Ditë: 4 Maj 2026

Bashkia Elbasan po vijon turin e takimeve në çdo rajon dhe njësi administrative, me qëllim diskutimin e buxhetit afatmesëm dhe përcaktimin e prioriteteve për tre vitet e ardhshme, në një proces të hapur konsultimi me banorët.

Takimi i radhës u zhvillua në Shushicë, ku ishin të pranishëm kryebashkiaku i Elbasanit, Gledian Llatja, deputetja Evis Kushi, si edhe kryetari i Këshillit Bashkiak, Lutfi Lala.

Gjatë fjalës së saj, deputetja Evis Kushi vlerësoi rëndësinë e këtyre takimeve, duke theksuar se ato shërbejnë për të identifikuar nevojat më emergjente të komunitetit dhe për të dakordësuar prioritetet që do të përfshihen në planin e punës së Bashkisë së Elbasanit.

Ajo u ndal gjithashtu te potenciali zhvillimor i Shushicës, duke nënvizuar se afërsia me qytetin dhe investimet në infrastrukturë, veçanërisht rruga që ka shkurtuar distancën me Elbasanin, e bëjnë këtë zonë një nga më premtueset. Sipas Kushit, investimet kanë vijuar pa ndërprerje dhe aktualisht po punohet për ndërtimin e një shkolle me standarde bashkëkohore, e krahasueshme me shkollat më të mira të qytetit.

Nga ana e tij, kryebashkiaku Gledian Llatja u shpreh se këto takime synojnë ndërtimin e një buxheti afatmesëm 3-vjeçar sa më të përshtatur me nevojat e qytetarëve.

Ai bëri me dije se brenda këtij viti pritet të përfundojnë punimet për shkollën e re të Shushicës, e cila do t’u ofrojë fëmijëve kushte dhe standarde të njëjta me ato të shkollave më të mira në qytet dhe më gjerë.

Llatja u ndal edhe te projektet infrastrukturore, duke përmendur problematikat e lidhura me by-passin dhe urën e Byshekut, të cilat tashmë janë përfshirë në fazën e parë të projektimit. Gjithashtu, ai theksoi se po punohet për zgjidhjen e çështjeve në Bradashesh dhe për vijimin e projektit të by-passit të Elbasanit.

Në fokus të planit 3-vjeçar janë edhe investimet në infrastrukturën rrugore, ku një ndër prioritetet kryesore do të jetë ndërtimi i rrugës së re që lidh Shushicën me Gjinarin.

Në sektorin e bujqësisë, kryebashkiaku nënvizoi rritjen e prodhimit përmes sigurimit të ujit vaditës, hapjes së kanaleve kulluese dhe rritjes së sipërfaqeve të tokës së punueshme, falë ndërhyrjeve me prita lumore. Ai shtoi se në funksion të plotësimit të ciklit ekonomik do të ngrihet edhe një qendër e madhe grumbullimi, si pjesë e mbështetjes për fermerët.

Ky proces synon të garantojë një vendimmarrje transparente dhe gjithëpërfshirëse, ku çdo zë dëgjohet dhe çdo ide merr vlerësimin e duhur.

Bashkia Elbasan ka vijuar turin e konsultimeve publike për hartimin e buxhetit afatmesëm 3-vjeçar në Njësinë Administrative Papër, ku kryebashkiaku Gledian Llatja prezantoi investimet dhe prioritetet kryesore për zonën.

Gjatë bashkëbisedimit me banorët, Llatja theksoi se buxheti afatmesëm është një instrument zhvillimi që shkon përtej planifikimit vjetor, duke garantuar ndërhyrje konkrete dhe të qëndrueshme në komunitet.

“Ky është më shumë sesa një buxhet vjetor. Kemi parashikuar një sërë investimesh për këtë vit në Papër, duke nisur nga përfundimi i projektit për asfaltimin e sheshit të njësisë administrative, një rrugë e rëndësishme që do të vijojë deri tek kthesa e Tampës dhe më tej në aksin Papër–Pajun,” u shpreh ai.

Një tjetër ndërhyrje e rëndësishme lidhet me përmirësimin e furnizimit me ujë të pijshëm në fshatin Vidhas, ku do të zëvendësohet tubacioni i amortizuar i ujësjellësit, një problem i kahershëm për banorët. Sipas kryebashkiakut, punimet për rehabilitimin e këtij sistemi do të nisin së shpejti në bashkëpunim me ndërmarrjen e ujësjellësit.

