Situata në territor nën kontroll pas reshjeve të pandërprera

Bashkia Elbasan bën të ditur se pas 24 orësh reshje shiu të pandërprera, situata në të gjithë territorin e bashkisë paraqitet e qetë dhe nën kontroll.

Të gjitha ekipet e ASHP-së, si në qytet ashtu edhe në zonat rurale, ndodhen në terren dhe janë në gatishmëri të plotë për përballimin e çdo situate të mundshme emergjente. Në fshatra po vijon shpërndarja e skorieve në rrugët malore, si masë parandaluese për ngricat që priten në ditët në vijim.

Ndërkohë, po monitorohen në mënyrë të vazhdueshme prurjet e Lumit Shkumbin dhe përroit të Zaranikës, të cilat vijojnë të jenë në kuota normale dhe nuk paraqesin rrezik. Në zonën urbane, ekipet po mbajnë nën kontroll kolektorët, me qëllim shmangien e bllokimeve të mundshme nga inertet e sjella nga reshjet.

Sipas parashikimeve, 24 orët në vijim priten të shoqërohen me reshje edhe më intensive, ndaj strukturat e Bashkisë Elbasan kanë shtuar masat e monitorimit dhe janë në gatishmëri të vazhdueshme.

Për çdo situatë urgjente, qytetarët luten të kontaktojnë:

• Policia e Shtetit: 129

• Zjarrfikësja: 128

• Numri unik i emergjencave: 112

Në dispozicion janë edhe numrat e Ndërmarrjes së Ujësjellës-Kanalizimeve:

+355 68 641 6064

+355 69 475 0333

Bashkia Elbasan vijon të ndjekë nga afër situatën dhe mbetet e angazhuar për garantimin e sigurisë së qytetarëve.