Muaj: Qershor 2026

Në kuadër të projektit ndërkufitar “Krushevë dhe Elbasan – Udhëtim në Natyrë dhe Aventurë”, organizata Tjetër Vizion do të zhvillojë në Elbasan një trajnim dyditor mbi Qeverisjen e Mirë, me pjesëmarrjen e 20 përfaqësuesve të institucioneve të qeverisjes vendore. Aktiviteti do të fokusohet në forcimin e transparencës, llogaridhënies dhe vendimmarrjes efektive në nivel lokal.
Trajnimi do të organizohet më 11–12 qershor 2026 në kuadër të projektit të financuar nga Bashkimi Evropian përmes Programit IPA III të Bashkëpunimit Ndërkufitar Maqedoni e Veriut – Shqipëri. Projekti synon të promovojë zhvillimin e qëndrueshëm të turizmit dhe rritjen socio-ekonomike në rajonin ndërkufitar Krushevë–Elbasan.
Programi i dy ditëve është ndërtuar mbi një qasje pjesëmarrëse dhe praktike. Dita e parë do t’i kushtohet parimeve të qeverisjes së mirë, pjesëmarrjes përfshirëse dhe angazhimit qytetar, ndërsa dita e dytë do të fokusohet në planifikimin, bashkëpunimin ndërkufitar, monitorimin e progresit dhe hartimin e veprimeve konkrete për përmirësimin e qeverisjes vendore.
Përmes ushtrimeve në grup, diskutimeve mbi raste konkrete dhe shkëmbimit të praktikave të mira, pjesëmarrësit do të zhvillojnë tregues realistë dhe masa të zbatueshme në punën e tyre të përditshme. Aktiviteti synon të nxisë bashkëpunimin ndërbashkiak dhe ndërkufitar, duke kontribuar në forcimin e kapaciteteve institucionale për një turizëm të qëndrueshëm dhe të përgjegjshëm.
Rreth projektit
Projekti “Krushevë dhe Elbasan – Udhëtim në Natyrë dhe Aventurë” zbatohet nga Tjetër Vizion në kuadër të Programit IPA III të Bashkëpunimit Ndërkufitar Maqedoni e Veriut – Shqipëri (Kontrata e Grantit Nr. IPA/2025/487-660). Projekti ndërton mbi arritjet e nismave të mëparshme për zhvillimin e turizmit të bazuar në natyrë dhe aventurë në zonën Elbasan–Funar, duke forcuar njëkohësisht dimensionin ndërkufitar të këtij potenciali turistik.

Agjencia për Zhvillim Bujqësor dhe Rural (AZHBR) zhvilloi një takim informues me fermerë dhe përfaqësues të sektorit të bujqësisë, ku u prezantuan masat mbështetëse dhe mundësitë e financimit që ofron Skema Kombëtare e Mbështetjes në Bujqësi 2026.

Gjatë takimit u diskutuan kriteret e aplikimit, procedurat dhe dokumentacioni i nevojshëm për përfitimin e mbështetjes financiare në sektorët e blegtorisë, bletarisë, fermave organike, mekanizimit bujqësor, investimeve për fermerët e rinj dhe zhvillimit të fermave bujqësore.

Drejtoresha e Sektorit të Bujqësisë në Bashkinë Elbasan theksoi rolin mbështetës të bashkisë në orientimin dhe lehtësimin e procedurave për fermerët, duke garantuar asistencë dhe informacion për çdo aplikant që dëshiron të përfitojë nga kjo skemë. Ajo nënvizoi se Bashkia Elbasan mbetet e angazhuar për të qenë pranë komunitetit bujqësor, me qëllim rritjen e përfituesve dhe nxitjen e investimeve në sektorin e bujqësisë.

Bashkia Elbasan inkurajon të gjithë fermerët dhe subjektet bujqësore të aplikojnë dhe të përfitojnë nga mundësitë që ofron Skema Kombëtare 2026 për zhvillimin dhe modernizimin e aktivitetit të tyre.

