Lajme

Procesi i buxhetimit me pjesëmarrje ka nisur këtë vit nga zona turistike e Gjinarit, aty ku janë kryer një sërë investimesh të dukshme, jo vetëm për zhvillimin turistik, por mbi të gjitha për rritjen e cilësisë së jetesës për banorët e zonës. 

E njohur si një nga perlat e turizmit në Elbasan, Gjinari është parë si përparësi gjatë këtij viti si nga investimet e qeverisë shqiptare ashtu edhe nga vetë Bashkia Elbasan.

Shumë të pranishëm kanë marrë pjesë në këtë takim të Buxhetimit me Pjesëmarrje, ku kryetari i Bashkisë Elbasan, Gledian Llatja, ka qenë i shoqëruar nga deputetja e zonës së Shpatit, Evis Kushi, kryetari i Këshillit Bashkiak, Lutfi Lala, si edhe ai i njësisë administrative të Gjinarit.

Në fjalën e tij, kryebashkiaku Gledian Llatja theksoi rëndësinë që ka zona e Shpatit për zhvillimin ekonomik dhe turistik të Elbasanit:

“Ne jemi mbledhur këtu për të diskutuar dhe për të marrë vendime për të ardhmen. 

Zona e Shpatit meriton shumë sepse është një zonë me traditë, me kulturë, një zonë e cila ka një potencial ekonomik, por edhe njerëzor. 

Kërkesa kryesore dikur këtu në Gjinar ishte qendra, sheshi kryesor ku edhe jemi sot, pasi i jep potencial të gjithë zones, jo vetëm Gjinarit, por edhe Lleshanit, Shelcanit, fshatrave të tjerë dhe Bukanikut, që është një nga malet tona më të bukura dhe krenaria e zonës sonë të Elbasanit.”

Llatja shtoi se investimet në Gjinar kanë qenë të shumta dhe me ndikim të drejtpërdrejtë në zhvillimin e zonës:

“Kemi bërë shumë investime në Gjinar, sistemime rrugësh, lidhje të energjisë elektrike, ujësjellësin, si edhe sheshin që ka qenë një investim i madh. 

Ne kemi investuar në Gjinar sepse duam ta bëjmë atë një destinacion turistik dhe të krenohemi të gjithë me bukurinë, traditën, kulinarinë dhe mikpritjen që e karakterizon,”, u shpreh Llatja.

Ai nënvizoi gjithashtu se përveç investimeve të realizuara, Bashkia Elbasan po punon për projekte të reja që do të lehtësojnë qarkullimin dhe do të shtojnë mundësitë për zhvillim turistik.

“Do të vazhdojmë të bëjmë edhe më shumë. Kemi projekte për Gjinarin, po ecim drejt konkretizimit të një rruge të re nga Shushica për të ardhur në Lleshan nga pjesa e mbrapme, një projekt që kërkon investim, por që do të bëjë një rrugë më të shkurtër dhe do t’i japë Gjinarit një potencial të ri, pa lënë pas dore rrugën e vjetër dhe kërkesën tonë të vazhdueshme për mirëmbajtjen e saj,”, theksoi Llatja.

Deputetja Evis Kushi vuri theksin tek investimet e kryera dhe tek interesi në rritje që ka treguar vetë kryetari i bashkisë për këtë zone.

“Zona e Gjinarit ka pasur një vëmendje të veçantë nga Bashkia Elbasan dhe nga kryetari Llatja personalisht. Por ne do të vazhdojmë të bëjmë akoma edhe më shumë për ju.

Buxhetimi me pjesëmarrje është një mundësi shumë e mirë që jo vetëm banorët të japin mendimet e tyre, por të jenë edhe pjesë e vendimmarrjes për investimet në zonën e tyre,”, u shpreh Kushi.

Gjatë këtij viti, paketa e maleve ka përfshirë edhe Gjinarin, si një zonë me potencial të madh turistik, ku janë kryer një sërë investimesh si hapja e muzeut, info point-it, etj. Kjo paketë ka si qëllim zhvillimin e turizmit dhe ekonomisë lokale.

