Nis shpërndarja e koshave për ndarjen e mbetjeve në burim në lagjen “Kala”
Vijon procesi i ndarjes së mbetjeve në burim në Bashkinë e Elbasanit. Në bashkëpunim me shoqërinë Alko Impex, nisi shpërndarja e koshave 80 kg për subjektet bar-kafe dhe restorante në lagjen Kala dhe zonat përreth, në kuadër të projektit pilot për menaxhimin e integruar të mbetjeve.
Pas përfundimit të kësaj zone, procesi pritet të shtrihet në të gjitha bizneset e qytetit, si pjesë e angazhimit për një menaxhim më efikas dhe më të qëndrueshëm të mbetjeve urbane.
Ky proces është pjesë e Planit Strategjik të Integrimit të Mbetjeve 2025–2030 dhe kontratës së shërbimit të pastrimit 2026–2030, me synimin për një qytet më të pastër, më të gjelbër dhe më të ndërgjegjshëm për mbrojtjen e mjedisit.
Shpërndarja e koshave do të vijojë edhe në shkollat e përfshira në projektin pilot të sistemit parauniversitar, ndërsa gjatë kësaj jave do të shpërndahen edhe qeset me ngjyra për ndarjen e mbetjeve në lagjen Kala.
Bashkia fton qytetarët dhe bizneset të bëhen pjesë aktive e këtij procesi, duke theksuar se një Elbasan më i pastër nis nga kontributi i secilit.
Featured Gallery
