Muaj: Qershor 2026

Qindra vizitorë nga Elbasani, qytete të tjera të vendit, por edhe turistë të huaj, u bënë pjesë këtë të shtunë e “Funar Fest 2026”, një nga aktivitetet më të rëndësishme verore që promovon natyrën, turizmin dhe traditat e zonës së Funarit.

Festa solli një atmosferë të gjallë me panairin e produkteve lokale, muzikë live, aktivitete sportive, kajak në liqen, kamping, guida në natyrë dhe shumë aktivitete të tjera që e kthyen Funarin në një pikëtakim të dashamirësve të natyrës dhe aventurës.

Përveç atmosferës festive, “Funar Fest 2026” shënoi edhe nisjen zyrtare të zbatimit të fazës së dytë të projektit ndërkufitar “Krushevë dhe Elbasan – Udhëtim në Natyrë dhe Aventurë”, i cili zbatohet nga organizata “Tjetër Vizion” në kuadër të Programit IPA III të Bashkëpunimit Ndërkufitar Maqedonia e Veriut – Shqipëri.

Në ceremoninë e organizuar me këtë rast mori pjesë edhe Kryetari i Komunës së Krushevës, Niko Choneski, duke konfirmuar bashkëpunimin e suksesshëm ndërmjet dy bashkive në zhvillimin e turizmit të qëndrueshëm.

Faza e dytë e projektit parashikon ndërtimin e Parkut të Aventurës në Funar, sistemimin e parkimit dhe hapjen e 13 kilometrave shtigje të reja malore, të cilat do të jenë të aksesueshme për këmbësorët dhe çiklistët, duke pasuruar ofertën turistike të zonës.

Kryetari i Bashkisë Elbasan, Gledian Llatja, u shpreh se Festa e Funarit është tashmë festa e miqve të Funarit, ndërsa këtë vit përkon edhe me një moment të rëndësishëm për zhvillimin e zonës.

“Sot kemi edhe një event tjetër të rëndësishëm, fillimin e fazës së dytë të projektit IPA Cross Border me Bashkinë e Krushevës. Është viti i dytë që miqtë tanë nga Krusheva marrin pjesë në aktivitetet tona dhe kjo tregon partneritetin e fortë që kemi ndërtuar.”

Llatja theksoi se Bashkia Elbasan ka realizuar një sërë projektesh të financuara nga Bashkimi Evropian, mes tyre qendrën e informacionit turistik, pajisje për biçikleta dhe kanoe, si dhe 60 kilometra shtigje malore që lidhin Elbasanin dhe Bradasheshin me Funarin.

“Sot nisim ndërtimin e Parkut të Aventurës, një investim që do ta bëjë Funarin edhe më tërheqës për turistët. Krahas kësaj, do të hapen edhe 13 kilometra shtigje të reja malore. Investimet tona në Funar kanë qenë të shumta, jo vetëm me fondet e Bashkimit Evropian, por edhe me fondet e Bashkisë Elbasan. Do të vazhdojmë të investojmë për një turizëm të qëndrueshëm që krijon zhvillim ekonomik për zonën.”

Nga ana e tij, Kryetari i Komunës së Krushevës, Niko Choneski, e cilësoi një nder pjesëmarrjen në Festën e Funarit dhe vlerësoi bashkëpunimin ndërkufitar mes dy bashkive.

“Është një kënaqësi e veçantë të jemi sot këtu, ndërsa së bashku nisim ndërtimin e Parkut të Aventurës, një investim që do të kontribuojë më tej në zhvillimin e Funarit si një destinacion modern për turizmin aktiv.

Projekti ‘Krushevë dhe Elbasan – Udhëtim në Natyrë dhe Aventurë’ është një tjetër rezultat konkret i bashkëpunimit të suksesshëm mes dy bashkive tona dhe një dëshmi se, duke punuar së bashku, mund të krijojmë mundësi të reja turistike, të nxisim zhvillimin lokal dhe të ndërtojmë një rajon ndërkufitar më të njohur dhe më tërheqës.”

Ai vlerësoi gjithashtu mbështetjen e Bashkimit Evropian përmes Programit të Bashkëpunimit Ndërkufitar, duke theksuar se investime të tilla po përmirësojnë infrastrukturën turistike, po krijojnë mundësi të reja ekonomike dhe po forcojnë lidhjet mes komuniteteve në të dy anët e kufirit.

