Lajme

Në Bashkinë Elbasan u zhvillua takimi konsultues i radhës në kuadër të hartimit të Planit të Mbrojtjes Sociale të bashkisë. Të pranishëm në këtë aktivitet ishin grupi i punës i ngritur me urdhër të Kryetarit të Bashkisë, Gledian Llatja, përfaqësues të grupeve të interesit si dhe anëtarë të OGP.

Në këtë takim u diskutua dhe u ndanë ide konkrete mbi zgjerimin e shërbimeve për mbështetjen e individëve dhe grupeve në nevojë, me synimin për t’i ofruar ato sa më pranë komunitetit. U vendos theksi te shërbimet specifike për grupe të veçanta si personat me aftësi të kufizuara dhe komunitetet vulnerabël rome dhe egjiptiane, bazuar në një analizë të nevojave të tyre.

Bashkia Elbasan ka përjetuar ndryshime të theksuara vitet e fundit, përfshirë rritjen e numrit të familjeve të prekshme edhe në zonat rurale dhe periferike, plakjen e popullsisë, shtimin e varësisë nga shërbimet sociale si dhe emigrimin. Këta faktorë kanë çuar në nevojën për një rishikim të planit të mbrojtjes sociale, me fokus në shërbime të decentralizuara dhe të personalizuara.

Plani i ri synon t’i përgjigjet sfidave social-ekonomike, të përmbushë detyrimet ligjore dhe angazhimet në kuadër të Objektivave të Zhvillimit të Qëndrueshëm, si dhe të sigurojë një infrastrukturë shërbimesh sociale të aksesueshme, cilësore dhe të qëndrueshme në kohë.

Fermeri Gazmir Hysa nga Jagodina ka sjellë një risi në bujqësinë lokale: rrush në sera. Prodhim cilësor dhe më shumë të ardhura për familjen e tij.

Por nuk është vetëm kaq. Hapja e Unazës Bujqësore, rruga që lidh zonat prodhuese me tregjet, po i jep fermerëve mundësi për transport më të shpejtë dhe më të sigurt të produkteve.

Kryetari i Bashkisë Elbasan, Gledian Llatja, vizitoi nga afër serën e Gazmir Hysës. “Unaza Bujqësore po kthen Jagodinën dhe gjithë zonën në një qendër moderne të prodhimit dhe tregtimit bujqësor,” u shpreh ai.

Fermerët kanë më shumë besim të investojnë. Idetë e reja, si kultivimi i rrushit në sera, po tregojnë se bujqësia mund të sjellë të ardhura të qëndrueshme dhe zhvillim për gjithë zonën.

Gjatë gjithë muajit korrik, Bashkia Elbasan ka sjellë një seri aktivitetesh festive që kanë gjallëruar qytetin edhe në ditët më të nxehta të verës. Nën kujdesin e veçantë të kryetarit të Bashkisë, Gledian Llatja, në sheshin qendror dhe në hapësira të tjera publike janë organizuar koncerte, shfaqje argëtuese dhe evente kulturore që kanë mbledhur jo vetëm qytetarët elbasanas, por edhe shumë vizitorë e turistë.

Një nga kulmet e këtyre aktiviteteve ishte El Summer Fest, i cili solli një tjetër mbrëmje të paharrueshme në zemër të qytetit. Artistë të njohur shqiptarë ndezën atmosferën me performancat e tyre, duke krijuar një energji të veçantë mes publikut.

Bashkia Elbasan synon që këto aktivitete të kthehen në një traditë të përvitshme, duke ofruar mundësi argëtimi për çdo moshë dhe duke e promovuar qytetin si një destinacion atraktiv edhe gjatë verës.

Geni dhe Erjoni, dy vëllezër të kthyer nga emigrimi, themeluan në vitin 2014 furrën “Baku” në qytetin e Elbasanit. Me një shumëllojshmëri produktesh brumi dhe ëmbëlsirash, si dhe standarde të larta higjienike e teknologjike, biznesi u bë shpejt i njohur jo vetëm në komunitetin ku ndodhej, por edhe më gjerë në qytet.

Furra “Baku” nisi si një biznes familjar, ku të punësuarit e parë ishin pjesëtarë të familjes. Me kalimin e viteve, cilësia e produkteve dhe kërkesa në rritje bënë që numri i punonjësve të zgjerohej nga 10 në 15. Së fundmi, ata kanë hapur edhe një pikë të dytë shërbimi, duke shtuar kapacitetet dhe prezencën e tyre në qytet. Ky zgjerim është bërë edhe me mbështetjen e pushtetit vendor.

