Lajme

Në kuadër të promovimit të sportit dhe aktiviteteve rinore, Qendra Kulturore e Fëmijëve Elbasan, në bashkëpunim me Klubin Shumësportësh Elbasan dhe Zyrën Vendore Arsimore Elbasan, zhvilluan me sukses finalet e Kampionatit të Volejbollit për djem dhe vajza midis shkollave 9-vjeçare të qytetit.

Pas një gare plot emocion, pasioni dhe performanca të shkëlqyera sportive, Kupa e Kampionit u fitua nga:

Shkolla “Jorgji Dilo” – Djem

 Shkolla “Abdyl Paralloi” – Vajza

Gjatë aktivitetit u vlerësuan gjithashtu ekipet nënkampione, si dhe sportisti dhe sportistja më e mirë e turneut, të cilët u dalluan për përkushtimin dhe shpirtin e tyre sportiv.

Në këtë event mori pjesë edhe Kryetari i Bashkisë Elbasan, z. Gledian Llatja, i cili përshëndeti të pranishmit dhe uroi fituesit, duke vlerësuar rëndësinë e sportit si një pjesë thelbësore e edukimit dhe zhvillimit të fëmijëve.

“Sporti është mënyra më e bukur për të mësuar bashkëpunimin, disiplinën dhe respektin ndaj njëri-tjetrit. Elbasani ka një traditë të shkëlqyer sportive dhe ne do të vazhdojmë ta mbështesim fuqishëm brezin e ri që e do sportin dhe jetën aktive,”  u shpreh z. Llatja gjatë fjalës së tij përshëndetëse.

Finalet e kampionatit shënuan një hap përpara në përfshirjen e nxënësve në aktivitetet sportive, duke forcuar traditën e qytetit të Elbasanit si një qytet me pasion për sportin.

Në kuadër të procesit të Buxhetimit me Pjesëmarrje, Kryetari i Bashkisë Elbasan, Gledian Llatja dhe deputetja Evis Kushi zhvilluan një takim me banorët e Njësisë Administrative Tregan.

 Takimi u mbajt në ambientet e shkollës së re “Jonuz Carçiu”, një nga investimet më të rëndësishme të realizuara në këtë zonë gjatë vitit paraardhës.

Kryebashkiaku  Llatja, theksoi se gjatë dy viteve të fundit janë realizuar investime të konsiderueshme në këtë njësi:

“Vetëm në këto dy vite, në Tregan kemi realizuar mbi 2 milionë euro investime në infrastrukturë shkollore dhe rrugore,”  u shpreh ai.

Duke u ndalur fillimisht te shkolla “Jonuz Carçiu”, ku u zhvillua edhe takimi, Llatja shtoi se “kjo shkollë ka qenë një nga kërkesat më të shumta të banorëve. Ishte një shkollë problematike për shumë vite, por tashmë kemi arritur ta kthejmë në një institucion modern që u shërben fëmijëve të zonës.”

Përmirësimin e rrugëve dhe infrastrukturës në Tregan, ishte një tjetër aspekt ku u ndal Llatja duke shtuar se “janë realizuar rruga e Kyçykëve, rrugët e brendshme të fshatit Tregan, si edhe pjesa e dytë e vazhdimit të rrugës që lidh Treganin dhe fshatin Kyçyk me Cërrikun. Të gjitha këto janë investime që po e zhvillojnë ndjeshëm zonën.” 

Ai vuri theksin te potenciali i madh zhvillimor i zonës, veçanërisht në turizëm.

“Në Tregan kemi një potencial të madh, ujin termal të Llixhës, turizmin dhe numrin më të madh të shtretërve në Bashkinë e Elbasanit. Do ta mbajmë Treganin në qendër të vëmendjes dhe do të mbështesim komunitetin për të vijuar punët e mira e për të zgjidhur problematikat që ekzistojnë,” u shpreh Llatja.

Duke folur për zhvillimin ekonomik, ai shtoi se, “synimi ynë është ta zhvillojmë Treganin jo vetëm nga aspekti infrastrukturor, por edhe ekonomik, duke shfrytëzuar potencialin që ka sot me biznese të reja, hotele të reja dhe mundësi të shtuara në kapacitete akomoduese. Ne do të vazhdojmë me të njëjtin ritëm për punët publike.”

