Lajme

Në këtë ditë të 13 marsit, qyteti i Elbasan është mbushur me atmosferën e veçantë të Dita e Verës, ku gëzimi, tradita dhe ngjyrat e festës janë ndjerë në çdo cep të qytetit. Qindra qytetarë, familje dhe vizitorë kanë shëtitur përgjatë stendave të panairit, duke shijuar nga afër punimet artizanale dhe shijen e traditës që sjell kjo festë.

Në disa pika të qytetit, maskotat e Teatrit të Ftohtë kanë argëtuar fëmijët dhe kalimtarët, duke krijuar momente plot buzëqeshje dhe një atmosferë festive që i ka dhënë qytetit energji të veçantë në këtë ditë të bukur pranvere.

Një nga ndalesat më të vizituara ka qenë Panairi i Zejeve, ku artizanët kanë ekspozuar punimet e tyre tradicionale, duke ruajtur dhe gjallëruar mjeshtërinë e trashëguar ndër breza. Ndërsa Panairi i Ballokumeve ka sjellë aromën dhe shijen karakteristike të kësaj ëmbëlsire simbol të qytetit, të përgatitur me përkushtim nga amvisa dhe artizanë që e mbajnë gjallë këtë traditë të veçantë të Elbasanit.

Atmosfera festive është vizituar edhe nga kryetari i Bashkisë së Elbasan, Gledian Llatja, i cili ka vizituar stendat e panairit dhe është takuar me artizanët dhe qytetarët, i shoqëruar nga nënkryetarja e bashkisë Klaudja Krasnika.

Kjo ditë e mbushur me ngjyra, shije dhe aktivitete festive e ka kthyer qytetin në një qendër gëzimi për të gjithë, ku tradita dhe komuniteti bashkohen për të festuar ardhjen e pranverës. Festa vazhdon gjatë gjithë ditës me plot surpriza dhe aktivitete për qytetarët dhe vizitorët.

Në Elbasan, festa e pranverës nuk fillon vetëm më 14 mars. Ajo nis shumë më herët, duke e kthyer qytetin për disa ditë rresht në një skenë të madhe aktivitetesh kulturore, artistike dhe festive. Këtë vit, atmosfera e Ditës së Verës ka nisur që më 9 mars, duke sjellë çdo mbrëmje gjallëri në sheshe, rrugë dhe ambiente publike të qytetit.

Qyteti është ndriçuar nga dritat e skenave festive, ndërsa muzika dhe zërat e të rinjve kanë mbushur shëtitoret. Çdo mbrëmje ka sjellë një aktivitet të ri, koncerte, performanca artistike, aktivitete për fëmijë, panaire dhe programe kulturore që kanë tërhequr qytetarë dhe vizitorë të shumtë.

I veçanta e këtyre festimeve është se ato nuk përqendrohen vetëm në një ditë, por shtrihen në disa ditë rresht, duke i dhënë qytetit një ritëm të pandërprerë feste. Familje të tëra dalin në shëtitore, fëmijët mbushin hapësirat e dedikuara për lojëra, ndërsa të rinjtë bëhen pjesë e koncerteve dhe aktiviteteve artistike që zgjasin deri në orët e vona të mbrëmjes.

Panairet me produkte tradicionale dhe artizanale kanë sjellë një tjetër ngjyrë në qytet. Në stendat e vendosura përgjatë shëtitores, vizitorët kanë mundur të shijojnë ëmbëlsirat tradicionale, ndër të cilat nuk mungon simboli i kësaj feste, ballokumja, e përgatitur sipas traditës së hershme elbasanase.

Kryetari i Bashkisë së Elbasanit, Gledian Llatja, pohon se aktivitetet festive do të jenë të shumta gjatë gjithë javës, me këngëtarët më të njohur të Shqipërisë që do të ngjiten në skenat e qytetit. Ai thekson gjithashtu se të gjitha hotelet në Elbasan, përfshirë edhe ato në Gjinar e në Llixha janë tashmë të prenotuara, duke e kthyer qytetin në një qendër feste dhe shijimesh të larmishme për vizitorët.

Netët e festës kanë qenë gjithashtu një mundësi për të promovuar kulturën dhe traditën e qytetit. Grupet artistike, këngëtarët dhe formacionet muzikore kanë sjellë performanca që kanë bashkuar breza të ndryshëm rreth muzikës dhe vallëzimit.

I gjithë ky program i pasur aktivitetesh është organizuar nën kujdesin e kryetarit të Bashkisë së Elbasanit, Gledian Llatja, me synimin për ta kthyer qytetin në një destinacion festiv gjatë gjithë këtyre ditëve të pranverës. Përmes këtij programi, Bashkia ka synuar jo vetëm ruajtjen e traditës së Ditës së Verës, por edhe gjallërimin e jetës kulturore dhe turistike të qytetit.

Dhe ndërsa çdo mbrëmje sjell aktivitete të reja, atmosfera festive kulmon në pragun e 14 marsit, kur Elbasani mbushet me vizitorë nga e gjithë Shqipëria për të përjetuar nga afër festën që prej shekujsh identifikohet me këtë qytet.