Furrën “Baku” e vizitoi edhe Kryetari i Bashkisë Elbasan, Gledian Llatja, si një biznes që po i shtohet hartës së zhvillimit të qytetit.
“Ky është një shembull domethënës i asaj që duam të nxisim në Elbasan: njerëz që rikthehen nga emigrimi dhe investojnë me përkushtim në qytetin e tyre. Furra ‘Baku’ është një histori suksesi që ka sjellë jo vetëm shërbim cilësor, por edhe vende të reja pune. Mbështetja jonë për biznese të ndershme dhe të qëndrueshme do të vazhdojë, dhe jemi të gatshëm të qëndrojmë pranë tyre edhe në hapat e ardhshëm të zhvillimit”, u shpreh Kryetari Llatja.

Biznesi përfaqëson një model të suksesshëm lokal, me kushte optimale pune, pajisje moderne dhe përkushtim të vazhdueshëm për të ofruar produkte cilësore.

Njoftohen të gjithë subjektet taksapagues që ushtrojnë aktivitet ekonomik ose zotërojnë një apo më shumë prona (të kategorisë njësi shërbimi) në territorin e Bashkisë Elbasan se në zbatim të Vendimit të Këshillit Bashkiak nr. 139 datë 26.12.2024 janë gjeneruar taksat dhe tarifat vendore për vitin 2025. Afati i pagesës së taksave dhe tarifave vendore për vitin 2025 është data 31 Korrik 2025.

Pagesa e detyrimit tatimor mund të kryhet pranë Postës Shqiptare, bankave të nivelit të dyte ose Unionit Financiar. Për mospagesë në afatin e caktuar aplikohet kamatvonesë në masën 1.8% çdo muaj, por jo më shumë se 12 muaj.

Për pagesat që kryhen pas datës 31 korrik 2025 nis aplikimi i masave shtrënguese të parashikuara në ligjin nr. 9920 datë
19.05.2008 “Për Procedurat Tatimore në Republikën e Shqipërisë” i ndryshuar.

Për çdo paqartësi dhe informacion si dhe për të tërhequr faturën e detyrimit tatimor, ju lutem paraqituni pranë sportelit të shërbimit të D.T.T.V.T.-së pranë bashkisë.

Faleminderit!

Në ambientet e Bashkisë Elbasan, Kryetari Gledian Llatja mirëpriti partnerët e projektit të mbështetur nga Ministria e Evropës dhe Punëve të Jashtme të Francës dhe Ambasada Franceze në Shqipëri, për të diskutuar mbi përdorimin e të dhënave territoriale në funksion të një qeverisjeje më transparente, inovative dhe efikase.

Ky projekt e përfshin Elbasanin si një nga katër qytetet pilote në nivel kombëtar, së bashku me Shkodrën, Korçën dhe Durrësin, duke krijuar mundësi për zhvillime konkrete në shërbim të qytetarëve dhe forcimin e kapaciteteve vendore nëpërmjet praktikave të avancuara të menaxhimit të territorit.

Një tjetër premtim i mbajtur nga Bashkia Elbasan merr formë konkrete në lagjen Panxhi të fshatit Shelcan, ku është përfunduar shtrimi me asfalt i një segmenti rrugor me gjatësi rreth 430 metra lineare. Aksi i saporregulluar lidh lagjen me varrezat e fshatit dhe përshkon një zonë të banuar nga rreth 30 familje.

Ky investim është realizuar në përgjigje të një kërkese të hershme të komunitetit, e ngritur vazhdimisht në mbledhjet e buxhetimit me pjesëmarrje, duke reflektuar qasjen gjithëpërfshirëse të Bashkisë ndaj nevojave reale të qytetarëve.

Krahas asfaltimit, është ndërhyrë edhe në pastrimin e kanalit kullues, duke përmirësuar ndjeshëm kushtet infrastrukturore në lagje, veçanërisht gjatë stinës së reshjeve. Rruga e re do t’u shërbejë banorëve për qarkullimin e përditshëm, për transportin më të lehtë të prodhimeve bujqësore, si edhe për akses më të mirë drejt varrezave të fshatit.

Kryetari i Bashkisë Elbasan, Gledian Llatja, ndoqi nga afër përfundimin e punimeve në terren dhe theksoi se ky investim ka një vlerë të veçantë për komunitetin lokal:

“Shelcani është një nga fshatrat me tradita dhe histori, ku gjendet edhe kisha e njohur e Shelcanit, ndaj këto investime janë mëse të merituara. Jemi të vendosur të vazhdojmë me investime të tjera edhe në këtë zonë, për ta kthyer fshatin në një hapësirë më funksionale dhe të denjë për banorët e tij,” u shpreh Llatja.

