Lajme

Në prag të nisjes së vitit të ri shkollor, Bashkia Elbasan ka filluar një fushatë të gjerë pastrimi dhe mirëmbajtjeje në të gjitha çerdhet, kopshtet dhe shkollat e qytetit.

Ekipet e Agjencisë së Shërbimeve Publike (ASHP) janë angazhuar me intensitet në punime që përfshijnë pastrimin e ambienteve të brendshme dhe të jashtme, mirëmbajtjen e infrastrukturës, si dhe krijimin e kushteve sa më të mira për të mirëpritur nxënësit dhe stafin pedagogjik.

Nëpërmjet kësaj nisme, synohet jo vetëm të garantohet një fillim i mbarë i vitit të ri shkollor, por edhe të krijohen standarde më të larta higjieno-sanitare për institucionet arsimore të qytetit.

Krahas pastrimit, gjithashtu po kryhen kontrolle për sigurinë dhe funksionalitetin e pajisjeve dhe sistemeve të ngrohjes, për të siguruar që çdo institucion arsimor është gati për sezonin e ri shkollor dhe dimrin që po afron.

 Ky proces do të vazhdojë deri në ditën e parë të shkollës, duke siguruar që të gjitha institucionet të jenë në gjendjen më të mirë të mundshme për fëmijët dhe mësuesit e tyre.

Zjarri i rënë në fabrikën e plastikës ditën e sotme rreth orës 14:40 është izoluar plotësisht dhe fatmirësisht nuk pati asnjë person të lënduar.

Për të shuar zjarrin, u angazhuan në terren mbi 10 mjete zjarrfikëse, me ndihmë edhe të bashkive të qarkut si dhe 2 mjete zjarrfikëse nga Tirana.

Mirënjohje e posaçme për 40 efektivët të cilët me përpjekje të guximshme mundësuam në kohë rekord izolimin e vatrës së zjarrit, duke shpëtuar njëherazi nga dëmtimi edhe fabrikat e prodhimit.

Ndërkohë janë duke u evidentuar dëmet materiale si pasojë e flakëve që përfshinë fabrikën e plastikës, ndërsa situata paraqitet tanimë totalisht në kontroll.

Pas takimit me drejtuesit e kompanisë, të cilëve u kërkova më shumë shpjegime në lidhje me situatën e krijuar, mora garancinë e plotë nga drejtuesit se angazhimi i tyre do të jetë maksimal për t’i garantuar siguri maksimale çdo punonjësi.

Kam folur personalisht me punonjësit, jam njohur me ankesat e tyre të drejta dhe i kam bërë me dije se mbrojtja e interesave të tyre mbetet objektiv parësor dhe i panegociueshëm!

Punëtorët do të paguhen 100%.

Do të paguhen dietat ushqimore

Punëtorët që do të qëndrojnë në shtëpi, do të paguhen deri në rifillimin e prodhimit.

Jemi duke e ndjekur me shqetësim këtë situatë duke pritur gjithashtu një reagim zyrtar nga kompania. Kundrejt çdo vendimi, çdo punonjës do të ketë gjithë mbështetjen dhe vëmendjen tonë maksimale.

“Kongresi i Arsimit Mbarëkombëtar Shqiptar” ishte tema e ekspozitës së hapur në ambientet e ish shkollës “Normale”, me rastin e 115-vjetorit të Kongresit të Elbasanit, i cili i la qytetit një trashëgimi të çmuar në arsim dhe kulturë.

Ekspozita, që paraqet rrugëtimin historik të shkrimit të gjuhës shqipe dhe momente kyçe nga Kongresi i Elbasanit dhe hapja e shkollës së parë kombëtare shqipe “Normale”, u organizua nga Muzeu Historik Kombëtar dhe Bashkia Elbasan. Ky event u përshëndet nga përfaqësuesit më të rëndësishëm lokalë, deputetët e Elbasanit, personalitete të shquara të gjuhës dhe historisë.

