Muaj: Qershor 2026

Vijojnë me ritme të mira punimet për rehabilitimin e rrugës kryesore në fshatin Kryezjarr, Njësia Administrative Shirgjan, një investim i rëndësishëm që do të përmirësojë ndjeshëm lëvizjen dhe aksesin për rreth 400 familje dhe fermerët e zonës.

Punimet u inspektuan nga kryetari i Bashkisë Elbasan, Gledian Llatja, i cili u njoh nga afër me ecurinë e projektit dhe ndikimin që ky investim do të ketë në përmirësimin e jetës së banorëve dhe zhvillimin e aktivitetit bujqësor në zonë.

“Jo vetëm në Njësinë Administrative Shirgjan, por në çdo njësi administrative të Bashkisë Elbasan, investimet në infrastrukturën rurale mbeten një prioritet i rëndësishëm.

Nga rehabilitimi i rrugëve lidhëse deri te pastrimi i kanaleve vaditëse dhe kulluese, çdo ndërhyrje synon të mbështesë fermerët, të përmirësojë aksesin në tokat bujqësore dhe të krijojë mundësi më të mira për zhvillimin ekonomik të zonave rurale. Ne do të vazhdojmë të investojmë në çdo komunitet, duke sjellë më shumë zhvillim dhe një cilësi më të mirë jetese për qytetarët”, u shpreh Llatja.

Ky projekt synon të lehtësojë qarkullimin e përditshëm të banorëve, të përmirësojë transportin e produkteve bujqësore dhe të rrisë sigurinë e lëvizjes në një nga akset më të rëndësishme të fshatit. Përmes këtij investimi, krijohen kushte më të mira për fermerët dhe banorët, duke i dhënë një shtysë të mëtejshme zhvillimit ekonomik dhe social të zonës.

Bashkia Elbasan vijon të investojë në infrastrukturën rurale, duke i kushtuar vëmendje çdo zone dhe çdo komuniteti. Krahas ndërhyrjeve në rrjetin rrugor, po punohet vazhdimisht edhe për mirëmbajtjen dhe pastrimin e kanaleve vaditëse dhe kulluese, me qëllim mbështetjen e sektorit të bujqësisë dhe përmirësimin e kushteve të punës për fermerët.

Rehabilitimi i rrugës në Kryezjarr është pjesë e programit të investimeve të Bashkisë Elbasan për përmirësimin e infrastrukturës lokale dhe rritjen e cilësisë së jetës në zonat rurale të territorit të saj.

Përfaqësues të shtatë bashkive të Qarkut Elbasan dhe të bashkive të rajonit të Pelagonias morën pjesë në trajnimin dyditor mbi Qeverisjen e Mirë, i zhvilluar më 11–12 qershor në Elbasan.

Aktiviteti u organizua në kuadër të projektit “Krushevo dhe Elbasani – Udhëtim në Natyrë dhe Aventurë”, i financuar nga Bashkimi Europian përmes Programit IPA III të Bashkëpunimit Ndërkufitar Maqedonia e Veriut – Shqipëri.

Projekti zbatohet nga Bashkia Krushevë në partneritet me Qendrën për Zhvillim të Qëndrueshëm ALKA, si dhe nga Bashkia Elbasan në partneritet me Shoqatën “Tjetër Vizion”.
Gjatë dy ditëve të trajnimit, pjesëmarrësit shkëmbyen përvoja dhe praktika mbi qeverisjen e mirë, transparencën institucionale dhe pjesëmarrjen qytetare. Takimi shërbeu gjithashtu për forcimin e bashkëpunimit ndërmjet njësive vendore dhe krijimin e rrjeteve të reja rajonale.

Në kuadër të aktivitetit, të ftuarit patën mundësinë të njihen nga afër edhe me potencialet turistike dhe kulturore të Elbasanit dhe zonave përreth, duke diskutuar mundësi për iniciativa të përbashkëta në të ardhmen.

Organizatorët vlerësuan se qeverisja e mirë mbetet një element kyç për zhvillimin e qëndrueshëm të komuniteteve dhe për forcimin e bashkëpunimit ndërkufitar mes partnerëve të projektit.

Teatri “Skampa” vijon të sjellë në skenë produksione cilësore artistike, duke tërhequr vëmendjen dhe interesin e publikut elbasanas.

Mbrëmjen e fundit, në sallën e tejmbushur të teatrit u shfaq premiera e komedisë “Për një Fjalë Goje”, një bashkëprodhim që u mirëprit ngrohtësisht nga artdashësit dhe u shoqërua me duartrokitje të gjata në fund të shfaqjes.

Vepra solli në skenë situata plot humor, emocione dhe mesazhe të forta njerëzore, duke krijuar një komunikim të drejtpërdrejtë me publikun. Interpretimi i aktorëve Ledion Zoi, Erli Fortuzi dhe Ledio Lako u vlerësua për profesionalizmin dhe energjinë e sjellë në skenë, ndërsa regjia e Altin Bashës i dha ritëm dhe dinamizëm shfaqjes.

Suksesi i kësaj premiere konfirmon edhe një herë rolin e Teatrit “Skampa” si një nga qendrat më aktive të jetës kulturore në qytet, duke ofruar vepra që pasurojnë jetën artistike dhe afron publikun me teatrin.