Lajme

Buxhetimi me pjesëmarrje vijoi në Njësinë Administrative Gjinar, ku së bashku me banorët diskutuam prioritetet dhe investimet që do të përfshihen në Buxhetin 2027.

Në fokus janë investimet në infrastrukturën rrugore, përmirësimi i furnizimit me ujë të pijshëm dhe sistemimi i rrugëve të fshatrave. Ndër ndërhyrjet e parashikuara janë asfaltimi i rrugëve Brekor–Pobrat dhe Gjinar–Pashtresh, përfundimi i punimeve në aksin Elbasan–Gjinar, si dhe rikonstruksioni i ujësjellësve në Pobrat dhe Lleshan.

Përmes investimeve infrastrukturore dhe mundësive që ofron Paketa e Maleve, synojmë të mbështesim zhvillimin e turizmit, agroturizmit dhe ekonomisë lokale, duke e kthyer Gjinarin në një destinacion tërheqës në të katërta stinët.

Bashkë me banorët, përcaktojmë prioritetet dhe ndërtojmë një të ardhme më të mirë për Gjinarin!

Buxhetimi me pjesëmarrje vijon në Njësinë Administrative Papër, ku banorët diskutuan problematikat e zonës dhe përcaktuan prioritetet që synojnë të kthehen në investime për Buxhetin 2027.

Kryetari i Bashkisë Elbasan, Gledian Llatja, tha se përmes këtij procesi, ndër vite, janë zgjidhur një sërë problematikash të ngritura nga vetë komuniteti, nga ndërhyrjet në përrenj e kanale deri te infrastruktura rrugore.

“Gjithmonë buxhetimi me pjesëmarrje ka interes dhe pjesëmarrje, për faktin se në Papër kemi zgjidhur shumë nga problemet tona. Ato që kemi diskutuar, i kemi çuar drejt zgjidhjes. Kemi ndërhyrë në pritat lumore në përroin e Gurrës, për nevojat që banorët i kanë pasur gjatë gjithë kohës, kemi punuar për disa pjesë rrugësh që duheshin asfaltuar në Vidhas, në Papër-Sollak dhe për probleme të tjera në fshatrat tona”, u shpreh Llatja.

Ndër prioritetet e përcaktuara nga komuniteti janë infrastruktura rrugore dhe këndi i lojërave në fshatin Papër. Por investimi kryesor i këtij viti është asfaltimi i aksit kryesor lidhës, që përfshin qendrën e fshatit Papër dhe rrugën që lidh katër fshatra – Papër, Bizhutë, Pajun dhe Papër-Sollak – deri në Damë.

 Sipas Llatjas, për këtë investim projekti është përfunduar, është shpallur fituesi dhe janë marrë masat për nisjen e punimeve. “Ne nuk kemi parë vetëm problemet që kanë të bëjnë me rrugët dhe kanalizimet. Gjatë gjithë kohës jemi përpjekur të shohim edhe problemet e tjera komunitare, ndaj kemi qenë dhe do të jemi këtu”, tha kryebashkiaku.

Llatja theksoi se buxhetimi me pjesëmarrje është një moment i demokracisë së drejtpërdrejtë, ku qytetarët vendosin për prioritetet e buxhetit, duke nënvizuar se fondet nuk janë të pakufizuara dhe për këtë arsye jo të gjitha kërkesat mund të realizohen njëherësh.

Procesi vijoi me diskutimin e banorëve të Njësisë Administrative Papër, të cilët paraqitën kërkesat dhe problematikat e tyre, ndërsa përmes votimit përcaktuan prioritetet që kërkojnë të përfshihen në Buxhetin 2027.

Në Krushevë ka nisur trajnimi praktik dyditor “Turizmi i qëndrueshëm dhe eficient në energji: Zgjidhje praktike për bizneset turistike”, në kuadër të projektit IPA CBC “Krusheva dhe Elbasani – Udhëtim në Natyrë dhe Aventurë”, financuar nga Bashkimi Evropian.