Në vijim, Kryetari njoftoi edhe projektet e reja që pritet të nisin së shpejti.

“Shumë shpejt do të nisë rruga e Bajramëve, ashtu si do të vijojmë me prioritetet tona për të lidhur edhe fshatrat e tjerë. Prioritet tona për vitin tjetër janë rruga nga Tregani në Trepsenisht dhe Tudan-Mjekës nga të dyja krahët,”  theksoi ai.

Deputetja Evis Kushi vlerësoi potencialin e madh zhvillimor të zonës dhe rëndësinë e përfshirjes së banorëve në procesin e vendimmarrjes.

“Është shumë e rëndësishme që banorët janë pjesë e procesit të vendimmarrjes. Vetëm përmes pjesëmarrjes aktive mund të sigurojmë zhvillim të qëndrueshëm për çdo fshat të kësaj njësie,” u shpreh Kushi.

Në përfundim të takimit, banorët votuan prioritetet kryesore të investimeve që do të përfshihen në buxhetin e vitit 2026.

Procesi i Buxhetimit me Pjesëmarrje mbetet një model demokratik që u jep qytetarëve mundësinë të vendosin për zhvillimin e komunitetit të tyre.

Procesi i Buxhetimit me Pjesëmarrje vijon në Rajonin Nr. 2 të Bashkisë Elbasan, ku banorët patën mundësinë të shprehin prioritetet dhe nevojat e komunitetit të tyre.

Në këtë takim morën pjesë Kryetari i Bashkisë Elbasan, Gledian Llatja, dhe deputetja Aulona Bylykbashi, të cilët theksuan rëndësinë e përfshirjes së qytetarëve në vendimmarrje dhe në planifikimin e investimeve publike.

Kryetari Gledian Llatja bëri një përmbledhje të investimeve të realizuara dhe atyre në proces, duke përmendur ndërhyrjet në rrugë, kanalizime, sistemin e fasadave me kapot në pallate, ndërtimin e terreneve sportive dhe hapësirave të gjelbra, si edhe hapjen e qendrës së parë për të moshuarit.

Ai gjithashtu njoftoi për projektet në zhvillim, duke theksuar se, “ Shkolla ‘Onufri’, një shkollë e rikonstruktuar plotësisht, e cila ishte edhe një kërkesë e banorëve. Në Rajonin Nr. 2 kemi bërë shumë punë të mira, si në qendër ashtu edhe në periferi. Kemi vijuar me sistemin e kapoteve në shumë pallate dhe do të vazhdojmë me investime të tjera. Formati i buxhetimit me pjesëmarrje është shumë i rëndësishëm, sepse u jep mundësi qytetarëve të votojnë prioritetet e tyre.”

Në vijim, Llatja shtoi se një nga projektet më të mëdha në zhvillim është krijimi i një hapësire të madhe sportive dhe rekreative, me një sipërfaqe prej 22 mijë metrash katrorë, ku ka nisur puna për ndërtimin e një projekti modern që do të përfshijë, dy fusha sportive (kalçeto, basketboll, volejboll, tenis), kënde lojërash dhe ambiente rekreative për fëmijë e të moshuar.

Kryebashkiaku bëri me dije se është gati projekti për rikonstruksionin e Markatës, i cili pritet të nisë së shpejti.

 “Do të shohim mundësinë që vitin e ardhshëm, në bashkëpunim me qeverinë shqiptare ose përmes projekteve të ndryshme, ta financojmë këtë investim me vlerë të konsiderueshme. Markata duhet të kthehet në një qendër të fortë ekonomike për qytetin”  u shpreh Llatja.

Deputetja Aulona Bylykbashi vlerësoi bashkëpunimin mes banorëve dhe përfaqësuesve të Bashkisë, duke theksuar se investimet e realizuara kanë përmirësuar ndjeshëm cilësinë e jetës në lagjet e Rajonit Nr. 2.

Gjatë takimit, banorët paraqitën disa kërkesa konkrete, për të cilat Kryetari Llatja siguroi se do të merren në konsideratë në planin e investimeve të ardhshme.

