Lajme

Në Bashkinë e Elbasanit u organizua takimi i radhës i grupit të punës për projektin “Krusheva dhe Elbasani — Udhëtim në Natyrë dhe Aventurë”, një nismë që synon zhvillimin e turizmit natyror dhe të aventurës në zonën e Elbasanit, në bashkëpunim me organizatën partnere TVO.

Takimi u drejtua nga Nënkryetari i Bashkisë Elbasan, Asim Sula, dhe mblodhi përfaqësues të drejtorive përkatëse të bashkisë dhe partnerëve të projektit. Gjatë takimit u vlerësua ecuria e deritanishme e zbatimit të projektit, si dhe u diskutuan hapat që do të ndërmerren në vijim për realizimin e aktiviteteve të planifikuara.

Në fokus të diskutimeve ishte organizimi i një trajnimi që do të zhvillohet më 11 dhe 12 qershor, ku do të marrin pjesë përfaqësues nga Bashkia Elbasan dhe bashkitë e qarkut, përfshirë Gramshin, Librazhdin, Cërrikun, Prrenjasin, Peqinin dhe Belshin.

Po ashtu, u shqyrtua mundësia që Festa e Funarit, e parashikuar për datat 25 ose 26 qershor, të shërbejë si një moment promovues i projektit, duke u lidhur me ceremoninë e hapjes së punimeve të Parkut dhe Parkimit, me qëllim forcimin e bashkëpunimit me komunitetin dhe partnerët lokalë.

Në përfundim të takimit, Nënkryetari Asim Sula vlerësoi angazhimin e të gjitha palëve të përfshira dhe theksoi rëndësinë e koordinimit të vazhdueshëm për përmbushjen me sukses të objektivave të projektit.

Në kuadër të Ditës Botërore të Mjedisit, kryetari i Bashkisë Elbasan, Gledian Llatja, nënshkroi marrëveshjen e bashkëpunimit me organizatën INCA, e cila synon reduktimin e ndotjes nga plastika, promovimin e ekonomisë qarkulluese dhe forcimin e edukimit mjedisor në komunitet.

Marrëveshja përfaqëson një hap të rëndësishëm në angazhimin e Bashkisë Elbasan për mbrojtjen e mjedisit, përmes zbatimit të nismave konkrete që synojnë ndërgjegjësimin e qytetarëve dhe përfshirjen e tyre në praktika të qëndrueshme mjedisore.

Pas nënshkrimit të marrëveshjes, u zhvillua ceremonia përmbyllëse e nismës së riciklimit të tapave plastike, e realizuar në bashkëpunim me Drejtorinë e Mjedisit, organizatën INCA, Zyrën Vendore të Arsimit dhe shkollat e qytetit. Për javë me radhë, qindra nxënës, mësues dhe prindër u angazhuan në mbledhjen e tapave plastike, duke e kthyer këtë nismë në një model të edukimit mjedisor dhe pjesëmarrjes qytetare.

Gjatë aktivitetit, nxënësit përcollën mesazhe sensibilizuese për mbrojtjen e mjedisit, prezantuan skeçe artistike dhe ndanë angazhimet e tyre për reduktimin e përdorimit të plastikës në jetën e përditshme.

Në përfundim, u vlerësuan shkollat pjesëmarrëse për kontributin e tyre, ndërsa shkollat “Jorgji Filo” dhe “Luigj Gurakuqi” u shpallën fituese të nismës, duke dëshmuar se bashkëpunimi dhe ndërgjegjësimi janë çelësi i suksesit në mbrojtjen e mjedisit.

Në fjalën e tij, kryetari i Bashkisë Elbasan vlerësoi angazhimin e nxënësve, mësuesve dhe familjeve, duke theksuar se edukimi mjedisor mbetet investimi më i rëndësishëm për të ardhmen dhe se çdo veprim i vogël në mbrojtje të natyrës sjell ndryshime të mëdha për komunitetin.

