Muaj: Tetor 2026

Dëgjesat me banorët për Buxhetin e vitit 2027 vijuan në Rajonin nr. 5, ku kryetari i Bashkisë Elbasan, Gledian Llatja, zhvilloi bashkëbisedimin me qytetarët në shkollën “Fadil Gurmani”, një prej investimeve të rëndësishme të realizuara në këtë zonë.

Dikur një shkollë për të cilën prindërit kërkonin kushte më të mira për zhvillimin e procesit mësimor, sot “Fadil Gurmani” është rikonstruktuar tërësisht dhe është një nga shkollat me kushtet më të mira në Elbasan. Krahas ambienteve të shkollës, është krijuar edhe një fushë sportive, e cila përdoret jo vetëm nga nxënësit, por edhe nga komuniteti.

Duke folur për investimet në Rajonin nr. 5, kryebashkiaku Llatja u ndal edhe te ndërhyrjet e realizuara në sheshet e pallateve të kësaj zone, ndërsa theksoi se të tjera ndërhyrje pritet të nisin së shpejti, sipas prioriteteve të përcaktuara nga banorët.

Një tjetër ndërhyrje e parashikuar lidhet me sistemin kapot, termoizolimin e pallateve. Bashkia ka bërë një studim për eficiencën e energjisë në lagjet Haxhias dhe Partizani, me synim kursimin e energjisë për banorët, përmirësimin e kushteve të banimit dhe rritjen e vlerës së pallateve përmes termoizolimit.

Një nga problematikat kryesore të ngritura nga banorët gjatë buxhetimit me pjesëmarrje ka qenë ndërhyrja në sheshet prapa Postës së lagjes.

Llatja u ndal edhe te investimet që Bashkia ka realizuar në Elbasan për sportin dhe arsimin, duke theksuar se ka pasur një rivitalizim të terreneve sportive dhe ndërhyrje në shkolla, me synim krijimin e kushteve më të mira për fëmijët dhe të rinjtë.

Në Rajonin nr. 5, banorët votuan prioritetet e tyre gjatë dëgjesës për Buxhetin 2027. Kërkesat dhe problematikat e ngritura prej tyre do të përkthehen në investime konkrete në buxhetin e vitit të ardhshëm.

Buxhetimi me pjesëmarrje ka në themel zërin e qytetarit, duke i dhënë komunitetit mundësinë të përcaktojë prioritetet dhe investimet e nevojshme për zonën ku jeton.

Në Tregan, ndër prioritetet e Buxhetit 2027 janë asfaltimi i rrugës nga aksi Elbasan–Gramsh deri te shkolla “Banush Llapushi” në Muçan, përfundimi i segmentit të mbetur të rrugës kryesore në Kyçyk, ndërtimi i rrugës së varrezave në Llixhë Qendër dhe ndërtimi i Unazës së Llixhave të Hidrajt.

Do të vijojmë gjithashtu punën për “Rrugën e Qershive”, e cila lidh Llixhat e Hidrajt me Çikalleshin, Shilbatrën dhe Gurishtin, si dhe për segmentin Kryezjarr–Tudan–Shkolla Trepsenisht.

Në Blerimas parashikohet ndërtimi i ujësjellësit të ri. Ndërkohë, në Llixhë Qendër dhe në Llixhat e Hidrajt planifikojmë përmirësimin e hapësirave publike, përmes ndërtimit të këndeve të lojërave dhe vendosjes së ndriçimit e stolave.

Zhvillimi i zonës së Llixhave mbetet një prioritet, me synim përmirësimin e infrastrukturës dhe shërbimeve për banorët, bizneset dhe vizitorët që e frekuentojnë këtë destinacion gjatë gjithë vitit.

Buxheti 2027 do të reflektojë kërkesat e përcaktuara së bashku me banorët, duke mundësuar investime konkrete në Tregan dhe në çdo njësi administrative të Elbasanit.