Gjatë këtij eventi u përshkruan zhvillimet e kongresit, duke u cilësuar si një kongres i formuar nga elitat që luajtën rol vendimtar në vendimmarrjen historike. Në fjalën e tij, kryetari i bashkisë, z. Gledian Llatja, e quajti 115-vjetorin e Kongresit si një vit jubilar, duke theksuar se Bashkia Elbasan është e angazhuar për të promovuar këtë aktivitet mbarëkombëtar. “Ashtu siç nisëm me hapjen e shkollës ‘Kostandin Kristoforidhi’ në Athinë para disa kohësh, do të vazhdojmë me aktivitete të tjera në kuadër të 115-vjetorit të shkollës ‘Normale’,” tha ai.

Kongresi i Elbasanit u mbajt nga data 2 deri më 9 shtator, një vit pas Kongresit të Manastirit. Ai u cilësua si mbarëkombëtar, pasi së pari, morën pjesë përfaqësues nga të gjitha trevat shqiptare, dhe së dyti, për shkak të vendimeve që u morën. Ndër 15 vendimet e marra, dy ishin më të rëndësishmet: organizimi dhe hapja e shkollës shqipe “Normale” dhe vendosja e një standardi të gjuhës shqipe, ku dialekti i Elbasanit u vendos si dialekti i përbashkët.

Elbasani hapi dyert për Kongresin, dhe jo vetëm delegatët, por edhe qytetarët e tjerë u angazhuan në organizimin dhe detajet e kongresit. Dyert e arsimit në Elbasan u hapën fillimisht me Kongresin e Elbasanit dhe më pas me shkollën “Normale”tha z. Llatja.

Në këtë event kumtuan edhe studiues dhe përfaqësues të pushtetit lokal, duke vlerësuar punën e madhe të këtij Kongresi. Vendimet e Kongresit të Elbasanit i dhanë një hov të mëtejshëm lëvizjes kombëtare, duke vendosur themelimin në Elbasan të një shkolle të mesme pedagogjike (normale) shqipe me gjashtë klasa, që do të përgatiste mësues për shkollat fillore shqipe dhe do të mbahej me kontributin e të gjitha klubeve dhe shoqërive shqiptare.

Ka përfunduar ndërtimi i urës së re tip Bejli, e cila do t’u vijë në ndihmë 70 familjeve të Koder Bujaras. Ura e re, e vendosur në njësinë administrative Tregan, do të lidhë fshatrat Kodër Bujaras dhe Bujaras.

Duke e cilësuar si një kërkesë të kahershme të banorëve të dy fshatrave, kryebashkiaku Llatja tha se “ky investim është realizuar për të përmirësuar jetesën e të gjithë banorëve të zones

 Ndërtimi i kësaj ure ishte një premtim i Bashkisë, i cili tani është realizuar me sukses.

Nga sot hyn në fuqi ligji për industrinë ushtarake, që i hap rrugë modernizimit dhe rivitalizimit të kapaciteteve të trashëguara të kësaj industrie në Shqipëri.

Ministri i Mbrojtjes, Pirro Vengu, shoqëruar edhe nga zv.ministri i Mbrojtjes, Dorian Tola vizituan uzinën e Mjekësit në Elbasan, për të çelur një kapitull të ri të kësaj industrie.

Ministri Vengu inspektoi disa nga mjediset e prodhimit dhe u njoh me punën që bëhet aktualisht në këto uzina. Ministri u takua me drejtues dhe punonjës të ndërmarrjes që ka nevojë emergjente për investime e që ligji i ri i siguron për ta transformuar sërish në institucion të rëndësishëm të mekanizmit ushtarak të vendit.

“Paketa ligjore adreson dhe një problematikë shumë të vjetër dhe e mbetur e pa adresuar ndër vite që është, shlyerja e detyrimeve të papaguara ndaj ish punonjësve, punonjësve aktualë, dhe të gjithë njerëzve që kanë kontribuar ndër vite në këto uzina dhe industri shumë të rëndësishme. Sot është momenti i një pikënisjeje të rë për këtë industri.

 Jemi sot bashkë me kryetarin e bashkisë së Elbasanit z. Gledian Llatja sepse e gjithë kjo industri ka një impakt ekonomik të rëndësishëm, dhe ne synojmë që të ketë një impakt jo vetëm në punësim por në të gjithë komponentët e rijetëzimit të zonës, një hapësirë shumë e madhe e cila ka nevojë për një rehabilitim mjedisor, dhe kjo është puna e parë që do të bëjë kompania”, tha ministri Vengu.

