Kujtohet 81 vjetori i krijimit të Shtabit të Përgjithshëm të Ushtrisë Nacionalçlirimtare Partizane në Labinot
Në Labinot të Elbasanit, u përkujtua me nderim dhe respekt 81 vjetori i krijimit të Shtabit të Përgjithshëm të Ushtrisë Nacionalçlirimtare Partizane.
Ky event historik mblodhi bashkë qytetarë, historianë dhe personalitete të ndryshme mes tyre edhe kreun e bashkisë z. Gledian LLatja, si edhe drejtuesin politik të qarkut Damian Gjiknuri të cilët shprehën mirënjohjen e tyre për ata burra e gra, djem e vajza, që luftuan deri në vetmohim për lirinë e vendit.
Në fjalimet e mbajtura, u theksua rëndësia e kontributit të Elbasanit, i cili në këtë luftë ka qenë i çmueshëm dhe i pazëvendësueshëm. Gjatë ceremonisë, u vunë kurora me lule në monumentet e dëshmorëve, ndërsa të pranishmit sollën në vëmendje rolin kyç që Labinoti dhe Elbasani patën në luftën për çlirimin e vendit.
Kjo ngjarje shërben si një kujtesë e gjallë për sakrificat dhe heroizmin e atyre që luftuan për një Shqipëri të lirë dhe të pavarur.