Në trajnim marrin pjesë përfaqësues të bizneseve turistike, strukturave akomoduese, pushtetit vendor dhe partnerë lokalë nga Krusheva dhe Elbasani.

Gjatë dy ditëve, pjesëmarrësit do të njihen me zgjidhje praktike për uljen e konsumit të energjisë, përdorimin e energjisë së rinovueshme, reduktimin e mbetjeve dhe shfrytëzimin më efikas të burimeve, me synim zhvillimin e një turizmi më të gjelbër dhe të qëndrueshëm në rajonin ndërkufitar Krushevë–Elbasan.

Në shkollën “Naim Frashëri” në Elbasan, një prej institucioneve me më shumë se një shekull histori në arsimin shqiptar, po vijojnë me ritme të larta punimet për rikonstruksionin e plotë të godinës dhe ndërtimin e ambienteve të reja, me synimin për të krijuar kushte bashkëkohore për nxënësit dhe mësuesit.

Ministrja e Arsimit dhe Sportit, Mirela Kumbaro, së bashku me kryetarin e Bashkisë Elbasan, Gledian Llatja, dhe drejtoreshën e ZVA Elbasan, Vesa Llanaj Lico, vizituan shkollën për të parë nga afër ecurinë e punimeve.

Projekti përfshin rikonstruksionin e godinës ekzistuese dhe ndërtimin e një shtese të re, e cila do t’i shtojë shkollës 10 klasa të reja. Këto hapësira do të mundësojnë zhvillimin e procesit mësimor pa turne për më shumë se 700 nxënës, duke përmirësuar ndjeshëm kushtet e mësimit dhe organizimin e jetës shkollore.

Shkolla do të pajiset me laboratorë modernë, palestër dhe terrene sportive, hapësira rekreative, si dhe ambiente të dedikuara për arsimin parashkollor. Projekti parashikon gjithashtu krijimin e një muzeu, instalimin e sistemeve fotovoltaike për rritjen e eficiencës energjetike dhe rreth 5 mijë metra katrorë sipërfaqe të gjelbëruar, duke promovuar një mjedis më të shëndetshëm dhe edukimin e qëndrueshëm mjedisor e qytetar.

Një vëmendje e veçantë i është kushtuar edhe sistemeve teknike, përfshirë ngrohjen dhe kaldajën, me qëllim garantimin e kushteve sa më të mira për zhvillimin e procesit mësimor gjatë gjithë vitit shkollor.

Shkolla “Naim Frashëri”, e cila u shërben rreth 700 nxënësve dhe 72 mësuesve, pritet që pas përfundimit të punimeve të ofrojë një infrastrukturë tërësisht të përmirësuar, me ambiente moderne për mësimin, aktivitetet sportive dhe zhvillimin e jetës komunitare.

Në kuadër të projektit MATRA, përfaqësues të Bashkisë Elbasan zhvilluan një vizitë studimore në Bashkinë Assen, në Holandë, ku u mirëpritën nga zëvendëskryetari i Bashkisë Assen, Willard Bouwmeester.

Vizita u zhvillua në formatin Peer-to-Peer dhe kiaste në fokus shkëmbimin e përvojave mbi digjitalizimin e shërbimeve publike dhe rritjen e pjesëmarrjes së qytetarëve në proceset e qeverisjes vendore.

Gjatë këtij shkëmbimi, përfaqësuesit e Bashkisë Elbasan u njohen me praktikat holandeze për ofrimin e shërbimeve digjitale, forcimin e transparencës dhe krijimin e mekanizmave që nxisin përfshirjen aktive të qytetarëve në vendimmarrje.