Është vënë re një pjesëmarrje e gjerë e qytetarëve, me një prani të madhe grash dhe vajzash, ç’ka tregon angazhimin e komunitetit në vendimmarrje.

Procesi i buxhetimit me pjesëmarrje mbetet një praktikë e rëndësishme e Bashkisë Elbasan, që garanton transparencë, përfshirje qytetare dhe zhvillim të qëndrueshëm për çdo lagje të qytetit.

Bashkia Elbasan njofton qytetarët për një ndryshim në kalendarin e takimeve të programit “Buxhetimi me Pjesëmarrje”, që po zhvillohet në të gjitha rajonet e Bashkisë me qëllim përfshirjen e komunitetit në vendimmarrjen mbi prioritetet e zhvillimit.

Në vijim, oraret e përditësuara për takimet e datës 23 tetor 2025 janë si më poshtë:

• Rajoni 5️⃣ – ora 17:00 dt. 23 Tetor
• Rajoni 6️⃣ – ora 18:30 dt. 23 Tetor

Bashkia Elbasan falënderon qytetarët për pjesëmarrjen aktive, bashkëpunimin dhe mirëkuptimin, si dhe për kontributin e tyre të vlefshëm në ndarjen e ideve dhe propozimeve që ndihmojnë në ndërtimin e një buxheti sa më gjithëpërfshirës dhe të qëndrueshëm për komunitetin.

Ky proces mbetet një shembull i dialogut të hapur midis Bashkisë dhe qytetarëve, në funksion të zhvillimit të balancuar dhe përmirësimit të cilësisë së jetës në çdo rajon të Elbasanit.

Bashkia Elbasan

Bashkia Elbasan ka vijuar gjatë ditëve të fundit aksionin për lirimin e hapësirave publike të zëna pa leje, me qëllim rikthimin e tyre në shërbim të qytetarëve.

Kryetari i Bashkisë Elbasan, Gledian Llatja, theksoi se angazhimi i bashkisë për këtë çështje është i pandalshëm dhe do të vijojë “pa kompromis” deri në lirimin e çdo hapësire të zaptuar në mënyrë të paligjshme.

“Angazhimi ynë vijon pa kompromis për të liruar çdo hapësirë të zaptuar pa të drejtë, që ka penguar lëvizjen dhe përdorimin e hapësirave nga qytetarët. Falenderoj bizneset që ju përgjigjën menjëherë thirrjes dhe liruan vullnetarisht hapësirat publike”,  deklaroi Llatja.

Ai shtoi se për rastet ku nuk ka pasur bashkëpunim, ekipet e bashkisë janë në terren për të vepruar sipas ligjit, duke mbrojtur interesin e qytetarëve.

“Jemi partnerë dhe mbështetës të biznesit, por asnjëherë në kurriz të qytetarit dhe qytetit”,  nënvizoi kryebashkiaku.

Sipas Bashkisë Elbasan, operacioni për lirimin e hapësirave publike do të vijojë në të gjitha lagjet e qytetit dhe zonat përreth, me qëllim përmirësimin e aksesit dhe funksionalitetit urban për komunitetin.

Procesi i Buxhetimit me Pjesëmarrje u ndal në Rajonin Nr. 1, ku banorët e lagjeve, pjesë e kësaj zone, patën mundësinë të diskutojnë drejtpërdrejt me drejtuesit e Bashkisë Elbasan për projektet aktuale, prioritetet dhe nevojat e komunitetit.

Në takim morën pjesë Kryetari i Bashkisë Elbasan, Gledian Llatja, dhe Deputeti i zonës, Adi Qosja, të cilët theksuan rëndësinë e këtij procesi si një praktikë demokratike që i jep zë qytetarëve dhe ndihmon në përmirësimin e planeve të zhvillimit vendor.

Në fjalën e tij, Kryetari Gledian Llatja u ndal në projektet aktuale dhe ato në proces, duke theksuar se Rajoni 1 është zemra e Elbasanit, një zonë me shumë diversitet që po pëson një transformim të dukshëm urban.

