Buxhetimi me Pjesëmarrje: Llatja/ Qytetarët janë vendimmarrësit kryesor të investimeve në qytet

Ashtu si çdo fundvitit Bashkia e Elbasanit nisi takimet me komunitetin në çdo njësi administrative në kuadër të “Buxhetimit me Pjesëmarrje”. Tashmë prej më shumë se një dekadë buxhetimi me pjesëmarrje është parë si forma më demokratike dhe gjithpërfshirëse e qytetarëve në vendimmarje. Gjithnjë e më shumë pjesëmarrja e banorëve në këto takime shtohet duke folur qartë për efektshmërinë e këtij procesi.

Në takimin me banorë të njësisë nr.2 në qytet kryetari i Bashkisë Z. Llatja vuri në dukje investimet që janë bërë duke ftuar qytetarët që të përcaktojnë përparësitë e tyre për vitin e ardhshëm:

“Nuk e kishim bërë akoma palestrën gati, që ta bënim takimin tek palestra e re tek shkolla “Onufri”, kështu që ky është viti i fundit që do ta bëjmë këtë takim në këtë ambjent.

Më në fund kemi bërë një shkollë fantastike, që është shkolla e të gjithë artistëve të Elbasanit, nuk është vetëm shkolla e rajonit Nr 2, as e qytetit të Elbasanit, por është e të gjithë qarkut të Elbasanit, por edhe më gjerë. Ndaj e meritonim që të kishim një shkollë fantastike, shkollën “Onufri”, të rehabilituar, të rikonstruktuar dhe vitin tjetër besoj se Buxhetimin me Pjesëmarrje, do ta zhvillojmë aty, në një palestër moderne, e cila nuk do të jetë vetëm për shkollën, por edhe për komunitetin.

Kemi pasur një sërë investimesh që i kemi bërë bashkarisht, që ju i keni kërkuar në vazhdimësi, dhe ne kemi gjetur mundësi që disa t’i bëjmë me buxhetin tonë, disa t’i fusim tek FSHZH, disa të tjera me prioritetet e qeverisë, disa të tjera me projekte.

 Kemi bërë shumë punë të mira me riasfaltimet, me sheshet e pallateve, kemi bërë shumë punë të mira tek “Qemal Stafa”, “Brigada 17 Sulmuese”, tek “ Sul Paprri” , do të vazhdojmë akoma të bëjmë, të rregullojmë shkollat, infrastrukturën, të mbyllim edhe disa probleme që kemi pasur me kanalizimet e ujrave të zeza në zonat e tona, të mbyllim një nga zonat më problematike që kemi që është zona e “ Ish Pularisë”, për kanalizimiet e ujrave të zeza, për rehabilitimin e rrugëve.

 Por gjithashtu, edhe pjesët tona fundore. Ne jemi përpjekur që të jemi të drejtë edhe në ndarjen e investimit, si në qendër ashtu edhe në periferi, por edhe në zonat rurale.” tha Llatja

Kryebashkiaku Llatja ndau me banorët e njësisë nr.2 lajmin e mirë të implementimit të projektit për rehabilitimin e rrjetit të ujësjellësit të qyteëtit të Elbasanit i cili do të realizohet falë bashkëpunimit me KFV gjermane.

“Shumë shpejt, brenda kësaj jave, ne fillojmë implementimin e projektit të madh që është me KFV gjermane, për rehabilitimin e rrjetit të ujësjellësit të qyteëtit të Elbasanit.

 Është projekti më i madh që implementohet në Elbasan, do të kemi një zhvillim në shumë zonat tona, aty ku kemi pasur problematika me ujësjellësin, me ujin e pijshëm.

Do të kemi përsëri kantiere që po hapen, dhe përsëri gjatë këtij viti ne po planifikojmë të investojmë në rrugët për riasfaltimet, por edhe në sheshet e pallateve.

 Shumë punë kemi bërë, shumë punë na presin të bëjmë akoma, na presin që ne t’i bëjmë bashkë.

Dhe jemi pikërisht këtu sot për këtë, që qytetarët të flasin fjalën e tyre në bazë të zonave dhe pastaj të gjithë të votojmë prioritetet tona” shtoi Llatja.

Në këtë takim kryetari i bashkisë u shoqëruar nga deputeti Florenc Spaho, anëtarë të Këshillit Bashkiak dhe për t’u vlerësuar gjithnjë është pjesëmarrja e shoqërisë civile.