infrastrukturën shkollore dhe krijimin e një sistemi të qartë dhe të pastër për një nga problematikat kryesore të qytetit. Ai vuri në dukje rëndësinë e një komuniteti aktiv për zgjidhjen e problemeve, evidentimin dhe përcaktimin e prioriteteve, duke bërë të ditur se deri tani janë bërë publike 21 shkolla të Elbasanit.

Drejtoresha e Misionit të USAID në Shqipëri, znj. Mischere Kawas, shprehu mbështetjen për realizimin e këtij projekti dhe bindjen se do të përmbushë nevojat e shkollave dhe komunitetit. “Prioriteti ynë është të sigurohemi që zërat tuaj të dëgjohen. Dhe ky tubim sot është një përfaqësim i përsosur i këtij qëllimi – demokracisë në veprim”.

Përfaqësuesi i UNICEF në Shqipëri, Murat Sahin, vuri theksin tek angazhimi i komunitetit të prindërve dhe të mësuesve për të siguruar cilësinë e duhur të shkollave dhe sistemit arsimor, duke e cilësuar projektin si shumë premtues.

Shtatë shkolla në Elbasan janë zgjedhur për projektet e ndërhyrjes në infrastrukturë .

1. Shkolla Dhaskal Todri

2. Shkolla Ahmet Dakli

3. Shkolla Sulë Misiri

4. Shkolla e Shushicës

5. Shkolla Vasil Kamami

6. Shkolla e Kuqanit Anastas Çakalli

7. Shkolla Abdyl Paralloi

Elbasani ka parë një rritje të jashtëzakonshme të turizmit këtë vit, me 53% më shumë vizitorë në gjashtë muajt e parë krahasuar me të njëjtën periudhë të vitit të kaluar. Ky numër premtues parashikon një sezon veror të mbushur me turistë të rinj që zgjedhin të eksplorojnë këtë qytet të mrekullueshëm.

Kreu i bashkisë z. Gledian Llatja i cili i ka dhënë prioritet promovimit të turizmit pohon se “Elbasani ofron një gamë të gjerë atraksionesh për të gjithë llojet e turistëve. Kalaja e Elbasanit, me historinë dhe arkitekturën e saj të pasur, është një nga pikat kryesore të vizitës. Rrapat shekullore dhe Hamamet e vjetra ofrojnë një dritare në të kaluarën e lavdishme të qytetit. Për ata që kërkojnë natyrën, Bysheku dhe Gjinar janë destinacione të mrekullueshme, me peisazhe të pabesueshme dhe mundësi për ecje dhe aventura”. Funari, një tjetër thesar natyror, po bëhet gjithnjë e më popullor për turistët që kërkojnë të largohen nga zhurma e qytetit dhe të shijojnë qetësinë e natyrës.

Me më shumë udhëtime rrugore, dhe ujore, qyteti po bëhet gjithnjë e më i aksesueshëm dhe i popullarizuar. Pritet që kjo rritje të vazhdojë të sjellë më shumë zhvillim dhe mundësi për Elbasanin.

Për disa vite, kryetari i bashkisë Gledian Llatja ka qenë një mbështetës i fuqishëm i zhvillimit të turizmit në Elbasan. Synimi i tij kryesor është që Elbasani të shndërrohet në një qendër të rëndësishme për turizmin kulturor. Me një trashëgimi të pasur kulturore dhe natyrore, Elbasani tashmë është pjesë e hartës turistike, duke tërhequr vizitorë gjatë gjithë vitit.

Në Labinot të Elbasanit, u përkujtua me nderim dhe respekt 81 vjetori i krijimit të Shtabit të Përgjithshëm të Ushtrisë Nacionalçlirimtare Partizane.

 Ky event historik mblodhi bashkë qytetarë, historianë dhe personalitete të ndryshme mes tyre edhe kreun e bashkisë z. Gledian LLatja, si edhe drejtuesin politik të qarkut Damian Gjiknuri të cilët shprehën mirënjohjen e tyre për ata burra e gra, djem e vajza, që luftuan deri në vetmohim për lirinë e vendit.

Në fjalimet e mbajtura, u theksua rëndësia e kontributit të Elbasanit, i cili në këtë luftë ka qenë i çmueshëm dhe i pazëvendësueshëm. Gjatë ceremonisë, u vunë kurora me lule në monumentet e dëshmorëve, ndërsa të pranishmit sollën në vëmendje rolin kyç që Labinoti dhe Elbasani patën në luftën për çlirimin e vendit.

Kjo ngjarje shërben si një kujtesë e gjallë për sakrificat dhe heroizmin e atyre që luftuan për një Shqipëri të lirë dhe të pavarur.

Në kuadër të projektit “Bashkëpunimi Rajonal për Përfshirje më të Mirë Sociale në Nivel Lokal”, kreu i bashkisë z. Gldian Llatja  zhvilloi një takim mbështetur nga NALAS dhe GIZ/ORF, në bashkëpunim me GADC, për të prezantuar gjetjet kryesore të Hartëzimit Social për Fëmijët me Aftësi të Kufizuara.

