Muaj: Tetor 2024

Në kuadër të procesit të buxhetimit me pjesëmarrje, banorët e Njësive Administrative Shirgjan dhe Gjergjan kanë prezantuar kërkesat dhe prioritetet e tyre për vitin 2025. Nënkryetari i Bashkisë Elbasan, Asim Sula, dhe kryetari i Këshillit Bashkiak, Lutfi Lala, morën pjesë në takime me komunitetin, duke diskutuar investimet e realizuara gjatë vitit 2024 dhe planet për të ardhmen.

Në Shirgjan, u vlerësuan disa nga investimet e realizuara, si asfaltimi i rrugëve në fshatrat Mjekës, Kuqan dhe Shirgjan, rikonstruksioni i shkollës në Mjekës, dhe ndërtimi i këndit sportiv në Bujqes. Po ashtu, u përmend pastrimi i përroit të Llixhës dhe vendosja e ndriçimit publik. Banorët falënderuan për përmirësimet e kryera, por ngritën kërkesa për ndriçim shtesë, rikonstruksion të urave dhe rrugëve, si dhe për zgjidhjen e problematikës së kolektorit Kuqan-Buqës-Jagodinë. Asim Sula siguroi se përmirësimi i infrastrukturës dhe pastrimi i kanaleve do të jetë një prioritet për vitin e ardhshëm, duke premtuar gjithashtu përmirësime në cilësinë e ujit të pijshëm.

Ndërkohë, në Gjergjan, investimet për vitin 2024 përfshinë rikonstruksionin e urës në Zallin e Gostimës dhe pastrimin e kanaleve vaditëse dhe kulluese. Banorët kërkuan më shumë investime në ndriçimin publik, përmirësimin e menaxhimit të mbetjeve, dhe vendosjen e një pritë në autostradë për të shmangur aksidentet.

Në të dy takimet, banorët votuan për prioritetet kryesore që do të përfshihen në buxhetin e vitit 2025, duke garantuar një transparencë dhe përfshirje më të madhe të komunitetit në procesin e vendimmarrjes. Bashkia Elbasan do të vazhdojë të përqendrohet në zgjidhjen e problematikave të ngritura, duke mbajtur si prioritet infrastrukturën dhe shërbimet publike për zonat rurale.

Procesi i buxhetimit me pjesëmarrje vijoi në njësinë administrative Tregan, ku gjatë dëgjesës publike ka marrë pjesë edhe kryetari i Bashkisë Elbasan, z. Gledian Llatja. Një nga investimet më të mëdha që Bashkia ka realizuar në këtë njësi është ndërtimi i shkollës 9-vjeçare “Jonuz Çarçiu”, projekt i cili u zbatua nën kujdesin e veçantë të kryetarit.

Gjatë fjalës së tij, z. Llatja kujtoi një sërë takimesh të realizuara me banorët e Treganit për të ndjekur problematikat, zhvillimet dhe shqetësimet e banorëve, sidomos gjatë sezonit turistik. “Keni kërkuar organizimin e një feste për promovimin e turizmit, dhe ne e realizuam këtë. Gjithashtu kemi ngritur edhe një agjenci për promovimin e turizmit, të cilën tashmë po e kalojmë në një fazë më të avancuar, duke krijuar një guidë më të madhe turistike për vizitorët që vijnë në Llixha, në Tregan, dhe në të gjitha atraksionet e Elbasanit,” theksoi ai.

Kreu i Bashkisë u ndal edhe tek problematika e shkollës në Tregan, një çështje e rëndësishme për komunitetin. “Sot jemi në një moment ku shkolla ka nisur ndërtimin dhe po punojmë për përmirësimin e rrugës që të çon drejt saj. Gjithashtu, jemi në proces përfundimi për rrugën e Bajramasve dhe për sistemimin dhe asfaltimin e disa rrugëve të tjera,” tha z. Llatja, duke nënvizuar se këto projekte janë pjesë e planifikimit të buxhetit për vitin 2025.

