Lajme

 Kryeqyteti i pranverës ka nisur sot festimet për Ditën e Verës, duke e kthyer qytetin në një skenë të gjallë plot muzikë, ngjyra dhe atmosferë festive. Si çdo vit, Elbasani mirëpret mijëra vizitorë nga e gjithë Shqipëria, të cilët bashkohen në një festë që mishëron traditën, kulturën dhe gëzimin e ardhjes së pranverës.

Festimet u hapën me aktivitetin “Trashëgimia në duart e vogla”, ku fëmijët e kopshteve të qytetit shfaqën talentin e tyre përmes lojërave tradicionale, punimeve artistike dhe këngëve festive.

Kryetari i Bashkisë Elbasan, Gledian Llatja, në fjalën e tij përshëndeti të pranishmit dhe theksoi se këtë vit festimet do të zgjasin një javë, me një program të pasur që kulmon më 15 Mars, kur qyteti do të kthehet në një arenë të madhe festive.

“Elbasani e jeton ndryshe Ditën e Verës dhe këtë vit kemi zgjeruar aktivitetet për ta bërë këtë festë edhe më të veçantë. Nga defiletë e kostumeve tradicionale, koncertet e mëdha, ekspozitat dhe panairet e kulinarisë, deri tek aktivitetet për fëmijë dhe të rinj, Elbasani do të jetë epiqendra e festimeve pranverore.”

Një javë festive plot surpriza

Mbrëmjen e 12 Marsit rikthehet Defileja e Kostumeve Tradicionale, një paradë që do të sjellë në skenë kulturën dhe folklorin e trevave shqiptare.

13 Marsi do të sjellë atmosferën e zjarrtë të Natës së Verës, ku koncertet dhe performancat artistike do të zgjasin deri në orët e para të mëngjesit.

Në 14 Mars, një program i pasur me aktivitete do të kulmojë me super koncertin e mbrëmjes, ndërsa më 15 dhe 16 Mars festimet do të vijojnë me aktivitete për fëmijë, panaire tradicionale dhe evente kulturore.

“Këtë vit, Elbasani është gati të mirëpresë të gjithë ata që duan ta jetojnë këtë festë në zemër të traditës.  Ju ftoj të gjithë, kudo që ndodheni, të vini në Elbasan dhe të festojmë së bashku këtë trashëgimi të bukur, duke sjellë energji, gëzim dhe dashuri për një pranverë të mbarë”, tha Llatja.

Kjo është dita kur festojmë rolin tuaj të paharrueshëm në jetët tona. Është një ditë e veçantë për të nderuar përkushtimin tuaj, pasi ju keni shndërruar njohuritë në pasione, sfidat në suksese dhe çdo ditë në një mundësi për rritje.

Kënaqësia më mbushet të filloj ditën me një takim të veçantë me ju, mësuesit që, prej vitesh, keni formësuar karakterin e brezave dhe keni edukuar qytetarë të mirë e të zotë. Çdo fjalë, çdo mësim dhe çdo përpjekje e juaj ka qenë një gur themelor në ndërtimin e të ardhmes sonë. Ju keni qenë udhërrëfyesi dhe frymëzuesi ynë në çdo hap të rrugëtimit, duke na dhënë besimin që çdo sfidë mund të tejkalojë me durim dhe përkushtim.

Mirënjohja ime është pak për ju, heronjtë e heshtur që çdo ditë na mësoni si të përmirësohemi dhe të lartësohemi. Faleminderit që na keni mësuar se arsimi është çelësi i hapjes së dyerve të të ardhmes, dhe që me pasionin tuaj keni ndriçuar rrugën tonë drejt ëndrrave. Ju jeni drita që na udhëheq në errësirën e sfidave dhe burim frymëzimi për të ndjekur gjithmonë ëndrrat tona.

Në këtë ditë të shënuar, ju uroj një ditë plot me lumturi, respekt dhe mirënjohje, ashtu siç meritoni. Gëzuar 7 Marsin, dhe faleminderit për çdo moment ku na keni mësuar jo vetëm fakte, por edhe vlera jetësore që na forcojnë çdo ditë.

Fush Bulli, dikur një fshat i vështirë për t’u aksesuar, po shndërrohet në një destinacion turistik tërheqës falë investimeve në infrastrukturë. Kryetari i Bashkisë Elbasan, Gledian Llatja, bashkë me deputeten Desantila Tahoraj dhe kryetarin e Këshillit Bashkiak, Lutfi Lala, inspektuan punimet për shtrimin me asfalt të rrugës që lidh qendrën e njësisë administrative Shushicë me fshatin Fush Bulli, një zonë me potencial të jashtëzakonshëm turistik.