Ky proces synon të identifikojë dhe adresojë nevojat specifike të fëmijëve me aftësi të kufizuara në komunitet. Qëllimi kryesor është të nxisim zhvillimin e shërbimeve të reja dhe të përmirësojmë ato ekzistuese, duke krijuar një mjedis më gjithëpërfshirës dhe mbështetës.

Në takim u diskutuan hapat e ardhshëm për të përmirësuar shërbimet sociale dhe për të siguruar që fëmijët me aftësi të kufizuara të kenë akses të barabartë në të gjitha mundësitë që ofron shoqëria. Pjesëmarrësit theksuan rëndësinë e bashkëpunimit midis organizatave lokale dhe ndërkombëtare për të arritur këto qëllime.

Në përfundim të takimit, u bë thirrje për veprime konkrete dhe për angazhim të vazhdueshëm për të krijuar një komunitet më gjithëpërfshirës dhe mbështetës për fëmijët me aftësi të kufizuara.

Kryetari i bashkisë Z. Gledian Llatja ka marrë pjesë në forumin konsultativ të organizuar nga Instituti për Demokraci dhe Ndërmjetësim (IDM) ku u diskutua projekt-vendimi i Këshillit të Ministrave për funksionimin e Këshillave Vendorë të Sigurisë Publike (KVSP).

Në këtë forum u diskutuan disa problematika të rëndësishme që duhet të adresohen:

Mospërputhshmëria me dispozitat kushtetuese për decentralizimin dhe autonominë vendore.

Nevoja për qartësi të plotë në lidhje me kompetencat e prefektit dhe kryetarit të bashkisë në çështjet e sigurisë publike.

Mungesa e specifikimit të rregullave për organizimin dhe funksionimin e KVSP-ve.

“Në fjalën time, theksova rëndësinë e ruajtjes së vazhdimësisë së funksionimit të KVSP-së në bashkinë Elbasan dhe shpreha shqetësimin se versioni i ri i propozuar do të pengojë punën tonë të drejtpërdrejtë. Duhet të sigurohemi që pushteti vendor dhe qeverisja qendrore të punojnë bashkë për sigurinë publike”.

OSBE dhe bashkia Elbasan kanë nënshkruar marrëveshjen e mirëkuptimit, si dëshmi e bashkëpunimit dhe partneritetit të vazhdueshëm me Këshillin Vendor të Sigurisë Publike (KVSP).

Marrëveshja e Mirëkuptimit krijon një kuadër të përgjithshëm bashkëpunimi dhe koordinimi të aktiviteteve të përbashkëta ndërgjegjësuese për rrezikun dhe keqpërdorimin e armëve të zjarrit ndërmjet palëve përkatëse të interesit, si pjesë e KVSP-së së Elbasanit.

KVSP-të, të cilat janë mbështetur nga Prezenca në të gjithë vendin që prej vitit 2016, bashkojnë një gamë të gjerë institucionesh dhe aktorësh, duke garantuar përfaqësimin e të gjithëve, që nga qeverisja kombëtare, institucionet lokale, komunitetet fetare, organizatat joqeveritare dhe të rinjtë, duke shërbyer si forume që rrisin pjesëmarrjen e publikut në çështjet e sigurisë.

Ceremonia e nënshkrimit u mbajt gjatë mbledhjes së Këshillit Vendor të Sigurisë Publike, me pjesëmarrjen e aktorëve lokalë si Policia e Shtetit, Prokuroria, Shërbimi Social dhe përfaqësues të disa Organizatave të Shoqërisë Civile (OSHC).

Aktivitetet ndërgjegjësuese janë pjesë integrale e projektit “Asistencë për autoritetet e Republikës së Shqipërisë për uljen e rrezikut të përhapjes së armëve dhe keqpërdorimit të armëve të vogla dhe të lehta” , i cili zbatohet nga Prezenca e OSBE-së , me fonde të Bashkimit Evropian , Gjermanisë dhe Francës .

Fjala e Kryetarit të Bashkisë Z. Gledian Llatja

Të nderuar anëtarë të Këshillit Vendor të Sigurisë Publike, i nderuar Ambasador i pranisë së OSBE në Shqipëri, Zoti Mikel Karan, faleminderit për prezencën tuaj që për herë të parë si ambasador po vini në Elbasan pas disa vizitave shumë vite më parë. Shumë faleminderit për mbështetjen që i dhatë ju personalisht por edhe OSBE-së Këshillit Vendor të Sigurisë Publike në Elbasan por edhe KZVP-së në të gjithë rajonin.

I nderuar Drejtor i Policisë Vendore të Qarkut Elbasan, Zoti Ilir Proda, shumë faleminderit që jeni prezent sot në këtë mbledhje të KVSP dhe shumë faleminderit për të gjithë punën e mirë dhe bashkëpunimin ndërmjet strukturave të policisë dhe strukturave të komunitetit dhe ato komunitare kanë ndërmjet tyre.

