Këngët qytetare elbasanase jehonë në Tetovë me Ansamblin “Isuf Muzyri”

Ansambli Popullor “Isuf Muzyri” i Elbasanit ishte i ftuar në edicionin e 14-të të Festivalit të Këngëve të Vjetra Qytetare “Teuta”, organizuar nga Qendra e Kulturës “Ilo Anteski Smok” në Tetovë, ku solli në skenë tingujt e traditës dhe shpirtin e qytetit elbasanas.

Me këngë dhe motive të pasura të muzikës qytetare, artistët e ansamblit rrëmbyen duartrokitjet e publikut, duke rikthyer në kujtesë magjinë e një repertori që mbart historinë dhe identitetin kulturor të Elbasanit. Performanca e tyre u shqua për stilin e veçantë interpretues dhe për autenticitetin me të cilin u përcollën meloditë që kanë shoqëruar brez pas brezi qytetarët elbasanas.

Pjesëmarrja në “Teuta” ishte një mundësi e vyer për të promovuar trashëgiminë muzikore shqiptare jashtë kufijve, duke dëshmuar se Elbasani mbetet një nga vatrat më të rëndësishme të kulturës qytetare.

Ansambli Popullor “Isuf Muzyri” falënderon organizatorët për mikpritjen dhe për mundësinë e përfaqësimit dinjitoz të kulturës sonë në një skenë ndërkombëtare, duke mbajtur gjallë traditën e muzikës popullore elbasanase dhe duke e përcjellë atë me krenari tek publiku.