Bashkia mbetet e angazhuar në zbatimin e politikave të qëndrueshme mjedisore dhe përfshirjen e të rinjve në nisma që kontribuojnë në mbrojtjen e natyrës dhe reduktimin e ndotjes nga plastika.

Programi “Toka në Shkollë” po shtrihet në gjithnjë e më shumë institucione arsimore në Bashkinë Elbasan, duke u ofruar nxënësve mundësinë të mësojnë përmes praktikës dhe kontaktit të drejtpërdrejtë me natyrën.
Një prej shembujve të këtij programi është edhe shkolla e Kuqanit, ku serat didaktike janë kthyer në një hapësirë mësimore të veçantë. Përmes aktiviteteve praktike, nxënësit njihen me proceset e kultivimit, kujdesin për bimët dhe rëndësinë e mbrojtjes së mjedisit.
Në bashkëpunim me Ministrinë e Arsimit, Bashkia Elbasan po punon për zgjerimin e këtij programi në shkolla të tjera, me synimin për të krijuar ambiente ku fëmijët mësojnë duke vëzhguar, eksperimentuar dhe zhvilluar aftësi praktike që lidhen me natyrën dhe bujqësinë.
Programi “Toka në Shkollë” synon të forcojë edukimin mjedisor dhe të nxisë tek brezat e rinj dashurinë për tokën, punën dhe natyrën.

Në fshatin Shijon të Elbasanit u zhvillua sot pelegrinazhi tradicional për nder të Shën Joan Vladimirit, një nga ngjarjet më të rëndësishme fetare dhe kulturore në rajon, ku morën pjesë qindra besimtarë nga Shqipëria dhe vendet fqinje të Ballkanit.

Kanë përcjellë urimet në këtë festë nënkryetarja e Bashkisë së Elbasanit, Krasnika Klaudia, deputetet e PS Evis Kushi e Sara Mila, përfaqësues të pushtetit vendor, klerikë dhe pelegrinë të shumtë.

Gjatë ceremonisë fetare, Mitropoliti i Elbasanit, Hirësia e Tij Andon Andoni, u shpreh se kjo festë vazhdon të bashkojë besimtarë jo vetëm nga Shqipëria, por edhe nga Mali i Zi, Maqedonia e Veriut dhe vende të tjera të rajonit.

Pas meshës së shenjtë, ceremonia vijoi me faljen e besimtarëve pranë lipsanit të Shën Joan Vladimirit, ku pelegrinët u lutën dhe nderuan kujtimin e shenjtorit, duke kërkuar bekim, paqe dhe mbarësi për familjet e tyre.

Festa e Shën Joan Vladimirit, që përkujton martirizimin e shenjtorit në shekullin XI, bashkon çdo vit besimtarë nga Shqipëria, Maqedonia e Veriut, Mali i Zi, Bosnja dhe Serbia, duke e kthyer Manastirin e Shën Joan Vladimirit në një qendër të rëndësishme pelegrinazhi dhe harmonie ndërfetare.

Numri i pjesëmarrësve është rritur nga viti në vit, duke e bërë këtë festë gjithnjë e më të madhe dhe më të dashur për besimtarët.

Kjo traditë, që daton që nga vitet 1010–1020, i ka mbijetuar shekujve dhe vazhdon të ruhet me përkushtim nga banorët e Shijonit, të cilët krenohen me trashëgiminë e vyer shpirtërore dhe historike që mbart ky vend i shenjtë.

Pelegrinazhi ka nisur që në mbrëmjen e 3 qershorit, kur qindra besimtarë u mblodhën në Manastirin e Shën Joan Vladimirit për ceremoninë tradicionale të ndezjes së qirinjve. Në një atmosferë qetësie dhe përkushtimi shpirtëror, pelegrinët u lutën për paqe, shëndet dhe mbarësi, duke shënuar kështu fillimin e festimeve që kulmuan sot me ceremonitë kryesore fetare.

Manastiri i Shën Joan Vladimirit mbetet një nga qendrat më të rëndësishme të pelegrinazhit në Shqipëri, duke mirëpritur çdo vit mijëra besimtarë dhe vizitorë nga vendi dhe rajoni.