Në këto ditë, Elbasani duket sikur jeton në një ritëm tjetër. Rrugët janë më të mbushura, buzëqeshjet më të shumta dhe muzika nuk pushon. Është periudha kur qyteti hap dyert për të gjithë dhe kur pranvera festohet me një energji që vetëm Elbasani di ta krijojë.

Kampionati i basketbollit për shkollat 9-vjeçare të qytetit të Elbasanit, “Kupa e Luleve”, ka përfunduar pas disa javësh garë plot energji, rivalitet sportiv dhe emocione të bukura për nxënësit pjesëmarrës.

Finalja e këtij kampionati u zhvillua në Pallatin e Sportit “Tomorr Sinani”, ku skuadrat më të mira të turneut u përballën për titullin kampion, duke dhuruar një atmosferë entuziaste dhe ndeshje me ritëm të lartë.

Në finalen e vajzave u përballën ekipet e shkollës “Bardhyl Popa” dhe Green School. Pas një ndeshjeje me plot aksione të bukura, skuadra e “Bardhyl Popa” arriti të shpallet kampione e këtij edicioni.

Ndërkohë, në finalen e djemve u përballën ekipet e shkollave “Jorgji Dilo” dhe “Imelda Lambertini”. Në një përballje me rivalitet të fortë dhe lojë dinamike, titullin kampion e fitoi skuadra e “Jorgji Dilo”.

Kampionati i basketbollit “Kupa e Luleve”, i cili nisi më 2 shkurt, u organizua nga Qendra Kulturore e Fëmijëve Elbasan në bashkëpunim me Zyrën Vendore të Arsimit, duke bërë bashkë 18 shkolla 9-vjeçare të qytetit në një garë sportive.

Në hollin e Teatrit “Skampa” u hap për publikun elbasanas ekspozita “Stinët” e piktorit elbasanas Sadik Kasa, një takim i veçantë me veprat e një prej figurave më të spikatura të artit pamor në qytetin tonë.

Ekspozita solli një përmbledhje veprash që pasqyrojnë ndjeshmërinë artistike dhe përvojën e gjatë krijuese të autorit, duke ofruar një reflektim artistik mbi stinët e jetës përmes ngjyrave dhe peizazheve të piktorit.

Sadik Kasa është një nga emrat e njohur të artit pamor në Elbasan dhe më gjerë, me një krijimtari të gjatë dhe një kontribut të rëndësishëm në jetën artistike dhe kulturore të qytetit.

Një moment i veçantë i kësaj dite ishte akordimi i titullit “Qytetar Nderi” për piktorin Sadik Kasa, me motivacionin “Për kontributin e vyer në jetën artistike dhe kulturore, si një ndër artistët e rëndësishëm të qytetit, me një krijimtari të gjatë të një niveli të lartë profesional.”

Në ceremoninë e dhënies së titullit ishte i pranishëm edhe Kryetari i Bashkisë Elbasan, Gledian Llatja, i cili vlerësoi punën dhe përkushtimin e piktorit Sadik Kasa ndër vite, në pasurimin e artit pamor dhe në zhvillimin e jetës kulturore të qytetit të Elbasanit.

Ambasadori i Italisë, Marco Alberti, zhvilloi një vizitë zyrtare në Elbasan, ku u prit në zyrën e Kryetarit të Bashkisë, Gledian Llatja, duke vijuar më pas me një seri vizitash që pasqyrojnë bashkëpunimin ekonomik dhe kulturor mes Elbasanit dhe partnerëve italianë.

Ambasadori vizitoi disa biznese italiane që ushtrojnë aktivitet në Elbasan, ku u njoh me investimet dhe zhvillimet e tyre në qytet.

Më pas, ai pa nga afër gatimin e ballokumes tradicionale të Elbasanit, të përgatitur me miell misri italian, duke vlerësuar lidhjen mes traditës lokale dhe produktit italian.

Kryetari Gledian Llatja e shoqëroi gjithashtu Ambasadorin në Bazilikën Paleokristiane pranë Rrapit të Bezistanit, ku diskutuan mundësitë për një investim të përbashkët për ta bërë këtë monument historik më të aksesueshëm me fonde të Bashkimit Evropian.

Vizita përfundoi me një shëtitje në qendrën e qytetit, ku Ambasadori shijoi atmosferën festive të Ditës së Verës dhe iu bashkua sofres tradicionale të Elbasanit, një traditë që ka ruajtur mikpritjen dhe kulturën qytetare ndër shekuj.

Kjo vizitë nënvizon angazhimin e Bashkisë së Elbasanit dhe kryetarit Gledian Llatja për të promovuar traditat, kulturën dhe mundësitë ekonomike të qytetit, si dhe për të forcuar marrëdhëniet me partnerët italianë.