Buxhetimi me pjesëmarrje vijoi në Njësinë Administrative Gjinar, ku së bashku me banorët diskutuam prioritetet dhe investimet që do të përfshihen në Buxhetin 2027.

Në fokus janë investimet në infrastrukturën rrugore, përmirësimi i furnizimit me ujë të pijshëm dhe sistemimi i rrugëve të fshatrave. Ndër ndërhyrjet e parashikuara janë asfaltimi i rrugëve Brekor–Pobrat dhe Gjinar–Pashtresh, përfundimi i punimeve në aksin Elbasan–Gjinar, si dhe rikonstruksioni i ujësjellësve në Pobrat dhe Lleshan.

Përmes investimeve infrastrukturore dhe mundësive që ofron Paketa e Maleve, synojmë të mbështesim zhvillimin e turizmit, agroturizmit dhe ekonomisë lokale, duke e kthyer Gjinarin në një destinacion tërheqës në të katërta stinët.

Bashkë me banorët, përcaktojmë prioritetet dhe ndërtojmë një të ardhme më të mirë për Gjinarin!

Buxhetimi me pjesëmarrje vijon në Njësinë Administrative Papër, ku banorët diskutuan problematikat e zonës dhe përcaktuan prioritetet që synojnë të kthehen në investime për Buxhetin 2027.

Kryetari i Bashkisë Elbasan, Gledian Llatja, tha se përmes këtij procesi, ndër vite, janë zgjidhur një sërë problematikash të ngritura nga vetë komuniteti, nga ndërhyrjet në përrenj e kanale deri te infrastruktura rrugore.

“Gjithmonë buxhetimi me pjesëmarrje ka interes dhe pjesëmarrje, për faktin se në Papër kemi zgjidhur shumë nga problemet tona. Ato që kemi diskutuar, i kemi çuar drejt zgjidhjes. Kemi ndërhyrë në pritat lumore në përroin e Gurrës, për nevojat që banorët i kanë pasur gjatë gjithë kohës, kemi punuar për disa pjesë rrugësh që duheshin asfaltuar në Vidhas, në Papër-Sollak dhe për probleme të tjera në fshatrat tona”, u shpreh Llatja.

Ndër prioritetet e përcaktuara nga komuniteti janë infrastruktura rrugore dhe këndi i lojërave në fshatin Papër. Por investimi kryesor i këtij viti është asfaltimi i aksit kryesor lidhës, që përfshin qendrën e fshatit Papër dhe rrugën që lidh katër fshatra – Papër, Bizhutë, Pajun dhe Papër-Sollak – deri në Damë.

 Sipas Llatjas, për këtë investim projekti është përfunduar, është shpallur fituesi dhe janë marrë masat për nisjen e punimeve. “Ne nuk kemi parë vetëm problemet që kanë të bëjnë me rrugët dhe kanalizimet. Gjatë gjithë kohës jemi përpjekur të shohim edhe problemet e tjera komunitare, ndaj kemi qenë dhe do të jemi këtu”, tha kryebashkiaku.

Llatja theksoi se buxhetimi me pjesëmarrje është një moment i demokracisë së drejtpërdrejtë, ku qytetarët vendosin për prioritetet e buxhetit, duke nënvizuar se fondet nuk janë të pakufizuara dhe për këtë arsye jo të gjitha kërkesat mund të realizohen njëherësh.

Procesi vijoi me diskutimin e banorëve të Njësisë Administrative Papër, të cilët paraqitën kërkesat dhe problematikat e tyre, ndërsa përmes votimit përcaktuan prioritetet që kërkojnë të përfshihen në Buxhetin 2027.

Në Krushevë ka nisur trajnimi praktik dyditor “Turizmi i qëndrueshëm dhe eficient në energji: Zgjidhje praktike për bizneset turistike”, në kuadër të projektit IPA CBC “Krusheva dhe Elbasani – Udhëtim në Natyrë dhe Aventurë”, financuar nga Bashkimi Evropian.