Këshilli Bashkiak i Elbasanit votoi në unanimitet, pa asnjë votë kundër dhënien e titullit “Qytetar Nderi” Z. Qazim Sejdini. 

“Për kontributin e jashtëzakonshëm në zhvillim , transformimin dhe promovimin e qytetit të Elbasanit si dhe për përkushtimin e palëkundur në shërbim të qytetarve dhe interesit publik”

Ishte propozimi i Kryetarit të Bashkisë Elbasan z. Gledian Llatja, për dhënien e titullit “Qytetar Nderi” (pas vdekjes) për figurën e Z. Qazim Sejdini.

Një personalitet që la gjurmë të thella në historinë moderne të qytetit tonë dhe që do mbetet në kujtesën e qytetarëve tanë si një prej figurave më të spikatura të qeverisjes vendore dhe jetës publike shqiptare, për kontributin e jashtëzakonshëm në zhvillimin, transformimin dhe promovimin e qytetit të Elbasanit, si dhe për përkushtimin e palëkundur në shërbim të qytetarëve.

​Qazim Sejdini lindi në Elbasan më 12 shkurt 1951, në një familje me tradita të hershme qytetare elbasanase, ku dashuria për punën, ndershmëria dhe respekti për njerëzit ishin vlera të trashëguara brez pas brezi. Që në fëmijëri, ai u rrit me ndjenjën e krenarisë për qytetin e tij dhe me bindjen se Elbasani meritonte të zhvillohej, të ruante identitetin e tij dhe të ecte përpara me dinjitet. 

Formimi i tij intelektual, përvoja si mësues, drejtues sportiv, sipërmarrës, drejtues i institucioneve dhe administrator publik, krijuan profilin e një lideri të afërt me njerëzit, vizionar dhe të përkushtuar ndaj zhvillimit të komunitetit.

​Jeta e tij profesionale nisi si mësues në zonën e Labinotit, ku u dallua menjëherë për përkushtimin ndaj të rinjve dhe aftësinë për të komunikuar me njerëzit. Më pas, në detyra organizative rinore dhe sportive, ai dëshmoi energji, disiplinë dhe vizion.

Kontributi i tij në sportin elbasanas si drejtues mbetet i rëndësishëm, ai ndihmoi në ringritjen e Klubit Sportiv të Elbasanit dhe rikthimin e identitetit historik të tij në një periudhë të vështirë për vendin.

​Në vitet e tranzicionit demokratik, Qazim Sejdini ishte ndër sipërmarrësit e parë të qytetit, duke kontribuar në zhvillimin ekonomik dhe në krijimin e një fryme të re biznesi në Elbasan. 

Si drejtues i Dhomës së Tregtisë dhe Industrisë dhe më pas President i Unionit të Dhomave të Tregtisë së Shqipërisë, ai punoi për të forcuar ekonominë vendore dhe për të promovuar Elbasanin si një qytet me potencial zhvillimi dhe bashkëpunimi.

​Që prej vitit 2002, si Prefekt i Qarkut Elbasan, përfaqësuesi më i lartë i qeverisë qendrore në një nga qarqet më të populluara të Shqipërisë, ai solli pragmatizmin dhe kujdesin që e karakterizonte për mirëqenien e komunitetit. 

Gjatë ushtrimit të kësaj detyre, ai u përqendrua në zgjidhjen e problemeve konkrete të qytetarëve dhe në forcimin e rolit të institucioneve publike.

Një nga sfidat më të rëndësishme ishte ndotja mjedisore e zonave industriale të Elbasanit, për të cilën ai ndërmori masa konkrete duke detyruar kompanitë industriale të instalonin filtra ajri dhe duke vendosur monitorim periodik për respektimin e standardeve mjedisore. 

Gjithashtu në këtë detyrë, ai përforcoi sistemin e emergjencave civile dhe koordinimin institucional gjatë përmbytjeve sezonale, duke rritur efektivitetin e reagimit ndaj krizave.