Parku “Rinia” u mbush me gëzim, ngjyra dhe energjinë e fëmijëve gjatë koncertit festiv të kopshteve, organizuar në kuadër të festimeve të Ditës së Verës. Dhjetëra vogëlushë u ngjitën në skenë, duke sjellë këngë, valle dhe interpretime të ndryshme artistike që krijuan një atmosferë të ngrohtë festive për të gjithë të pranishmit.

Me kostume shumëngjyrëshe dhe plot entuziazëm, fëmijët dhuruan emocione të bukura për prindërit dhe qytetarët që kishin mbushur parkun për të ndjekur aktivitetin. Interpretimet e tyre u shoqëruan me duartrokitje të shumta, duke e kthyer këtë koncert në një moment të veçantë të festës.

Ky aktivitet solli në qendër talentin dhe energjinë e më të vegjëlve, të cilët me spontanitetin dhe gëzimin e tyre i dhanë një tjetër gjallëri festimeve të Ditës së Verës në qytet. Koncerti i kopshteve në Parkun “Rinia” u kthye kështu në një nga momentet më të dashura për familjet dhe komunitetin, duke mbledhur së bashku shumë qytetarë në një atmosferë të bukur festive.

Sofrat e Elbasanit këto ditë janë të mbushura plot në pritje të miqve për “Ditën e Verës” , por sofra më e bukur është ajo e vogëlushëve tanë të kopshteve.

Të stiluar me veshje popullore dhe nën një ekspozitë të punimeve të tyre artistike, fëmijët, të ulur në sofra, krijuan një atmosferë të ngrohtë e festive, duke e mbushur parkun me gjallëri dhe ngjyra.

Të vegjlit, të shoqëruar nga edukatorë dhe prindër, sollën sofrat e tyre të vogla të zbukuruara me elementë tradicionalë, gatime karakteristike të zonës dhe simbolin më të njohur të kësaj feste, ballokumen e Elbasanit. Sofrat u pasuruan gjithashtu me vizatime dhe punime artistike të realizuara nga vetë fëmijët, duke i dhënë aktivitetit edhe më shumë ngjyra dhe kreativitet.

Aktivitetin e përshëndeti edhe Kryetari i Bashkisë, Gledian Llatja, i cili përshëndeti fëmijët dhe vlerësoi rolin e prindërve dhe mësuesve në organizimin e kësaj nisme. Ai theksoi rëndësinë që kanë aktivitete të tilla në edukimin e brezave të rinj me traditat dhe vlerat e qytetit, duke shtuar se janë pikërisht këto momente që i gëzojnë më shumë fëmijët.

Ky aktivitet i mbushur me energji pozitive është një nga momentet më të bukura të festimeve, pasi përfshin fëmijët në ruajtjen dhe përcjelljen e traditave të qytetit.

Më 13 mars, Sheshi “Gensher” do të ndizet nga muzika dhe atmosfera festive në natën më të madhe të qytetit. Në skenë do të ngjiten artistët e dashur për publikun, Xhensila Myrtezaj, Ledri Vula, Eneida Tarifa, Mato Lale dhe DJ NOIIAN.

Sepse askush nuk e feston Natën e Verës si Elbasani, qyteti ku kjo festë ka lindur dhe është përcjellë brez pas brezi prej shekujsh. Një natë plot energji, muzikë dhe emocione ju pret në zemër të qytetit!

Mos e humbisni festën më të madhe të pranveres!

Fëmijët e klasave përgatitore të shkollave “Ali Agjah”, “Bardhyl Popa”, “Naim Frashëri”, “Jorgji Dilo” dhe “Fadil Gurmani” çelën festimet e Ditës së Verës përmes aktivitetit “Art & Zeje”, një moment simbolik kushtuar pranverës dhe traditave të qytetit.

Të vendosur në tavolina të vogla të improvizuara në ambientin e jashtëm, fëmijët realizuan vizatime me motive pranverore, ndërsa u njohën edhe me elementë të artizanatit dhe lojërave tradicionale, duke sjellë përmes ngjyrave dhe krijimtarisë simbolikën e stinës që po afron.

Të rrethuar nga prindër dhe qytetarë që ndoqën aktivitetin, fëmijët, nën kujdesin e edukatoreve të tyre, interpretuan gjithashtu këngë dhe recitime kushtuar ardhjes së pranverës, duke përcjellë mesazhe gëzimi, paqeje dhe harmonie.

Në këtë aktivitet ishte i pranishëm edhe kryetari i Bashkisë së Elbasanit, Gledian Llatja, i cili përshëndeti fëmijët dhe uroi të gjithë qytetarët për festën e Ditës së Verës, duke theksuar rëndësinë e ruajtjes së traditave dhe përcjelljes së tyre tek brezat më të rinj.

Atmosfera e Ditës së Verës është ndjerë më herët në qytetin e Elbasanit, ku kjo festë me prejardhje të lashtë është kremtuar prej shekujsh dhe përfaqëson një nga traditat më të rëndësishme të qytetit. Në mënyrë simbolike, janë pikërisht fëmijët ata që çelin festimet, duke i dhënë kësaj feste gjallërinë dhe kuptimin që ajo përcillet ndër breza.