Lajme

Instituti Kombëtar i Trashëgimisë Kulturore ka përfunduar restaurimin e Stacionit Antik Ad Quintum, një monument i rrallë përgjatë rrugës Egnatia, duke hedhur një hap të rëndësishëm në ruajtjen e trashëgimisë kulturore.

Ky stacion antik, i njohur si një nga ndalesat më të rëndësishme të rrugës Egnatia, ndodhet në fshatin Bradashesh, pranë Elbasanit. Në lashtësi, ai shërbente si një mutatio (stacion pushimi) për udhëtarët dhe tregtarët që lëviznin përgjatë kësaj arterieje të rëndësishme romake. Një nga elementët më të veçantë të këtij stacioni është hamami, një kompleks banjash publike që daton në shekullin e II të erës sonë.

Stacioni ka një planimetri drejtkëndëshe me sipërfaqe 130 m² dhe përbëhet nga dhoma e zhveshjes, mjedisi i ngrohtë dhe ai me ujë të ftohtë. Sistemi i ngrohjes funksiononte me një furrë dhe një sistem hipokaust, duke siguruar qarkullimin e gazrave të nxehtë përmes dyshemesë dhe mureve.

Gjatë regjimit komunist, këto banja u mbyllën dhe me kalimin e viteve, shumë prej strukturave ranë në gjendje të degraduar. Megjithatë, falë restaurimit të plotë, Stacioni Antik Ad Quintum tashmë është gati të mirëpresë vizitorë dhe të rijetojë si një pjesë e rëndësishme e trashëgimisë historike të Elbasanit.

Ky monument kulturor, i mbrojtur nga Drejtoria Rajonale e Monumenteve të Kulturës, pritet të tërheqë turistë dhe studiues të historisë, duke i dhënë një vlerë të shtuar turizmit kulturor në zonë.

Marka “Made in Albania” po fiton gjithnjë e më shumë terren në tregjet ndërkombëtare, falë mbështetjes së qeverisë për fermerët dhe bujqësinë vendase.

Ngarkesat e fundit të lakrës së Brukselit janë gati për eksport, ndërsa fermerët e Shirgjanit vijojnë me mbjelljen e kulturave të tjera bujqësore, duke garantuar prodhim cilësor dhe të qëndrueshëm.

“Vetëm këtë vit, nga zona e Shirgjanit janë eksportuar 1,600 ton lakër, një sukses që vjen si rezultat i punës së palodhur të fermerëve tanë dhe mbështetjes konkrete të qeverisë për zhvillimin e bujqësisë. Ky është modeli që ne duam të forcojmë edhe më shumë, një fshat të gjallë, një ekonomi të qëndrueshme dhe produkte cilësore që bëjnë krenar çdo shqiptar!”  është shprehur kryetari i Bashkisë Elbasan, Gledian Llatja.

Ky është ndryshimi që duam të shohim, më shumë mbështetje për fermerët, më shumë sukses për Shqipërinë!

Në ambientet e Pallatit të Sportit “Tomorr Sinani” në Elbasan u zhvillua  panairi tradicional “Work & Study”, një mundësi e rëndësishme për maturantët dhe të rinjtë që kërkojnë alternativa për të ardhmen e tyre.

Mbi 30 universitete prezantuan programet e tyre akademike dhe bursat që ofrojnë, ndërsa biznese të ndryshme vendase dhe kombëtare paraqitën mundësi konkrete punësimi. Ky event u krijoi të rinjve hapësirën e nevojshme për të marrë informacion të detajuar dhe për të ndërtuar ura komunikimi me përfaqësuesit e institucioneve arsimore dhe të sektorit privat.

Panairi “Work & Study” është tashmë një traditë e konsoliduar në Elbasan, duke shërbyer si një pikë takimi mes arsimit dhe tregut të punës. Përfaqësues të universiteteve dhe bizneseve theksuan rëndësinë e bashkëpunimit për të ndihmuar të rinjtë të bëjnë zgjedhje të informuara dhe të sigurojnë një të ardhme profesionale të qëndrueshme.

Një tjetër investim i rëndësishëm në infrastrukturën rurale ka përfunduar në fshatin Gjergjan, konkretisht në lagjen Xhami, ku është shtruar me asfalt një segment rrugor prej 1.2 kilometrash. Kjo ndërhyrje ishte një kërkesë e kahershme e banorëve, veçanërisht për pjesën e pjerrët të rrugës, e cila bëhej problematike në rastet e reshjeve, për mjetet ashtu edhe për banorët.