Përmes komunikimit të drejtpërdrejtë me qytetarët dhe hapjes së institucionit të Prefekturës ndaj komunitetit, Z. Sejdini riktheu besimin e publikut tek administrata vendore dhe e ktheu figurën e prefektit në një institucion të afërt dhe funksional për qytetarët.

​Por kontributi më i madh dhe më i dukshëm i tij lidhet pa dyshim me drejtimin e Bashkisë së Elbasanit për tre mandate radhazi, në vitet 2007–2019. Gjatë drejtimit të Bashkisë Elbasan Z. Qazim Sejdini udhëhoqi një prej proceseve më të rëndësishme transformuese në historinë moderne të qytetit, duke e kthyer Elbasanin në një qendër me interes të shtuar turistik dhe historik.

Nën drejtimin e tij, Elbasani njohu zhvillime të dukshme në infrastrukturë, urbanistikë, kulturë, arsim, sport dhe turizëm, duke fituar një identitet të ri qytetar dhe duke e shndërruar në një qytet më modern, funksional dhe mikpritës.

Gjatë këtyre viteve të transformimit të rëndësishëm për qytetin tone, Elbasani nën drejtimin e tij ndryshoi pamje. Krahas investimeve në infrastrukturë, në rikualifikimin urban, në ndriçim, në rrugë, ura, shkolla, kopshte dhe hapësira publike, u restauruan dhe u promovuan vlerat historike e kulturore të qytetit, duke nxjerrë në pah trashëgiminë tonë të çmuar dhe duke e kthyer Elbasanin në një destinacion gjithnjë e më të njohur për vizitorët vendas dhe të huaj. 

Nën drejtimin e tij u realizuan projekte që sot konsiderohen pjesë e identitetit modern të qytetit: restaurimi dhe ndriçimi i mureve të kalasë, rikonstruksioni i zonave historike dhe veçanërisht zbulimi dhe evidentimi i mozaikut paleokristian të kishës së Shën Pjetrit pranë Rrapit të Bezistanit, ndërtimi i stadiumit “Elbasan Arena”, zhvillimi i jetës kulturore e sportive dhe promovimi i Ditës së Verës si simbol i identitetit elbasanas në rang kombëtar e ndërkombëtar.

​Në vitin 2009, nën drejtimin e tij qyteti i Elbasanit u nderua me çmimin “Destination to be Discovered” në Lugano, Zvicër, një vlerësim ndërkombëtar që evidentoi potencialin historik, kulturor dhe turistik të qytetit. Ky çmim shënoi një moment të rëndësishëm për promovimin ndërkombëtar të Elbasanit dhe përfshirjen e tij për herë të parë në Hartën Turistike Botërore.

Vlerësimi nxori në pah trashëgiminë 2000-vjeçare të qytetit, ndërthurjen e qytetërimeve romake, bizantine dhe osmane, si dhe identitetin e tij si një qytet i dijes, kulturës dhe bashkëjetesës.

​Kontributi i tij në restaurimin dhe promovimin e trashëgimisë historike e kulturore të qytetit, në rilindjen urbane të Elbasanit, në ndërtimin e veprave publike me rëndësi strategjike si dhe në fuqizimin e jetës kulturore, sportive dhe ekonomike, mbetet një trashëgimi e vyer për ne dhe për brezat që do të vijnë.

​Z. Qazim Sejdini besonte se qyteti nuk ndërtohet vetëm me projekte infrastrukturore, por mbi të gjitha me harmoni, respekt dhe bashkëjetesë. Ai ishte një mbështetës i palodhur i tolerancës fetare dhe i bashkëpunimit qytetar. Ai kontribuoi në ruajtjen e frymës së mirëkuptimit që e ka karakterizuar gjithmonë Elbasanin dhe mbështeti nisma me rëndësi të madhe kulturore e shpirtërore për komunitetin. Me vizionin, integritetin dhe frymën bashkëpunuese që e karakterizonte, ai promovoi modelin e një qeverisjeje të bazuar mbi dialogun, përfshirjen qytetare, mirëkuptimin politik dhe respektin për çdo komunitet. Përkushtimi i tij ndaj ruajtjes së harmonisë fetare dhe vlerave qytetare e bëri një simbol të unitetit dhe bashkëjetesës në Elbasan.