Po ashtu, në fokus të investimeve mbetet edhe infrastruktura rrugore, ku është parashikuar ndërhyrja në segmentin nga nënstacioni deri në Vidhas, me një gjatësi rreth 1 kilometër.

Llatja bëri të ditur se Bashkia po punon edhe për projekte strategjike që synojnë zhvillimin afatgjatë të zonës, përtej zgjidhjes së problematikave infrastrukturore. Një ndër to është hartimi i masterplanit të zonës së Metalurgjikut, i cili pritet të adresojë një sërë çështjesh mjedisore, veçanërisht në lidhje me fushën e Paprit, lumin Shkumbin dhe tokat bujqësore që vaditen në këtë zonë.

Një mundësi e re zhvillimi për banorët e Paprit dhe fshatrave përreth është edhe “Paketa e Maleve”, e cila synon të nxisë investimet në agroturizëm dhe ekonomi rurale. Kryebashkiaku ftoi qytetarët të aplikojnë, duke e cilësuar këtë si një mundësi konkrete për të zhvilluar pronat e tyre dhe për të gjallëruar jetën ekonomike në fshat.

“Kjo është një paketë e dedikuar për ju. Merrni tokën tuaj, investoni dhe zhvilloni agroturizmin. Bashkia do të jetë mbështetëse në këtë proces, sepse synimi ynë është t’i japim jetë fshatit dhe të krijojmë mundësi reale për zhvillim,” theksoi ai.

Takimi në Papër është pjesë e një serie konsultimesh që Bashkia Elbasan po zhvillon në çdo njësi administrative dhe rajoni në qytet, me qëllim përfshirjen e qytetarëve në vendimmarrje dhe përcaktimin e prioriteteve për vitet në vijim.

Në vijim të turit të dëgjesave publike për buxhetin afatmesëm 3-vjeçar, kryetari i Bashkisë Elbasan, Gledian Llatja, së bashku me deputeten Aulona Bylykbashi, zhvilluan një takim me banorët e Rajonit nr. 3, ku u diskutuan prioritetet dhe projektet për zhvillimin e zonës.

Deputetja Bylykbashi vlerësoi pjesëmarrjen e qytetarëve në këtë proces, duke theksuar se angazhimi i tyre ndër vite ka ndikuar drejtpërdrejt në realizimin e investimeve dhe rritjen e besimit ndaj institucioneve vendore.

Në fjalën e tij, kryebashkiaku Llatja u ndal fillimisht te investimet që po kryhen, veçanërisht në drejtim të përmirësimit të rrjetit të kanalizimeve të ujërave të zeza (KUZ), ku theksoi se, “kemi një plan serioz i cili po implementohet dhe kemi vazhduar punën me KUZ, ku një pjesë e madhe e problematikave janë sistemuar dhe brenda vitit të ardhshëm do të mbyllim të gjitha problematikat që kemi me KUZ, jo vetëm në Rajonin 3, por në të gjithë Elbasanin”.

Duke u ndalur më tej tek prioritetet, ai nënvizoi se investimet do të vijojnë sipas nevojave të komunitetit, duke u fokusuar në projekte konkrete infrastrukturore dhe urbane.

“Jemi në përfundim të rrugës “Tajar Tetova” me kanalizimet e ujërave të zeza dhe sistemimin e saj, për të vijuar më pas me shtrimin e rrugës. Kemi në prioritetet tona edhe bllokun e banesave tek rruga “Adem Jashari’, si dhe ndërhyrjen në kryqëzimin e Cërrikut, një nga problematikat kryesore të zonës së unazës”, u shpreh Llatja.

Ai shtoi gjithashtu se ndër projektet madhore mbetet edhe urbanizimi i ish-autostradës së Metalurgjikut, duke theksuar: “vitin tjetër duam të fusim projektin e madh të urbanizimit dhe sistemimit të ish-autostradës së Metalurgjisë, nga rrethrrotullimi i Luleve deri në Bradashesh, si dhe zgjerimin e bulevardit kryesor nga Bradasheshi deri në Shushicë, së bashku me urën e Bushekut dhe segmentin e ri që do të hapim në lagjen ‘Emin Matraxhiu’”.

Sipas kryebashkiakut, këto janë projekte të rëndësishme zhvillimore që kërkojnë kohë dhe kapacitete financiare, ndaj janë parashikuar të realizohen në kuadër të buxhetit afatmesëm të bashkisë, në bashkëpunim të ngushtë me qytetarët.