Kryetari i Bashkisë, Gledian Llatja, së bashku me deputeten Evis Kushi, inspektuan nga afër punimet e unazës së fshatit Kryezjarr, në Njësinë Administrative Shirgjan, një investim i rëndësishëm që tashmë po i jep zonës standarde infrastrukturore si në qytet.

Me një gjatësi prej 1.2 kilometrash, kjo unazë u shërben drejtpërdrejt rreth 600 banorëve dhe mbi 50 hektarëve tokë bujqësore, kryesisht në zonat kodrinore të fshatit. Investimi ndikon ndjeshëm në lehtësimin e transportit të prodhimeve bujqësore drejt tregut, si edhe në përmirësimin e jetës së përditshme të banorëve.

Banorët e zonës e kishin prej kohësh këtë kërkesë, pasi gjatë reshjeve të shiut rrugët në zonat kodrinore bëheshin problematike dhe vështirësonin lëvizjen. Tashmë, me ndërtimin e kësaj unaze, fermerët dhe familjet e fshatit do të kenë akses më të lehtë dhe më të sigurt, duke u ndjerë më pranë qytetit dhe më të lidhur me tregun.

Kryetari i Bashkisë, Gledian Llatja, u shpreh se investimet në infrastrukturën rurale mbeten prioritet, pasi ndikojnë drejtpërdrejt në zhvillimin ekonomik të zonave dhe në përmirësimin e kushteve të jetesës së banorëve. Ai theksoi se Bashkia do të vijojë të jetë pranë komunitetit me projekte konkrete që mbështesin bujqësinë dhe ekonominë familjare.

Ndërkohë, deputetja Evis Kushi deklaroi se gjatë kësaj periudhe ka qenë shpesh në këtë zonë, duke vlerësuar potencialin e lartë që Shirgjani ka për bujqësinë dhe ekonominë rurale.

“Jemi përsëri këtu për këtë rrugë të re që do t’u shërbejë banorëve për pronat, arat dhe serrat, por edhe si një unazë lidhëse për fshatin. I gjithë potenciali i kësaj zone përkthehet në ekonomi rurale dhe në mirëqenie për familjet e kësaj zone”, u shpreh Kushi.

Edhe banorët e Kryezjarrit shprehën mirënjohjen për realizimin e këtij investimi, duke vlerësuar mbështetjen dhe praninë e vazhdueshme të Bashkisë në zgjidhjen e problematikave të zonës.

Kryetari i Bashkisë Elbasan, Gledian Llatja, zhvilloi një takim me përfaqësuesit e komuniteteve fetare të qytetit, ku u prezantua projekti i rivitalizimit të Kalasë së Elbasanit, një nga asetet më të rëndësishme historike, kulturore dhe shpirtërore të qytetit.

Gjatë takimit, u diskutuan vizioni dhe ndërhyrjet e planifikuara për rijetëzimin e kësaj zone me vlera të veçanta, ndërsa përfaqësuesit e komuniteteve fetare ndanë sugjerimet dhe idetë e tyre për ruajtjen e identitetit historik dhe harmonisë që karakterizon Kalanë e Elbasanit.

Kryebashkiaku Llatja vlerësoi rolin e komuniteteve fetare si pjesë e rëndësishme e historisë dhe trashëgimisë së Kalasë, duke theksuar se bashkëpunimi me të gjithë aktorët lokalë është thelbësor për realizimin e një projekti që respekton të kaluarën dhe ndërton një të ardhme më të mirë për qytetin.

Projekti synon ta kthejë Kalanë në një hapësirë më të gjallë, mikpritëse dhe tërheqëse për qytetarët dhe vizitorët, duke forcuar rolin e saj si një nga pikat kryesore të trashëgimisë kulturore dhe zhvillimit turistik të Elbasanit.

Projekti i rivitalizimit të Kalasë së Elbasanit mbështetet nga Albanian-American Development Foundation dhe është hartuar nga arkitekti turk Emre Arolat në bashkëpunim me MVM Architecture. Ai parashikon restaurimin dhe rijetëzimin e zonës historike, përmirësimin e hapësirave publike, zhvillimin e infrastrukturës për vizitorët dhe krijimin e ambienteve multifunksionale për aktivitete kulturore, artistike dhe turistike.