Me investimet e realizuara ndër vite në infrastrukturë, zhvillimin e bujtinave, shtigjeve natyrore dhe tashmë me Parkun e Aventurës, Funari po konsolidohet si një nga destinacionet më të rëndësishme të turizmit natyror dhe aktiv në Shqipëri, duke tërhequr çdo vit gjithnjë e më shumë vizitorë vendas dhe të huaj.

Pas shqetësimit të ngritur disa ditë më parë nga banorët për dëmtimin e urës në rrugën e fshatit Kryezjarr, Bashkia Elbasan reagoi menjëherë duke ndërhyrë për riparimin e dëmeve më emergjente dhe vendosjen e mbrojtëseve anësore, me qëllim garantimin e sigurisë së kalimtarëve dhe automjeteve.

Për të ndjekur nga afër ecurinë e punimeve, kryetari i Bashkisë Elbasan, Gledian Llatja, ishte sërish në Kryezjarr, ku inspektoi ndërhyrjen e realizuar dhe u takua me banorët e zonës.

Ndërhyrja e menjëhershme bëri të mundur shmangien e degradimit të mëtejshëm të urës dhe rikthimin e sigurisë në një segment të rëndësishëm rrugor për komunitetin.

Gjatë vizitës, Llatja theksoi se Bashkia Elbasan është në kontakt të vazhdueshëm me kompaninë që po ndërton nënstacionin elektrik në zonë, në mënyrë që menjëherë pas përfundimit të punimeve me mjetet e rënda të nisë rehabilitimi i plotë i rrugës dhe kthimi i saj në gjendjen e mëparshme.

Kryetari i bashkisë garantoi se çdo dëmtim i shkaktuar nga punimet do të riparohet, ndërsa Bashkia do të vijojë të monitorojë situatën deri në përfundimin e plotë të ndërhyrjeve.

Një tjetër ndërhyrje e rëndësishme në infrastrukturën bujqësore ka nisur në fshatin Karakullak, ku për herë të parë po realizohet hapja e një kanali të ri kullues me gjatësi 600 metra linearë.

Ky investim vjen si përgjigje ndaj nevojave të banorëve të zonës dhe synon të përmirësojë ndjeshëm kushtet e jetesës dhe të punës për komunitetin lokal.

Kanali i ri do t’u shërbejë drejtpërdrejt 12 familjeve, duke parandaluar përmbytjet dhe duke lehtësuar problematikat që lidhen me infrastrukturën rrugore të lagjes.

Njëkohësisht, ndërhyrja do të mundësojë kullimin dhe sistemimin e mbi 10 hektarëve tokë bujqësore, duke krijuar kushte më të sigurta për aktivitetin e fermerëve dhe duke mbështetur zhvillimin e bujqësisë në këtë zonë.

 Së bashku me Ministrinë e Turizmit, Kulturës dhe Sportit, Fondacionin Shqiptaro-Amerikan për Zhvillim (AADF), Studion Arkitekturore MVM dhe arkitektin Emre Arolat, zhvilluam takimin e parë me banorët dhe bizneset e lagjes Kala, duke hapur procesin e konsultimit publik për një nga projektet më ambicioze që është ndërmarrë ndonjëherë për zemrën historike të qytetit tonë.

Ky projekt synon jo vetëm restaurimin dhe ruajtjen e trashëgimisë sonë të çmuar, por edhe krijimin e një hapësire më funksionale, që do t’i japë Kalasë një dimension të ri zhvillimi, duke nxitur turizmin, artizanatin, kulturën dhe ekonominë lokale.

Kontributi i banorëve dhe bizneseve është thelbësor për suksesin e këtij projekti. Përmes dialogut dhe bashkëpunimit, do të ndërtojmë së bashku një Kala që ruan autenticitetin dhe historinë e saj, ndërsa i përgjigjet nevojave të së ardhmes.

Kalaja e Elbasanit është identiteti ynë. Së bashku do ta rikthejmë atë në zemrën historike, kulturore dhe turistike të qytetit, një hapësirë ku historia, tradita dhe zhvillimi ecin krah për krah.