Ai theksoi gjithashtu rëndësinë e investimeve të ardhshme, si ndriçimi i zonave me prani të madhe turistësh dhe shtrimi i asfaltit në fshatrat kryesore, duke përmendur specifikisht projektin për rrugën e Kodër Bujarasit që do të lidhë pjesën poshtë me fshatrat përreth.

“Njësia administrative Tregan ka qenë shumë aktive në zgjidhjen e problematikave dhe ne do të vazhdojmë të jemi në kontakt të vazhdueshëm me banorët për t’u marrë me hallet e tyre,” përfundoi kryetari i Bashkisë.

Ambasadori i Bashkimit Europian në Shqipëri, z. Silvio Gonzato, zhvilloi një takim me kryetarin e Bashkisë Elbasan, z. Gledian Llatja, për të diskutuar mbi prioritetet e zhvillimit të qytetit dhe mundësitë e bashkëpunimit me Bashkimin Europian. Në fokus të bisedës ishin mbështetja e projekteve lokale dhe roli i BE-së në përgatitjen e bashkive shqiptare për procesin e integrimit europian.

“Kjo mbështetje nga Bashkimi Europian është thelbësore për forcimin e kapaciteteve të bashkive dhe për përshpejtimin e integrimit të vendit në familjen europiane,” u shpreh kryetari i bashkisë.

Në vazhdën e takimit, ambasadori Gonzato, së bashku me ministrin e Brendshëm, z. Ervin Hoxha, dhe Kryekordinatoren e Agjencisë së Administrimit të Pasurive të Sekuestruara dhe të Konfiskuara (AAPSK), znj. Rinesa Xhaja, vizituan nga afër një ndërmarrje sociale në Elbasan. Kjo ndërmarrje është ngritur mbi prona të sekuestruara nga aktivitetet kriminale, duke demonstruar një model të suksesshëm të përfshirjes sociale dhe ekonomike.

Bashkia Elbasan ka vijuar procesin e Buxhetimit me Pjesëmarrje, duke zhvilluar takime me banorët në Rajonin Nr. 1 dhe Nr. 2, ku janë prezantuar investime të rëndësishme për përmirësimin e infrastrukturës dhe shërbimeve.

Në takimin e mbajtur në Rajonin Nr. 1, kryetari i Bashkisë Elbasan, z. Gledian Llatja, prezantoi projektet që synojnë të transformojnë këtë rajon. Një ndër projektet kryesore është zgjatimi i rrugës së Automoto Parkut, që do të lidhet me zonën e Menglit, duke krijuar një unazë të re për lehtësimin e qarkullimit. Po ashtu, është duke u realizuar rikonstruksioni i ambulancës qendrore dhe ndërtimi i Çerdhes Nr. 5, që do të ofrojë kushte më të mira për banorët.

Ndërkohë, në Rajonin Nr. 2, Llatja vlerësoi investimet në arsim dhe sport, përfshirë rikonstruksionin e shkollës ‘Onufri’ dhe palestrës ku u zhvillua takimi. Një projekt i ri për rikonstruksionin e tregut kryesor të qytetit pritet të përfshihet në buxhetin e vitit të ardhshëm, falë propozimeve të qytetarëve.

Gjatë takimeve, Llatja theksoi përmirësimet në rrjetin e ujësjellësit, kanalizimet, rrugët e lagjeve dhe projektet e fasadave në bulevardet kryesore. Investimet e planifikuara për vitin 2025 përfshijnë riasfaltimin e shesheve të pallateve, përmirësimin e shkollave, kopshteve dhe çerdheve, si dhe projekte të tjera për infrastrukturën.

Ministri i Shtetit për Pushtetin Vendor, z. Arbian Mazniku, dhe deputeti Florenc Spaho, vlerësuan përfshirjen aktive të qytetarëve, duke theksuar se bashkëpunimi mes qytetarëve dhe institucioneve ka sjellë rezultate pozitive për të gjithë rajonet e qytetit.