Ai nënvizoi se projekti i automotoparkut në zonën e Emin Matraxhiut do t’i japë qytetit një dimension të ri zhvillimi urban dhe ekonomik, duke e kthyer, dikur periferinë, në një qendër të re moderne.

Ndër projektet kryesore në zbatim ose planifikim, Llatja përmendi rikonstruksionin e shkollës “Naim Frashëri” (procedurat janë mbyllur dhe punimet nisin së shpejti) si dhe ndërtimin e Çerdhes Nr. 5 në lagjen “Kongresi i Elbasanit”, e cila do të hapet në muajin shkurt të vitit 2026.

Gledian Llatja theksoi se projektet për Rajonin Nr. 1 nuk janë ndalur asnjëherë, por përkundrazi janë shtuar ndjeshëm.

“Kemi shumë projekte, automotoparku i Elbasanit do të jetë një pol i fortë zhvillimi ekonomik për qytetin, bashkë me kalanë e Elbasanit, për të cilën kemi filluar punën për projektimin dhe vitin tjetër do të nisim investimet e para.

Në lagjen Kala do të vazhdojmë me sistemimet dhe asfaltimet, ndërsa më pas edhe në zonën e Krastës, ku do të ndërtojmë një ambient të ri rekreativ.

Ne po punojmë për Elbasanin, kemi një sërë projektesh, të vogla dhe të mëdha, por të gjitha këto realizohen bashkë me ju,” tha Llatja.

Deputeti Adi Qose vlerësoi Bashkinë për mënyrën e organizimit të takimeve me banorët, duke theksuar se “ky është një proces i rëndësishëm që i jep qytetarëve mundësinë të dëgjohen dhe të përcaktojnë vetë prioritetet e tyre. Ai e vuri theksin edhe tek automotoparku i cili do t’i japë qytetit një zhvillim ekonomik.

Llatja garantoi se të gjitha sugjerimet e banorëve do të përfshihen në planin e ardhshëm të investimeve dhe se procesi i buxhetimit me pjesëmarrje do të vijojë të mbetet një praktikë e qëndrueshme për zhvillimin e balancuar të qytetit.

Punimet për ndërtimin e rrugës “Gjergj Arianiti” po ecin me ritme të shpejta, duke hyrë në fazën e asfaltimit. Ky aks i ri, me gjatësi rreth 1.5 kilometra, do të lidhë lagjen “Emin Matraxhiu” me Menglin dhe më tej me Koridorin VIII, duke krijuar një alternativë të re dhe moderne lëvizjeje për banorët e zonës.

Rruga po ndërtohet plotësisht nga e para, duke përfshirë, trotuare të reja për këmbësorët, ndriçim modern, si dhe korsi të dedikuara për biçikleta, që do të rrisin sigurinë dhe cilësinë e jetesës urbane.

Përveç përmirësimit të infrastrukturës, projekti do të sjellë një pamje të re e tërheqëse përgjatë brigjeve të lumit Shkumbin, duke e kthyer zonën në një hapësirë më të gjelbër dhe më të aksesueshme.

Në vijim, punimet do të shtrihen edhe në segmentin e rrugës “Behxhet Hyti”, nga ura e Lizës deri te ish-frigoriferi i Elbasanit, duke plotësuar kështu një nyje të rëndësishme lidhëse për qarkullimin urban dhe ndërqytetas.

Investimet në infrastrukturën e Elbasanit vazhdojnë, duke transformuar çdo ditë pamjen e qytetit dhe duke sjellë kushte më të mira jetese për komunitetin.

Procesi i buxhetimit me pjesëmarrje, një nga nismat më të rëndësishme të përfshirjes qytetare në vendimmarrje, ka vijuar në njësinë administrative Gjergjan, ku pjesëmarrja masive e banorëve tregoi për përgjegjësinë dhe besimin e tyre ndaj këtij procesi.

Në takim morën pjesë kryetari i Bashkisë Elbasan, Gledian Llatja, deputetja Evis Kushi, si dhe kryetari i Njësisë Administrative Gjergjan, të cilët bashkëbiseduan me banorët për problematikat e zonës dhe vendosën së bashku prioritetet për investimet e ardhshme.