Synimi është që Kalaja të rikthehet në një prej destinacioneve më të rëndësishme kulturore dhe turistike në vend, duke u shndërruar njëkohësisht në një motor të ri zhvillimi ekonomik për qytetin.

Kalaja e Elbasanit konsiderohet një nga kalatë fushore të banuara më të rëndësishme në Ballkan, me histori që daton që nga periudha romake, dhe projekti synon të ruajë këtë trashëgimi duke i dhënë një identitet të ri urban dhe kulturor.

Në kuadër të Ditës Ndërkombëtare të Mjedisit, kryetari i Bashkisë Elbasan, Gledian Llatja, nënshkroi një marrëveshje bashkëpunimi me organizatën INCA, me synim reduktimin e ndotjes nga plastika dhe promovimin e ekonomisë qarkulluese.

Gjatë ceremonisë së nënshkrimit, kryebashkiaku Gledian Llatja vlerësoi bashkëpunimin me INCA-n dhe theksoi se edukimi mjedisor dhe ndërgjegjësimi i qytetarëve janë elementë kyç në luftën kundër ndotjes.

Kjo marrëveshje synon të nxisë praktika të qëndrueshme për menaxhimin e mbetjeve, riciklimin dhe ripërdorimin e materialeve, duke kontribuar në krijimin e një qyteti më të pastër dhe më miqësor me mjedisin.

Me moton se ndryshimi fillon nga veprimet e vogla, Bashkia Elbasan dhe partnerët e saj vazhdojnë të promovojnë iniciativa që forcojnë kulturën e mbrojtjes së mjedisit dhe përgjegjësinë qytetare.

Në kuadër të Ditës Botërore të Mjedisit, kryetari i Bashkisë Elbasan, Gledian Llatja, nënshkroi marrëveshjen e bashkëpunimit me organizatën INCA, e cila synon reduktimin e ndotjes nga plastika, promovimin e ekonomisë qarkulluese dhe forcimin e edukimit mjedisor në komunitet.

Marrëveshja përfaqëson një hap të rëndësishëm në angazhimin e Bashkisë Elbasan për mbrojtjen e mjedisit, përmes zbatimit të nismave konkrete që synojnë ndërgjegjësimin e qytetarëve dhe përfshirjen e tyre në praktika të qëndrueshme mjedisore.

Pas nënshkrimit të marrëveshjes, u zhvillua ceremonia përmbyllëse e nismës së riciklimit të tapave plastike, e realizuar në bashkëpunim me Drejtorinë e Mjedisit, organizatën INCA, Zyrën Vendore të Arsimit dhe shkollat e qytetit. Për javë me radhë, qindra nxënës, mësues dhe prindër u angazhuan në mbledhjen e tapave plastike, duke e kthyer këtë nismë në një model të edukimit mjedisor dhe pjesëmarrjes qytetare.

Gjatë aktivitetit, nxënësit përcollën mesazhe sensibilizuese për mbrojtjen e mjedisit, prezantuan skeçe artistike dhe ndanë angazhimet e tyre për reduktimin e përdorimit të plastikës në jetën e përditshme.

Në përfundim, u vlerësuan shkollat pjesëmarrëse për kontributin e tyre, ndërsa shkollat “Jorgji Filo” dhe “Luigj Gurakuqi” u shpallën fituese të nismës, duke dëshmuar se bashkëpunimi dhe ndërgjegjësimi janë çelësi i suksesit në mbrojtjen e mjedisit.

Në fjalën e tij, kryetari i Bashkisë Elbasan vlerësoi angazhimin e nxënësve, mësuesve dhe familjeve, duke theksuar se edukimi mjedisor mbetet investimi më i rëndësishëm për të ardhmen dhe se çdo veprim i vogël në mbrojtje të natyrës sjell ndryshime të mëdha për komunitetin.

Bashkia mbetet e angazhuar në zbatimin e politikave të qëndrueshme mjedisore dhe përfshirjen e të rinjve në nisma që kontribuojnë në mbrojtjen e natyrës dhe reduktimin e ndotjes nga plastika.