Banorët e të dy rajoneve votuan për prioritetet që do të kthehen në investime gjatë vitit 2025, duke theksuar nevojat e tyre kryesore për ndriçim, kanalizime dhe projekte të tjera infrastrukturore.

Në takimin në Rajonin Nr. 2, kryetari Llatja vlerësoi ristrukturimin e palestrës dhe përfundimin e shkollës ‘Onufri’, duke theksuar rëndësinë e investimeve në sport dhe arsim. Ai gjithashtu prezantoi një projekt të ri për tregun kryesor të qytetit, i cili do të realizohet në bazë të propozimeve të qytetarëve.

Kryetari nënvizoi përmirësimet e bëra në rrjetin e ujësjellësit dhe kanalizimeve, si dhe investimet në rrugët brenda lagjeve. “Puna jonë nuk ka përfunduar. Do të vazhdojmë me projektin e dytë për fasadat dhe riasfaltimin e shesheve të pallateve,” tha Llatja, duke siguruar se prioritetet e vitit të ardhshëm do të jenë përmirësimet në shkolla, kopshte dhe çerdhe.

Ministri i Shtetit për Pushtetin Vendor, z. Arbian Mazniku, vlerësoi përfshirjen aktive të qytetarëve, duke theksuar se një komunitet i gjallë është një tregues i besimit në proceset e përbashkëta.

Bashkia Elbasan ka nisur procesin e Buxhetimit me Pjesëmarrje për vitin 2024 në Njësinë Administrative Shushicë, duke zhvilluar takime me banorët dhe përfaqësuesit e zonës për të identifikuar nevojat dhe prioritetet kryesore. Ky proces, i cili është kthyer në një traditë të suksesshme të bashkëpunimit me qytetarët, synon të përfshijë komunitetin në vendimmarrjen për shpërndarjen e burimeve financiare dhe hartimin e politikave zhvillimore.

Në takimet e mbajtura morën pjesë nënkryetari i Bashkisë Elbasan, z. Asim Sula, kryetari i Këshillit Bashkiak, z. Lutfi Lala, si dhe përfaqësues të njësive administrative përkatëse. Diskutimet u përqendruan në investimet e nevojshme në infrastrukturë, përmirësimin e furnizimit me ujë të pijshëm dhe energjinë elektrike, si dhe në ndërtimin e një këndi sportiv për shkollën e zonës. Banorët kërkuan gjithashtu ndërhyrje për asfaltimin e rrugëve të brendshme dhe ndriçimin publik.

Në Gjinar dhe Zavalinë u vlerësuan investimet e deritanishme, duke përfshirë rregullimin e qendrës së Gjinarit dhe asfaltimin e disa rrugëve kryesore. Banorët e këtyre zonave ngritën kërkesa për ndërhyrje shtesë në përmirësimin e rrugëve të brendshme dhe zgjerimin e shërbimeve publike.

Njoftim për restaurimin e Muzeut Etnografik

Duke filluar nga sot, 8 tetor, Muzeu Etnografik i Elbasanit do të qëndrojë i mbyllur për një periudhë prej 4 deri në 6 muaj, për shkak të punimeve të restaurimit të nevojshme për të ruajtur trashëgiminë kulturore të qytetit. Gjatë kësaj kohe, muzeu do t’i nënshtrohet përmirësimeve strukturore dhe estetike, me synimin për të ofruar një përvojë më të pasur dhe më të sigurt për vizitorët në të ardhmen. Falënderojmë të gjithë për mirëkuptimin dhe mbështetjen e vazhdueshme.

 Kryetari i Bashkisë Elbasan z. Gledian Llatja së bashku me Agjencinë e Pyjeve dhe Mjedisit, ka rifilluar aksionin e pastrimit në Krastë. Ky aksion është pjesë e një nisme të nisur kohë më parë, ku strukturat e bashkisë, Këshilli Rinor dhe qytetarët e Elbasanit po kontribuojnë çdo ditë për të pastruar këtë zonë.

