Njoftime

Bashkia Elbasan po vendos në funksion sistemin e ri të parkimit publik me pagesë dhe po ofron bashkëpunim për subjekte tregtare lokale për të qenë pjesë e këtij shërbimi.
Kjo është një mundësi për subjektet tregtare të tipologjisë tabakino, dyqanet e shërbimeve (telefonie, pagesash, interneti, e-albania), të cilët dëshirojnë të ofrojnë një shërbim shtesë për qytetarët.
Subjekti juaj do të veprojë si agjent tatimor për:
-Arkëtimin e tarifës së parkimit.
-Rimbushjen me kredite të aplikacionit të parkimit për qytetarët.

Të interesuarit duhet të plotësojnë këto kritere:

1. Të jenë të pajisur me NIPT aktiv dhe të regjistruar për aktivitet tregtar.
2. Subjektet duhet të ushrojnë aktivitet në ose pranë zonës së parkimit të përcaktuar nga Bashkia Elbasan.
3. Të disponojnë pajisje elektronike (kompjuter, tablet, POS, etj.), për kryerjen e rimbushjeve me kredite në aplikacionin ELBA-PARKING.
   Për të formalizuar interesin, çdo subjekt i interesuar duhet të paraqitet pranë zyrave të informacionit të Bashkisë Elbasan (kati i parë) dhe të dorëzojë një kërkesë me shkrim.
   Bashkangjitur formati i akt marrëveshjes “Mbi arkëtimin e tarifës së parkimit publik me pagesë”.

Plani Social 2024–2027 i Bashkisë Elbasan është duke u rishikuar për t’iu përgjigjur më mirë nevojave aktuale demografike, sfidave sociale dhe vecanërisht gjithëpërfshirjes, duke sjellë përditësime në bazë të gjetjeve të vitit të mëparshëm dhe situatave të identifikuara në nivel vendor duke pasur në fokus dhe përfshirjen e komuniteteve vulnerabël, veçanërisht pakicave rome dhe egjiptiane.

Nisur nga fakti që ky plan aktual 2024-2027 nuk kishte të përfshirë masa që mundësojnë integrimin e pakicave rome e egjiptiane si pasojë e ekzistencës së Planit Vendor për Integrimin e Pakicave Rome dhe Egjiptiane 2019–2022 (miratuar me vendimin e Këshillit Bashkiak nr. 43, më 30 prill 2020), u pa e nevojshme përfshirja e masave për integrimin e këtyre pakicave në Planin e Veprimit të Mbrojtjes Sociale 2025-2028.

Rishikimi i Planit Social 2024–2027 synon të jetë më gjithëpërfshirës dhe efektiv, duke garantuar që përfaqësues të këtyre komuniteteve të përfshihen në proceset vendimmarrëse dhe zbatimin e politikave sociale, me qëllim rritjen e integrimit dhe barazisë në shoqëri. Në fokus do të jetë përmbushja e indikatorëve dhe aktiviteteve të parashikuara e të ndara në gjashtë fushat prioritare si; regjistrimi civil, arsimi, punësimi, mbrojtja dhe kujdesi social, strehimi dhe shëndetësia, bazuar në Planin Kombëtar të Veprimit për Barazi, Përfshirje dhe Pjesëmarrje të Romëve dhe Egjiptianëve 2021-2025

Deri tani janë organizuar konsultime,me grupet e interesit respektivisht:

–21 Korrik ora 10.00 -13.00 Workshopi i parë, me anëtarë të Grupit të Punës të ngritur me Urdhër të Kryetarit të Bashkisë

-25 Korrik ora 10.00 – 13.00 Workshopi i dytë me praninë dhe në konsultim me partnerët dhe bashkëpunëtorët e Bashkisë

–30 Korrik ora 10.00 – 13.30 Workshpi i tretë, ku u finalizuan diskutimet mbi shtojcën për pakicat rome e egjiptiane dhe aktivitetet e propozuara.

Dokumenti PLANI VENDOR I VEPRIMIT PËR MBROJTJEN SOCIALE 2025-2028 I BASHKISË ELBASAN, SHTOJCA PËR PAKICAT ROME E EGJIPTIANE do të qëndrojë i hapur për komente dhe konsultim publik deri në datën  27/08/2025.

Presim Rekomandimet dhe Sugjerimet tuaja në adresën: lindita.senia@elbasani.gov.al

Takimi për diskutimin e rekomandimeve nga konsultimi publik do të mbahet më 27/08/2025 ora 11.00 pranë Bashkisë Elbasan ,Salla Multifunksionale.