Në përfundim të takimit, banorët shprehën kërkesat e tyre dhe u votua për prioritetet e investimeve, të cilat do të kalojnë më pas në buxhetin e vitit 2026, ku zërat e tyre dhe këto prioritete do të vihen në zbatim nga Bashkia Elbasan.

Në Bashkinë e Elbasanit u zhvillua një takim mes përfaqësuesve të Bashkisë dhe GIZ Albania, në kuadër të bashkëpunimit për përmirësimin e sistemit të transportit publik në qytet.

Kryetari i Bashkisë Elbasan, Gledian Llatja, theksoi rëndësinë e këtij partneriteti, duke u shprehur se,“bashkëpunimi me GIZ Albania është një mundësi e jashtëzakonshme për të përshpejtuar transformimin e Elbasanit në një qytet më të mençur, më të gjelbër dhe më të aksesueshëm për të gjithë qytetarët. Transporti publik është një nga shtyllat kryesore për zhvillimin urban të qëndrueshëm dhe jemi të përkushtuar të ofrojmë shërbime sa më cilësore për komunitetin.”

Ky projekt i përbashkët synon të bëjë transportin publik në Elbasan më efikas, të besueshëm dhe të orientuar drejt nevojave të qytetarëve.

Bashkia Elbasan dhe GIZ Albania janë të angazhuar për të zgjeruar më tej fushat e bashkëpunimit, duke përfshirë mobilitetin e gjelbër, dixhitalizimin e shërbimeve, planifikimin urban dhe menaxhimin e qëndrueshëm të qytetit.

Në njësinë administrative Papërr, në fshatin Papërr-Sollak, kanë nisur punimet për ndërtimin e urës mbi përruan që ndan fshatin, një investim i shumëpritur nga banorët prej vitesh.

Kjo urë konsiderohet një infrastrukturë jetike për lëvizjen e banorëve, veçanërisht të fëmijëve dhe nxënësve që përballeshin çdo ditë me vështirësi gjatë kalimit të përroit, sidomos në periudhën e reshjeve, kur niveli i ujit rritej dhe qarkullimi bëhej i rrezikshëm.

Punimet po vijojnë me ritme të kënaqshme dhe pritet që shumë shpejt ura e re të vihet në shërbim të komunitetit, duke i dhënë fund izolimit dhe duke përmirësuar ndjeshëm sigurinë e lëvizjes.

Ky investim është në përputhje me angazhimin e Bashkisë Elbasan për të përmirësuar jetën e qytetarëve edhe në zonat rurale, duke realizuar një nga kërkesat më të hershme të banorëve të Papërr-Sollakut.

Kryetari i Bashkisë Elbasan, Gledian Llatja, në nisjen e punimeve, theksoi se “ky investim është pjesë e përpjekjeve tona për të sjellë zhvillim dhe siguri për çdo komunitet të Bashkisë Elbasan. Ura e Papërr-Sollakut është një premtim që po e bëjmë realitet, duke i dhënë fund një problemi të përhershëm të banorëve dhe duke përmirësuar ndjeshëm lëvizjen e tyre të përditshme. Çdo investim në infrastrukturë rurale është një hap drejt barazisë dhe shërbimeve më cilësore për të gjithë.”

Agjencia e Shërbimeve Publike e Bashkisë Elbasan vijon në mënyrë të rregullt punën për mirëmbajtjen dhe pastrimin e territorit, si pjesë e përditshme e angazhimit për një qytet më të pastër dhe më të sistemuar.

Gjatë ditës së sotme, punonjësit e shërbimeve publike janë përqendruar në pastrimin e akseve nacionale që lidhin qytetin e Elbasanit me zonat përreth, si edhe në rrugët rurale dhe kanalet vaditëse. Këto ndërhyrje kryhen periodikisht, me qëllim ruajtjen e pastërtisë dhe funksionalitetit të infrastrukturës, duke përmirësuar ndjeshëm pamjen e qytetit dhe kushte më të mira për banorët.

Bashkia Elbasan bën apel për bashkëpunim nga të gjithë qytetarët, që të respektojnë hapësirat publike dhe të kontribuojnë për një mjedis të pastër, duke hedhur mbetjet vetëm në vendet e përcaktuara.