I nderuar zv/drejtues i Prokurorisë së Elbasanit, z. Xheljan Seferi, shumë faleminderit që jeni sot prezent, për të gjithë punën e mirë që ka bërë institucioni juaj në bashkëpunim edhe me Komisariatin e Policisë Elbasan për të gjitha ato çështje të ndjeshme që ne kemi pasur dhe kemi si komunitet, por edhe për bashkëpunimin e mirë që ka me OJQ-të të cilat zhvillojnë aktivitetin në Elbasan, dhe është një shembull i mirë që duhet të merret nga shumë institucione të tjera, për bashkëpunimin dhe marrëveshjet e bashkëpunimit tashmë të kolauduara ndërmjet këtyre institucioneve.

Shumë falënderir anëtarëve të Këshillit Bashkiak, shumë faleminderit sekretarit të gjykatës, institucioneve shëndetësore, të rinjve të cilët kanë ardhur nga Këshilli Rinor dhe janë prezent sot këtu si edhe OJF-ve që zhvillojnë aktivitetin në Elbasan, Shoqatës së Grave, përfaqësuesve të Drejtorisë Arsimore, për bashkëpunimin e mirë.

Elbasani ka një Këshill Vendor të Sigurisë Publike i cili shumë herë është marrë shembull, por kjo tavonë ku ne jemi sot, është ajo tavolinë e punës ku ne zgjidhim shumë nga problematikat tona. Sekretari i Dhomës së Tregtisë na është gjendur pranë në të gjitha rastet tona ku kemi pasur nevojë të punësojmë kryesisht gratë e dhunuara apo shtresat në nevojë. Bashkëpunimi ndërmjet KVSP dhe biznesit të Elbasanit ka qenë një xhevahir i mirë për komunitetin dhe për punën tonë.

Jemi mbledhur sot për të adresuar një çështje me rëndësi të madhe që është “Ndërgjegjësimi për përdorimin e armëve të lehta dhe të vogla”. Sot ne mblidhemi këtu për të hedhur dritë mbi temën e përhapjes dhe shpesh të anashkaluar të armëve të lehta dhe të vogla si një çështje që prek drejtpërdrejt sigurinë e komuniteteve tona. Armët e lehta dhe të vogla luajnë një rol të rëndësishëm për formimin e konflikteve dhe dhunës. Ato janë lehtësisht të transportueshme, të arritshme për parandalimin e tyre dhe ajo që është më e rëndësishme për shmangien e çdo situate të papëlqyeshme nga ne të gjithë.

Pranoj sot se ne jemi sërish bashkë për të punuar drejt një shoqërie ku paqja dhe siguria mbizotëron tek të gjithë dhe duhet të jetë tema e diskutimeve tona të përbashkëta. Faleminderit për vëmendjen dhe angazhimin tuaj në kuadër të kësaj çështje kaq të rëndësishme për ne të gjithë.

Rruga “Hajdar Blloshmi”, një zonë informale në lagjen “5 Maji”, ka pasur shumë probleme sidomos në stinën e dimrit me reshje shiu, duke shkaktuar vështirësi në qarkullim. Edhe pse punimet janë drejt fundit, ku po vendosen pusetat dhe ndriçimi, tashmë kjo lagje, e cila ka vila dhe shtëpi individuale, po shndërrohet në një lagje rezidenciale.

Gjatë inspektimit të punimeve në këtë zonë, kreu i bashkisë, z. Gledian Llatja, së bashku me drejtuesin politik të qarkut, Damian Gjiknuri, theksuan investimet e shumta që janë kryer në lagjen “5 Maji” dhe që po vijojnë ende.

“Në këtë lagje kemi nisur një plan të madh për urbanizimin. Para disa ditësh kemi mbyllur edhe pjesën e kanalizimeve të ujërave të zeza në zonën e “Teqes”, që është një nga lagjet e mëdha të zonës së Elbasanit,” tha z. Llatja.

Drejtuesi politik i qarkut, Damian Gjiknuri, theksoi rëndësinë e investimeve në rrugë, të cilat sipas tij janë ndër më kryesoret për komunitetin. “Edhe kjo rrugë ka qenë një premtim në fushatë dhe një fjalë e mbajtur, dhe ky investim i mbetet banorëve”, tha ai. Në këtë lagje janë dy shkolla, dhe rruga u shërben edhe nxënësve të shkollës. Në Elbasan janë kryer një sërë punimesh të rëndësishme për përmirësimin e infrastrukturës dhe urbanizimit. Këto përfshijnë ndërtimin e rrugëve të reja, sistemimin e kanalizimeve, dhe përmirësimin e ndriçimit publik. Këto investime kanë pasur ndikim të madh në jetën e përditshme të banorëve, duke rritur cilësinë e jetesës dhe lehtësuar qarkullimin në zonë.