Dikur një vend i vështirë për t’u aksesuar, Fush Bulli po shndërrohet në një pol të zhvillimit turistik falë investimeve në infrastrukturë. Rruga e re, e gjatë 7 kilometra, tashmë përshkohet për vetëm 12 minuta, një ndryshim i madh krahasuar me vitin 2021, kur kjo distancë kërkonte rreth 50 minuta dhe mjete të larta për të kaluar terrenin e vështirë malor.

“Kjo zonë gjithmonë ka pasur një potencial të madh turistik, por mungesa e infrastrukturës e kishte lënë thuajse të izoluar. Sot, me këtë rrugë të re, jo vetëm banorët e zonës do të kenë një lidhje më të lehtë me qytetin, por edhe ekonomia lokale do të marrë një shtysë të madhe,” u shpreh kryetari i Bashkisë gjatë inspektimit.

Investimi ka sjellë një transformim të rëndësishëm, duke e bërë zonën më të aksesueshme jo vetëm për banorët, por edhe për vizitorët që kërkojnë natyrën e paprekur dhe turizmin malor. Fillimisht e parashikuar për t’u shtruar me zhavorr, rruga me asfalt është realizuar me standarde të qëndrueshme, duke i dhënë kështu një vlerë të shtuar zhvillimit të turizmit në këtë zonë malore të Elbasanit.

Shushica, një nga njësitë administrative më të mëdha të Bashkisë Elbasan, po vijon të përfitojë investime të rëndësishme infrastrukturore. Kryetari i Bashkisë Elbasan, Gledian Llatja, së bashku me deputeten e zonës, Desantila Tahiraj, dhe kryetarin e Këshillit Bashkiak, Lutfi Lala, inspektuan nga afër punimet që po kryhen në lagjen Baldavere, ku po realizohet një investim i rëndësishëm për komunitetin.

Kryetari i Bashkisë Elbasan, Gledian Llatja, tha se ” Shushica është një nga njësitë tona më të mëdha administrative, dhe fshati Shushicë është gjithashtu një nga fshatrat më të mëdhenj. Kemi investuar në vazhdimësi gjatë këtyre viteve në rrugën kryesore të fshatit, në rrugën e varrezave, në prita lumore, në ura, në pastrimin e përroit të Gurrës, si dhe në investime të tjera në shkollën e Shushicës dhe në terrene sportive. Sot kemi në fokus shtrimin e rrugëve të lagjeve të brendshme të fshatit Shushicë. Këtu jemi në lagjen Baldavere, ku ky investim i shërben të gjithë komunitetit”. 

Po shtrohen rreth 1.7 km rrugë në rrugën kryesore me gjerësi 4 metra dhe 1.2 km rrugë të brendshme me gjerësi 3 metra, sipas standardeve të rrugëve rurale. Ky është një investim i shumëkërkuar nga banorët dhe ndihmon në urbanizimin e lagjes Baldavere, duke e afruar më shumë me qendrën dhe qytetin.

” Shushica është një nga potencialet tona më të mëdha turistike dhe, bashkë me projektin për urën e Shushicës dhe by-pass-in e Elbasanit, që pritet të nisë këtë vit, kjo zonë do të shndërrohet në një lagje periferike të qytetit të Elbasanit. Ne po vijojmë me investimet për ta bërë këtë realitet,” shtoi Llatja.

Deputetja Desantila Tahiraj vlerësoi investimin, duke theksuar rëndësinë e tij për rreth 2,000 banorët e zonës, ndërsa banorët shprehën mirënjohjen për këtë ndërhyrje të rëndësishme, e cila lehtëson ndjeshëm lëvizjen dhe përmirëson kushtet për fermerët dhe komunitetin.

Falë këtyre investimeve, Shushica po fiton një qasje të re infrastrukturore, duke u bërë një zonë gjithnjë e më e integruar me qytetin e Elbasanit dhe duke garantuar kushte më të mira jetese për banorët e saj.

Kryetari i Bashkisë Gledian Llatja, dhe deputetja Desatila Tahiraj, inspektuan  punimet në shkollën e Treganit, një objekt që u shemb plotësisht gjatë tërmetit të vitit 2019. Pas një periudhe të gjatë punimesh, rindërtimi i shkollës është duke përfunduar, duke sjellë një ndërtesë të re dhe moderne, që do të shërbejë për rreth 150 fëmijë të fshatit, si dhe për banorët e zonës.