Elbasani është shtëpia jonë e përbashkët — ta mbajmë të pastër për sot dhe për brezat që do të vijnë.

Lagjja “28 Nëntori” përfiton nga investimi i ri

Në kuadër të programit për efiçencën e energjisë dhe përmirësimin estetik të hapësirave urbane, ka nisur puna për rikonstruksionin e fasadave në bllokun e pallateve të lagjes “28 Nëntori” në Elbasan.

Ky investim po realizohet falë bashkëpunimit mes Bashkisë Elbasan dhe Fondit Shqiptar të Zhvillimit (FSHZH), si pjesë e programit kombëtar për rehabilitimin e fasadave me sistem kapotë.

Kryetari i Bashkisë Elbasan, z. Gledian Llatja, gjatë inspektimit të punimeve theksoi rëndësinë e këtij investimi për cilësinë e jetës së banorëve dhe për transformimin urban të qytetit.

 “Angazhimi ynë është i qartë, të gjithë pallatet e qytetit do të kalojnë në sistemin kapotë, për të garantuar kursim të energjisë, izolim termik dhe akustik më të mirë, si dhe një pamje moderne e unifikuar për çdo lagje të Elbasanit.”

Sistemi kapotë, përveç përfitimeve estetike, ndihmon në uljen deri në 30% të konsumit të energjisë elektrike, duke ndikuar drejtpërdrejt në kursimet familjare dhe në mbrojtjen e mjedisit.

Ky është një tjetër hap konkret në zbatimin e politikave të qëndrueshme të Bashkisë Elbasan, që synojnë jo vetëm përmirësimin e infrastrukturës së banesave, por edhe krijimin e një qyteti më të gjelbër, më të kursyer dhe më të bukur për të gjithë banorët.

Në ambientet e Bashkisë Elbasan u zhvillua një takim i Forumit të Qeverisjes së Hapur (OGP Local) me Sekretariatin e Këshillit Bashkiak, i fokusuar në proceset e konsultimit publik për buxhetin dhe paketën fiskale 2026.

Ky takim vjen në kuadër të angazhimit të Bashkisë Elbasan për të ndërtuar një qeverisje më transparente, bashkëpunuese dhe të orientuar nga nevojat reale të komunitetit.

Në diskutim morën pjesë përfaqësues të organizatave partnere “Faktoje” dhe “Tjetër Vizion”, të cilët prezantuan gjetjet e monitorimeve shumëvjeçare mbi zbatimin e praktikave të konsultimit publik në nivel vendor. Nw kwtw takimu diskutuan  një sërë rekomandimesh për forcimin e pjesëmarrjes qytetare, rritjen e besimit në institucionet vendore dhe përmirësimin e procedurave të konsultimit në hartimin e dokumenteve buxhetore dhe fiskale.

Në fjalën e tyre, përfaqësuesit e Bashkisë theksuan rëndësinë e një procesi të hapur dhe gjithëpërfshirës, ku çdo grup interesi nga bizneset e vogla te të rinjtë, gratë, fermerët dhe shoqëria civile – të ketë mundësinë të japë mendimin e vet për prioritetet e zhvillimit të qytetit.  “Qeverisja me pjesëmarrje është thelbësore për ndërtimin e politikave të drejta dhe efektive. Synimi ynë është që zëri i qytetarëve të jetë pjesë e çdo vendimmarrjeje, duke orientuar investimet aty ku komuniteti ka më shumë nevojë,” u theksua gjatë takimit.

Ky aktivitet është pjesë e zbatimit të planit të veprimit të Forumit të Qeverisjes së Hapur në nivel lokal, një nismë ndërkombëtare që promovon transparencën, llogaridhënien dhe përfshirjen e qytetarëve në proceset vendimmarrëse.

Në vijim, Bashkia Elbasan do të vijojë me një seri takimesh dhe dëgjesash publike në njësitë administrative, për të mbledhur propozime konkrete që do të reflektohen në buxhetin dhe paketën fiskale të vitit 2026.