Ky investim u realizua me mbështetjen e Fondit Shqiptar të Zhvillimit dhe i shërben jo vetëm banorëve të Gjergjanit, por edhe një pjese të fshatit Kështjellas, ku është asfaltuar pothuajse 1 kilometër rrugë.

Kryetari i Bashkisë Elbasan, Gledian Llatja, i pranishëm gjatë inspektimit të punimeve, theksoi rëndësinë e këtij investimi për komunitetin lokal:

“Jemi të angazhuar për të përmirësuar infrastrukturën jo vetëm në qytet, por edhe në zonat rurale. Kemi realizuar mbi 10 kilometra rrugë në faza të ndryshme investimi, duke përmirësuar jetën e mijëra banorëve. Gjithashtu, kemi planifikuar një ndërhyrje të rëndësishme në fshatin Kështjellas, i cili ndonëse është më i vogël, përballet me problematika të theksuara për shkak të terrenit kodrinor ku ndodhet.”

Llatja shtoi se investimet e Bashkisë Elbasan do të vijojnë në të gjitha njësitë administrative, duke përmendur edhe projekte të tjera infrastrukturore në bashkëpunim me Bashkinë Cërrik:

“Po përgatitemi për një ndërhyrje madhore në rrugët kryesore të fshatrave Bujar dhe Kodër Bujaras, në bashkëpunim me bashkinë e Cerrikut si dhe në rrugën kryesore të fshatit Murriqan. Objektivi ynë është që çdo zonë, pavarësisht largësisë nga qyteti, të ketë infrastrukturë të përmirësuar dhe të sigurojmë kushte më të mira për të gjithë banorët.”

Investimi në rrugën e Gjergjanit është pritur  nga banorët, të cilët tashmë kanë një akses më të lehtë dhe më të sigurt drejt qendrave të tjera urbane. Përmirësimi i infrastrukturës rrugore në zonat rurale mbetet një prioritet i Bashkisë Elbasan, me projekte që synojnë të modernizojnë rrjetin rrugor dhe të rrisin cilësinë e jetës për komunitetet lokale.

Në Elbasan është nënshkruar kontrata e Angazhimeve për Neutralitetin Klimatik 2030, një hap i rëndësishëm drejt zhvillimit të qëndrueshëm dhe reduktimit të ndotjes mjedisore. Në këtë nismë janë përfshirë aktorë kryesorë si Bashkia e Elbasanit, Ministria e Shtetit për Pushtetin Vendor, Climate-Neutral and Smart Cities Mission, Agjencia për Eficensën e Energjisë, Universiteti “Aleksandër Xhuvani” dhe Prefektura e Elbasanit.

Bashkia Elbasan është përzgjedhur si një nga 100 qytetet përfituese të Misionit Europian për Qytetet Neutrale ndaj Klimës dhe Qytetet e Zgjuara, pas shprehjes së interesit të bërë më 31 janar 2021. Në kuadër të këtij misioni, Bashkia ka ngritur struktura të posaçme që do të merren me identifikimin, zbatimin dhe monitorimin e projekteve me impakt të drejtpërdrejtë në mjedis dhe eficiencën e energjisë.

Kryetari i Bashkisë Elbasan, Gledian Llatja, u shpreh se ky është një moment kyç për të ardhmen e qytetit dhe për përmirësimin e cilësisë së ajrit në zonën industriale, duke përmendur edhe projekte konkrete si:

Projekti “Përshtatja ndaj Ndryshimeve Klimatike në Menaxhimin Ndërkufitar të Rrezikut nga Përmbytjet”, i financuar nga Ministria Gjermane për Bashkëpunim dhe Zhvillim Ekonomik (BMZ) dhe i implementuar nga GIZ.

Zhvillimi i qëndrueshëm rural përmes projektit “Cash for Work” me mbështetjen e Ambasadës Suedeze dhe asaj Amerikane.

Hartimi i Planit Strategjik për Ndryshimet Klimatike në bashkëpunim me UNDP.

Implementimi i Planit Strategjik për Lëvizjen e Qëndrueshme Urbane (SUMP), financuar nga GIZ.

Projekti për ngritjen e “Murit të Gjelbër” në zonën e ish-metalurgjisë, me qëllim reduktimin e ndotjes së ajrit dhe krijimin e sipërfaqeve të gjelbra.

“Tashmë Elbasani ka hyrë në rrugën drejt neutralitetit klimatik. Në bashkëpunim me partnerët tanë vendorë dhe ndërkombëtarë, do të punojmë për të ndërtuar një qytet më të pastër dhe më të qëndrueshëm për brezat e ardhshëm,” tha kryebashkiaku Llatja.