Kryetari i njësisë bëri një përmbledhje të punëve të realizuara gjatë vitit, mes të cilave u përmendën, asfaltimi i rrugës Muriqan – Gjergjan, me gjatësi rreth 1.5 km, ndërtimi i policëve të shtrirë dhe ndërhyrje në infrastrukturën rrugore në fshatin Thanë, sistemime dhe asfaltime në fshatin Gjergjan, punime për rrugën Kodër Bujaras – Bujaras, në bashkëpunim me ndërmarrjen ASHP, etj.

Në fjalën e tij, kryebashkiaku Gledian Llatja prezantoi projektet që po realizohen dhe planifikimet e reja për përmirësimin e infrastrukturës rurale.
“Jemi duke investuar në shtrimin e rrugëve në disa fshatra dhe lagje të brendshme, përfshirë Bujaras dhe Kodër Bujaras, një premtim i kahershëm tashmë i mbajtur,” tha ai.

Llatja shtoi se tashmë Bashkia Elbasan ka ngritur një ndërmarrje të veçantë për zonat rurale, ASHP, dhe synon të krijojë edhe dy struktura të dedikuara për zonën poshtë dhe lart të Shkumbinit, me qëllim që shërbimet dhe mirëmbajtja e rrugëve të jenë më pranë banorëve.

Në vijim, ai u ndal edhe te çështjet e pastrimit dhe menaxhimit të mbetjeve, duke theksuar se “Elbasani ka tarifat më të ulëta nga të gjitha bashkitë, por do të ketë një rritje të lehtë të tyre, më e ndjeshme në qytet dhe më e moderuar në zonat rurale”.
Gjithashtu, Llatja përmendi se është në zhvillim një fazë e re investimesh në rrjetin e energjisë elektrike, në bashkëpunim me ABC Energji.

Deputetja Evis Kushi vlerësoi angazhimin e Bashkisë Elbasan dhe theksoi se “bashkëpunimi i të gjithëve është i domosdoshëm për të ecur përpara dhe për të sjellë më shumë punë të mira në këtë zonë.” Ajo nënvizoi se kryetari Llatja e ka gjithmonë në vëmendje zhvillimin e zonave rurale si Gjergjani.

Ky takim në Gjergjan është pjesë e turit të gjerë të takimeve të Bashkisë Elbasan në kuadër të procesit të buxhetimit me pjesëmarrje, përmes të cilit banorët kanë mundësinë të shprehin nevojat e tyre dhe të vendosin së bashku prioritetet për zhvillimin e komunitetit.

Mbrëmja e djeshme në Teatrin “Skampa” të Elbasanit solli një udhëtim magjik përmes tingujve të muzikës së harqeve, duke hapur zyrtarisht edicionin e 10-të të Takimit Kombëtar të Orkestrave të Harqeve.

Ky aktivitet tradicional, që prej vitesh ka zënë një vend të veçantë në jetën artistike të vendit, promovon artin, kulturën dhe bashkëpunimin mes talenteve nga qytete të ndryshme të Shqipërisë dhe rajonit.

Në këtë edicion morën pjesë orkestrat dhe ansamblet nga Elbasani, Tirana, Durrësi, Shkodra, Vlora, Fieri, Berati dhe Ulqini, të cilat sollën një mbrëmje të mbushur me emocione, profesionalizëm dhe dashuri për muzikën.

Publiku elbasanas përjetoi një atmosferë të ngrohtë, ku muzika bashkoi breza, pasione dhe ndjenja të përbashkëta artistike.

Festivali organizohet nën drejtimin e Blerim Narazanit (Mjeshtër i Madh) si Drejtor i Festivalit, dhe Kliton Kapaj si Drejtor Organizativ.

Edhe këtë herë, Elbasani shkëlqeu si një qendër e artit dhe kulturës, duke dëshmuar se muzika mbetet një gjuhë universale që frymëzon dhe bashkon.

Procesi i buxhetimit me pjesëmarrje ka nisur këtë vit nga zona turistike e Gjinarit, aty ku janë kryer një sërë investimesh të dukshme, jo vetëm për zhvillimin turistik, por mbi të gjitha për rritjen e cilësisë së jetesës për banorët e zonës. 