​Ndër kontributet e tij më të spikatura në ruajtjen e harmonisë dhe trashëgimisë fetare të qytetit ka qenë mbështetja e tij vendimtare për rindërtimin e Xhamisë së Ballies në vitin 2013. Xhamia, e ndërtuar fillimisht në vitin 1608 dhe e shkatërruar nga regjimi komunist në vitin 1967, përfaqësonte një simbol të rëndësishëm historik dhe shpirtëror për qytetin e Elbasanit. 

Z. Sejdini bashkëpunoi ngushtë me Komunitetin Mysliman dhe kontribuoi në sigurimin e mbështetjes ndërkombëtare për financimin e projektit të rindërtimit. Falë kësaj nisme, Xhamia e Ballies u rikthye si një nga objektet më përfaqësuese të arkitekturës moderne fetare në Shqipëri dhe u vlerësua ndër pesë objektet e kultit më të bukura në botë në finalen e çmimit prestigjioz “Ndërtesa e Vitit 2025” nga ArchDaily.

​Në shenjë vlerësimi për kontributin e tij në forcimin e bashkëpunimit ndërkombëtar dhe promovimin e dialogut ndërkulturor, Z. Qazim Sejdini u nderua në vitin 2013 në Shtetet e Bashkuara me “Çelësin e Qytetit” të Idahos dhe me titullin “Qytetar Nderi” të qytetit Pensacola në Florida.

​Një nga cilësitë që qytetarët kujtojnë më shumë tek ai ishte afërsia me njerëzit. Dyert e institucionit ishin të hapura për qytetarët e thjeshtë, për hallet dhe shqetësimet e tyre. Ai e kuptonte pushtetin si përgjegjësi dhe shërbim, jo si privilegj. Kjo është arsyeja pse ai fitoi respektin dhe besimin e qytetarëve për tre mandate radhazi, me një besim gjithnjë në rritje.

Për qytetarët e Elbasanit, Qazim Sejdini mbetet figura e një drejtuesi që e deshi qytetin me zemër, punoi me devotshmëri për të dhe ia kushtoi jetën përparimit të tij. Vepra dhe trashëgimia e tij përbëjnë sot një model frymëzimi për shërbimin publik me dinjitet, ndershmëri dhe përkushtim.

Kryetari i Bashkisë së Elbasanit, Gledian Llatja, ka marrë pjesë në një takim në Bruksel, në kuadër të “11th Enlargement Days”, të organizuar nga @pes_cor, mbi rolin e qeverisjes vendore në procesin e zgjerimit të Bashkimit Evropian dhe sfidat që shoqërojnë këtë rrugëtim.

Në këtë kuadër, Antonio Mazzeo, President i Këshillit Rajonal të Toskanës (Consiglio Regionale della Toscana) dhe përfaqësues në Komitetin Evropian të Rajoneve, në një deklaratë së bashku me kryebashkiakun Llatja u shpreh se “sot në Bruksel, së bashku me Gledian Llatja, kryetar i Bashkisë së Elbasanit, kryesuam takimin e tretë të tryezës së dialogut ndërmjet Komitetit Evropian të Rajoneve dhe autoriteteve vendore shqiptare mbi rrugëtimin e anëtarësimit të Shqipërisë në Bashkimin Evropian. Shqipëria është sot ndër vendet kandidate më të avancuara në procesin e anëtarësimit. Tani sfida është të shndërrohen përparimet në negociata në rezultate të verifikueshme në jetën e përditshme të njerëzve.”

Ai theksoi rëndësinë e bashkëpunimit mes institucioneve evropiane dhe qeverisjes vendore në forcimin e procesit të integrimit.
Nga ana e tij, kryebashkiaku i Elbasanit, Gledian Llatja, u shpreh se “është nder për mua të punoj me ju z. Mazzeo dhe të marr eksperiencën që ju në Itali keni. Po bëjmë gjërat më të mira për qytetet tona dhe për qytetarët tanë. Na gëzon marrëdhënia që kemi me Bashkimin Evropian dhe progresi që kemi bërë deri tani.

