25 vite “Miqtë e Malit”, Gjinari feston traditën, natyrën dhe mikpritjen

Mes ajrit të pastër, pyjeve të gjelbëruara dhe atmosferës festive, Gjinari mblodhi edhe këtë vit qindra vizitorë në festën tradicionale “Miqtë e Malit”, një aktivitet që prej 25 vitesh promovon bukuritë natyrore, kulturën dhe traditat e kësaj zone.

Falë investimeve të viteve të fundit në infrastrukturë, agroturizëm dhe hapësira publike, Gjinari është shndërruar në një nga destinacionet më të rëndësishme të turizmit malor në Shqipëri. I preferuar në çdo stinë të vitit, ai mirëpret vizitorë jo vetëm gjatë verës, por edhe në dimër, kur reshjet e dëborës e kthejnë zonën në një peizazh magjepsës që tërheq të apasionuarit pas natyrës dhe maleve. Me pyjet, shtigjet malore, klimën e freskët, gastronominë tradicionale dhe mikpritjen karakteristike, Gjinari pret çdo vit vizitorë shqiptarë dhe të huaj, duke u kthyer në një nga pikat më të vizituara turistike të qarkut të Elbasanit.

Panairi artizanal, produktet lokale, gatimet tradicionale, aktivitetet në natyrë dhe koncerti festiv e kthyen qendrën e Gjinarit në një mozaik ngjyrash, shijesh dhe emocionesh, ku vendas e vizitorë festuan së bashku një nga ngjarjet më të rëndësishme të verës në Elbasan.

Mes atmosferës festive, një vend të veçantë në këtë ditë kishin edhe fëmijët, të cilët u bënë pjesë e aktiviteteve të organizuara në natyrë, lojërave dhe momenteve argëtuese. Me buzëqeshjet dhe energjinë e tyre, ata sollën gjallëri në festë, duke e kthyer Gjinarin në një hapësirë ku tradita takohet me brezin e ri.

Kryetari i Bashkisë së Elbasanit, Gledian Llatja, tha se këtë vit festa “Miqtë e Malit” shënon 25-vjetorin e saj, një traditë që gjatë gjithë këtyre viteve ka promovuar Gjinarin, Lleshanin dhe Shpatin, duke nxjerrë në pah pasuritë natyrore, kulturore dhe turistike të zonës. Ai uroi një sezon të mbarë turistik për Gjinarin dhe për gjithë Elbasanin, ndërsa theksoi se investimet do të vijojnë për ta bërë këtë destinacion edhe më të zhvilluar, me infrastrukturë më të mirë dhe më tërheqës për vizitorët.

Deputetja e qarkut të Elbasanit, Evis Kushi, e cilësoi “Miqtë e Malit” si një nga festat më të bukura, që bashkon njerëzit dhe promovon një nga perlat e Shqipërisë së Mesme. Sipas saj, natyra, peizazhet piktoreske, traditat e trashëguara brez pas brezi dhe njerëzit punëtorë janë pasuria më e madhe e Gjinarit, ndërsa investimet e kryera po i japin zonës një zhvillim të ri.

Kryetari i Këshillit Bashkiak, Lutfi Lala, u shpreh se trashëgimia natyrore dhe kulturore e Gjinarit është pasuria më e çmuar që po u lihet brezave të rinj dhe se ruajtja e këtyre vlerave është detyrim për të gjithë.

Pas 25 vitesh, “Miqtë e Malit” mbetet shumë më tepër se një festë. Ajo është një dëshmi e identitetit, traditës dhe zhvillimit të Gjinarit, një ftesë për të zbuluar bukuritë e tij në çdo stinë të vitit dhe për të përjetuar mikpritjen e një prej destinacioneve më të veçanta turistike të Shqipërisë.

Festa e Gjinarit dëshmon se traditat vazhdojnë të ruhen dhe të përcillen brez pas brezi, duke mbajtur gjallë identitetin e kësaj zone.