Në ceremoninë e nënshkrimit ishin të pranishëm Ministri i Shtetit për Pushtetin Vendor, Arbjan Mazniku, rektorja e Universitetit “Aleksandër Xhuvani”, Elvira Fetahu, përfaqësuesja e Climate-Neutral and Smart Cities Mission, Laura Hetel, drejtori i Agjencisë për Eficensën e Energjisë, Ani Hasa, dhe Prefekti i Qarkut Elbasan, Ilir Bejtja.

Ky bashkëpunim synon uljen e emetimeve të karbonit deri në vitin 2030 dhe transformimin e Elbasanit në një model të qëndrueshëm për qytetet e tjera në vend.

Elbasani u transformua në një arenë kulturore të gjallë gjatë ditës së sotme, kur Bulevardi “Aqif Pasha” u mbush me jetë, ngjyra dhe ritme tradicionale. Në këtë event të veçantë, 20 grupe folklorike nga të gjitha trevat shqipfolëse sollën në skenë një spektakël që shpaloste pasurinë dhe magjinë e traditës shqiptare.

Atmosfera e ditës ishte e mbushur me muzikë, vallëzime tradicionale dhe kostume që rrëfejnë historinë e pasur kulturore të rajonit. Audienca, përbërë nga banorë dhe vizitorë nga qytete të tjera, u zhyt në një eksperiencë të paharrueshme që bashkoi të gjithë me gjuhën universale të folklorit.

Elbasani foli me gjuhën e folklorit, duke sjellë një frymë verore dhe duke forcuar lidhjet kulturore midis komuniteteve shqipfolëse. Kjo ditë festimi jo vetëm që pasuroi traditat e vendit, por edhe promovoi unitetin dhe krenarinë kulturore, duke përçuar mesazhin se çdo hap, çdo notë dhe çdo vallëzim është një dëshmi e gjallë e historisë dhe identitetit shqiptar.

Me këtë iniciativë, qyteti Elbasan vazhdon të mbajë gjallë traditat e veta dhe të krijojë momente të paharrueshme që bashkojnë komunitetin për një festë verore plot ngjyra dhe emocione.

Elbasani mirëpriti sot Trofeun “Dita e Verës”, një aktivitet tashmë tradicional që mbledh çiklistë nga qytete të ndryshme të vendit, duke promovuar sportin dhe një stil jetese të shëndetshëm.

Të apasionuarit pas çiklizmit kaluan një ditë fantastike, duke përshkuar rrugët e qytetit në një atmosferë festive dhe plot energji. Aktiviteti u përshëndet nga Kryetari i Bashkisë Elbasan, Gledian Llatja, i cili vlerësoi angazhimin e të rinjve dhe sportdashësve në këtë event të rëndësishëm.

Falë masave të marra nga Policia e Shtetit dhe ajo Bashkiake, turi u zhvillua pa probleme, duke garantuar sigurinë e çiklistëve dhe qytetarëve që ndoqën nga afër këtë garë sportive.

Trofeu “Dita e Verës” është kthyer në një traditë që jo vetëm promovon sportin, por edhe promovon qytetin e Elbasanit si një destinacion të rëndësishëm për evente sportive dhe kulturore.

Bashkia Elbasan rikujton qytetarët për masat e marra në garantim e mbarëvajtjes së aktivitetit çiklistik “Trofeu Dita e Verës ”.

Më datë 16.03.2025, do të zhvillohet aktiviteti çiklistik “Trofeu Dita e Verës”.

Për mbarëvajtjen e këtij aktiviteti, Bashkia e Elbasanit, Policia Bashkiake dhe strukturat e Policisë Rrugore do të marrin masa, me qëllim rritjen e parametrave të sigurisë rrugore, sigurimin e qarkullimit të lirë dhe pa rreziqe për garuesit, si dhe parandalimin e ngjarjeve rrugore.

Për këtë qëllim, ju informojmë si më poshtë:

➡️Më datë 16.03.2025, prej orës 08:00 deri në përfundim të aktivitetit, do të ketë kufizime të qarkullimit në këto rrugë;

• Bulevardi “Aqif Pasha”
• Rruga “Muhamet Karadaku”
• Rruga “Ismail Zyma”
• Rruga “Shën Thanasi”
• Rruga “Papa Jorgji Theofari”
• Rruga “Abedin Caushi”
• Rruga “Kozma Naska”
• Rruga “Kamber Sejdini”

Bashkia Elbasan dhe policia kërkojnë mirëkuptimin e përdoruesve të rrugës, për ndalimin e qarkullimit të mjeteve, në këto rrugë, nga momenti i fillimit të këtij aktiviteti (sipas orarit të paracaktuar) deri në përfundim të tij.

Duke ju falënderuar për mirëkuptimin.