Në trajnim marrin pjesë përfaqësues të bizneseve turistike, strukturave akomoduese, pushtetit vendor dhe partnerë lokalë nga Krusheva dhe Elbasani.

Gjatë dy ditëve, pjesëmarrësit do të njihen me zgjidhje praktike për uljen e konsumit të energjisë, përdorimin e energjisë së rinovueshme, reduktimin e mbetjeve dhe shfrytëzimin më efikas të burimeve, me synim zhvillimin e një turizmi më të gjelbër dhe të qëndrueshëm në rajonin ndërkufitar Krushevë–Elbasan.

Në shkollën “Naim Frashëri” në Elbasan, një prej institucioneve me më shumë se një shekull histori në arsimin shqiptar, po vijojnë me ritme të larta punimet për rikonstruksionin e plotë të godinës dhe ndërtimin e ambienteve të reja, me synimin për të krijuar kushte bashkëkohore për nxënësit dhe mësuesit.

Ministrja e Arsimit dhe Sportit, Mirela Kumbaro, së bashku me kryetarin e Bashkisë Elbasan, Gledian Llatja, dhe drejtoreshën e ZVA Elbasan, Vesa Llanaj Lico, vizituan shkollën për të parë nga afër ecurinë e punimeve.

Projekti përfshin rikonstruksionin e godinës ekzistuese dhe ndërtimin e një shtese të re, e cila do t’i shtojë shkollës 10 klasa të reja. Këto hapësira do të mundësojnë zhvillimin e procesit mësimor pa turne për më shumë se 700 nxënës, duke përmirësuar ndjeshëm kushtet e mësimit dhe organizimin e jetës shkollore.

Shkolla do të pajiset me laboratorë modernë, palestër dhe terrene sportive, hapësira rekreative, si dhe ambiente të dedikuara për arsimin parashkollor. Projekti parashikon gjithashtu krijimin e një muzeu, instalimin e sistemeve fotovoltaike për rritjen e eficiencës energjetike dhe rreth 5 mijë metra katrorë sipërfaqe të gjelbëruar, duke promovuar një mjedis më të shëndetshëm dhe edukimin e qëndrueshëm mjedisor e qytetar.

Një vëmendje e veçantë i është kushtuar edhe sistemeve teknike, përfshirë ngrohjen dhe kaldajën, me qëllim garantimin e kushteve sa më të mira për zhvillimin e procesit mësimor gjatë gjithë vitit shkollor.

Shkolla “Naim Frashëri”, e cila u shërben rreth 700 nxënësve dhe 72 mësuesve, pritet që pas përfundimit të punimeve të ofrojë një infrastrukturë tërësisht të përmirësuar, me ambiente moderne për mësimin, aktivitetet sportive dhe zhvillimin e jetës komunitare.

Në kuadër të projektit MATRA, përfaqësues të Bashkisë Elbasan zhvilluan një vizitë studimore në Bashkinë Assen, në Holandë, ku u mirëpritën nga zëvendëskryetari i Bashkisë Assen, Willard Bouwmeester.

Vizita u zhvillua në formatin Peer-to-Peer dhe kiaste në fokus shkëmbimin e përvojave mbi digjitalizimin e shërbimeve publike dhe rritjen e pjesëmarrjes së qytetarëve në proceset e qeverisjes vendore.

Gjatë këtij shkëmbimi, përfaqësuesit e Bashkisë Elbasan u njohen me praktikat holandeze për ofrimin e shërbimeve digjitale, forcimin e transparencës dhe krijimin e mekanizmave që nxisin përfshirjen aktive të qytetarëve në vendimmarrje.

Kjo vizitë synon të forcojë bashkëpunimin ndërmjet dy bashkive, të mundësojë shkëmbimin e njohurive dhe të sjellë praktika inovative në shërbim të qytetarëve të Elbasanit, drejt një qeverisjeje vendore më të hapur, digjitale dhe gjithëpërfshirëse.