Nga ana e tij, kryetari i bashkisë z. Gledian Llatja pohoi se “ne e shohim shumë pozitive perspektivën ekonomike për punësimin pasi kjo është një zonë që zhvillon ekonominë e saj. Unë jam i bindur se edhe me standartet e reja që do të investohen do të jetë në fokus edhe punësimi, mjedisi, zhvillimi ekonomik, si edhe industria ushtarake”.

Me hyrjen në fuqi të ligjit të ri për industrinë ushtarake, bëhet i mundur krijimi i një strukture të re në formën e një shoqërie tregtare me të gjitha kapacitetet e nevojshme për të ndërvepruar në tregun e sotshëm kombëtar dhe ndërkombëtar të strategjisë ushtarake, në kuadrin e dinamikave aktuale globale të sigurisë dhe mbrojtjes.

Ringritja e industrisë ushtarake do të kërkojë një qasje të integruar dhe të koordinuar që adreson jo vetëm aspektet teknologjike dhe operative, por edhe ato ligjore, financiare, ekonomike, sociale dhe ambientale.

Gjinari, i njohur për bukurinë natyrore dhe freskinë e ajrit malor, po shndërrohet në një nga pikat më të preferuara për turizmin në Elbasan. Me punimet që kanë nisur për rehabilitimin total të qendrës së tij, turizmi në këtë zonë po përjeton një lulëzim të vërtetë. Gjinari, vendi i Bukanikut dhe pishave, tashmë është bërë edhe destinacioni i bujtinave tradicionale që ofrojnë mikpritje të ngrohtë dhe komoditet për turistët.

Një nga këto bujtina është Bujtina Bezhani, ku katin e dytë të banesës familja e ka përshtatur për t’u ofruar turistëve një eksperiencë të veçantë. Kryetari i Bashkisë Elbasan, Gledian Llatja, ka vizituar këtë bujtinë, ku është pritur nga e zonja e shtëpisë. Ajo e ka falënderuar për investimet e fundit që po kryhen në Gjinar, duke theksuar rëndësinë e tyre për zhvillimin e turizmit lokal.

“Një natyrë e freskët, një oborr i pastër plot me lule dhe pemë të stinës – kjo është zona e Gjinarit, tipike, tradicionale dhe jo vetëm,” u shpreh z. Llatja gjatë vizitës së tij. Në Bujtinën Bezhani, vizitorët mund të shijojnë gjelbërimin e pafund, pemtarinë e bollshme, si dhe një lëndinë të mrekullueshme ku mund të organizohen barbeky në çdo kohë. Kjo bujtinë ofron të gjitha kushtet për një qëndrim të këndshëm, në një ambient fantastik që i bën mysafirët të ndihen si në shtëpi.

Investimet e fundit dhe përkushtimi i komunitetit për të ofruar mikpritje të veçantë kanë bërë që numri i turistëve në Gjinar të rritet ndjeshëm. Kjo zonë, me natyrën e saj të virgjër dhe bujtinat e ngrohta, është duke u shndërruar në një destinacion të preferuar për pushuesit nga brenda dhe jashtë vendit.

Elbasani u mbush me emocion dhe poezi mbrëmjen e sotme, kur në lulishten e Muzeut Etnografik u organizua një ngjarje e veçantë poetike. Aktiviteti, i cili u realizua në kuadër të aktiviteteve të gushtit të organizuara nga Bashkia Elbasan, dhe Biblioteka Publike “ Qemal Baholli” kishte për qëllim të sjellë në jetë dhe të ruajë trashëgiminë poetike të qytetit tonë.

Në këtë pasdite magjike, pjesëmarrësit, që përfaqësonin breza të ndryshëm, recituan dhe rikthyen në kujtesë krijimtarinë popullore elbasanase. Atmosfera ishte e mbushur me emocion dhe ndjenjë, ndërsa të pranishmit përjetuan magjinë e fjalës së shkruar dhe të trashëguar nga të parët tanë.

Shkolla artistike “Onufri” në Elbasan ka përfunduar rikonstruksionin e saj të plotë, duke u shndërruar në një qendër të vërtetë artistike. Ky institucion arsimor tani është zgjeruar me klasa të reja, laboratorë shkencorë, palestër të re dhe një sallë koncertesh të dedikuar për 340 nxënës artistë. Ky projekt ambicioz u bë i mundur falë investimeve të Ministrisë së Arsimit dhe Sportit, në bashkëpunim me Bashkinë e Elbasanit.