 Ky projekt ka qenë një kërkesë e banorëve të zonës, të cilët kanë theksuar nevojën për ndërtimin e një shkolle të re, që do të ofronte kushte më të mira dhe do të kontribuonte në zhvillimin e përgjithshëm të komunitetit.

Kryetari Llatja theksoi se ky rindërtim ka pasur disa sfida teknike dhe gjeologjike, për shkak të kushteve të veçanta të territorit dhe strukturës së shkollës së vjetër. Ai shtoi se prioriteti kryesor ka qenë sigurimi i një strukture të qëndrueshme dhe krijimi i kushteve të përshtatshme për fëmijët. “Falenderoj Ministrinë e Arsimit për mbështetje në këtë projekt, i cili përfshin jo vetëm shkollën 9-vjeçare, por edhe kopshtin e Treganit, duke e bërë këtë objekt një qendër të vërtetë komunitare për fshatin dhe Njësinë Administrative,” u shpreh Llatja.

Shkolla e re do të ofrojë kushte të përmirësuara për mësim dhe aktivitete edukative. Ajo ka një sipërfaqe prej rreth 1500 m² dhe përfshin katër klasa për nxënësit, një guzhinë, një hapësirë lidhëse mes shkollës dhe kopshtit, si dhe disa dhoma shërbimi, përfshirë drejtorinë, sallën e mësuesve, sekretarinë dhe tualetët. Përveç kësaj, pas ndërtimit të shkollës, do të jetë edhe një palestër moderne, e cila do të shërbejë si qendër komunitare për fshatin.

Deputetja Tahiraj e vlerësoi këtë projekt si një arritje të rëndësishme pas pesë viteve, duke e quajtur kthimin në shkollë një moment të rëndësishëm për fëmijët dhe familjet e Treganit. “Për pesë vite, fëmijët tanë kanë mësuar në Shirgjan, dhe tani, në shtator 2025, do të mund të kthehen në shkollën e re që plotëson të gjitha standardet dhe ofron një mjedis të sigurt dhe funksional,” tha ajo.

Shkolla e Treganit është një ndër projektet kyçe për zhvillimin e zonës, duke shfrytëzuar potencialin turistik të ujrave termale të Elbasanit dhe duke kontribuar në forcimin e infrastrukturës arsimore dhe sociale.

Përfundimi i punimeve është i afërt, duke hapur dyert për një vit të ri shkollor, i cili do të ofrojë mundësi më të mira për fëmijët dhe do të shërbejë si një qendër e re komunitare për Treganin.

Xhamia e Ballies në Elbasan është përzgjedhur si një nga pesë objektet më të bukura të kultit në botë, në finalen e çmimit prestigjioz “Ndërtesa e Vitit 2025” nga ArchDaily.

Ky vlerësim është një arritje e jashtëzakonshme për arkitekturën shqiptare dhe veçanërisht për arkitekturën fetare në vendin tonë. Tashmë kjo xhami konkuron me katër ndërtesat e tjera nga Kina, Kanadaja, Bangladeshi dhe Kili.

Xhamia ka një sipërfaqe rreth 1900 metra katrorë dhe përbëhet nga katër kate, në të cilat përveç vendit të faljes përfshihen edhe sallat e konferencave dhe zyrat e stafit të Myftinisë Elbasan.

Xhamia e Ballies shquhet për një dizajn inovativ që kombinon mjeshtërisht traditën islame me elemente moderne, duke krijuar një hapësirë unike dhe frymëzuese për besimtarët dhe vizitorët. Arkitektura e saj përfaqëson një qasje të re dhe të avancuar në ndërtimin e objekteve të kultit, duke ruajtur identitetin dhe vlerat kulturore, por edhe duke u përshtatur me kërkesat dhe estetikën bashkëkohore.

Xhamia e Ballies është një ndër objektet më të lashta në Elbasan e cila u ndërtua nga Hasan Balliu në vitin 1608 në qendër të qytetit të Elbasanit.

Regjimi komunist në 1967 urdhëroi prishjen e saj. Ajo ka qenë simbol i Elbasanit, nga më të bukurat dhe të vjetrat. Është quajtur ndryshe “xhamia blu” për bukurinë dhe madhështinë që ka pasur. Pas shumë vitesh Xhamia e Ballies u ringrit shumë më madhështore se e vjetra në qendër të qytetit të Elbasanit dhe është kthyer në identitet. Elementi më tërheqës i xhamisë së shkatërruar në kohën e regjimit komunist ishte minareja që konkurronte të gjitha të tjerat me modelimin dekorativ origjinal të saj.