Funari mirëpret këtë të shtunë një nga aktivitetet më të dashura verore, Funar Fest 2026, një festë që bashkon natyrën, traditën dhe argëtimin në një nga destinacionet më të bukura natyrore të Bashkisë Elbasan.

Nën kujdesin e veçantë të Kryetarit të Bashkisë Elbasan, Gledian Llatja, kjo festë synon të promovojë më tej potencialin turistik të zonës së Funarit dhe ta kthejë atë në një pikë referimi për turizmin natyror dhe familjar.

Duke nisur nga ora 10:00, vizitorët do të kenë mundësinë të eksplorojnë bukuritë e Funarit përmes guidave natyrore, që do të ofrojnë një eksperiencë të drejtpërdrejtë me shtigjet, liqenet dhe peizazhet karakteristike të zonës.

Programi i festës do të shoqërohet me muzikë live, DJ, si dhe performanca të një live band me kitarë, duke krijuar një atmosferë festive në zemër të natyrës.

Përveç argëtimit, pjesëmarrësit do të kenë mundësinë të shijojnë edhe panairin e produkteve lokale, ku do të ekspozohen ushqimet tradicionale dhe produktet karakteristike të zonës, duke promovuar ekonominë dhe traditat vendase.

Aktivitetet në natyrë, përfshirë kajakun në liqen dhe kampingun, do ta bëjnë këtë ditë një eksperiencë të plotë për të gjitha moshat, nga familjet te të rinjtë dhe turistët që kërkojnë aventura dhe qetësi larg qytetit.

Funar Fest është tashmë një traditë e konsoliduar që çdo vit tërheq gjithnjë e më shumë vizitorë, duke e pozicionuar Funarin si një nga destinacionet më të rëndësishme të turizmit natyror në Elbasan.

Falë investimeve të viteve të fundit në infrastrukturë, si dhe zhvillimit të bujtinave dhe shërbimeve turistike, Funari po kthehet si një destinacion i preferuar për ata që kërkojnë qetësi, natyrë dhe eksperienca autentike larg zhurmës së qytetit.

Bashkia Elbasan fton qytetarët dhe vizitorët nga e gjithë Shqipëria të bëhen pjesë e kësaj feste, e cila bashkon natyrën, muzikën dhe traditën në një eksperiencë të paharrueshme verore.

Pas disa vitesh mungesë, Shqipëria mirëpret sërish Kampionatin Ballkanik të Pingpongut. Edicioni i 33-të i këtij aktiviteti po zhvillohet në Pallatin e Sportit “Tomorr Sinani” në Elbasan, nga data 24 deri më 28 qershor, duke mbledhur 13 ekipe nga vendet e rajonit dhe një total prej 150 sportistësh e zyrtarësh.

Shqipëria paraqitet me delegacionin më të madh të kampionatit, me 22 sportistë, ndërsa ky është edicioni i parë në historinë e këtij kompeticioni që zhvillohet me pjesëmarrjen e 13 skuadrave.

Në ceremoninë hapëse morën pjesë drejtues të sportit shqiptar dhe atij ballkanik, të cilët vlerësuan rëndësinë e organizimit të këtij eventi në vendin tonë. Sipas tyre, zhvillimi i Kampionatit Ballkanik në Shqipëri dëshmon besimin që institucionet sportive të rajonit kanë ndaj kapaciteteve organizative të vendit tonë.

Përfaqësuesit e Federatës Ballkanike të Pingpongut shprehën vlerësimin për organizimin e aktivitetit në Elbasan, duke theksuar se ky është një nga edicionet më të veçanta të kampionatit, jo vetëm për numrin rekord të vendeve pjesëmarrëse, por edhe për nivelin e lartë të përgatitjeve.

Organizatorët nënvizuan se rikthimi i këtij eventi në Shqipëri pas 11 vitesh përbën një mundësi të rëndësishme për promovimin e pingpongut në vend, si dhe për rritjen e nivelit konkurrues të sportistëve shqiptarë.

Në një atmosferë festive dhe miqësore në Pallatin e Sportit “Tomorr Sinani”, garat kanë nisur me synimin për të shpallur kampionët e rinj të Ballkanit, por edhe për të forcuar bashkëpunimin dhe lidhjet sportive mes vendeve pjesëmarrëse.