Në Ditën Ndërkombëtare për Reduktimin e Riskut nga Fatkeqësitë, në kuadër të fushatës “Mbrojtja Civile në Turne 2025”, së bashku me UNDP Albania dhe Bashkinë e Elbasanit zhvilluam aktivitetin ndërgjegjësues për rëndësinë e parandalimit, përgatitjes dhe reagimit të koordinuar ndaj rreziqeve natyrore dhe emergjencave.

Në aktivitet morën pjesë Drejtori i Përgjithshëm i AKMC-së, z. Haki Çako, Kryetari i Bashkisë Elbasan, z. Gledian Llatja, si dhe përfaqësues nga Prefektura e Qarkut Elbasan dhe institucione të tjera vendore.

Gjatë aktivitetit, u informuan dhe ndërgjegjësuan qytetarët mbi mënyrat e mbrojtjes, veprimet që duhen ndërmarrë në situata emergjente dhe rëndësinë e bashkëpunimit për ndërtimin e komuniteteve më të sigurta dhe më të qëndrueshme. Gjithashtu, qytetarët u njohën me pajisje të emergjencës, materiale ndërgjegjësuese, udhëzues praktikë dhe aktivitete ndërvepruese mbi mënyrat e reagimit në situata të rrezikut.

Më pas, u zhvillua një ndalesë në shkollën e mesme “Kostandin Kristoforidhi”, ku u organizua një simulim i një emergjence nga zjarri. Nxënësit, nën drejtimin e mësuesve dhe ekipeve të zjarrfikësve, shërbimit të urgjencës mjekësore dhe vullnetarëve të Kryqit të Kuq Shqiptar, demonstruan mënyrat e evakuimit dhe reagimit në raste emergjente, duke treguar rëndësinë e njohjes së procedurave të mbrojtjes dhe vetëndihmës.

Fushata “Mbrojtja Civile në Turne 2025” zbatohet nga Agjencia Kombëtare e Mbrojtjes Civile (AKMC), me mbështetjen e UNDP në Shqipëri, në kuadër të projektit “RESEAL – Forcimi i Qëndrueshmërisë dhe Reagimit ndaj Emergjencave në Shqipëri”, të financuar nga Qeveria Suedeze (Sida), Qeveria Zviceriane  (SECO) dhe bashkëfinancuar nga Qeveria e Portugalisë dhe Qeveria Shqiptare

Pas 12 vitesh në emigrim, Eduart Dervishi është rikthyer në vendlindjen e tij, në Funar, për t’u marrë me bujqësi. Në parcelën e tij me mbi 1 mijë rrënjë mollë, ai prodhon çdo vit 500–600 kv mollë cilësore të disa varieteteve, përfshirë edhe mollën dietike.

Kryetari i Bashkisë Elbasan, Gledian Llatja, vizitoi nga afër këtë parcelë model në Funar, duke theksuar rëndësinë e mbështetjes për fermerët e zonave malore dhe të gjithë atyre që rikthehen për të investuar në vendlindje.

“Infrastruktura e kanaleve kulluese dhe vaditëse mbetet një nga prioritetet tona kryesore në zonat rurale. Çdo vit po vërejmë një rritje të sipërfaqeve të mbjella dhe gjithnjë e më shumë të rinj po zgjedhin të kthehen në fshat për të ndërtuar të ardhmen këtu,”  u shpreh Llatja.

Funari nuk njihet vetëm për natyrën e tij mahnitëse, liqenet dhe ajrin e pastër, por gjithnjë e më shumë po spikat edhe për prodhimet e tij bio. Sa më lart në mal, aq më të pastra e natyrale janë frutat dhe perimet që prodhohen këtu — një pasuri që po kthehet në identitetin e zonës.

Funari po dëshmon se zhvillimi rural dhe kthimi i të rinjve në bujqësi janë rrugë të sigurta drejt një ekonomie të qëndrueshme dhe të shëndetshme për komunitetet lokale.

Sporti elbasanas ngjitet sërish në majë!
Ekipi i Elbasanit është shpallur Kampion Kombëtar  Ekipor U- 19 vjecar dhe të Rritur 2025 në ping pong, duke konfirmuar traditën dhe nivelin e lartë të këtij sporti në qytetin e Elbasanit.
Në të njëjtin kampionat, ekipi i femrave arriti një rezultat të shkëlqyer, duke u renditur në vendin e dytë në nivel kombëtar.