Kryetari i Bashkisë, Gledian Llatja, shprehu mirënjohjen e tij për Ministrinë e Arsimit dhe Sportit për mbështetjen e vazhdueshme në investimet arsimore, duke theksuar se shkolla “Onufri” është një simbol i Elbasanit, një institucion që ka nxjerrë artistë të shquar dhe ka fuqizuar jetën artistike jo vetëm në Elbasan, por në të gjithë Shqipërinë e Mesme.

Për shumë vite, kjo shkollë ka qenë furnizuesi kryesor i Akademisë së Arteve me studentë të talentuar.

Tani, me infrastrukturën e re, shkolla është e gatshme të realizojë programin e saj 100%, dhe të zhvillohet më tej, duke përfaqësuar qytetin jo vetëm në evente kombëtare, por edhe ndërkombëtare.

Në këto ditë vere, Kalaja e Elbasanit po kthehet në një pikë qendrore për turistët nga e gjithë bota. Falë rëndësisë së saj historike dhe thirrjes së kryetarit të Bashkisë, Gledian Llatja, për të vizituar këtë monument të lashtësisë, qindra vizitorë nga vendi dhe bota po zbulojnë thesaret e një prej fortifikimeve më të vjetra të Shqipërisë.

Për shumë nga këta turistë, Kalaja e Elbasanit është një dritare në të kaluarën, ku historia dhe arkitektura bashkohen për të treguar rrëfimet e një qyteti që ka kaluar nëpër shekuj, duke ruajtur kulturën dhe traditat e tij. Ndërsa ecin nëpër rrugicat e kalldrëmta brenda mureve të Kalasë, vizitorët mund të ndiejnë peshën e kohës dhe të imagjinojnë jetën e dikurshme të qytetit.

Lagja “Kala” është një pjesë e veçantë e qytetit të Elbasanit dhe përbën një nga qendrat më të rëndësishme të trashëgimisë kulturore në Ballkan. Më shumë se pesë shekuj më parë, kur ushtria turke mbante të rrethuar Krujën, një pjesë e kësaj ushtrie punonte për zgjerimin e kalasë ekzistuese të “Skampinit.”

Kalaja përfshinte gjithashtu garnizonet e ushtrisë turke, qendrat tregtare dhe zona të tjera jetike të qytetit. Pas zgjerimit të qytetit dhe ardhjes së banorëve nga fshatra të ndryshëm, lagjet si “Shën Koll” dhe “Alejdine” u formuan jashtë mureve të kalasë, duke shtuar diversitetin e këtij vendi të veçantë.

Me vendim të Institutit të Monumenteve të Kulturës, lagja “Kala” u shpall Lagje Muze, një nismë që ka sjellë restaurime të rëndësishme. Shtëpitë karakteristike elbasanase janë restauruar, si dhe rrugët e kalldrëmta janë rivendosur në formën e tyre origjinale. Turistët sot mund të shijojnë ngushtësinë e rrugicave, ndërtimin karakteristik të shtëpive dhe portat masive me çekicat karakteristikë, të gjitha të ndërtuara për të ruajtur atmosferën e kaluar.

Brenda mureve të kalasë ndodhet varri i Kostandin Kristoforidhit, një figurë kyçe në zhvillimin e gjuhës shqipe. Po ashtu, lagja ka qenë shtëpia e shumë intelektualëve dhe artistëve të shquar, si Aleksandër Xhuvani dhe Dhimitër Shuteriqi, që kanë kontribuar në pasurimin e kulturës shqiptare,  si edhe kisha “Shen Maria”.

 Me ritmin e vizitave që rritet çdo vit, Kalaja e Elbasanit dhe monumentet e tjera të lashtësisë në qytet janë bërë një destinacion tërheqës për turistët. Thirrja e kryetarit të Bashkisë për të vizituar këtë thesar kulturor ka përmirësuar përvojën turistike dhe ka rritur ndërgjegjësimin për rëndësinë e ruajtjes së trashëgimisë kulturore.