Muaj: Korrik 2026

Dizinformimi online dhe dhuna digjitale, si dy nga sfidat më të mëdha që prekin sigurinë publike dhe të rinjtë, ishin në fokus të mbledhjes së radhës së Këshillit Vendor të Sigurisë Publike, të zhvilluar në Bashkinë Elbasan.

Në takim morën pjesë Kryetari i Bashkisë Elbasan, Gledian Llatja, Zëvendësministrja e Punëve të Brendshme, Anisa Ruseti, Prefekti i Qarkut Elbasan, Ilir Bejtja, Drejtori i Drejtorisë Vendore të Policisë Elbasan, Fatmir Hoxha, Drejtuesi i Prokurorisë pranë Gjykatës së Shkallës së Parë të Juridiksionit të Përgjithshëm Elbasan, Kreshnik Ajazi, përfaqësues të institucioneve vendore, sistemit arsimor, organizatave të shoqërisë civile dhe mediave.

Në fjalën e tij, Kryetari i Bashkisë Elbasan, Gledian Llatja, u shpreh se sot po trajtohet një sfidë që prek drejtpërdrejt sigurinë, demokracinë dhe besimin e qytetarëve. Ai theksoi se dizinformimi në rrjetet sociale nuk luftohet vetëm me teknologji, por duke fituar besimin e qytetarëve, duke forcuar bashkëpunimin mes institucioneve dhe duke investuar tek të rinjtë.

Llatja nënvizoi se Këshilli Vendor i Sigurisë Publike në Elbasan i ka kushtuar një vëmendje të veçantë përfshirjes së të rinjve në çështjet e sigurisë publike, ndërsa trajnimet dhe aktivitetet e zhvilluara gjatë këtij viti kanë dëshmuar rëndësinë e krijimit të hapësirave ku të rinjtë informohen, diskutojnë dhe kontribuojnë në ndërtimin e një kulture qytetare të përgjegjshme. Sipas tij, përgjegjësia e përbashkët mbetet ndërtimi i një komuniteti më të informuar dhe më kritik ndaj dezinformimit dhe lajmeve të rreme.

Zëvendësministrja e Punëve të Brendshme, Anisa Ruseti, e vlerësoi Këshillin Vendor të Sigurisë Publike të Elbasanit si një nga më të suksesshmit ndër 61 bashkitë e vendit, falë bashkëpunimit të ngushtë mes institucioneve. Ajo theksoi se ky bashkëpunim ka bërë të mundur parandalimin e një sërë rastesh dhe ndikimesh që mund të cenonin sigurinë e komunitetit. Ruseti shtoi se Bashkia Elbasan përbën një model bashkëpunimi, i cili do të shërbejë si shembull edhe për bashki të tjera, ndërsa Ministria e Punëve të Brendshme është duke hartuar Strategjinë e re të Sigurisë Publike.

Gjatë mbledhjes u diskutuan gjithashtu masat e Paketës së Sigurisë në Shkolla për vitin shkollor 2026–2027, si dhe u prezantua aplikacioni “Raporto Tani”, i cili synon të lehtësojë raportimin e rasteve problematike dhe të forcojë ndërhyrjen e hershme për mbrojtjen e fëmijëve dhe të rinjve.

Në përfundim të mbledhjes u ritheksua angazhimi për forcimin e bashkëpunimit ndërinstitucional dhe zbatimin e rekomandimeve të dala nga diskutimet. Bashkia Elbasan, përmes Këshillit Vendor të Sigurisë Publike, vijon prej vitesh të organizojë takime periodike mbi tema që lidhen me sigurinë publike, mbrojtjen e të rinjve, parandalimin e fenomeneve sociale dhe forcimin e bashkëpunimit mes institucioneve.

Këto tryeza kanë shndërruar Këshillin Vendor të Sigurisë Publike të Elbasanit në një model suksesi në nivel kombëtar, duke dhënë një kontribut të rëndësishëm në ndërtimin e një komuniteti më të sigurt, më të informuar dhe më të përgjegjshëm.

Bashkia Elbasan është përzgjedhur si bashkia shqiptare që do të luajë një rol kyç në iniciativën ndërkufitare AI4Society, duke kontribuar në identifikimin e sfidave dhe nevojave lokale që mund të adresohen përmes zgjidhjeve dixhitale dhe Inteligjencës Artificiale.

Në ambientet e Bashkisë Elbasan u zhvillua takimi i parë për vlerësimin e nevojave, organizuar në bashkëpunim me Build Green Group, ku u prezantua iniciativa dhe u diskutua mbi prioritetet strategjike të Bashkisë, sfidat aktuale dhe mundësitë për përdorimin e teknologjisë dhe Inteligjencës Artificiale në përmirësimin e shërbimeve publike dhe vendimmarrjes së bazuar në të dhëna.

Në fokus të diskutimeve ishte identifikimi i nevojave konkrete të Bashkisë, të cilat në fazat e mëtejshme të projektit do të shërbejnë si bazë për zhvillimin e zgjidhjeve dhe prototipeve inovative të bazuara në AI.