Në kuadër të projektit EU4Digital, Bashkia Elbasan ka përfituar instalimin e hotspot-eve publike WiFi4WB, duke ofruar akses falas në internet për qytetarët dhe vizitorët në disa pika publike të qytetit.

Pikat ku është vendosur shërbimi WiFi publik janë:
Sheshi “ Kozma Naska”
Parku ” Aqif Pasha”

Nisma WiFi4WB financohet nga Bashkimi Evropian dhe Qeveria Gjermane, ndërsa zbatohet nga GIZ, si pjesë e projektit EU4Digital, që synon forcimin e lidhjes digjitale në Shqipëri dhe në vendet e Ballkanit Perëndimor.

Përmes këtij projekti synohet zgjerimi i aksesit në internet publik falas, duke krijuar më shumë mundësi për komunikim, informim dhe përdorim të shërbimeve digjitale nga komuniteti.

Bashkia Elbasan është një nga 500 bashkitë përfituese në rajon në kuadër të programit
WiFi4WB, i cili ndjek modelin e iniciativës WiFi4EU të Bashkimit Evropian, që ka sjellë internet publik falas në mijëra pika në të gjithë Europën.

Në çdo pikë ku është instaluar hotspot-i do të vendosen edhe tabela informuese zyrtare sipas standardeve të projektit, për të garantuar identifikimin dhe promovimin e kësaj mbështetjeje.

Nga data 24 deri më 28 qershor 2026, Elbasani do të jetë qendra e pingpongut ballkanik, duke mirëpritur Kampionatin e 33-të Ballkanik të Pingpongut për të Rinjtë (33rd Balkan Youth Table Tennis Championship), një nga aktivitetet më të rëndësishme sportive për moshat e reja në rajon.

Gjatë pesë ditëve të garave, Pallati i Sportit “Tomorr Sinani” do të presë sportistët më të talentuar të Ballkanit, të cilët do të konkurrojnë në një atmosferë sportive që promovon talentin, fair-play-in, miqësinë dhe bashkëpunimin mes të rinjve.

Në këtë kampionat prestigjioz marrin pjesë 13 shtete: Shqipëria, Bosnje dhe Hercegovina, Bullgaria, Greqia, Kosova, Mali i Zi, Maqedonia e Veriut, Moldavia, Qipro, Rumania, Serbia, Sllovenia dhe Turqia.

Organizimi i këtij eventi ndërkombëtar e vendos Elbasanin në qendër të vëmendjes sportive rajonale, duke dëshmuar edhe një herë kapacitetet e qytetit për të pritur aktivitete të rëndësishme sportive dhe për të promovuar vlerat e sportit tek brezi i ri.

Kampionati do të zhvillohet nga 24 deri më 28 qershor në Pallatin e Sportit “Tomorr Sinani”, ndërsa qytetarët dhe sportdashësit janë të ftuar të ndjekin nga afër emocionet dhe spektaklin që do të sjellin kampionët e rinj të Ballkanit.

Kryetari i Bashkisë Elbasan, Gledian Llatja, ka ndjekur nga afër punimet për hapjen e kanalit vaditës në zonën e Labinot-Fushë, i cili do të sigurojë ujë për rreth 300 familje fermere dhe mbi 100 hektarë tokë bujqësore.

Gjatë inspektimit, Llatja falënderoi punonjësit e Ndërmarrjes së Punëve Publike, të cilët kanë punuar me intensitet, edhe gjatë fundjavës, për të përfunduar në kohë këtë ndërhyrje të rëndësishme për bujqësinë e zonës.

Për shkak të devijimit të lumit Shkumbin, si pasojë e punimeve të Korridorit VIII, ndërhyrja ka zgjatur në kohë për shkak të vështirësive të krijuara.

Ndërkohë Bashkia Elbasan ka siguruar përkohësisht 50 litra ujë në sekondë përmes një sistemi pompimi, deri në përfundimin e veprës së marrjes.

Kanali me gjatësi rreth 1.2 kilometra po përgatitet për të përcjellë ujin nga lumi Shkumbin në të gjithë zonën e Labinot-Fushës.

Sipas kryebashkiakut Llatja, që prej datës 15 qershor të gjitha kanalet vaditëse në territor janë aktive, ndërsa ky është segmenti i fundit që po vihet në funksion për këtë sezon vaditës.