Nga ky projekt përfitojnë jo vetëm banorët e lagjes Panxhi, por edhe një pjesë tjetër e komunitetit të Shelcanit që përdor këtë segment. Rruga është përshëndetur me entuziazëm nga banorët, të cilët e kanë cilësuar si një investim me rëndësi të madhe për jetën e përditshme dhe zhvillimin e fshatit.

Në vijim të angazhimit të vazhdueshëm për ndërtimin e një bashkie gjithëpërfshirëse dhe të ndjeshme ndaj çështjeve gjinore, Bashkia Elbasan zhvilloi sot takimin përmbyllës për finalizimin e Planit Vendor të Veprimit për Barazinë Gjinore (PVVBGJ) 2025–2030.

Takimi u mbajt në sallën multifunksionale të bashkisë dhe mblodhi rreth tryezës grupin e punës ndërinstitucional, përfaqësues të UN Women Shqipëri, anëtarët e Forumit të Qeverisjes së Hapur (OGP), Agjencisë Kombëtare për Punësimin dhe Aftësitë (AKPA), Zyrës Vendore Arsimore (ZVA), Shërbimit Social Shtetëror (ShSSH) dhe aktorë të tjerë lokalë, si pjesë e procesit të konsultimit publik për dokumentin strategjik.

Ky plan është hartuar në kuadër të zbatimit të Strategjisë Kombëtare për Barazinë Gjinore 2021–2030, si dhe në përputhje meKartën Evropiane për Barazinë e Grave dhe Burrave në Jetën Vendore.

Bashkia Elbasan vlerësohet si një ndër bashkitë model në Shqipëri për përfshirjen aktive dhe të strukturuar të parimeve të barazisë gjinore në politikat dhe buxhetimin vendor, një angazhim që lidhet ngushtësisht me standardet e integrimit evropian.

“Barazia gjinore nuk është vetëm një e drejtë themelore dhe një standard demokratik, por edhe një parakusht për zhvillim të qëndrueshëm. Ky plan është një reflektim i qartë i përkushtimit tonë për t’i kthyer këto parime në politika konkrete që përmirësojnë jetën e çdo qytetari dhe qytetareje,” theksoi Asim Sula, Nënkryetar i Bashkisë Elbasan dhe kryetar i grupit të punës.

Plani përfaqëson një dokument të rëndësishëm programor, i treti në radhë i hartuar nga Bashkia Elbasan, dhe synon të avancojë më tej, fuqizimin ekonomik të grave dhe vajzave, rritjen e pjesëmarrjes në vendimmarrje, parandalimin dhe trajtimin e dhunës me bazë gjinore, si dhe integrimin gjinor në çdo politikë dhe buxhet vendor.

Dokumenti është hartuar me mbështetjen teknike të UN Women Shqipëri, në kuadër të projektit“Bashkimi Evropian për Barazinë Gjinore II”,i financuar ngaBashkimi Evropian.

Ky dokument strategjik është më shumë se një plan veprimi, ai është një angazhim konkret institucional, që shpreh vullnetin politik dhe administrativ të Bashkisë Elbasan për të garantuar barazi reale mes grave dhe burrave, jo vetëm në ligj, por edhe në praktikë.

Bashkia Elbasan ka dëshmuar ndër vite se barazia gjinore nuk trajtohet si një çështje dytësore, por si pjesë thelbësore e qeverisjes së mirë, me ndikim të drejtpërdrejtë në zhvillimin lokal dhe në përmirësimin e cilësisë së jetës për të gjithë qytetarët.

Përmes këtij plani, Bashkia synon të thellojë përfshirjen gjinore në të gjitha politikat publike, duke promovuar një mjedis gjithëpërfshirës dhe të sigurt për gratë, vajzat, djemtë dhe burrat, si aktorë të barabartë në ndërtimin e një të ardhmeje më të drejtë dhe më të qëndrueshme për komunitetin.

Bëhuni pjesë e administratës publike!

Bashkia Elbasan fton profesionistë nga fusha të ndryshme që dëshirojnë të japin kontributin e tyre në shërbim të komunitetit dhe zhvillimit të qytetit tonë.

Në këtë kuadër, mirëpresim aplikime nga individë me përgatitje të ndryshme profesionale, të motivuar për të sjellë ide dhe energji të reja në administratën tonë.

Të interesuarit mund të dërgojnë CV-në dhe një letër interesi në adresën:

profesioniste@elbasani.gov.al