Përmes një hackathon-i ndërkufitar, programit të mentorimit dhe validimit nga ekspertë, të rinjtë inovatorë dhe ekspertët do të punojnë mbi sfidat e identifikuara, me synimin për t’i kthyer ato në zgjidhje praktike që i përgjigjen nevojave të administratës dhe qytetarëve.

AI4Society krijon një mundësi të re për Bashkinë Elbasan për të lidhur nevojat lokale me inovacionin, teknologjinë dhe potencialin e të rinjve, duke kontribuar në zhvillimin e shërbimeve publike më inteligjente, efikase dhe të orientuara drejt qytetarit.

Iniciativa AI4Society zbatohet nga Build Green Group, në partneritet me NALED dhe Reputeo, me mbështetjen e Open Society Foundations – Western Balkans.

Kryetari i Bashkisë Elbasan, Gledian Llatja, së bashku me Koordinatorin e ri të Programit TİKA për Shqipërinë, z. Murat Ölçenoğlu, panë nga afër disa prej monumenteve më të rëndësishme të trashëgimisë kulturore të qytetit.

Gjatë vizitës, ata u ndalën në Bazilikën e Bezistanit, një nga dëshmitë më të hershme të historisë së Elbasanit, në Kalanë e Elbasanit, simbol i identitetit dhe historisë shumë shekullore të qytetit, si edhe në Xhaminë Mbret, e cila së fundmi është restauruar falë bashkëpunimit mes Bashkisë Elbasan dhe TİKA-s.

E ndërtuar në vitin 1464, Xhamia Mbret është një nga monumentet më të rëndësishme të trashëgimisë kulturore dhe fetare të Elbasanit. Restaurimi i saj ka rikthyer në vlerë një pasuri të çmuar historike, duke kontribuar edhe në pasurimin e ofertës turistike të qytetit.

Gjatë vizitës u vlerësua bashkëpunimi i deritanishëm mes Bashkisë Elbasan dhe TİKA-s në restaurimin dhe ruajtjen e monumenteve të trashëgimisë kulturore, ndërsa u theksua se ky partneritet do të vijojë edhe në të ardhmen me projekte të reja në shërbim të mbrojtjes dhe promovimit të vlerave historike e kulturore të Elbasanit.

Prodhimi bujqësor në Bashkinë e Elbasanit po njeh rritje nga viti në vit, ndërsa organizimi i fermerëve në Shoqëri të Bashkuara Bujqësore mbetet një nga prioritetet kryesore për zhvillimin e mëtejshëm të sektorit. Ky ishte edhe mesazhi i përcjellë nga kryetari i Bashkisë Elbasan, Gledian Llatja, gjatë vizitës në Shushicë, ku së bashku me deputeten Evis Kushi u takua me fermerët dhe pa nga afër parcelat me pjeshkë.
“Nga viti në vit prodhimi vjen në rritje. Prandaj prej kohësh po punojmë për të bashkuar fermerët, si ata që kanë serat në fushën e Elbasanit, ashtu edhe fermerët e pemëtarisë në zonat tona kodrinore, siç është Shushica. Qëllimi ynë është krijimi i Shoqërive të Bashkuara Bujqësore, të cilat do t’u japin fermerëve më shumë mundësi për të zhvilluar aktivitetin e tyre dhe për të qenë më të fortë në treg”, u shpreh Llatja.
Kryebashkiaku bëri të ditur se një tjetër hap i rëndësishëm në këtë drejtim është edhe vendimi i fundit i Këshillit të Ministrave, përmes të cilit kaloi në pronësi toka bujqësore në Thanë, ku do të ndërtohen kapanone bujqësore dhe pika frigoriferike në shërbim të fermerëve të organizuar në Shoqëritë e Bashkuara Bujqësore.
“Këto janë mbështetje konkrete për fermerët tanë. Çmimet janë të paqëndrueshme, sidomos në sezonet kur ka mbiprodhim të produkteve bujqësore dhe të pemëtarisë. Me ndërtimin e pikave frigoriferike fermerët do të kenë mundësi t’i ruajnë produktet dhe t’i nxjerrin në treg në momentin kur çmimi është më i favorshëm. Pikërisht këtë synojmë, t’u krijojmë ambiente të përbashkëta për grumbullimin dhe ruajtjen e prodhimeve, duke ecur në këtë rrugë së bashku me fermerët”, tha Llatja.
Deputetja Evis Kushi vlerësoi punën e fermerëve të Shushicës dhe të gjithë zonës së Shpatit, duke theksuar se investimet në bujqësi dhe infrastrukturë po japin rezultate konkrete.
“Fermerët e Shushicës dhe të zonës së Shpatit janë njerëz punëtorë dhe investimet që bëjnë janë investime të zgjuara. Edhe ne po japim kontributin tonë me investime që u shërbejnë drejtpërdrejt fermerëve. Pak kohë më parë përuruam një kanal vaditës dhe tashmë janë tre kanale vaditëse që ndihmojnë bujqësinë në këtë zonë, ndërsa edhe investimet në infrastrukturën rrugore ua kanë lehtësuar punën fermerëve”, u shpreh Kushi.
Vizita në Shushicë u fokusua te mbështetja që po u jepet fermerëve përmes krijimit të Shoqërive të Bashkuara Bujqësore, investimeve në infrastrukturën vaditëse dhe ndërtimit të kapaciteteve për grumbullimin e ruajtjen e prodhimeve, me synimin për të rritur vlerën e prodhimit vendas dhe të ardhurat e fermerëve.