Sot xhamia e rindërtuar ka të përshtatur klasiken me modernen. Ka salla për abdesë, për faljen e grave dhe ambient për faljen e burrave. Kapaciteti është 1500 besimtarë vetëm brenda, por ka dhe hapësirë jashtë.

Kryetari i Bashkisë Elbasan, Gledian Llatja, ka zhvilluar një takim të veçantë me fermerin Drini, i cili me përkushtim vazhdon traditën e blektorisë të trashëguar nga gjyshi i tij. Me 300 krerë dele, të ndara në dy tufa, Drini kujdeset personalisht për delet e sapolindura, ndërsa për tufën tjetër janë të angazhuar punëtorë që ndihmojnë në kullotjen dhe mirëmbajtjen e bagëtive.

“Drini është një shembull i jashtëzakonshëm i punës së palodhur dhe përkushtimit ndaj traditës. Ai e çon përpara me mund e sakrificë këtë pjesë kaq të rëndësishme të bujqësisë dhe blektorisë, duke mos e humbur lidhjen me rrënjët,” u shpreh kryetari Llatja gjatë bisedës me fermerin.

Për Drinin, kjo punë është më shumë se një mënyrë jetese,  është një pasion që e ndan edhe me djalin e tij, të cilin e merr shpesh me vete në kullotat e zonës. Përkushtimi i tij ndaj blektorisë dhe ruajtja e traditës familjare janë një model frymëzimi për brezat e rinj që zgjedhin të qëndrojnë dhe të kontribuojnë në zhvillimin rural.

Kryetari i Bashkisë vlerësoi angazhimin dhe punën e palodhur të Drinit, duke theksuar se mbështetja për fermerët dhe zhvillimi i bujqësisë janë një prioritet për Bashkinë Elbasan. “Puna e njerëzve si Drini është një pasuri për komunitetin tonë. Ne do të vijojmë të mbështesim fermerët që me mund mbajnë gjallë traditat dhe ekonominë lokale,” përfundoi Llatja.

Kryetari i Bashkisë Elbasan, Gledian Llatja, ka pritur në një takim zyrtar Ambasadorin e Sllovakisë në Shqipëri, SH.T.Z. Albin Otruba. Gjatë takimit u diskutua për forcimin e marrëdhënieve mes Elbasanit dhe Sllovakisë, duke u fokusuar në zhvillimin e infrastrukturës, arsimit, shëndetësisë dhe mbështetjes sociale.

Bashkëpunimi mes dy palëve do të zgjerohet edhe në sektorë të tjerë me potencial zhvillimi, si turizmi, bujqësia dhe kultura. Kryetari Llatja vlerësoi këtë takim si një hap të rëndësishëm drejt krijimit të mundësive të reja për investime dhe zhvillim ekonomik në qytetin e Elbasanit.

Nga ana e tij, Ambasadori Otruba shprehu gatishmërinë për të mbështetur projekte të përbashkëta që do të ndihmojnë në forcimin e lidhjeve mes dy vendeve dhe do të sjellin përfitime konkrete për komunitetin lokal.

Në një vizitë të fundit në fshatin Papërr Sollak, Kryetari i Bashkisë, Gledian Llatja, theksoi rëndësinë e përfundimit të projektit për ndërtimin e urës që do të lidhë këtë zonë me pjesën tjetër të njësisë administrative Papërr. Sipas Llatjas, ura është një investim jetik për fëmijët e shkollës.

“Një nga kërkesat e kahershme të komunitetit ka qenë ndërtimi i kësaj ure, e cila do të mundësojë që fëmijët të kalojnë në shkollë pa pasur nevojë të kalojnë përmes përroit. Kur të përfundojë ura, ata do të mund të shkojnë në shkollë me lehtësi, dhe kjo është një arritje e madhe për ta,” tha Llatja.

Fshati Papërr Sollak, një nga fshatrat më të largëta të njësisë administrative Papërr.

 “Të paktën këto vite, kemi marrë masa për të shmangur shembjen e rrugëve dhe kemi realizuar prita lumore. Po punojmë ngadalë, por sigurt, dhe tani po afrojmë fundin e punimeve për urën e Papërr Sollakut,” u shpreh Llatja.

Ky projekt pritet të sjellë përmirësime të mëdha në kushte jetese dhe mobilitet për banorët e fshatit, duke rritur aksesin dhe sigurinë për të gjithë ata që kalojnë çdo ditë në këtë rrugë.