E njohur si një nga perlat e turizmit në Elbasan, Gjinari është parë si përparësi gjatë këtij viti si nga investimet e qeverisë shqiptare ashtu edhe nga vetë Bashkia Elbasan.

Shumë të pranishëm kanë marrë pjesë në këtë takim të Buxhetimit me Pjesëmarrje, ku kryetari i Bashkisë Elbasan, Gledian Llatja, ka qenë i shoqëruar nga deputetja e zonës së Shpatit, Evis Kushi, kryetari i Këshillit Bashkiak, Lutfi Lala, si edhe ai i njësisë administrative të Gjinarit.

Në fjalën e tij, kryebashkiaku Gledian Llatja theksoi rëndësinë që ka zona e Shpatit për zhvillimin ekonomik dhe turistik të Elbasanit:

“Ne jemi mbledhur këtu për të diskutuar dhe për të marrë vendime për të ardhmen. 

Zona e Shpatit meriton shumë sepse është një zonë me traditë, me kulturë, një zonë e cila ka një potencial ekonomik, por edhe njerëzor. 

Kërkesa kryesore dikur këtu në Gjinar ishte qendra, sheshi kryesor ku edhe jemi sot, pasi i jep potencial të gjithë zones, jo vetëm Gjinarit, por edhe Lleshanit, Shelcanit, fshatrave të tjerë dhe Bukanikut, që është një nga malet tona më të bukura dhe krenaria e zonës sonë të Elbasanit.”

Llatja shtoi se investimet në Gjinar kanë qenë të shumta dhe me ndikim të drejtpërdrejtë në zhvillimin e zonës:

“Kemi bërë shumë investime në Gjinar, sistemime rrugësh, lidhje të energjisë elektrike, ujësjellësin, si edhe sheshin që ka qenë një investim i madh. 

Ne kemi investuar në Gjinar sepse duam ta bëjmë atë një destinacion turistik dhe të krenohemi të gjithë me bukurinë, traditën, kulinarinë dhe mikpritjen që e karakterizon,”, u shpreh Llatja.

Ai nënvizoi gjithashtu se përveç investimeve të realizuara, Bashkia Elbasan po punon për projekte të reja që do të lehtësojnë qarkullimin dhe do të shtojnë mundësitë për zhvillim turistik.

“Do të vazhdojmë të bëjmë edhe më shumë. Kemi projekte për Gjinarin, po ecim drejt konkretizimit të një rruge të re nga Shushica për të ardhur në Lleshan nga pjesa e mbrapme, një projekt që kërkon investim, por që do të bëjë një rrugë më të shkurtër dhe do t’i japë Gjinarit një potencial të ri, pa lënë pas dore rrugën e vjetër dhe kërkesën tonë të vazhdueshme për mirëmbajtjen e saj,”, theksoi Llatja.

Deputetja Evis Kushi vuri theksin tek investimet e kryera dhe tek interesi në rritje që ka treguar vetë kryetari i bashkisë për këtë zone.

“Zona e Gjinarit ka pasur një vëmendje të veçantë nga Bashkia Elbasan dhe nga kryetari Llatja personalisht. Por ne do të vazhdojmë të bëjmë akoma edhe më shumë për ju.

Buxhetimi me pjesëmarrje është një mundësi shumë e mirë që jo vetëm banorët të japin mendimet e tyre, por të jenë edhe pjesë e vendimmarrjes për investimet në zonën e tyre,”, u shpreh Kushi.

Gjatë këtij viti, paketa e maleve ka përfshirë edhe Gjinarin, si një zonë me potencial të madh turistik, ku janë kryer një sërë investimesh si hapja e muzeut, info point-it, etj. Kjo paketë ka si qëllim zhvillimin e turizmit dhe ekonomisë lokale.

Në përfundim të takimit, banorët shprehën kërkesat e tyre dhe u votua për prioritetet e investimeve, të cilat do të kalojnë më pas në buxhetin e vitit 2026, ku zërat e tyre dhe këto prioritete do të vihen në zbatim nga Bashkia Elbasan.