Këshilli Bashkiak i Elbasanit, në mbledhjen e radhës, miratoi ngritjen e një stacioni të ri të Shërbimit të Mbrojtjes nga Zjarri dhe Shpëtimit në Njësinë Administrative Bradashesh, pranë godinës së njësisë administrative, si edhe shtimin me 10 punonjës operacionalë në organikën e Drejtorisë së Shërbimit të Mbrojtjes nga Zjarri dhe Shpëtimit.

Ky investim vjen si përgjigje ndaj rritjes së numrit dhe kompleksitetit të emergjencave, si zjarret, aksidentet rrugore, përmbytjet dhe incidentet industriale, duke synuar forcimin e kapaciteteve operacionale dhe uljen e kohës së reagimit në të gjithë territorin e bashkisë.

Stacioni i ri do të pajiset me automjete zjarrfikëse, pajisje moderne dhe infrastrukturën e nevojshme për funksionimin e tij. Vendndodhja në Bradashesh është përzgjedhur për shkak të pozicionit strategjik, pasi mundëson ndërhyrje më të shpejtë në aksin rrugor Elbasan–Tiranë, në zonat industriale, si edhe në njësitë administrative Bradashesh, Gracen dhe Papër, ku gjatë sezonit veror shtohet rreziku i zjarreve në sipërfaqet pyjore dhe bujqësore.

Vendimi synon gjithashtu të rrisë nivelin e sigurisë për zonën industriale të Elbasanit, ku janë të përqendruara aktivitete prodhuese dhe biznese me potencial të lartë rreziku. Me ngritjen e stacionit të ri pritet të përmirësohet mbrojtja e jetës, pronës, mjedisit dhe investimeve, duke garantuar një reagim më të shpejtë dhe më efikas në çdo situatë emergjente.

Aktualisht, Shërbimi i Mbrojtjes nga Zjarri dhe Shpëtimit në Bashkinë Elbasan funksionon me një stacion zjarrfikës, i cili disponon 6 automjete zjarrfikëse me pompë centrifugale, një autoshkallë dhe një autobot uji me kapacitet 14 ton, si edhe një personel prej 42 punonjësish.

Me zgjerimin e territorit, rritjen e numrit të emergjencave, zhvillimin industrial dhe shtimin e rrezikut nga zjarret gjatë sezonit veror, ngritja e një stacioni të dytë në Bradashesh synon të rrisë kapacitetet operacionale, të ulë kohën e reagimit dhe të garantojë një mbulim më të mirë të territorit të Bashkisë Elbasan, veçanërisht në zonat perëndimore dhe përgjatë aksit Elbasan–Tiranë.

Pas takimit të parë me fermerët për krijimin e Shoqatës së Bashkëpunimit Bujqësor, procesi ka vijuar me blegtorët e njësive administrative të Bashkisë Elbasan.

Takimi me blegtorët, kishte në fokus krijimin e një strukture të përbashkët bashkëpunimi për grumbullimin, përpunimin dhe zhvillimin e produkteve të bulmetit, e cila do të mbajë emrin “Bulmeti i Elbasanit”.

Nënkryetari i Bashkisë Elbasan, Asim Sula, prezantoi rëndësinë e krijimit të kësaj shoqërie dhe i njohu blegtorët me statutin, aktin e themelimit dhe organet drejtuese, duke theksuar se bashkimi i tyre në një strukturë të përbashkët do të krijojë mundësi të reja për zhvillimin e sektorit, rritjen e vlerës së produkteve vendase dhe fuqizimin e tyre në treg.

Shoqata e Bashkëpunimit Bujqësor “Bulmeti i Elbasanit” synon të krijojë një model të ri bashkëpunimi mes blegtorëve, duke mundësuar grumbullimin e organizuar të qumështit, prodhimin e produkteve të certifikuara të bulmetit dhe promovimin e një marke lokale me standarde të larta cilësie.

Kjo nismë mbështetet nga Bashkia Elbasan, e cila po punon për fuqizimin e fermerëve dhe blegtorëve, duke krijuar kushte më të mira për zhvillimin e ekonomisë rurale dhe përgatitjen e prodhimit vendas për t’u orientuar drejt standardeve dhe mundësive të reja që ofron integrimi europian.