Asfaltohet rruga e varrezave në Kusarth: Investim që u shërben tre fshatrave dhe rreth 600 familjeve

Një tjetër investim infrastrukturor, i cili konsiston në asfaltimin e rrugës së varrezave, në fshatin Kusarth. Kjo rrugë, e cila më parë ishte e vështirë për t’u frekuentuar, tashmë shtrihet me standarde bashkëkohore. Investimi i shërben jo vetëm banorëve të Kusarthit, por edhe lagjes Katundi i Ri dhe një pjese të fshatit Balzë e Poshtme, duke përfituar drejtpërdrejt rreth 600 familje të kësaj zone.

Kryetari i Bashkisë Elbasan, Gledian Llatja, u shpreh se “pas ndërtimit të urës në këtë zonë, banorët na shprehën një tjetër nevojë të domosdoshme, sistemimin dhe asfaltimin e rrugës së varrezave. Ne e realizuam këtë investim i cili nuk i shërben vetëm Kusarthit, Katundit të Ri por edhe një pjese të fshatit Balëz, pra janë tre fshatra me rreth 600 familjeve të kësaj zone që preken drejtëpërdrejtë nga ky investim”.

Ai theksoi gjithashtu se ky investim është bërë i mundur falë programit të Buxhetimit me Pjesëmarrje, një nismë e Bashkisë Elbasan ku vetë banorët shprehin kërkesat e tyre dhe institucionet lokale i kthejnë ato në investime konkrete.

“Falë mbështetjes së Qeverisë Shqiptare dhe Fondit Shqiptar të Zhvillimit, kemi nisur një sërë investimesh në të gjithë fshatrat e Elbasanit. Nuk do të ndalemi me kaq, sepse prioriteti ynë mbetet përmirësimi i infrastrukturës në çdo lagje dhe fshat, duke i dhënë vëmendjen e duhur çdo problematike që komuniteti sjell në vëmendjen tonë.”

Ky projekt është një tjetër hap i rëndësishëm në drejtim të zhvillimit të infrastrukturës rurale, duke garantuar kushte më të mira për të gjithë banorët e zonës.