“Ne po punojmë që Krasta, si mushkëria jonë kryesore, të jetë e pastër dhe e mbrojtur. Puna për pastrimin do të na përgatisë për periudhën e dimrit dhe sezonin e mbjelljeve që do të nisë në dhjetor me energji të reja,”  u shpreh kryetari.

Ai falënderoi veçanërisht punonjësit dhe të rinjtë që janë bashkuar në këtë iniciativë, duke i bërë thirrje të gjithë qytetarëve të kujdesen për pastërtinë e zonave publike dhe pyjore.

Aksioni i pastrimit në Krastë synon të rrisë ndërgjegjësimin mbi rëndësinë e ruajtjes së mjedisit dhe promovimin e Krastës si një destinacion të pastër e të shëndetshëm për të gjithë qytetarët e Elbasanit.

Elbasani mirëpriti sot Maratonën Skampa, një nga ngjarjet më të mëdha sportive të vitit, ku morën pjesë rreth 1500 vrapues nga 35 shtete të ndryshme. Kjo maratonë ndërkombëtare, e organizuar për herë të dytë, nuk ishte thjesht një garë atletike, por një mesazh i fuqishëm për një jetë më të shëndetshme dhe aktive.

Kryetari i Bashkisë Elbasan, z. Gledian Llatja, falënderoi të gjithë pjesëmarrësit, duke theksuar rëndësinë e aktiviteteve sportive për të rinjtë dhe komunitetin. “Sporti nuk është thjesht konkurrencë, por një mënyrë për të përmirësuar cilësinë e jetës. Maratona Skampa është një shembull i shkëlqyer i përkushtimit tonë për të promovuar një stil jete të shëndetshëm,” tha ai.

Znj. Ermira Urupi, Kryetare e Këshillit të Qarkut, theksoi gjithashtu se “jeta është një garë, dhe ne duhet të garojmë për të marrë të mirat e saj.” Ajo vlerësoi mbështetjen e dhënë nga institucione të ndryshme dhe përpjekjet e klubit sportiv për ta bërë këtë maratonë një realitet të suksesshëm në Elbasan.

Maratona përfshiu gara në distanca prej 5 km, 10 km dhe 21 km, duke përçuar mesazhe të fuqishme për rëndësinë e një jetese aktive dhe promovimin e turizmit në qytet. Çdo vit, kjo ngjarje ka sjellë një intensitet të veçantë, duke përforcuar imazhin e Elbasanit si një qytet që mbështet sportin dhe një stil jete të shëndetshëm.

Kryetari  i bashkisë z. Gledian Llatja pati kënaqësinë të presë Ambasadorin e Shtetit të Katarit, Sh.T. z. Jabor Ali H.A. Al-Dossari, në një takim të frytshëm dhe plot optimizëm për të ardhmen. Gjatë këtij takimi u diskutua gjerësisht për mundësitë e zgjerimit të bashkëpunimit strategjik në disa fusha kyçe, duke përfshirë ekonominë, turizmin, dhe shkëmbimet kulturore.

Bashkëpunimi në fushën e ekonomisë ishte një nga pikat kryesore të bisedës, me fokusin për të gjetur mënyra konkrete për të rritur investimet dhe zhvillimin e përbashkët në qytetin e Elbasanit. Turizmi, një tjetër sektor me potencial të madh, u vlerësua si një fushë me rëndësi të veçantë për të dy vendet, duke ofruar mundësi për promovimin e kulturave dhe traditave unike të Shqipërisë dhe Katarit.

Një tjetër aspekt i rëndësishëm ishte shkëmbimi kulturor, ku u theksua rëndësia e forcimit të lidhjeve midis dy popujve nëpërmjet artit, muzikës dhe trashëgimisë kulturore. Ambasadori Al-Dossari shprehu gatishmërinë e Katarit për të mbështetur iniciativa që forcojnë marrëdhëniet miqësore midis vendeve tona.

Bashkia e Elbasanit është mirënjohëse për mbështetjen e vazhdueshme të Shtetit të Katarit dhe është e angazhuar që idetë e diskutuara të kthehen në projekte konkrete.