Kjo vizitë synon të forcojë bashkëpunimin ndërmjet dy bashkive, të mundësojë shkëmbimin e njohurive dhe të sjellë praktika inovative në shërbim të qytetarëve të Elbasanit, drejt një qeverisjeje vendore më të hapur, digjitale dhe gjithëpërfshirëse.

Buxhetimi me pjesëmarrje vijoi në Rajonin nr. 3 të Elbasanit, ku takimi me banorët u zhvillua në ambientet e shkollës “Jorgji Dilo”, një prej investimeve të rëndësishme të realizuara në këtë zonë, tashmë me kushte bashkëkohore dhe palestër.

Duke e marrë këtë shkollë si shembull të investimeve të realizuara, Kryetari i Bashkisë Elbasan, Gledian Llatja, tha se investimet në Rajonin nr. 3 do të vijojnë edhe gjatë vitit 2027, me fokus arsimin, rrugët, sheshet e pallateve, kanalizimet dhe urbanizimin e zonave informale.

“Jemi sot në shkollën ‘Jorgji Dilo’, bashkë me palestrën e saj, një shkollë me kushte bashkëkohore. Por investimet në arsim do të vazhdojnë. Do të fillojmë këtë vit me shkollën ‘Vasil Kamami’, ndërsa do të rikonstruktojmë edhe shkollën ‘Sul Misiri’, e cila ka dalë pikërisht nga kërkesa juaj në buxhetimin me pjesëmarrje. Duke qenë se ‘Jorgji Dilo’ është një nga shkollat më të mëdha dhe numri i nxënësve këtu është rritur ndjeshëm, rikonstruksioni i ‘Sul Misirit’ është një ndërhyrje e nevojshme dhe do ta fillojmë brenda këtij viti”, tha Llatja.

Krahas investimeve në arsim, Kryebashkiaku bëri të ditur se do të vijojnë edhe ndërhyrjet në infrastrukturën rrugore, duke veçuar disa prej akseve të rëndësishme për banorët e Rajonit nr. 3.

“Shumë shpejt do të fillojmë rikonstruksionin e rrugës ‘Bajram Curri’, e cila do të bëhet me standarde. Do të vazhdojmë edhe me rrugën e Kombinatit të Drurit, për ta lidhur me Fushë Mbretin, si edhe nga rruga e Inceneratorit për t’u lidhur me Fushë Mbretin. Edhe kjo është një kërkesë e kahershme e banorëve të Rajonit nr. 3”, u shpreh ai.

Një tjetër fokus i investimeve do të jetë përmirësimi i shesheve të pallateve dhe zgjidhja e problematikave të kanalizimeve dhe ujërave të zeza.

“Ne kemi një sërë projektesh të tjera që na presin përpara. Do të vazhdojmë me sheshet e pallateve, si edhe me një sërë investimesh që çojnë përpara projektin tonë për urbanizimin e zonave informale. Kemi thënë që në vitin 2027 do të mbyllim komplet problematikat e kanalizimeve dhe ujërave të zeza. Pjesën më të madhe e kemi përfunduar në shumë zona dhe brenda buxhetit të vitit të ardhshëm do të mbyllim edhe pjesën e mbetur”, tha Llatja.

Takimi në Rajonin nr. 3 shërbeu për të diskutuar me banorët prioritetet e zonës dhe investimet që do të përfshihen në buxhet. Kërkesat e ngritura gjatë procesit të buxhetimit me pjesëmarrje po kthehen në projekte konkrete, duke sjellë ndërhyrje në shkolla, rrugë, sheshe dhe infrastrukturën e kanalizimeve.

Procesi i buxhetimit me pjesëmarrje vijoi në Njësinë Administrative Gjergjan, ku banorët diskutuan dhe përcaktuan prioritetet për investimet që kërkojnë të përfshihen në Buxhetin 2027. Problematikat dhe nevojat e komunitetit janë në fokus të këtyre takimeve, me qëllim që investimet të orientohen drejt kërkesave konkrete të banorëve.

