Skip to content Skip to left sidebar Skip to right sidebar Skip to footer

Ditë: 14 Tetor 2026

Buxhetimi me pjesëmarrje në Labinot-Mal, investimet dhe prioritetet për vitin 2027

Buxhetimi me pjesëmarrje vijoi në Njësinë Administrative Labinot-Mal, ku banorët diskutuan nevojat e zonës dhe përcaktuan përmes votimit prioritetet kryesore për investimet që do të përfshihen në Buxhetin e vitit 2027. Në dëgjesë ishte i pranishëm nënkryetari i Bashkisë Elbasan, Asim Sula.

Në fokus të diskutimeve ishin përmirësimi i infrastrukturës rrugore, furnizimi me ujë të pijshëm, sistemet e ujitjes bujqësore, si dhe investimet në arsim dhe shëndetësi.

Gjatë vitit 2027, në Njësinë Administrative Labinot-Mal parashikohen një sërë investimesh në infrastrukturën rrugore, ujësjellës, ujitjen bujqësore, arsim dhe shëndetësi. Ndërhyrjet përfshijnë asfaltimin e rrugës Xibrakë–Lugaxhi, riveshjen me asfalt të aksit Guri i Zi–Qafë–Renas, vijimin e asfaltimit të rrugës Griqan–Labinot-Katund, si dhe asfaltimin e rrugës nga qendra e fshatit Labinot-Katund deri te varrezat.

Në sektorin e ujit të pijshëm dhe ujitjes bujqësore, parashikohet rikonstruksioni i ujësjellësve në fshatrat Labinot-Katund dhe Qerret, si dhe pastrimi dhe rritja e kapacitetit të rezervuarëve në Qerret, Labinot-Mal dhe Benë, me synim zgjerimin e sipërfaqeve ujitëse.

Investimet e planifikuara përfshijnë gjithashtu rikonstruksionin e shkollave në fshatrat Qafë dhe Labinot-Katund, si dhe rikonstruksionin e plotë të ambulancave në Guri i Zi dhe Labinot-Katund.

Paralelisht me planifikimin e investimeve të reja, gjatë vitit 2026 janë realizuar edhe ndërhyrje të rëndësishme në infrastrukturën e zonës.

Ndërkohë, vijojnë punimet për pastrimin dhe vënien në eficiencë të plotë të rezervuarit në fshatin Lugaxhi.

Në përfundim të dëgjesës, banorët votuan prioritetet e tyre, duke përcaktuar nevojat më të rëndësishme të komunitetit. Zëri i tyre do të shërbejë si bazë për orientimin e investimeve në Njësinë Administrative Labinot-Mal gjatë vitit 2027.

Java Kombëtare e Ndërgjegjësimit për Zvogëlimin e Riskut nga Fatkeqësitë,  aktivitete sensibilizuese në Elbasan

Një simulim i situatës së emergjencës u zhvillua në gjimnazin “Dhaskal Todri” në Elbasan, me pjesëmarrjen e strukturave të Mbrojtjes Civile, për të rritur ndërgjegjësimin mbi parandalimin dhe përballimin e fatkeqësive natyrore.

Aktiviteti u organizua nga Shërbimi Zjarrfikës Elbasan, Kryqi i Kuq Shqiptar – Dega Elbasan, Agjencia Kombëtare e Mbrojtjes Civile dhe Zyra Vendore Arsimore, në kuadër të “Javës Kombëtare të Ndërgjegjësimit për Zvogëlimin e Riskut nga Fatkeqësitë”.

Përmes simulimit, pjesëmarrësit u njohën nga afër me mënyrat e reagimit në situata emergjente dhe rëndësinë e koordinimit mes strukturave përgjegjëse.

Aktivitetet nisën në Sheshin “Gensher”, ku u ngrit Kampi i Mbrojtjes Civile, me qëllim informimin dhe sensibilizimin e komunitetit për masat e sigurisë dhe veprimet që duhen ndërmarrë përballë situatave të rrezikut.

Kjo nismë synon të rrisë ndërgjegjësimin publik për rëndësinë e parandalimit dhe përgatitjes për përballimin e fatkeqësive natyrore, si dhe të forcojë gatishmërinë dhe qëndrueshmërinë e komunitetit për të reaguar në mënyrë efektive në situata emergjente.