Një mundësi e vyer për të ndarë përvojat më të mira të qeverisjes vendore dhe për të forcuar bashkëpunimin me partnerët europianë, me bindjen se integrimi fillon nga qytetet dhe komunitetet tona”.

Takimi në Bruksel u vlerësua si një hap i rëndësishëm në forcimin e dialogut mes qeverisjes vendore shqiptare dhe institucioneve evropiane në kuadër të procesit të zgjerimit të BE-së.

Drejt përfundimit janë punimet për rehabilitimin dhe sistemimin e rrjetit të kanalizimeve të ujërave të zeza në rrugën “Dervish Biçakçiu”, një ndërhyrje e rëndësishme infrastrukturore në pjesën fundore të lagjes “Skënderbej”, zonë që lidhet me Katundin e Ri.

Ky investim, i cili ka qenë një kërkesë e hershme e banorëve të zonës, po i hap rrugë urbanizimit të plotë të kësaj lagjeje dhe përmirësimit të ndjeshëm të kushteve të jetesës për komunitetin.

Gjatë inspektimit të punimeve, kryetari i Bashkisë së Elbasanit, Gledian Llatja, i shoqëruar nga deputetja Aulona Bylykbashi, panë nga afër ecurinë e investimit, i cili tashmë ndodhet në fazën përfundimtare.

Kryetari Llatja u shpreh se “janë rreth 512 metra linearë kanalizime që ndikojnë drejtpërdrejt në përmirësimin e kushteve të jetesës dhe urbanizimin e kësaj lagjeje. Ky investim i shërben rreth 500 banorëve dhe është hapi i parë për të vijuar më pas me urbanizimin e plotë të kësaj zone”, deklaroi Llatja.

Nga ana tjetër, deputetja Aulona Bylykbashi theksoi se urbanizimi i zonave informale mbetet një ndër prioritetet kryesore të Bashkisë së Elbasanit në bashkëpunim me qeverinë dhe Fondin Shqiptar të Zhvillimit.
“Synimi është që shumë shpejt kjo zonë të kthehet në një hapësirë plotësisht të urbanizuar, me infrastrukturë rrugore adekuate dhe standarde bashkëkohore për komunitetin”, u shpreh Bylykbashi.

Banorët e zonës, veçanërisht të moshuarit, u shprehën falënderues për investimin e realizuar, duke theksuar se prej dekadash nuk kishin parë një ndërhyrje të tillë në rrjetin e kanalizimeve të ujërave të zeza.
Sipas tyre, ky investim do të sjellë jo vetëm zgjidhje të problematikave të kahershme me kanalizimet, por edhe transformimin e plotë të infrastrukturës së lagjes.

Bashkia Elbasan prezantoi praktikën mbi validimin dhe pasurimin e indikatorëve të performancës gjatë Takimit të Forumit të Performancës, të zhvilluar më 28 maj 2026 në Tiranë, organizuar nga Shoqata Kombëtare e Bashkive në bashkëpunim me projektin Bashki të Forta.

Praktika e Bashkisë Elbasan u përzgjodh ndër praktikat më të mira për prezantim, së bashku me Shkodrën dhe Pogradecin, duke ndarë një qasje që synon ta kthejë performancën nga një proces teknik raportimi në një instrument real për vendimmarrje, transparencë dhe përmirësim të shërbimeve publike.

Përmes kësaj praktike, Bashkia Elbasan prezantoi mënyrën se si përdorimi i evidencës, validimi i indikatorëve dhe bashkëpunimi ndërmjet drejtorive sektoriale, në ndërthurje me qeverisjen e hapur përmes Forumit OGP, po ndihmojnë në ndërtimin e një administrate më transparente, më të bazuar në të dhëna dhe më pranë qytetarëve.

Një tjetër hap drejt forcimit të kulturës së performancës dhe qeverisjes vendore të bazuar në evidencë.