Në takimin me qytetarët, Kryetari i Bashkisë Elbasan, Gledian Llatja, theksoi se investimet e realizuara në territor kanë ardhur edhe si rezultat i kërkesave të vetë komunitetit, duke përmirësuar infrastrukturën dhe cilësinë e jetesës në fshatra.

“Është zëri juaj që ka sjellë investimet. Problemet që keni ngritur janë kthyer në investime konkrete në infrastrukturë dhe në përmirësimin e cilësisë së jetës”, u shpreh Llatja.

Ai përmendi ndër të tjera ndërhyrjet për pastrimin dhe mirëmbajtjen e kanaleve vaditëse e kulluese, mbështetjen për fermerët përmes krijimit të Shoqërisë së Bashkëpunimit Bujqësor për grumbullimin e prodhimit dhe uljen e kostove, si dhe punën për përmirësimin e infrastrukturës rrugore.

Llatja u ndal gjithashtu te investimet në arsim dhe krijimi i kushteve më të mira për fëmijët, përfshirë terrenet sportive dhe projektet për rikonstruksionin e plotë të shkollave.

“Duam të vazhdojmë të bëjmë punë të mira, ashtu siç kemi bërë deri tani. Pjesëmarrja juaj e madhe më bind se, së bashku, kemi ecur dhe do të ecim përpara”, tha Llatja.

Takimet e buxhetimit me pjesëmarrje do të vijojnë edhe në njësitë e tjera administrative dhe rajonet e Bashkisë Elbasan, ku qytetarët do të kenë mundësi të paraqesin kërkesat dhe prioritetet e tyre për Buxhetin 2027.

Buxhetimi me pjesëmarrje ka vijuar në Njësinë Administrative Shirgjan, ku qytetarët kanë pasur mundësinë të shprehin kërkesat dhe problematikat e zonës së tyre, por edhe të votojnë për prioritetet që kërkojnë të shndërrohen në investime gjatë vitit 2027.

Gjatë takimit me banorët, Kryetari i Bashkisë Elbasan, Gledian Llatja, u ndal te projektet e nisura në zonë, veçanërisht në mbështetje të bujqësisë dhe fermerëve.

“Ne kemi filluar një sërë projektesh dhe kemi hapur bashkërisht edhe një Shoqëri të Bashkëpunimit Bujqësor, ku Bashkia e Elbasanit ka krijuar një shoqëri e cila është pjesë e të gjitha SHBB-ve që janë krijuar”, tha Llatja.

Një nga nevojat kryesore të evidentuara nga fermerët është krijimi i një pike grumbullimi. Për këtë, Bashkia e Elbasanit po punon për hapjen e një pike grumbullimi e cila do të menaxhohet nga Bashkia.

“Ne po bëjmë në Thanë një magazinë të madhe me pika frigoriferike që do të menaxhohen nga Bashkia e Elbasanit. Nuk do të jetë një sipërmarrje private. Ka dy ambiente të cilat do t’u jepen me qira të gjithë fermerëve, me një çmim preferencial për anëtarët e SHBB-së”, u shpreh kryebashkiaku.

Në fokus të takimit ishte edhe infrastruktura rrugore, ku banorët përcaktuan përmes votës prioritetet e tyre për vitin e ardhshëm.

“Uroj që rruga e Kasallarëve të dalë fituese sot nga ky buxhetim dhe vitin tjetër ta kthejmë në investim, ashtu siç kemi bërë të mundur me buxhetimin e vitit të kaluar edhe investimin në rrugën e Ballsit, edhe ajo një rrugë me problematika e cila kërkonte një investim dhe shumë shpejt fillon”, tha ai.

Një tjetër projekt i rëndësishëm lidhet me arsimin.

“Ne kemi një projekt për shkollën e Kuqanit, i cili uroj shumë që të arrijë të financohet në bashkëpunim me Ministrinë e Arsimit, ashtu siç, në fakt, kemi investuar shumë në infrastrukturën arsimore gjatë këtyre viteve në të gjithë Bashkinë Elbasan”, u shpreh Llatja.