Ky sukses vjen si rezultat i përkushtimit të sportistëve, trajnerëve dhe stafit teknik, të cilët me  disiplinë kanë përfaqësuar me dinjitet Bashkinë Elbasandhe Klubin Sportiv Elbasani në arenën kombëtare.

Ping pongu ka vite që zhvillohet me pasion në Elbasan dhe rezultatet flasin vetë.

Kampionati Kombëtar i Ping Pongut për të Rritur 2025 u zhvillua me pjesëmarrjen e ekipeve më të mira nga e gjithë Shqipëria, ku përmes ndeshjeve të forta dhe garës së ndershme, Elbasani u ngjit në vendin e parë, duke fituar titullin më të lartë ekipor të këtij viti.

Elbasani vazhdon të mbetet një qendër e rëndësishme e zhvillimit sportiv në vend, duke dhënë shembuj frymëzues për brezat e rinj.

Ashtu si çdo fundviti, Bashkia e Elbasanit në datën 15 tetor do të nisë takimet me komunitetin në çdo njësi administrative në kuadër të procesit të “Buxhetimit me Pjesëmarrje”, një praktikë tashmë e konsoliduar që prej më shumë se një dekade.

Ky proces, i njohur si një nga format më demokratike të përfshirjes së qytetarëve në vendimmarrje, synon të sigurojë që çdo zë të dëgjohet dhe çdo kërkesë e komunitetit të reflektohet në buxhetin e bashkisë për vitin e ardhshëm.

Prej më shumë se dhjetë vitesh, Elbasani është bashkia e parë në Shqipëri që ka zbatuar me sukses këtë model të pjesëmarrjes qytetare. Nëpërmjet “Buxhetimit me Pjesëmarrje”, banorët e çdo njësie diskutojnë hapur për problemet dhe nevojat e zonës së tyre, nga infrastruktura rrugore e ndriçimi publik, te ujësjellësi, kanalizimet, arsimi dhe hapësirat e gjelbra, ndërsa në fund votojnë për prioritetet që duan të përfshihen në buxhetin e vitit pasardhës.

Ky proces nuk është thjesht konsultativ, por një formë konkrete e vendimmarrjes së përbashkët midis qytetarëve dhe pushtetit vendor. Administrata e bashkisë merr në shënim të gjitha propozimet, edhe ato që nuk janë drejtpërdrejt në kompetencën e saj, për t’i përcjellë më pas institucioneve përkatëse.

Në vitet e fundit, modeli është zgjeruar edhe në fusha të tjera, përfshirë sportin dhe buxhetimin gjinor, ku i jepet prioritet përfshirjes së grave dhe vajzave në vendimmarrje.

Falë këtij mekanizmi, shumë prej kërkesave të banorëve janë kthyer në investime konkrete, që variojnë nga përmirësimi i rrugëve dhe ndriçimit publik, deri te ndërtimi i këndeve të lojërave dhe rehabilitimi i ambienteve publike.

Pjesëmarrja e qytetarëve në këto takime është rritur çdo vit, duke dëshmuar për efektshmërinë dhe besimin që ky proces ka krijuar në komunitet.

Suksesi i Elbasanit në zbatimin e këtij modeli ka shërbyer si shembull frymëzues për shumë bashki të tjera në vend, të cilat e kanë adoptuar si një praktikë të mirë të qeverisjes vendore. Kjo e ka bërë Bashkinë e Elbasanit të cilësohet shpesh si një bashki model, për mënyrën transparente dhe gjithëpërfshirëse me të cilën menaxhon procesin e buxhetimit.

Në thelb, “Buxhetimi me Pjesëmarrje” mbetet një mekanizëm që forcon lidhjen mes qytetarëve dhe institucioneve, duke e bërë vendimmarrjen më të ndershme, më transparente dhe më pranë nevojave reale të komunitetit.

Falë këtij procesi, zëri i qytetarit kthehet në investime konkrete, dhe Bashkia e Elbasanit vijon të mbetet një nga shembujt më të qëndrueshëm të demokracisë pjesëmarrëse në nivel vendor.