Duke folur për prioritetet e Bashkisë, kryebashkiaku theksoi se investimet në rrugë, infrastrukturë dhe arsim janë pjesë e rëndësishme e projektbuxheteve.

“Ne sot flasim për investime në të gjithë fshatrat tanë, për investime konkrete në rrugë, infrastrukturë dhe infrastrukturën arsimore. Në projektbuxhetet tona i kemi dhënë vëmendje të posaçme arsimit, sepse për ne, të rrisim një brez të shëndetshëm me një infrastrukturë arsimore bashkëkohore është kryesore”, tha Llatja.

Takimi në Shirgjan u zhvillua me pjesëmarrje të gjerë të komunitetit, ku një pjesë të rëndësishme e përbënin të rinjtë dhe nxënësit e shkollave.

Procesi i buxhetimit me pjesëmarrje vijon në Bashkinë e Elbasanit, duke u dhënë qytetarëve mundësinë të shprehin drejtpërdrejt kërkesat dhe problematikat e zonave të tyre dhe të përcaktojnë, përmes votës, prioritetet që do të jenë në vëmendje për investime gjatë vitit 2027.

Investime të reja në arsim, infrastrukturë rrugore, çerdhe, hapësira publike dhe fasada janë në fokus të projekteve të Bashkisë së Elbasanit për Rajonin nr. 2. Prioritetet u diskutuan me banorët në kuadër të procesit të buxhetimit me pjesëmarrje, gjatë takimit të zhvilluar në ambientet e palestrës së rikonstruktuar të shkollës “Onufri”.

Kryetari i Bashkisë Elbasan, Gledian Llatja, tha se investimet në infrastrukturën arsimore do të vijojnë, duke paralajmëruar ndërhyrje të reja në institucionet arsimore të këtij rajoni. Ndër projektet e parashikuara është rikonstruksioni i shkollës “Vasil Kamami”, gjimnazit që i shërben komunitetit të Rajonit nr. 2.

Një tjetër investim i rëndësishëm për zonën është nisja e punimeve për Çerdhen nr. 6, e cila do të ndërtohet në Qendrën Balashe dhe do t’u shërbejë banorëve të një zone periferike të Rajonit nr. 2, por edhe komunitetit të Rajonit nr. 3, në zonën e lagjes “Skënderbej”.

Në fushën e shërbimeve dhe hapësirave komunitare, kryebashkiaku bëri të ditur se së shpejti do të inaugurohet edhe parku më i madh në Elbasan, “Dua të Luaj”, duke shtuar një tjetër hapësirë të dedikuar për fëmijët e qytetarët.

Në fokus janë edhe ndërhyrjet në infrastrukturën rrugore. Sipas Llatjas, kanë nisur procedurat dhe janë marrë lejet e ndërtimit për sheshin e pallateve nga kryqëzimi i Cërrikut deri te stacioni i trenit, ndërsa së shpejti pritet të nisin punimet edhe në sheshet e pallateve të Rajonit nr. 2.

Një projekt i rëndësishëm është edhe ndërhyrja në kryqëzimin e Cërrikut, për të cilin është përgatitur projekti që do të hidhet për konsultim publik. Kryqëzimi do të transformohet në një rrethrrotullim, i projektuar për të përballuar qarkullimin e rreth 35 mijë automjeteve në ditë, duke synuar lehtësimin e trafikut, përmirësimin e lëvizjes së këmbësorëve dhe krijimin e një lidhjeje më të mirë të lagjeve me njëra-tjetrën dhe me qendrën e qytetit.

Paralelisht, do të vijojnë edhe projektet për përmirësimin e fasadave dhe ndërhyrjet në infrastrukturën urbane në zona të ndryshme të Elbasanit.